666 ki nshinga patupu to

‘Kakuikadi muntu udi mua kusumba, nansha kupana, anu udi ne tshimanyinu, dîna mene dia nyama wa luonji, anyi nomba wa dîna diende. [Apa ke padibio bikengela kuikala ne meji matue, Mukanda wa Mvidi Mukulu (Katolike, MMM)]. Udi ne dijingulula, [enze makumi a] nomba wa nyama wa luonji; bualu bua udi nomba wa muntu; ne nomba wende udi nkama isambombo ne makumi asambombo ne isambombo.’​—Buakabuluibua 13:17, 18.

BIENA-BUALU bikese patupu bia mu Bible mbitu bikoka ntema ya bantu bikole mushindu umue ne mulayi wa tshiprofete wa dîna anyi tshimanyinu tshikole mua kutshijingulula tshia “nyama wa luonji”: nomba wa 666. Ku televizion ne ku Internet, nansha mu filme, mu mikanda ne mu bikandakanda, bantu mbadifuanyikijile ngenyi bungi kabuyi kubala pa bidi bitangila tshimanyinu tshia nyama eu.

Bamue batu bajadika ne: nomba wa 666 ntshimanyinu tshia muluishi wa Kristo mutela mu Bible. Bakuabu batu bamba ne: nomba eu udi umvuija tshimanyinu kampanda tshituangana ku bukole, bu mudi tshisalu anyi ka-tshiamu kampanda kela muntu mu mubidi kafunda bishiferi bia tshimanyinu tshidi tshileja mudi udi naku muikale musadidi wa nyama wa luonji. Kadi banga pabu eku bashale balame anu mu lungenyi ne: nomba wa 666 ntshimanyinu tshia bumfumu bua Papa wa bena Katolike. Padibu bapingaja bishiferi bia mu mfundilu wa makumi wa bena Lomo pa muaba wa maleta a buena adi mu dîna dia muanzu dipesha Papa dia Vicarius Filii Dei (Nsaserdose muleji-mpala wa Muana wa Nzambi), ne padibu bateta kuakajilula bishiferi ebi kakese, badi bapeta nomba wa 666. Batu bamba kabidi ne: bantu badi mua kuenza kabidi makumi a nomba umue umue eu ne dîna dia mu Latin dia Dioclétien (mfumu wa bena Lomo), kabidi ne dîna dia mu tshiena-Ebelu dia César Néron. *

Kadi mishindu ya diumvuija bishiferi midifuanyikijila kudi bantu nkayabu eyi mmishilangane ne tshidi Bible nkayende wamba bua tshimanyinu tshia nyama wa luonji anu mutuabimona mu tshiena-bualu tshidi tshilonda. Bible yeye udi uleja patoke ne: bantu badi ne tshimanyinu tshia nyama eu Nzambi neabaleje tshiji tshiende patuishaye ndongoluelu wa malu a tshikondo etshi ku tshibungubungu. (Buakabuluibua 14:9-11; 19:20) Nunku kumanya bimpe tshidi nomba wa 666 umvuija nkupite dijandula patupu nshinga kampanda mupite bukole. Diakalenga, Yehowa Nzambi udi tshiuwidi menemene tshia dinanga ne Mpokolo wa butoke bua mu nyuma ki mmushiye basadidi bende mu tshijimajima pa bualu ebu bua mushinga mukole to.​—2 Timote 3:16; 1 Yone 1:5; 4:8.

[Mêyi adi kuinshi]