“Nuyile malu kundi”

‘Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi [mupole malu ne mupuekele] mu mutshima wanyi; nunku nenusangane dikisha mu mitshima yenu.’​—MATAYO 11:29.

1. Bua tshinyi kulongela malu kudi Yezu kudi mua kusankisha ne kulengeja muntu?

 YEZU KRISTO uvua misangu yonso wela meji, ulongesha ne wenza malu mu mushindu muakane. Nansha muakenzaye matuku makese pa buloba, wakenza mudimu muimpe uvua usankisha, ne uvua anu ne disanka. Wakasangisha bayidi bende ne kubalongeshaye mua kutendelela Nzambi, mua kunanga bantu nabu ne mua kutshimuna bia panu. (Yone 16:33) Wakuuja mitshima yabu ne ditekemena ne “kukenkeshaye muoyo udi kauyi mua kufua ku bukole bua mukenji mulenga.” (2 Timote 1:10, MMM) Biwikala munkatshi mua bayidi bende, buebe wewe kuikala muyidi kudi kumvuija tshinyi? Tuetu bakonkonone tshidi Yezu wamba bua bayidi, tudi mua kumanya mua kulengeja nsombelu wetu. Mbuena kuamba ne: tudi ne bua kuitaba tshidiye wamba ne kutumikila amue mêyi manene.​—Matayo 10:24, 25; Luka 14:26, 27; Yone 8:31, 32; 13:35; 15:8.

2, 3. (a) Kuikala muyidi wa Yezu kudi kumvuija tshinyi? (b) Bua tshinyi mbimpe tuetu kudiebeja ne: ‘Ndi mulue muyidi wa nganyi?’

² Mu Mikanda ya tshiena-Gelika ya bena Kristo, muaku udibu bakudimune ne: “muyidi” udi nangananga umvuija muntu udi mutangije meji ende ku tshintu kampanda, peshi udi ulonga. Tudi tusangana muaku udi upetangana ne muaku eu mu mvese utudi tukonkonona eu: Matayo 11:29: ‘Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi [mupole malu ne mupuekele] mu mutshima wanyi; nunku nenusangane dikisha mu mitshima yenu.’ Bushuwa, muyidi mmulongi. Misangu mivule batu batela muaku “muyidi” mu Evanjeliyo bua kuakula bua balongi ba Yezu bakalongeshaye malu ne bakendakana nende pavuaye wenda uyisha. Bamue bantu bavua mua kuikala bitabe patupu malongesha a Yezu, pamu’apa baitabe mu musokoko. (Luka 6:17; Yone 19:38) Bafundi ba Evanjeliyo  bakakula kabidi bua “Bayidi ba Yone [Mubatiji] ne [bayidi ba] Bafalese.” (Mâko 2:18) Bu muvua Yezu muambile bayidi bende bua “kudimukila diyisha dia Bafalese,” tudi mua kudiebeja ne: ‘Ndi mulue muyidi wa nganyi?’​—Matayo 16:12.

³ Bituikala bayidi ba Yezu, bituikala bayile malu kudiye, nanku bakuabu badi ne bua kudiumvua bakankamija mu nyuma padibu ku luseke luetu. Badi ne bua kujingulula ne: tudi balue bapole malu bikole ne bapuekele mu mutshima. Bituikala baludiki ku mudimu wetu, baledi anyi balami mu tshisumbu tshia bena Kristo, bantu batudi tulombola badiku bamona ne: tudi tubangata muvua Yezu wangata bantu bavuaye ulombola anyi?

Mushindu uvua Yezu wangata bantu

4, 5. (a) Bua tshinyi ki mbikole bua kumanya muvua Yezu wangata bantu bavua bakenga? (b) Mbualu kayi buakamona Yezu pavuaye udia mu nzubu mua Mufalese mukuabu?

⁴ Tudi basue kumanya muvua Yezu wangata bantu, nangananga aba bavua ne ntatu mikole. Ki mbikole bua kumanya bualu ebu to; mu Bible mudi miyuki ya bungi ya bantu bavua Yezu mupetangane nabu, bamue ba kudibu bavua bakenga. Tumonayi kabidi mushindu uvua balombodi ba bitendelelu (nangananga Bafalese) bangata bantu bavua ne ntatu ya muomumue. Dishilangana adi neditupeshe dilongesha.

⁵ Mu tshidimu tshia 31 B.B., pavua Yezu wenda uyisha mu Galela, “Mufarizeyi mukuabu [wakabikila] Yezu bua kudiaye pamue nende.” Yezu kakelakana bua kuitaba dibikila edi to. “Yezu kubuela mu nzubu mua Mufarizeyi  awu, kusomba ku mesa. Mu tshimenga amu muvua mukaji muenji wa malu mabi. Pavuaye mumvue lumu ne: Yezu udi udia mu nzubu mua Mufarizeyi awu, kuvuaye ne kalondo ka manananshi. Kuimanaye kunyima kua Yezu, udidila ku makasa ende, uabolesha ne binsonji, uakupula ne nsuki yende, uatua mishiku, ualaba manananshi.”​—Luka 7:36-38, MMM.

6. Mmunyi muvua mukaji “muenji wa malu mabi” mufike ku dibuela mu nzubu mua Mufalese?

⁶ Enzabi bu mumone bualu ebu mu lungenyi. Mukanda mukuabu udi wamba ne: “Mukaji (mvese wa 37) wakapeta mushindu wa kufika muaba eu bualu bilele bivuaku bivua bianyishila bakengi bua kufika muaba uvua bantu badia nunku bua kuangata bimue bia ku bintu bivua bishala.” Ke tshivua mua kuenza bua muntu kufikaye muaba eu kabayi bamubikile to. Kuvua mua kuikala bantu bakuabu bavua bindile bua kuangulula biakudia bivua bishala pavua didia adi dijika. Kadi ngikadilu wa mukaji eu uvua ukemesha. Kakashala muimanyine pa bule bua kuindila too ne pavua didia adi ne bua kujika to. Uvua ne lumu lubialubi, uvua “muenji wa malu mabi” wa kalanda musenga, ke bua tshinyi Yezu wakamba ne: uvua mumanye “mibi yende, nansha [muvuayi ya] bungi.”​—Luka 7:47, MMM.

7, 8. (a) Ntshinyi tshiuvua mua kuikala muenze kumpala kua malu adibu balonde mu Luka 7:36-38? (b) Ntshinyi tshiakenza Simona?

⁷ Fuanyikijabi ne: uvuaku mu tshikondo atshi ne wewe ke Yezu. Uvua mua kuikala muenze tshinyi? Uvua mua kuikala mumvue bibi pavua mukaji eu ulua pabuipi nebe anyi? Bualu ebu buvua mua kukupesha meji kayi? (Luka 7:45) Uvuaku mua kuikala mumvue buôwa anyi?

⁸ Bu wewe muikale umue wa ku benyi bavua muaba au, meji ebe avuaku mua kuikala bu a Mufalese Simona anyi? “Mufarizeyi uvua mubikile Yezu umona nanku, kuambaye mundamunda ne: Bu muntu ewu muikale [muprofete], uvua mua kumanya mukaji udi umulenga ewu ne: mmuenji wa malu mabi.” (Luka 7:39, MMM) Kadi Yezu yeye uvua muntu wa luse lua bungi. Wakamona lutatu luvua nalu mukaji eu ne kumvuaye kanyinganyinga kavuaye naku. Bible kêna utuambila muvua mukaji eu mubange nsombelu wende wa mpekatu eu to. Bikalaye uvua mukaji wa ndumba, bidi bimueneka ne: bantu balume ba mu tshimenga atshi (bena Yuda bavua batendelela Nzambi) kabavua bamuambuluishe to.

9. Ntshinyi tshiakenza Yezu bua mukaji eu, ne mbualu kayi buvua mua kuikala bulue kuenzeka kunyima?

⁹ Kadi Yezu uvua musue kuambuluisha mukaji eu. Wakamuambila ne: “Mibi yebe mmijimine.” Pashishe kuambaye kabidi ne: “Ditaba diebe ndikupandishe; waya bimpe.” (Luka 7:48-50, MMM) Muyuki eu udi ujikila muaba eu. Kadi muntu mukuabu udi mua kuamba ne: Yezu kakenzela mukaji eu malu a bungi to. Wakamubenesha patupu ne kulayanganaye nende. Udi wela meji ne: bumue wakapingana ku nsombelu wende mubi au anyi? Nansha mutudi katuyi mua kushindika bualu ebu, tangila tshiakamba Luka pashishe. Wakalonda ne: Yezu uvua wenda ‘mu bimenga ne mu misoko mikese, wambila bantu bualu bua Nzambi, wenda ne lumu luimpe lua bukalenge bua Nzambi.’ Luka wakamba kabidi ne: ‘bakaji bakuabu’ bavua ne Yezu ne bayidi bende, ‘bakadi babakuatshisha ne bintu biabu.’ Bidi mua kuikala bilelela bua se: mukaji eu wakadilengeja ne uvua muena dianyisha uvua mpindieu munkatshi muabu, muikale ne nsombelu uvua usankisha Nzambi ne kuondo ka muoyo katoke, muikale kabidi ne bipatshila bipiabipia ne dinanga dikole bua Nzambi.​—Luka 8:1-3.

Dishilangana pankatshi pa Yezu ne Bafalese

10. Bua tshinyi mbia mushinga bua kukonkonona muyuki wa Yezu ne mukaji ku nzubu kua Simona?

¹⁰ Ntshinyi tshitudi mua kulongela ku muyuki mulenga eu? Udi utujula majiya, ki mmuomu anyi? Fuanyikijabi ne: uvua mu nzubu mua Simona. Uvua mua kuikala mumvue bishi? Uvua mua kuikala muenze bu muakenza Yezu anyi, peshi uvua mua kuikala ne meji masue kuenza bu a Mufalese uvua mumuakidile kuende? Yezu uvua Muana wa Nzambi, tuetu katuena mua kumvua anyi kuenza malu bimpe menemene anu bu yeye nansha. Kabidi, katuena mua kujinga bua kudifuanyikija ne Mufalese Simona to. Bantu bakese patupu ke badi mua kusanka bua kuikala bu Bafalese.

11. Bua tshinyi katuena mua kujinga bua kutufuanyikijabu ne Bafalese?

¹¹ Bilondeshile dilonga dia malu a mu Bible ne a mu mikanda mikuabu, tudi mua kuamba ne:  Bafalese bavua badiangata ne mushinga wa bungi, bavua badimona bu bavua bakuate disanka ne diakalenga bia tshisamba tshiabu tshijima ne manza abidi. Kabavua basanka pavua Mikenji ya Nzambi mikale mitoke ne yumvuika bimpe nansha. Muaba wonso uvua Mikenji imueneka kayiyi misunguluke bimpe, bavua bakeba bua kusakidilapu malu makuabu a mishindu ya kuyitumikila kabayi bashila kuondo ka muoyo muaba nansha mukese to. Balombodi ba bitendelelu aba bakela mikandu bua kulombola nsombelu wa bantu mu malu onso, nansha ne mu tualu tua mushinga mukese. *

12. Mmushindu kayi uvua Bafalese badiangata?

¹² Josèphe, mufundi wa miyuki ya kale muena Yuda wa mu bidimu lukama bia kumpala udi uleja patoke ne: Bafalese bavua badimona bantu bimpe, ba malu malenga, kabayi ne kansungansunga ne bakumbanyine mudimu wabu bimpe. Kakuyi mpata, bamue bavua bamueneka bikale nanku. Pamu’apa udi muvuluke Nikodemo. (Yone 3:1, 2; 7:50, 51) Mu bungi bua matuku, bamue ba kudibu bakitaba njila wa Buena-Kristo. (Bienzedi 15:5) Paulo mupostolo muena Kristo wakafunda bua bamue bena Yuda bu mudi Bafalese ne: ‘Badi ne lukunukunu kudi Nzambi, kadi ki ndua lungenyi lulelela.’ (Lomo 10:2) Kadi Evanjeliyo idi ileja ne: bantu ba tshianana bavua babamona bena ditambisha, bena diambu, bakane ku mêsu kuabu nkayabu, bataludianganyi ba bilema, babipishanganyi ne bapepejanganyi.

Mushindu uvua Yezu ubangata

13. Ntshinyi tshiakamba Yezu bua Bafalese?

¹³ Yezu wakamba ne: Bafalese bavua bena lubombo. Wakamba ne: “Badi basuika majitu manene ne badi baambuisha bantu pa mapa, kadi badi bapidia mua kubakuatshisha nansha ne lusongo lua munu.” Bulelela, majitu au avua maneme, ne tshikokedi tshivuabu bambike bantu tshivua  tshibi. Yezu wakatungunuka ubikila bafundi ne Bafalese ne: “[bapale].” Muntu mupale udi mua kuenzela bakuabu bibi. Yezu wakabikila kabidi bafundi ne Bafalese ne: “balombodi bafofo” ne kuambaye ne: bavua ‘balengulula malongesha matambe bunene a mu Mikenji, bu buakane, luse ne lulamatu.’ Nnganyi udi mua kujinga bua Yezu amuangate bu Mufalese?​—Matayo 23:1-4, 16, 17, 23, MML.

14, 15. (a) Mushindu uvua Yezu muangate Matayo Lewi udi uleja tshinyi bua bienzedi bia Bafalese? (b) Mmalu kayi a mushinga adi muyuki eu mua kutulongesha?

¹⁴ Pabuipi ne mubadi yonso wa miyuki ya Evanjeliyo udi mua kumona ngikadilu mubi uvua nende Bafalese ba bungi. Kunyima kua Yezu mumane kubikila Matayo Lewi mulambuishi wa bitadi bua kuluaye muyidi wende, Lewi wakamulambishila biakudia. Muyuki udi uleja ne: ‘Bafalese ne [bafundi] bakadi ba mu tshisumbu tshiabu bakadi banyingalala, kukonkabu balongi ba Yezu ne: Bua tshinyi nudi nudia ne nudi nunua ne balambuishi ba milambu ne benji ba malu mabi? Yezu wakabandamuna ne: Meme tshiakuluila bua kubikila bantu bakane, kadi ngakuluila bua kubikila benji ba malu mabi bua kukudimunabu mioyo yabu.’​—Luka 5:27-32, MML.

¹⁵ Lewi wakajingulula bualu bukuabu buakamba Yezu dituku adi ne: ‘Yayi bienu nuyile dîyi edi ne: Ndi musue luse, tshiena nsua nyama minshipela.’ (Matayo 9:13) Nansha muvua Bafalese bamba muvuabu bitaba malu avua mu mikanda ya baprofete bena Ebelu, kabavua balonda mêyi aa mangatshila mu Hoshea 6:6 to. Buabu buobu, kutumikila mikenji mu katoba ne mu katoba kuvua ne mushinga wa bungi kupite kuikala ne luse. Yonso wa kutudi adiebeje ne: ‘Ndi ne lumu lua muntu udi ulamata kashendende ku imue mikandu, bu mudi idi ileja meji anyi nkayanyi peshi ya bantu ba bungi pa tshilumbu kampanda anyi? Peshi bakuabu batu bangangata bu muena luse ne muntu muimpe?

16. Ntshilele kayi tshivua natshi Bafalese, mmunyi mutudi mua kuepuka bua kuikala bu buobu?

¹⁶ Bafalese bavua basombele anu dipishangana njila ne njila bua tualu tukese. Bavua bakeba bilema bionso, nansha biobi bilelela anyi bifuikakaja. Bavua bashiye bantu anu mioyo kulukulu ne bavua basombele anu dibavuluija bilema biabu. Bafalese bavua baditambisha bua muvuabu bafila tshia-dikumi tshia bisonsa bia tshianana bu mudi luenyi, tshidibu a luenyi ne tshikote. Bavua baleja muvuabu ne luse ku mvuadilu wabu ne bavua basue kuikala baludiki ba tshisamba tshiabu. Bulelela, bituasa bua bienzedi bietu biumvuangane ne tshilejilu tshia Yezu, tudi ne bua kuepuka tshilele tshia kukeba misangu yonso bilema bia bakuabu bua tuetu kubiasa ku bituta.

Mmushindu kayi uvua Yezu ukosa bilumbu?

17-19. (a) Umvuija muvua Yezu mukose tshilumbu tshivua mua kuikala tshikebeshe ntatu minene. (b) Ntshinyi tshiakavuija bualu ebu bua kanyinganyinga ne bubi menemene? (c) Bu wewe muikalepu dîba divua mukaji eu mulue pabuipi ne Yezu, uvua mua kuikala muenze tshinyi?

¹⁷ Nkoselu wa bilumbu wa Yezu uvua mushilangane bikole ne wa Bafalese. Tangila muakakosa Yezu tshilumbu tshivua mua kuikala tshikole menemene. Ntshilumbu tshia mukaji mukuabu uvua muenze bidimu 12 ne disama dia mashi apatuka. Udi mua kubala muyuki eu mu Luka 8:42-48.

¹⁸ Mâko udi wamba ne: mukaji eu uvua “uzakala ne buowa.” (Mâko 5:33, MML) Bua tshinyi? Mbualu uvua mumanye ne: uvua mushipe Mikenji ya Nzambi. Bilondeshile Lewitiki 15:25-28, mukaji uvua mashi apatuka kabiyi muvuabi pa tshibidilu uvua mupange bukezuke munkatshi mua tshikondo tshionso tshivua mashi apatuka, kusakidila lumingu lumue. Tshintu tshionso anyi muntu yonso uvuaye ulenga uvua ulua ne bukoya. Bua kusemena pabuipi ne Yezu, mukaji eu uvua ne bua kudifinya munkatshi mua tshisumbu tshia bantu. Patudi tubala muyuki eu kunyima kua bidimu 2 000, tudi tumumvuila luse bua lutatu luvuaye nalu.

¹⁹ Bu wewe muikalepu dîba adi, mmunyi muuvua mua kuikala muangate bualu ebu? Uvua mua kuikala muambe ntshinyi? Tangila ne: Yezu  wakenzela mukaji eu malu mimpe ne dinanga ne luse kabidi, kayi nansha utuma meji ku ntatu ivuaye mua kuikala mujudije to.​—Mâko 5:34.

20. Bu buobu balombe bena Kristo malu adi mu Lewitiki 15:25-28 lelu, ndutatu kayi lutuvua mua kuikala nalu?

²⁰ Muanda eu udiku mua kutulongesha bualu kampanda anyi? Fuanyikija ne: udi mukulu mu tshisumbu tshia bena Kristo lelu. Ne fuanyikija kabidi ne: lelu mbalombe bena Kristo malu adi mu Lewitiki 15:25-28, ne mukaji muena Kristo mukuabu mmushipe mukenji eu, udi ne kanyinganyinga ne udimona mushikile. Udi mua kuenza tshinyi? Udi mua kumufuisha bundu patoke ne mêyi a kumupisha nawu anyi? Pamu’apa newambe ne: “Tòo, tshiena mua kuenza nanku nansha bia munyi. Bu mundi ndonda tshilejilu tshia Yezu, ndi ne bua kuenza muanyi muonso bua kuikala muena malu malenga, kuikala ne dinanga ne luse, ne kuditeka pa muaba wa bakuabu.” Mbimpe bitambe! Kadi manya ne: kuenza nanku bua kuidikija tshilejilu tshia Yezu ke kudi kukole.

21. Yezu wakalongesha bantu tshinyi bua Mikenji?

²¹ Tshivua ne mushinga ntshia se: bantu bavua badiumvua bakolesha ne bakankamija kudi Yezu. Muaba uvua Mikenji ya Nzambi misunguluke, ivua yumvuija anu tshivuayi yamba. Pavuayi imueneka yamba malu kaayi masunguluke, kuondo kabu ka muoyo kavua ne bua kuenza mudimu wa bungi, ne dinanga diabu dia Nzambi divua ne bua kumuenekela mu mapangadika abu. Mikenji ivua ibashila mpunga wa kupuyakena. (Mâko 2:27, 28) Nzambi uvua munange bantu bende, misangu yonso uvua wenza malu bua diakalenga diabu, ne uvua ubafuila luse pavuabu benza bilema. Ke muvua Yezu nanku.​—Yone 14:9.

Bipeta bia malongesha a Yezu

22. Kuyila malu kudi Yezu kuakambuluisha bayidi bua kuikala ne ngikadilu wa mushindu kayi?

²² Bantu bakateleja Yezu Kristo ne bakalua bayidi bende bakajingulula bulelela bua mêyi ende a se: ‘Mutshi wanyi wa tshikokedi udi muakane ne bujitu buanyi budi bupepele.’ (Matayo 11:30) Kabavua badimona bu bantu bambika majitu maneme, batondesha anyi bakayisha kudi Yezu nansha. Bavua ne budikadidi bua bungi, ne disanka ne dishindika divule bua malanda abu ne Nzambi ne malanda abu munkatshi muabu buobu bine. (Matayo 7:1-5; Luka 9:49, 50) Bakalongela kudiye ne: kulombola bantu mu nyuma kudi kulomba bua kukolesha bakuabu, kuleja bupuekele bua lungenyi ne mutshima.​—1 Kolinto 16:17, 18; Filipoi 2:3.

23. Kuikala ne Yezu kuakalongesha bayidi dilongesha kayi dia mushinga ne kuakabambuluisha bua kujingulula malu kayi?

²³ Kabidi, bantu ba bungi bakamona mushinga wa kuikala mu buobumue ne Kristo ne kuikala ne lungenyi luvuaye nalu. Wakambila bayidi bende ne: ‘Ngakunusua bu muakunsua Tatu, shalayi mu dinanga dianyi. Binuatumikila mikenji yanyi, nenushale mu dinanga dianyi, bu mungakutumikila mikenji ya Tatu wanyi, ne mundi nshala mu dinanga diende.’ (Yone 15:9, 10) Bikalabu bavua basue kupeta diakalenga mu mudimu wabu uvuabu benzela Nzambi, bavua ne bua kutumikila ne tshisumi malu avuabu balongele kudi Yezu mu diyisha ne dilongesha bantu lumu luimpe lua malu malenga enza Nzambi ne mu malanda abu ne balela ne balunda babu. Pavua bana betu benda bavula mu bisumbu, bavua ne bua kuikala bavuluka misangu yonso ne: njila wende ke njila muakane. Malu akalongeshaye ke avua bulelela, ne nsombelu wakamumonabu nende ke uvua bushuwa nsombelu wa kuidikija.​—Yone 14:6; Efeso 4:20, 21.

24. Mmalu kayi a mu tshilejilu tshia Yezu atudi ne bua kulonda?

²⁴ Bu muudi welangana meji mpindieu bua amue malu atudi balonge, udiku umona miaba iudi mua kulongolola anyi? Udi witaba ne: Yezu uvua misangu yonso wela meji, ulongesha ne wenza malu mu mushindu muakane anyi? Nanku, ikala ne dikima. Udi utukankamija ne mêyi aa: ‘Binuamanya malu aa, nenuikale ne disanka binuaenza.’​—Yone 13:17.

[Mêyi adi kuinshi]

Newandamune munyi?

• Buebe wewe, kuikala muyidi wa Yezu kudi kumvuija tshinyi?

• Mmushindu kayi uvua Yezu wangata bantu?

• Ntshinyi tshitudi mua kulongela ku mushindu uvua Yezu ulongesha?

• Nku tshinyi kuvua Bafalese bashilangane ne Yezu?

[Nkonko ya dilonga]

[Bimfuanyi mu mabeji 18, 19]

Mushindu uvua Yezu wangata bantu uvua mushilangane bikole ne mushindu uvua Bafalese babangata!