Nkonko ya babadi

Bantemu ba Yehowa batu bitaba bua babuondape ne tuntu tutambe bukese tua mu mashi anyi?

Diandamuna didi dilonda edi ndituvua bafile mu nimero wetu wa dia 15 Kabalashipu 2000.

Diandamuna dinene didi se: Bantemu ba Yehowa kabatu bitaba bua kudia anyi bua babele mashi mu mubidi nansha. Tudi tuitaba ne muoyo mujima ne: mukenji wa Nzambi udi ukandika mashi ki ng’wa kushintulula bua ulonde ngenyi itu ikudimukangana dîba dionso patupu nansha. Tshidibi, nkonko mikuabu idi ijuka bualu mpindieu badi mua kutapulula bintu binene binayi bidi bienza mashi ne tukuabu tuntu tutambe bukese tua mu bintu binene ebi. Kumpala kua muena Kristo kuitaba bintu ebi, udi ne bua kuanji kukonkonona malu a bungi bua kumanya buimpe ne bubi bua amue manga adibu buondapa nawu. Bualu budiye ne bua kuangata ne mushinga budi ne bua kuikala tshidi Bible wamba ne tshidi mua kufikila malanda ende ne Nzambi Wa-Bukole-Buonso.

Malu manene mmumvuike bimpe. Bua wewe kujadika ne: bidi nanku, teta kukonkonona amue malu a mu Bible, a mu miyuki ya kale ne a mishindu idibu buondapa bantu.

Yehowa Nzambi wakambila nkambua wetu Noa ne: mashi avua ne bua kuikala tshintu tshia pa buatshi ku mêsu kuabu. (Genese 9:3, 4) Kunyima, mikenji ivua Nzambi mupeshe Isalele yakaleja muvua mashi mikale tshintu tshia tshijila: ‘Muntu yonso wa mu bisamba bia bena Isalele anyi [muenyi] udi udia mashi, meme nengumushe mêsu anyi kudi muntu au udi udia mashi.’ Pavua muena Isalele ubenga kutumikila mukenji wa Nzambi, uvua mua kunyanga bakuabu; ke bua tshinyi Nzambi wakamba kabidi ne: ‘Nemmumushe munkatshi mua bana babu.’ (Lewitiki 17:10) Kunyima, mu tshisangilu tshiakenzelabu mu Yelushalema, bapostolo ne bakulu bakela mukenji bua tuetu ‘kulekela mashi.’ Kulekela mashi kudi ne mushinga anu mudi kulekela tshiendenda ne ditendelela dia mpingu.​—Bienzedi 15:28, 29.

‘Kulekela mashi’ kuvua mua kuikala kumvuija tshinyi mu tshikondo atshi? Bena Kristo kabavua badia mashi to, nansha mikale menguluke peshi makuatakane; kabavua badia munyinyi wa nyama kayi muela mashi panshi to. Kabavua kabidi badia bintu bisambakaja ne mashi bu mudi sosise idi mienza ne mashi nansha. Kudia mashi mu mishindu yonso eyi kuvua dishipa dia mukenji wa Nzambi.​—1 Samuele 14:32, 33.

Bantu ba bungi pa kale kabavua bumvua bibi pavuabu badia mashi, anu mutudi mua kumuena muanda eu mu malu akafunda Tertullien (wa mu lukama lua bidimu luibidi ne luisatu B.B.). Pavuaye wandamuna bua kuleja muvuabu bashiminyine bena Kristo ne: bavua badia mashi, Tertullien wakatela bisamba bivua bilaka mashi bua kutua biala pa bipungidi. Wakamba ne: “Pavuabu baleja mvita mu tshipalu, bena mpalu anyi tshiseki bavua balaka mashi a bena tshibawu ne luzuku lua bungi . . . bua kujikija disama diabu.”

Malu au (nansha muvua bamue bena Lomo baenza bua kudiondapa) avua mabi ku mêsu kua bena Kristo, bualu Tertullien wakafunda ne: “Katutu nansha tuela mashi a nyama mu biakudia bietu to.” Bena Lomo bavua bateta lulamatu lua bena Kristo balelela ne biakudia bisambakaja ne mashi. Tertullien wakamba kabidi ne: “Mpindieu, ndi nnukonka tshinudi nusua kuamba panudi nushindika [ne: bena Kristo] nebabenge mashi a nyama ne muoyo mujima, nanku nudi nusua kubamona bu badi ne lukuka lua mashi a bantu anyi?”

Lelu, bamue bantu badi mua kuela meji ne: badi mua kubenga mikenji ya Nzambi Wa-Bukole-Buonso bu munganga mua kuamba bua babele mashi. Nansha mutudi tuetu Bantemu ba Yehowa basue bua kuikala ne muoyo, tudi bapangadije bua kutumikila mukenji wa Yehowa udi ukandika mashi. Ntshinyi tshidi bualu ebu bumvuija patudi tutangila manga ne mishindu ya diondapangana idiku lelu?

Pakatangalaka dielangana dia mashi mu kabujima kawu kunyima kua Mvita Mibidi ya Buloba bujima, Bantemu ba Yehowa bakamona ne: bualu ebu buvua bubengangana ne mukenji wa Nzambi, too ne lelu tutshidi tuamba amu nanku. Pabi, mishindu ya diondapa bantu mmishintuluke mu bungi bua bidimu. Lelu, mashi a bungi atubu belangana kaatu anu mu kabujima kawu, kadi batu belangana tshimue tshia ku bintu binene bidi bienza mashi bu mudi: (1) globile mikunze; (2) globile mitoke; (3) plakete; (4) plasma (serume) peshi luayiyi. Bilondeshile mushindu udi mubedi muikale, baminganga badi mua kufundila globile mikunze, globile mitoke, plakete anyi plasma.  Diela muntu bintu binene ebi bidi bienza mashi didi difila mushindu wa kuabanyina babedi ba bungi mashi amuepele. Bantemu ba Yehowa buobu badi bamba ne: kuitaba mashi mu kabujima kawu peshi tshimue tshia ku bintu binene ebi binayi bidi bienza, nkushipa kua mukenji wa Nzambi. Tumanye ne: ditumikila tshidi Bible wamba ndibakube ku njiwu ya bungi, ne ku masama bu mudi dia mutshima ne dia SIDA, adi muntu mua kupetela ku mashi.

Kadi bu mudibu mua kupatula tunga tuntu mu bintu binene ebi bidi bienza mashi, nkonko idi ijuka bua tuntu etu tutambe bukese tudi tufumina ku bintu binene ebi. Ntshinyi tshitubu benza ne tuntu tutambe bukese etu, ne mmalu kayi adi muena Kristo ne bua kumanya padiye wangata dipangadika dia kuitaba anyi kubenga manga menza ne tuntu etu tua mu mashi?

Mashi atu ne bintu bia bungi be. Nansha plasma (udi tshitupa tshinene tshikale tshienza ne mâyi), udi ne bintu bipite bungi bidibu babikila ne: hormone, sel minero, anzime, bidishi bia mubidi, ne bintu bitu mu buloba ne nsukadi. Plasma utu kabidi ne proteyine bu mudi albumine, bikuatakaji bia mashi ne bikubi bia mubidi bitu biluisha tuîshi tua masama. Bamanyi banene batu batapulula proteyine mivule ya mu plasma ne batu buondapa nayi bantu. Tshilejilu, bantu bavua ne disama dia mashi apueka kaayi akama lukasa pavuabu batapika (anyi hémophilie) bavua babela tshikuatakaji tshia mashi tshidibu babikila ne: facteur de coagulation VIII. Peshi bikala muntu ne amue masama, baminganga badi mua kumufundila bua bamutue gammaglobuline muangatshila ku plasma wa mashi a bantu bakadibu batue bisalu. Mikuabu proteyine ya mu plasma batu buondapangana nayi, kadi bualu butukadi baleje ebu budi buleja mushindu udibu mua kupatula tuntu tutambe bukese ku tshimue tshia ku bintu binene (plasma) bidi bienza mashi. *

Anu mudi plasma wa mashi mua kupatula tuntu tutambe bukese tushilangane, mu bintu bikuabu binene (globile mikunze, globile mitoke, plakete) badi mua kupatulamu kabidi tutupa tukuabu tukese menemene. Tshilejilu, globile mitoke ya mashi idi mua kupatula interféron ne interleukine, manga atubu buondapa nawu amue masama a kansere ne makuabu makeba kudi tuîshi tua virus. Badi mua kupatula manga a kuondapa nawu mputa mu plakete. Ne manga makuabu adi enda apatuka menza (tshia kumpala) ne bintu bidi bienza mashi. Kutua muntu manga aa ki mmumue ne: nkumuela bintu binene bidi bienza mashi to; pa tshibidilu mu manga aa mutu tutupa tua tuntu tutambe bukese tua mu bintu bidi bienza mashi. Muena Kristo udi ne bua kuitaba bua kumuondapabu ne tuntu tutambe bukese etu anyi? Katuena mua kuandamuna lukonko elu to. Bible kêna ufila mumvuija bua muanda eu to, nanku muena Kristo udi ne bua kudiangatshila dipangadika diende nkayende kumpala kua Nzambi.

Bamue badi mua kubenga tshintu tshionso tshiangatshila ku mashi (nansha tuntu tutambe bukese tuenza bua kukuba mubidi bua tshitupa tshîpi). Au ke mushindu udibu buobu bumvua mukenji wa Nzambi wa ‘kulekela mashi.’ Batu bela meji mushindu’eu: mukenji uvuaye muelele bena Isalele uvua ubalomba bua ‘kupongolola pa buloba’ mashi avuabu bumbusha mu tshifukibua tshionso. (Dutelonome 12:22-24) Bua tshinyi kupongolola mashi nenku kudi ne mushinga? Bushuwa, bua kuenza gammaglobuline, bikuatakaji bia mashi bidibu benza ne mashi mine, ne binga bintu, bitu bilomba bua kupeta mashi ne kutapulula bintu bidimu. Ke padi bamue bena Kristo babenga manga aa, anu mutubu babenga mashi mu kabujima kawu anyi bintu binene binayi bidi bienza mashi. Tudi ne bua kunemeka dipangadika diabu edi diangata ne muoyo mujima.

Bakuabu bena Kristo batu bapangadija munga mushindu. Buobu pabu batu babenga bua kubelabu mashi mu kabujima kawu, globile mikunze, globile mitoke, plakete anyi plasma. Kadi, badi mua kuitaba bua munganga kubuondapa ne buanga buenza ne kantu katambe bukese ka mu bintu binene bidi bienza mashi. Nansha muaba eu kudi mua kuikala malu adi mashilangane. Muena Kristo udi mua kuitaba bua bamutue gammaglobuline, kadi udi mua kuitaba anyi kubenga buanga budi ne tshintu tshiangatshila ku globile mikunze anyi mitoke. Kadi mu bionso ebi, ntshinyi tshidi mua kufikisha bamue bena Kristo bua kuamba ne: badi mua kuitaba manga menza ne tuntu tutambe bukese tua mu mashi?

Tshiena-bualu tshia “Nkonko ya babadi” mu Tshibumba tshia Nsentedi tshia dia 1 Kabalashipu 1990, tshiakamba ne: proteyine ya mu plasma (tuntu tutambe bukese) idi yumbuka mu mashi a mukaji udi ne difu iya mu mashi a muana udi munda muende. Mushindu’eu ke udi mamu usambulujila muanende  immunoglobuline, umupesha bikubi bia mubidi. Nanku padi globile mikunze ya mashi a muana ifua, tshitupa tshia molekile itu yambula kapepe kimpe tshidi tshilua bilirubine, udi umbuka mu tshibombi tshidi muana musombele ne upatukila ku bintu bidi mubidi wa mamu wimansha. Bamue bena Kristo badi mua kuamba ne: bu mudi tuntu tutambe bukese tua mu mashi mua kumbuka kudi muntu umue kuya kudi mukuabu mushindu’eu, badi mua kuitaba bua babele kantu katambe bukese kangatshila mu plasma anyi mu globile ya mashi.

Bu mudi ngenyi ne mapangadika mua kushilangana, nanku bidi biumvuika ne: tshilumbu etshi ntshikese anyi? Tòo, ntshilumbu tshinene. Kadi kudi muanda munene utudi mua kumvua bipepele. Malu atudi bambe mu tshiena-bualu etshi adi aleja ne: Bantemu ba Yehowa badi babenga bua kubelabu mashi mu kabujima kawu ne bintu binene bidi bienza mashi. Bible udi wambila bena Kristo bua ‘balekele bintu bidi bishipela mpingu, balekele kabidi mashi, ne masandi.’ (Bienzedi 15:29) Kadi bua tuntu tutambe bukese tuangatshila ku tshimue tshia ku bintu binene bidi bienza mashi, muena Kristo yonso udi ne bua kudiangatshila dipangadika diende nkayende kunyima kua yeye mumane kuela meji bikole ne musambile.

Bantu ba bungi batu bitaba luondapu luonso ludi lumueneka bu ludi luambuluisha ne lukasa, nansha luondapu ludi lumanyike ne: lutu ne njiwu, bu mutubi bua manga menza ne mashi. Muena Kristo mulelela udi udienzeja bua kumona kule ne kubenga kuimanyina anu pa malu adi atangila makanda ende a mubidi. Bantemu ba Yehowa batu banyisha padi baminganga badienzeja bua kuondapa bantu bimpe, ne batu bakonkonona buimpe ne bubi bua luondapu luonso. Kadi bua bidi bitangila manga menza ne mashi, badi batamba kuangata ne mushinga tshidi Bible wamba ne malanda adibu badie ne Mufidi wa muoyo.​—Musambu 36:9.

Ndibenesha padi muena Kristo muikale ne dishindika anu muvua nadi mufundi wa misambu wakamba ne: ‘Yehowa Nzambi udi dîba ne ngabu; Yehowa udi upa bantu luse ne butumbi. Kêna upala badi benda mu buakane tshintu tshimpe [nansha] tshimue. Yehowa, disanka didi kudi muntu udi ukueyemena’!​—Musambu 84:11, 12.

[Mêyi adi kuinshi]

[Kazubu mu dibeji 31]

NKONKO IUDI MUA KUELA MUNGANGA

Pikalabu bakeba kukupanda anyi kukuondapa, kadi bilomba buanga buenza ne mashi, ebeja ne:

Baminganga bonso badi muaba eu mbamanye ne: ndi Ntemu wa Yehowa, ne ndi ngamba bua kabangedi mashi (mashi mu kabujima kawu, globile mikunze, globile mitoke, plakete anyi plasma ya mashi) nansha bia munyi anyi?

Bikala buanga budibu bakufundile buikale buenza pamu’apa ne plasma, globile mikunze anyi mitoke peshi plakete ya mu mashi, ebeja ne:

Buanga ebu mbuenza ne tshimue tshia ku bintu binene binayi bidi bienza mashi anyi? Bikalabi ne: eyowa, udiku mua kungumvuija bidibu babuenze nabi anyi?

Buanga ebu buenza ne bintu bia mu mashi muntu udi mua kubuangata bungi kayi, ne mushindu kayi?

Bu kuondo kanyi ka muoyo mua kuanyisha bua meme kuitaba buanga ebu buenza ne kantu aka katambe bukese ka mu mashi, nnjiwu kayi indi mua kupeta?

Bu kuondo kanyi ka muoyo mua kunsaka bua kubenga buanga ebu buenza ne kantu katambe bukese ka mu mashi, mbuanga kayi bukuabu bundi mua kuangata?

Kunyima kua meme mumane kukonkonona bualu ebu mu buondoke buabu, ndîba kayi dindi mua kukumanyisha dipangadika dianyi?