‘Tungunukayi ne kundonda’

‘Nuakabikidibua bua muanda eu, bualu bua Kristo wakakenga bua bualu buenu, wakanushila tshilejilu bua nuenu numulonde mu makasa ende.’​—1 PETELO 2:21.

1, 2. Bua tshinyi tshilejilu tshipuangane tshia Yezu tshia pavuaye ulongesha katshiena tshitambe bukole bua tuetu kutshidikija?

 YEZU KRISTO uvua Mulongeshi mutambe bunene wa katshia ne katshia. Uvua kabidi mupuangane, kakenza mpekatu nansha umue mu matuku ende onso a muoyo pa buloba to. (1 Petelo 2:22) Nansha nanku, bidiku biumvuija ne: tshilejilu tshiakafila Yezu pavuaye ulongesha, tuetu bantu bapange bupuangane katuena mua kumanya bua kutshilonda anyi? Kabiena nanku to.

² Anu mutuvua bamone mu tshiena-bualu tshishale, nshindamenu wa dilongesha dia Yezu uvua dinanga. Ne dinanga nngikadilu utudi tuetu buonso ne bua kuikala nende. Dîyi dia Nzambi didi ditubela misangu yonso bua kuvudija ne kulengeja dinanga dietu kudi bantu bakuabu. (Filipoi 1:9; Kolosai 3:14) Yehowa katu ulomba bantu badiye mufuke malu adibu kabayi mua kukumbaja to. Bushuwa, bu mudi “Nzambi [muikale] dinanga” ne mutufuke mu tshimfuanyi tshiende, tudi mua kuamba ne: wakatuenza bua tuetu kuleja dinanga. (1 Yone 4:8; Genese 1:27) Nunku patudi tubala mêyi a mupostolo Petelo adi mu mvese wa tshiena-bualu tshietu etshi, tudi mua kuitaba ne dishindika ne: tudi tuakumbaja. Tudi mua kulonda mu makasa a Kristo bimpe menemene. Bulelela, tudi mua kutumikila dîyi dia Yezu yeye nkayende dia se: ‘[Nutungunuke ne] kundonda.’ (Luka 9:23) Tumonayi mushindu utudi mua kuidikija dinanga diakaleja Kristo, kumpala bua bulelela buvuaye ulongesha, ne pashishe bua bantu bavuaye ulongesha.

Tuikalayi ne dinanga bua bulelela butudi tulonga

3. Bua tshinyi bitu bikolele bamue bua kulonga, kadi mmubelu kayi utudi tupeta mu Nsumuinu 2:1-5?

³ Bua tuetu kunanga bulelela butudi tulongesha bantu, tuetu bine tudi ne bua kunanga bua kulonga bulelela ebu. Lelu’eu, dinanga bua kulonga nunku kaditu anu dilua misangu yonso bipepele to. Malu bu mudi dibenga kulonga kalasa bimpe ne bibidilu bibi bipeta mu bunsonga bidi bifikisha bantu ba bungi ku dishala kabatshiyi basue kulonga. Kadi bidi ne mushinga wa bungi bua tuetu kulonga malu a Yehowa. Nsumuinu 2:1-5 udi wamba ne: ‘Muananyi, biwitabuja mêyi anyi, biwateka mikenji yanyi munda muebe, bua wewe utelejije matshi ebe ku meji, bua kufila mutshima webe ku dijingulula dia mianda; e, biwadidila dijingulula dia mianda muadi, biwabandishila kumanya kua malu dîyi diebe, biwakukeba bu muudi ukeba tshiamu tshia argent, biwakukeja bu muudi ukeja biuma bisokoka, nunku neujingulule  ditshina dia Yehowa, neusangane dimanya dia malu a Nzambi.’

4. ‘kufila’ mutshima kudi kumvuija tshinyi, ne mmushindu kayi wa dimona malu watuambuluisha bua kufila mutshima wetu nunku?

⁴ Tangila ne: mu mvese 1 too ne 4, badi batubela njila ne njila bua kuenza muetu muonso, kabiyi anu bua ‘kuitabuja’ ne ‘kuteka munda’ kadi kabidi bua ‘[kutungunuka] ne kukeba’ ne ‘[kutungunuka] ne kukeja.’ Kadi ntshinyi tshidi ne bua kutusaka bua kuenza bionso ebi? Tangila tshiambilu etshi: ‘fila mutshima webe ku dijingulula dia mianda.’ Mukanda kampanda udi wamba ne: mubelu eu “ki ndilomba bua kuikala anu ne ntema to; ndilomba bua kuikala ne lungenyi kampanda: ditaba malongesha ne muoyo mujima.” Kadi ntshinyi tshidi mua kutufikisha ku ditaba ne ku dijinga dia kulonga malu adi Yehowa utulongesha? Mmushindu utudi tumona malu. Tudi ne bua kuangata “dimanya dia malu a Nzambi” bu “tshiamu tshia argent” ne bu “biuma bisokoka.”

5, 6. (a) Ntshinyi tshidi mua kutuenzekela mu bungi bua matuku, ne mmunyi mutudi mua kuepuka bualu ebu? (b) Bua tshinyi tudi ne bua kutungunuka ne kuvudija dimanya didi bu biuma ditudi bapete mu Bible?

⁵ Ki mbikole bua kubanga kumona malu mushindu’eu to. Tshilejilu, mu “dimanya dia malu a Nzambi” diudi mupete mudi pamu’apa bulelela bua se: Yehowa mmulongolole bua bantu bena lulamatu bikale ne muoyo kashidi mu Mparadizu pa buloba. (Musambu 37:28, 29) Pawakalonga bulelela ebu musangu wa kumpala, kabiyi mpata, wakabumona bu tshiuma tshia mushinga mukole, dimanya diakuuja lungenyi luebe ne mutshima webe ne ditekemena ne disanka. Kadi bidi munyi mpindieu? Mu bule bua matuku, dianyisha bua biuma ebi dikadi diatuke anyi? Bikalabi nanku, keba bua kuenza malu abidi. Bua kumpala: akajilula dianyisha diebe, mbuena kuamba ne: ikala wenzeja lungenyi luebe bua kuvuluka tshiudi wangatshila bulelela buonso budi Yehowa mukulongeshe ne mushinga, nansha ebu budi butangila malu auvua mulonge kukadi bidimu bia bungi.

⁶ Buibidi: Vudija anu kuvudija biuma biebe. Tshilejilu, wewe mumbule tshina mu mpukapuka ne mupete dibue dia mushinga mukole, neujuke wewe kudiela mu mpaya ne kukuata njila kuya wenda usanka kujike anyi? Kuakumbulaku kabidi bua kumona ni mudi mabue makuabu anyi? Mu Dîyi dia Nzambi mudi bulelela bua mushinga mukole bufuanangane ne mabue a mushinga mukole. Nansha wewe ukadi mumane kupeta malu bungi munyi a bulelela ebu, udi mua kupeta makuabu a bungi. (Lomo 11:33) Paudi ulonga malu mapiamapia adi atangila bulelela, diebeja ne: ‘Ntshinyi tshidi tshivuija bualu ebu tshiuma tshia mushinga mukole? Budiku bumpesha mushindu wa kumvua bimpe menemene bumuntu bua Yehowa peshi mapangadika ende anyi? Budiku bumpesha imue mibelu mimpe idi mua kungambuluisha bua kulonda  mu makasa a Yezu anyi?’ Dielangana meji bua nkonko eyi nedikuambuluishe bua kukolesha dinanga bua bulelela budi Yehowa mukulongeshe.

Tulejayi dinanga bua bulelela butudi tulongesha

7, 8. Ng’imue mishindu kayi itudi mua kuleja bantu ne: tudi banange bulelela butudi balonge mu Bible? Fila tshilejilu.

⁷ Patudi tulongesha bakuabu, mmunyi mutudi mua kuleja ne: tudi banange bulelela butudi balonge mu Dîyi dia Nzambi? Bu mutudi tulonda tshilejilu tshia Yezu, tudi tueyemena Bible ne muoyo mujima patudi tuyisha ne tulongesha. Matuku adi panshi aa, mbakankamije bantu ba Nzambi ba buloba bujima bua kutamba kuyisha bantu ne Bible mu mudimu wa buambi. Paudi utumikila mubelu eu, keba mishindu ya kufikisha muntu uudi uyukila nende ku dimanya ne: wewe muine udi wangata ne mushinga malu a mu Bible audi wambila bantu bakuabu.​—Matayo 13:52.

⁸ Tshilejilu, kunyima kua malu a tshinyangu akenzabu mu tshimenga tshia New York, muanetu mukuabu wa bakaji muena Kristo uvua ubadila bantu bavuaye upeta mu buambi mêyi adi mu Musambu 46:1, 11. Kumpala uvua ukonka bantu muvuabu balale kunyima kua malu a njiwu au. Uvua uteleja diandamuna diabu ne ntema yonso, udianyisha, pashishe uvua wamba ne: “Ndiku mua kunubadila mvese udi mutambe kunkolesha mu tshikondo tshikole etshi anyi?” Bantu bakese menemene ke bavua babenga, kadi ba bungi bakayikila nende bimpe menemene. Pavua muanetu wa bakaji eu uyikila ne bansonga, uvua wamba misangu ya bungi ne: “Ndi ndongesha Bible kukadi bidimu 50 mpindieu. Tshitu muanji kupetaku lutatu nansha lumue ludi mukanda eu kauyi ungambuluisha bua kujikija to.” Tuetu tuakula ne mêyi malelela ne a musangelu, tudi tuleja bantu ne: tudi tuangata malu atudi balonge mu Dîyi dia Nzambi ne mushinga ne tudi baanange.​—Musambu 119:97, 105.

9, 10. Bua tshinyi mbimpe bua tuetu kuandamuna nkonko idi itangila mayisha etu ku diambuluisha dia Bible?

⁹ Padi bantu batuela nkonko pa bidi bitangila mayisha etu, tudi ne mushindu muimpe wa kubaleja ne: tudi banange Dîyi dia Nzambi. Bu mutudi tulonda tshilejilu tshia Yezu, katuena tufila mandamuna bilondeshile ngenyi yetu tuetu to.  (Nsumuinu 3:5, 6) Kadi tudi tubandamuna ne Bible. Udiku ne buôwa bua se: muntu udi mua kukuela lukonko luwikala kuyi mua kuandamuna anyi? Tangila malu abidi audi mua kuenza.

¹⁰ Enza muebe muonso bua kuikala mudilongolole. Mupostolo Petelo wakafunda ne: ‘Nujidile Kristo mu mitshima yenu bu Mukalenge, nuikale badilongolole misangu yonso, bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne [lutulu ne kanemu kakole].’ (1 Petelo 3:15) Udi mudilongolole bua kubingisha mayisha enu anyi? Tshilejilu, bikala muntu kampanda musue kumanya tshiutu kuyi ubuelela mu bimue bilele bidi kabiyi biumvuangana ne Bible, kusanki anu bua kuamba patupu ne: “Tshitendelelu tshietu ntshibengeshe malu aa to.” Diandamuna dia nunku didi mua kuleja ne: bantu bakuabu ke batu bakuangatshila mapangadika, ne udi mu tshitendelelu tshibi. Bidi mua kuikala bitambe buimpe bua kuamba ne: “Dîyi dia Nzambi didi dikandika bualu ebu,” anyi ne: “Kabiena bisankisha Nzambi wanyi to.” Pashishe udi mua kufila diumvuija ditoke bua kumuleja tshiudi wambidila nanku.​—Lomo 12:1.

11. Mmukanda kayi udi mua kutuambuluisha bua kuikala badilongolole bua kuandamuna nkonko idi itangila bulelela bua mu Dîyi dia Nzambi?

¹¹ Wewe mumone ne: kuena mudilongolole, bua tshinyi kubenga kuikala wangata minite ndambu bua kulonga kakanda ka Biena-bualu bua kuyikila pa Bible? * Sungula biena-bualu bidi bantu mua kuelela nkonko, ne ukuate amue malu adibu baleje a mu Mukanda wa Nzambi. Ikala anu wenda ne kakanda kebe ka Biena-bualu ne Bible webe. Kuelakanyi bua kubadila muntu mu mikanda yonso ibidi eyi, umuambila ne: udi ne mukanda uudi musue kumubadila bua kupeta diandamuna didi Bible ufila bua lukonko luende.

12. Mmunyi mutudi mua kuandamuna patudi katuyi bamanye diandamuna dia lukonko lua bualu kampanda bua mu Bible?

¹² Dienzeja bua kubenga kulubakana patupu. Kakuena muntu mupangile bupuangane udi mumanye mandamuna a nkonko yonso to. Nunku padibu bakuela lukonko lua bualu kampanda bua mu Bible luudi kuyi mumanye mua kuandamuna, udi anu mua kuandamuna mushindu’eu: “Tuasakidila bua lukonko luimpe elu luudi mujule. Bua kuamba bulelela, tshiena mumanye diandamuna dialu to, kadi ndi mujadike ne: Bible udi wakula bua bualu ebu. Ntu musue kukebulula malu mu Bible, nunku ndi nya kukeba diandamuna dia lukonko luebe ne nempingane bua kukupeshadi.” Mêyi malelela ne a bupuekele a mushindu’eu adi mua kufila njila wa nuenu kulua kuyukila kabidi.​—Nsumuinu 11:2.

Tulejayi dinanga bua bantu batudi tulongesha

13. Bua tshinyi tudi ne bua kuikala tuangata bimpe bantu batudi tuyisha?

¹³ Yezu wakaleja dinanga bua bantu bavuaye ulongesha. Mmunyi mutudi mua kumuidikija mu muanda eu? Katuena ne bua kuikala ne ngikadilu wa bamone bantu bu badi kabayi babamone to. Bushuwa, ‘mvita ya dituku dinene dia Nzambi Wa-Bukole-Buonso’ ikadi pabuipi menemene, ne bantu miliyare ne miliyare nebabutudibue. (Buakabuluibua 16:14; Yelemiya 25:33) Kadi katuena  bamanye bashala ne muoyo ne bafua to. Dilumbuluisha edi nedienzeke mu matuku atshilualua ne Yezu Kristo, muntu udi Yehowa muteke, ke wadienza. Nunku anu pikala dilumbuluisha adi dienzeke, tudi ne bua kumona muntu yonso bu udi mua kulua musadidi wa Yehowa.​—Matayo 19:24-26; 25:31-33; Bienzedi 17:31.

14. (a) Nnkonko kayi itudi mua kudiela bua kumanya ni tudi tumvuila bantu luse? (b) Mmishindu kayi mimpe itudi mua kuleja bantu luse ne dinanga?

¹⁴ Ke bua tshinyi, anu bu Yezu, tudi ne bua kumvuila bantu luse. Tudi mua kudikonka ne: ‘Ndiku ne luse bua bantu badibu badinge ne mashimi malongolola a bena bitendelelu, bena tshididi, bena malu a bungenda ba panu anyi? Bikalabu bamueneka kabayi basua kuteleja mukenji utudi tubatuadila, ndiku nkeba bua kumanya tshidibu baubengela anyi? Ndiku mumanye bua se: meme nansha bantu bakuabu badi basadila Yehowa ne lulamatu mpindieu, tuvua tuela meji mushindu’eu musangu kampanda anyi? Ndiku muakaje ndongeshilu wanyi bilondeshile nsombelu eu anyi? Peshi ndi ndengulula bantu aba mbamona bu badi kabayi mua kushintuluka?’ (Buakabuluibua 12:9) Padi bantu bamona ne: tudi tubumvuila luse ne muoyo mujima, badi mua kufika pamu’apa ku ditaba mukenji wetu. (1 Petelo 3:8) Luse ludi kabidi mua kutusaka bua kutamba kunanga bantu batudi tupeta mu buambi. Tudi mua kufunda nkonko yabu ne malu adibu basue kumanya. Patudi tupingana, tudi mua kubaleja ne: tudi bakonkonone malu avuabu baleje musangu mushale. Ne bikalabu dijinga ne bualu kampanda bua lukasa, tudi mua kuikala ne mushindu wa kubapesha diambuluisha.

15. Bua tshinyi tudi ne bua kukeba malu mimpe adi nawu bantu, ne mmunyi mutudi mua kuakeba?

¹⁵ Anu bu Yezu, tudi tukeba malu mimpe adi nawu bantu. Pamu’apa mamu kampanda udi kayi ne mulume udi udienzeja bua kukolesha bana bende nkayende. Tatu kampanda udi uluangana bua kukuatshisha bena mu dîku diende. Mukulakaje kansanga udi usankidila malu a mu nyuma. Tudiku tumona malu aa kudi bantu batudi tupetangana nabu, ne tudiku tubelelawu kalumbandi anyi? Tuetu bikale tuenza nenku, tudi tuvudija malu adi atuambuluisha bua kumvuangana nabu ne bidi mua kutunzuluila njila wa kubayisha malu adi atangila Bukalenge.​—Bienzedi 26:2, 3.

Bidi bikengela kuikala ne budipuekeshi bua kuleja dinanga

16. Bua tshinyi mbimpe bua tuetu kuleja lutulu ne kanemu kudi bantu batudi tuyisha?

¹⁶ Dinanga bantu batudi tulongesha neditusake bua kuteleja mubelu wa meji wa mu Bible eu: “Dimanya didi dipetesha muntu ditambisha; amu dinanga ke didi ditukolesha.” (1 Kolinto 8:1, MMM) Yezu uvua ne dimanya divule, kadi kavua uditambisha nansha. Nunku paudi wambila bantu bakuabu malu adi atangila mayisha etu, epuka diangata dîyi dia dikokangana anyi dia kuleja muudi wewe mubapite. Tshipatshila tshietu ntshia kulenga mitshima ya bantu ne kubasemeja ku bulelela butudi banange bikole. (Kolosai 4:6) Vuluka ne: pavua Petelo mubele bena Kristo bua kuikala badilongolole bua kuandamuna muntu yonso, wakasakidila divuluija dia se: tudi ne bua kubandamuna nunku ‘ne [lutulu ne kanemu kakole].’ (1 Petelo 3:15) Bituikala ne lutulu ne kanemu, tudi mua kutamba kusemeja bantu kudi Nzambi utudi tusadila.

17, 18. (a) Ntshinyi tshitudi mua kuenza padibu batuamba ne: katuena bakumbane bua kuikala basadidi ba Nzambi? (b) Bua tshinyi dimanya dia miakulu ya kale ivuabu bafundile Bible kadiena ne mushinga menemene kudi balongi ba Bible?

¹⁷ Kabiena ne mushinga bua tuetu kukemesha bantu ne dimanya anyi tulasa tutudi balonge to. Bikala bamue bantu ba mu tshipapu tshietu babenga bua kuteleja muntu yonso udi kayi mulonge iniversite anyi kayi ne imue mianzu, kulekedi bualu ebu bukutekesha mu mikolo to. Yezu kakateleja bivuabu bamuamba ne: kavua mulonge mu tulasa tunene tua ba-rabi tua mu tshikondo tshiende; peshi kakalonda ngenyi ivua mitangalake mu bantu bua kukebaye pende bua kukemesha bantu ne dimanya diende divule nansha.​—Yone 7:15.

¹⁸ Budipuekeshi ne dinanga bidi ne mushinga wa bungi kudi basadidi bena Kristo kupita dimanya dia mu tulasa tua panu nansha diodi bungi kayi. Mulongeshi Mutambe Bunene Yehowa ke udi utukumbaja bua kuenza mudimu wende. (2 Kolinto 3:5, 6) Ne nansha bamue balombodi ba Bukua-buena-Kristo bambe tshinganyi, kabiena bitukengela kulonga miakulu ya kale ivuabu bafunde Bible bua tuetu kushisha kulua balongeshi ba Dîyi dia Nzambi to. Yehowa wakafundisha Bible ku nyuma wende mu mushindu mutoke, ne miaku mipepele ne misunguluke idi muntu pabuipi ne  yonso mua kumvua bulelela bua mushinga mukole budimu. Bulelela ebu kabutu bushintuluka nansha buobu babukudimune mu miakulu nkama ne nkama. Nunku, nansha mudi dimanya dia miakulu ya kale mua kuambuluisha imue misangu, kadi kadiena ne mushinga mutambe menemene to. Kabidi, kuditambisha bua dimanya dia miakulu kudi mua kufikisha muntu ku dijimija ngikadilu udi ne mushinga kudi bena Kristo balelela: kuitaba bua kulongeshibua.​—1 Timote 6:4.

19. Mmu mushindu kayi mudi mudimu wetu wa bena Kristo muikale wa diambuluishangana?

¹⁹ Kakuena mpata bua se: mudimu wetu wa bena Kristo udi ulomba budipuekeshi. Mudimu eu utu pa tshibidilu usaka bantu bua kutuluisha, bua kutupepeja ne mene bua kutukengesha. (Yone 15:20) Nansha nanku, patudi tuyisha ne lulamatu luonso, tudi tukumbaja mudimu wa mushinga mukole. Patudi tutungunuka ne kuambuluisha bantu bakuabu ne budipuekeshi buonso mu mudimu eu, tudi tuidikija dinanga dia buena divua Yezu Kristo muleje bantu. Elabi meji: bu biobi bitukengela kuyisha bantu tshinunu badi kabayi basankidila mukenji wetu anyi badi batubenga bua tuetu kumona mua kupeta anu muntu umuepele patupu udi mufuane mukoko, katuvuaku mua kudienzeja bua kuenza nanku anyi? Menemene! Nunku patudi tunanukila mu mudimu eu, katuyi tuulekela, tudi tuambuluisha bantu badi bafuane mikoko batudi ne bua kuyisha. Kakuena mpata bua se: Yehowa ne Yezu nebenze bua se: tupete bantu bakuabu ba bungi badi ne mushinga ne tubambuluishe kumpala kua nshikidilu kuluaye.​—Hagai 2:7.

20. Ng’imue mishindu kayi itudi mua kulongesha ku tshilejilu tshietu?

²⁰ Kulongesha ku tshilejilu tshietu mmushindu mukuabu wa kuleja ne: tudi ne muoyo wa kuambuluisha bakuabu. Tshilejilu, tudi basue kulongesha bantu ne: kusadila Yehowa “Nzambi wa disanka” ke nsombelu mutambe bulenga ne wa musangelu wa bungi. (1 Timote 1:11, NW) Padi bantu abu bamona ngikadilu wetu ne malanda etu ne bena mutumba netu, balongi netu ne bena mudimu netu, badiku mua kumona ne: tudi ne disanka ne musangelu anyi? Bia muomumue, tudi tulongesha balongi ba Bible bua se: tshisumbu tshia bena Kristo ke muaba udibu mua kusangana dinanga pa buloba ebu budi bantu bikale ne muoyo mupape ne tshikisu. Balongi betu badiku mua kumona diakamue ne: tudi banange bantu bonso mu tshisumbu ne tudi tudienzeja ne muoyo mujima bua kulama ditalala munkatshi muetu anyi?​—1 Petelo 4:8.

21, 22. (a) Didikonkonona pa bidi bitangila mudimu wetu didi mua kutufikisha ku malu kayi? (b) Ntshinyi tshituamona mu biena-bualu bia nimero wa Tshibumba tshia Nsentedi udi ulonda?

²¹ Muoyo wa budisuile wa kuenza mudimu wetu udi pamu’apa mua kutusaka bua kudikonkonona tuetu bine. Padi ba bungi benza nunku ne muoyo umue, badi bafika ku dimona ne: badi ne mushindu wa kuvudija mudimu wabu mu diangata mudimu wa ku dîba ne ku dîba anyi mu diya kuambuluisha muaba udibu batamba kujinga bambi ba lumu luimpe. Bakuabu mbalonge muakulu wa ku ba bende bua kuambuluisha benyi bavule badi balue mu ditunga diabu. Wewe muikale ne mushindu wa kuenza malu aa, akonkonone bimpe mu masambila. Nsombelu wa diambuluisha bakuabu udi upetesha disanka dia bungi ne ditalala dia mu mutshima.​—Muambi 5:12.

²² Tuenzayi muetu muonso bua kutungunuka ne kuidikija Yezu Kristo mu dikolesha dinanga dietu bua bulelela butudi tulongesha ne bua bantu batudi tulongesha. Kupeta ne kuleja dinanga mu malu abidi aa nekutuambuluishe bua kuasa tshishimikidi tshimpe bua kuikala balongeshi badi bafuanangane ne Kristo. Kadi mmunyi mutudi mua kuibakila pa tshishimikidi etshi? Mu nimero wa Tshibumba tshia Nsentedi udi ulonda netumone biena-bualu bidi biakula bua mishindu misunguluke ivua Yezu ulongesha.

[Mêyi adi kuinshi]

Newandamune munyi?

• Ntshinyi tshidi tshitujadikila ne: tshilejilu tshiakafila Yezu pavuaye ulongesha ki ntshikole bua tuetu kutshidikija?

• Mmunyi mutudi mua kuleja ne: tudi banange bulelela butudi balonge mu Bible?

• Bua tshinyi bidi ne mushinga bua kuikala anu ne budipuekeshi patudi tuenda tuvudija dimanya?

• Ng’imue mishindu kayi itudi mua kuleja dinanga kudi bantu batudi tudienzeja bua kulongesha?

[Nkonko ya dilonga]

[Bimfuanyi mu dibeji 16]

Enza muebe muonso bua kuikala mudilongolole

[Bimfuanyi mu mabeji 16, 17]

Wewe muikale wanyisha “dimanya dia malu a Nzambi,” neumanye mua kuyisha bimpe ne Bible

[Tshimfuanyi mu dibeji 18]

Tudi tuleja ne: tudi banange bantu pa kubamanyisha lumu luimpe