Buena-Kristo bulelela budi buya kumpala

MUDIMU wa diyisha wa Yezu Kristo uvua ne bukole bua bungi mu bidimu lukama bia kumpala. Mukenji wende uvua ukolesha, ufila butoke ne ulenga mitshima ya bantu mu mushindu uvua ubakemesha. Bantu ba bungi bavua bakamuteleja pavuaye wakula bakalengibua bikole kudi miaku yende.​—Matayo 7:28, 29.

Yezu wakabenga kubuela mu tusumbu tua balombodi ba bitendelelu ne ba malu a tshididi tua mu tshikondo tshiende tuvua tukengesha bantu, kadi muikale muntu wa kulondela bualu kudi bantu ba mishindu yonso. (Matayo 11:25-30) Wakaleja patoke muvuaye mumanye ne: bukole bua nyuma mibi mbutangalake miaba yonso pa buloba ne kulejaye bukole buvua Nzambi mumupesha ku mutu kuayi. (Matayo 4:2-11, 24; Yone 14:30) Yezu wakaleja ne meji onso diumvuangana dinene didi pankatshi pa makenga ne mpekatu, ne kuleja se: disulakana dia kashidi nedilue ku diambuluisha dia Bukalenge bua Nzambi. (Mâko 2:1-12; Luka 11:2, 17-23) Musangu umue bua kashidi, wakumbusha mîdima ivua mibuikile bumuntu bulelela bua Tatuende munkatshi mua matuku a bungi, ne kumanyisha dîna dia Nzambi kudi bantu bonso bavua ne dijinga dia kudia Nende malanda a muntu pa nkayende.​—Yone 17:6, 26.

Ke bualu kayi kabiena bitukemesha bua nansha muvua balombodi ba bitendelelu ne bamfumu ba tshididi bakebele bayidi ba Yezu makenga, bayidi aba bakamuangalaja ne lukasa luonso mukenji wende wa bukole. Mu bidimu bu 30 tshianana, bisumbu bia bena Kristo bikavuaku mu Afrike, Asia ne ku Mputu. (Kolosai 1:23) Malu malelela mapepele avua Yezu ulongesha akalenga mitshima ya bantu bapuekele ba mioyo miakane mu Ampire mujima wa bena Lomo.​—Efeso 1:17, 18.

Nunku, mmunyi muvua bayidi bapiabapia bonso aba bavua ne nsombelu mishilashilangane, babanji ne bapele, ba miakulu ne ntendelelu kabukabu mua kudisangisha mu buobumue mu ‘ditabuja dimue’ dilelela bu muvua mupostolo muambe? (Efeso 4:5) Ntshinyi tshidi tshibafikisha ku ‘diamba dîyi diodimue’ bua kubenga kutapuluka? (1 Kolinto 1:10) Pa kumona matapuluka manene adiku lelu munkatshi mua bantu badi badiamba mudibu bena Kristo, bidi bimpe bua tuetu kukonkonona tshivua Yezu mulongeshe yeye nkayende.

Nshindamenu wa buobumue bua bena Kristo

Pavua Yezu ulumbulula kumpala kua Ponsio Pilato, wakaleja nshindamenu wa buobumue bua bena Kristo. Wakamba ne: “Tshidibo bandelele, kabidi tshindi muvuile panu apa, mbua kujadikila bantu bulelela. Yonso udi munange bulelela, udi uteleja dîyi dianyi.” (Yone 18:37, Mukanda wa Mvidi Mukulu [Katolike, MMM]) Nunku, kuitaba malongesha a Yezu pamue ne makuabu onso adi mu Bible, Dîyi dia  Nzambi difundisha ku nyuma kudi ne bukole budi buenzeja bua ne: bayidi balelela ba Kristo bikale mu buobumue.​—1 Kolinto 4:6; 2 Timote 3:16, 17.

Ntshia bushuwa bua se: bayidi ba Kristo bavua mua kupeta ntatu anyi bilumbu kampanda munkatshi muabu. Kadi ntshinyi tshivua mua kubambuluisha mu nsombelu wa nanku? Yezu wakamba ne: ‘Palua nyuma wa bulelela, yeye neanulombole mu malu malelela onso; bua yeye kêna udiambila, kadi neambe anu malu umvuaye, neanuambile malu alualua.’ (Yone 16:12, 13) Nunku nyuma muimpe wa Nzambi uvua ne bua kuambuluisha bayidi balelela ba Kristo bua kumvua bulelela buvua Nzambi wenda utokesha ku kakese ku kakese. Kabidi, nyuma eu uvua ne bua kubambuluisha bua kukuamabu mamuma bu mudi: dinanga, disanka ne ditalala, mamuma avua mua kubueja buobumue munkatshi muabu.​—Bienzedi 15:28; Galatia 5:22, 23.

Yezu kakanyisha matapuluka anyi tusumbusumbu munkatshi mua bayidi bende to; kakabanyishila nansha bua kumvuija malongesha malelela a Nzambi mu wabu mushindu bua kupetanganawu ne bilele bia ntendelelu anyi bia bantu bavuabu mua kupetanganabu nabu nansha. Kadi butuku bua muladilu wa lufu luende, wakasambila ne muoyo mujima wamba ne: ‘Tshiena ndombela aba nkayabu, kadi ndi ndombela kabidi badi bangitabuja bua dîyi diabu; bua buonso buabu bikale bamue; Tatu, bu muudi munda muanyi ne meme munda muebe, bobo kabidi bikale munda muetu, bua ba pa buloba bitabuje ne: Wewe wakantuma.’ (Yone 17:20, 21) Nunku, buobumue bua menemene, mu nyuma ne mu bulelela buvua ne bua kuikala tshimanyinu tshivua mua kusunguluja bayidi ba Kristo kubangila anu ku ntuadijilu too ne lelu. (Yone 4:23, 24) Kadi lelu bitendelelu kabiena mu buobumue to, mbipanduluke. Bua tshinyi bidi nanku?

Tshidi bitendelelu bipandulukile

Diumvuija dilelela dia tshidi malongesha ne bilele bidi munkatshi mua badi badiamba mudibu bena Kristo bikaleku bipite bungi didi ne: bualu kabena balamate ku malongesha a Yezu to. Mufundi mukuabu wakamba ne: “Anu bu mu bikondo bia kale, bena Kristo bapiabapia ba lelu badi bakeba mu Bible malu adi abasankisha, ne balengulula adi kaayi apetangana ne bilele ne malongesha bia mu tshitendelelu tshia bankambua babu.” Etshi ke tshivua Yezu ne bapostolo bende badianjile kumanyisha.

Tshilejilu, mupostolo Paulo muenzeja kudi nyuma wa Nzambi, wakafundila mutangidi nende Timote ne: ‘Tshikondo netshilue tshikalabu kabayi bumvua diyisha dilenga ne lutulu; kadi bualu bua matshi abu adi asasakana, bobu nebadikebele bayishi ba bungi bu mudi disamina diabu dia mitshima yabo; nebumushe matshi abu ku malu malelela, nebasesukile ku nsumuinu.’ Bidi bisua kumvuija ne: bavua ne bua kupambuisha bena Kristo bonso anyi? Tòo. Paulo wakatungunuka wamba ne: ‘Kadi wikale ne meji mapole mu malu onso, witabuje makenga, wenze mudimu wa butangadiki, ukumbaje mudimu webe wa Nzambi.’ (2 Timote 4:3-5; Luka 21:8; Bienzedi 20:29, 30; 2 Petelo 2:1-3) Timote ne bena Kristo bakuabu ba lulamatu bakatumikila mubelu eu mufundisha ku nyuma wa Nzambi.

Bena Kristo balelela badi bashale mu buobumue

Anu bu Timote, bena Kristo balelela ba lelu mbalame tshieledi tshiabu tshia lungenyi bimpe pa kubenga ngelelu wa meji wa bantu ne pa kuitaba anu buludiki budi bufuma mu Mukanda wa Nzambi bua malongesha abu. (Kolosai 2:8; 1 Yone 4:1) Mu didikija bena Kristo ba mu bidimu lukama bia kumpala, Bantemu ba Yehowa badi bakumbaja mudimu wabu mu matunga mapite pa 230, bamanyisha mukenji wa Yezu wa lumu luimpe lua Bukalenge miaba yonso. Konkonona mishindu minene inayi eyi idibu bidikija Yezu mu buobumue ne benza malu a Buena-Kristo bulelela nansha basombele penyi.

Malongesha abu mmimanyine pa Dîyi dia Nzambi. (Yone 17:17) Kiré wa parwase kampanda wa mu ditunga dia Belgique wakafunda pa bidi bibatangila ne: “Bumue bualu butudi mua kulongela kudibu mbudisuile budibu nabu bua kulonda Dîyi dia Nzambi ne bua dikima didibu bamanyisha nadi Dîyi edi.”

Buabu buobu, Bukalenge bua Nzambi ke tshintu tshimuepele tshiajikija ntatu ya buloba bujima. (Luka 8:1) Mu tshimenga tshia Barranquilla, mu ditunga dia Colombie, Ntemu mukuabu wakayisha Antonio, uvua munangi wa  dilambu wa tshisumbu kampanda tshia malu a tshididi. Ntemu eu kavua utua ku tshia bena mu kasumbu ka ba Antonio to anyi ku ngenyi ya bena mu kasumbu kakuabu ka malu a tshididi nansha. Kadi wakamulomba bua kulonga nende Bible yeye ne bakunyi bende ba bakaji kakuyi difuta dia makuta nansha. Matuku makese, Antonio kujingulula ne: Bukalenge bua Nzambi ke ditekemena dimuepele bua bapele ba mu ditunga dia Colombie ne ba pa buloba bujima kabidi.

Badi banemeka dîna dia Nzambi. (Matayo 6:9) Pavua Bantemu ba Yehowa bapetangane ne Maria muena Katolike wa dilambu wa mu ditunga dia Australie bua musangu wa kumpala, wakitaba bua Bantemu aba bamuleje dîna dia Nzambi mu Bible. Kadi ntshinyi tshiakenzaye bua bualu ebu? Udi wamba ne: “Pangakamona dîna dia Nzambi bua musangu wa kumpala mu Bible, ngakadila. Ngakasanka bikole bua mumvua mumanye dîna disunguluke dia Nzambi ne mupete mushindu wa kuenza nadi mudimu.” Maria wakatungunuka ne kulonga Bible, ne bua musangu wa kumpala katshia bamulela, wakafika ku dimanya bumuntu bua Yehowa ne kudia nende malanda a kashidi.

Dinanga ndibasangishe mu buobumue. (Yone 13:34, 35) Tshikandakanda tshikuabu tshia mu ditunga dia Canada tshidi tshiamba ne: “Nansha wewe muikala wa mu tshitendelelu kayi anyi mene kuyi mu tshitendelelu kampanda, newele Bantemu ba Yehowa 4 500 bavua benza mudimu mu lumingu lumu’epele ne tshitupa bua kuibaka Nzubu wa Mpuilu wa metre 2 300 mu bule ne mu butshiama mu tshimenga tshia Cassidy kalumbandi . . . Kuenza mudimu eu ne disanka kakuyi dikokangana ku mêyi anyi didikebela lumu ntshimanyinu tshia Buena-Kristo bulelela.”​—The Ladysmith-Chemainus Chronicle.

Mpindieu tangila bijadiki. Padi eku balongi ba malu a Nzambi ba mu Bukua-Buena-Kristo, ba-misionere ne batendeledi bakuabu batungunuka ne kukokangana mu bitendelelu biabu, bena Kristo balelela bobu badi benda baya kumpala pa buloba bujima. Bushuwa, bena Kristo balelela badi benda bakumbaja mudimu mubapesha wa kuyisha ne kulongesha Dîyi dia Nzambi. (Matayo 24:14; 28:19, 20) Biwikala munkatshi mua bantu badi ‘bapumuna muoyo ne badi badila’ bua malu mabi adi enzeka ne batondesha kudi matapuluka adi munkatshi mua bitendelelu bia Bukua-Buena-Kristo, tudi tukulomba bua kudisanga ne Bantemu ba Yehowa mu ntendelelu wa bena Kristo badi mu buobumue ne badi batendelela Nzambi umuepele mulelela Yehowa.​—Yehezekele 9:4; Yeshaya 2:2-4.