Tshilongelu tshia Gilada: bidimu 60 bia dilongesha bantu mudimu wa bu-misionere

PAVUA mulongi kampanda wa mu kalasa ka kumpala ka Gilada, Tshilongelu tshia Bible tshia Watchtower uleja malu avuaye mulonge mu tshilongelu etshi, wakamba ne: “Bua dilonga dietu dia Bible ne muoyo mujima, tuvua basemene pabuipi ne Yehowa ne balonge malu a bungi adi atangila bulongolodi. Ebi biakatulongolola bua kuya kuenzela mudimu mu ditunga dienyi.” Katshia babanjija Tshilongelu tshia Gilada kukadi bidimu 60, tshitu tshituma anu kutuma ba-misionere. Mu dia matuku 8, ngondo muisatu 2003, bakapesha balongi ba kalasa ka 114 mapoloma muaba wa tulasa tua Watchtower, mu Patterson (New York). Bantu 6 404 bavua badisangishe mu nzubu umue munene ne mu nzubu mikuabu ivua ilonda tshibilu atshi ku nshinga bakateleja ndongamu au ne ntema. Kuvua miyuki, dielangana nkonko ne diyukidilangana ne kasumbu kamue ka bantu.

Muanetu Theodore Jaracz, muena mu Kasumbu Kaludiki ke uvua mulombodi wa ndongamu au. Mêyi ende a ntuadijilu akaleja mushindu uvua bavua bamuteleje bikale bafumine miaba kabukabu, mu Asia, mu bidila bia Antilles, mu Amerike wa pankatshi ne wa ku Sud, ne ku Mputu. Muimanyine pa 2 Timote 4:5 (Muanda Mulenga Lelu), muanetu Jaracz wakakula bua mudimu munene udibu benza kudi ba-misionere badibu balongesha mu Gilada: ‘mudimu wa buambi bua [lumu luimpe].’ Ba-misionere badi bayisha bulelela pa kulongesha bantu Bible.

Balongi badi bapeta dilongesha dia ndekelu

Mulongolongo wa miyuki mîpi wakatuadija ne wa muanetu John Larson, muena mu komite wa filiale wa mu États-Unis uvua ne tshiena-bualu tshivua tshikolesha ditabuja tshia se: “Bikala [Nzambi] netu, nganyi watuenzela bualu bubi?” (Lomo 8:31, MML) Ku diambuluisha dia Bible, ngamba-malu eu wakaleja balongi bua kueyemenabu anu bukole bua Yehowa bua bubambuluishe bua kutshimuna lutatu luonso ludibu mua kupeta mu mudimu wabu. Muanetu Larson wakambila balongi bilondeshile Lomo 8:38, 39 ne: “Imanayi ne elanganayi meji bua bukole budi Yehowa unuambuluisha nabu, ne ikalayi bavuluke ne: kakuena tshintu nansha tshimue tshidi mua kulamuna Yehowa kunudi to.”

Ngamba-malu muibidi uvua muanetu Guy Pierce, muena mu Kasumbu Kaludiki. Muyuki wende uvua ne tshiena-bualu ne: “Mêsu enu ikala ne disanka!” (Luka 10:23) Wakumvuija ne: disanka dilelela didi dilomba kumanya Yehowa ne kujingulula malu adiye mulongolole bua tshiendelele ne kumona dikumbana dia milayi ya mu Bible. Miaba yonso idibu baya, balongi badi mua kuikala ne disanka dilelela pa kuenza bua mêsu abu ikale ne disanka edi. Muanetu Pierce wakakankamija balongi bua kuelanganabu meji bikole pa bulenga bua Nzambi ne kujalamija meji abu ne mutshima wabu mu kuenza kua disua Diende. (Musambu 77:12) Pa kuikala ne mmuenenu muimpe, balongi badi mua kutshimuna lutatu luonso ludibu mua kupeta.

Pashishe bakambila kabidi balongi mêyi malenga kudi balongeshi babidi bavua babalongesha dituku dionso. Muanetu Lawrence wakenza muyuki uvua ne tshiena-bualu etshi: “Utu ukeba lumu anyi?” Bantu bavule batu bela meji ne: badi  ne lumu padibu babasamuna, babanemeka ne padibu bashilangane ne bakuabu bantu. Kadi mufundi wa Misambu Asafa wakafika ku dimanya lumu lulelela: tshiuma tshia mushinga mukole anyi malanda mimpe ne Yehowa. (Musambu 73:24, 25) Bakakankamija balongi bavua bajikije abu bua kuikalabu ne malanda mimpe ne Yehowa mu ditungunuka ne kulonga Bible kumulongelamu. Banjelu ‘mbasue kutangilatangila’ malu a dikumbana dia dijinga dia Yehowa ku butuangaji bua Kristo. (1 Petelo 1:12) Mbasue kulonga malu a bungi adi atangila Tatuabu bua kulejabu butumbi buende. Pashishe ngamba-malu eu wakambila balongi bua kutumbishabu Yehowa miaba yabu idibu benzela mudimu wa bumisionere pa kuambuluisha bakuabu bua kupeta tshiuma tshia mushinga mukole etshi.

Muanetu Wallace Liverance, Mufundi wa Tshilongelu wakenza muyuki wa ndekelu uvua ne tshiena-bualu tshia se: ‘Ambayi meji a Nzambi mu bualu [bunsantu] busokoka.’ (1 Kolinto 2:7) Meji a Nzambi avua mupostolo Paulo muambe mu mudimu wende wa bumisionere mmeji kayi au? Mmushindu wa meji ne munene udi Yehowa muenze bua kufila ditalala ne buobumue buloba bujima. Meji aa mmashindamene pa Yezu. Pamutu pa kuyisha ne: bantu nkayabu nebalengeje nsombelu wabu, Paulo wakambuluisha bantu bua kumona mushindu wikala Nzambi ne bua kujimija bipeta bia mpekatu wa Adama. (Efeso 3:8, 9)  Ngamba-malu eu wakabela bateleji bende ne: “Nuangate mudimu wenu wa pa buawu anu muvua Paulo wangata mudimu wende, wakangata mudimu wende wa bumisionere bu mushindu wa kuambuluisha bantu bua kumona mushindu wikala Yehowa ne bua kukumbaja dijinga diende.”

Bakalonda kudi muanetu Mark Noumair, mulongeshi mukuabu wa mu Gilada, yeye kuyukidilangana ne bamue balongi. Tshiena-bualu tshia diyukidilangana adi tshivua tshia se: “Dilonga dia Dîyi dia Nzambi didi dipatula bayishi ba lukunukunu” bilondeshile mêyi a Paulo adi mu Lomo 10:10. Balongi bakalonda malu a bungi avuabu bamone mu mudimi wa budimi pavuabu mu kalasa aku. Malu akalondabu au akaleja ne: patudi tulonga Dîyi dia Nzambi ne tuelangana meji bua bualu buadi, malu mimpe adi atangila Yehowa Nzambi ne Bukalenge buende neuwule mu mutshima wetu ne netuamanyishe bantu bakuabu kabidi. Munkatshi mua ngondo itanu ivuabu benze muaba wa tulasa tua Watchtower atu, balongi bakatuadija kulonga Bible ne bantu bapite pa 30 bavua baleje dijinga dia kumanya bia bungi ba mu teritware itu Bantemu bayisha bikole ya bisumbu bia pabuipi apu.

Bena Kristo bapie badi bafila mibelu milenga

Pavua balongi mu kalasa, bavua basombe pamue ne bamue bana betu bena mu dîku dia Betele wa mu États-Unis. Bana betu bena mu komite wa filiale aba: Robert Ciranko ne Robert Johnson bakela bamue bana betu basadidi ba Yehowa ba lulamatu ba matuku a bungi nkonko, pamue ne batangidi bena ngendu bavua mu kalasa muaba wa tulasa tua Watchtower au. Bonso bavuabu bele nkonko abu bavua balonge mu Gilada ne bavua benze mudimu wa bumisionere musangu kampanda. Balongi, bena mêku abu ne balunda babu bakakola ku muoyo pakumvuabu malu a meji avua balume bapie mu nyuma ne bamonemone malu aba bamba.

Bakafila mibelu eyi: “Ikalayi nuenza mudimu wa bungi wa kuyisha ne wa mu tshisumbu.” “Kanudiangatshi ne mushinga mupite to. Ikalayi anu bamanye tshipatshila tshienu nuenu ba-misionere, ne enzayi bua ditunga didibu banutume bua kuenzela mudimu dikale bu dienu.” Malu makuabu akambabu akaleja mushindu udi malongesha a mu Gilada apaya muena mudimu wa Nzambi mu mushindu muimpe nansha bobu bamutume penyi. Bakamba ne: “Tuakalonga mua kuambuluishangana ne kuenza mudimu pamue.” “Kalasa kakatuambuluisha bua kuitaba bua kusomba muaba udi bilele ne malu bipiabipia.” “Bavua batulongeshe bua kuenza mudimu ne Bible mu mushindu mupiamupia.”

John Barr, muena mu Kasumbu Kaludiki wa matuku a bungi wakenza muyuki wa nshindamenu wa ndongamu au. Tshiena-bualu tshia muyuki wende tshivua tshia mêyi a mu Mukanda wa Nzambi aa: ‘Mêyi abu akafika ku ndekelu kua buloba.’ (Lomo 10:18, MML) Wakela lukonko elu: Bantu ba Nzambi mbakumbaje bualu bukole ebu lelu anyi? Eyowa! Mu tshidimu tshia 1881, bakebeja babadi ba tshibejibeji tshia Tshibumba tshia Nsentedi ne: “Nudiku nuyisha anyi?” Pashishe ngamba-malu au wakavuluija buonso bavua bamuteleja bualu bukena kupua muoyo buvuabu balombe bantu mu mpungilu wa mu 1922 wa ku Cedar Point, mu Ohio (États-Unis) ebu: “Manyishayi Mukalenge ne Bukalenge buende!” Mu kupita kua tshikondo, lukunukunu lua basadidi ba lulamatu ba Nzambi luakabasaka bua kumanyisha malu manene a bulelela budi butangila Bukalenge kudi bisamba bionso. Ku diambuluisha dia mikanda ne mêyi a mukana, lumu luimpe ndufike ku ntengu ya buloba bua butumbi ne lumu bia Yehowa. Mu mêyi ende malenga a ndekelu, muanetu Barr wakalomba balongi bua kubalabu mabenesha adibu bapeta, wamba ne: “Dituku dionso, panudi nusambila Yehowa muaba unudi nuenzela mudimu, numuele tuasakidila ne muoyo wenu mujima bua munudi nukumbaja miaku eyi mu mudimu wenu: ‘Mêyi abu akafika ku ndekelu kua buloba.’”

Kunyima kua muyuki eu, bakabala mikanda ya bavua batumine balongi ne bateleji mioyo, ne mulombodi wakapesha mulongi yonso dipoloma diende. Pashishe, ne disanka disambakaja ne dibungama bua dishiyangana ne Tshilongelu tshilenga atshi, mulongi umue wakabala mukanda uvua ne mêyi avua atua ku muoyo mambila Kasumbu Kaludiki ne bena dîku dia Betele, uleja didisuika dia balongi bua kusamuna Yehowa ‘ku dituku edi too ne tshiendelele.’​—Musambu 115:18.

Tudi tusambila bua balongi aba bibidilangane ne miaba idibu babatume ne bua bambuluishe bua mudimu wa diyisha uye kumpala mu buloba bujima anu mutu aba batu baye kumpala kuabu benze kukadi bidimu 60 bijima.

[Kazubu mu dibeji 23]

MALU ADI ATANGILA BALONGI

Bungi bua matunga adibu bafumine: 12

Bungi bua matunga adibu babatume: 16

Bungi bua balongi: 48

Muayene wa bidimu: 34,4

Muayene wa bidimu bienza mu bulelela: 17,6

Muayene wa bidimu mu mudimu wa ku dîba ne ku dîba: 13,5

[Tshimfuanyi mu dibeji 24]

Kalasa ka 114 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala baya batangile panyima; mbafunde mêna babangile ku dia bakaji batangile ku dia balume mu mulongo wonso.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.