Lumu luimpe lua Bukalenge ntshinyi?

Tshidimu tshishale, mu matunga 235, bantu 6 035 564 bakulumpe ne bana bavua benze mêba 1 171 270 425 bua kuambila bantu bualu bualu. Bavua kabidi babanyine bantu mikanda mipite pa miliyo 700 bua kulumanyisha ne kulumvuija bantu. Bavua babanye kabidi binunu ne binunu bia bande ya kuteleja ne ya video bua kulumuangalaja. Ndunganyi luine “elu”?

“ELU,” mmumue ne: lumu luimpe lua Bukalenge bua Nzambi. Bulelela, katshia kabatu banji kuyisha ‘lumu luimpe lua Bukalenge’ miaba ya bungi mutudi tubimona lelu’eu nansha.​—Matayo 24:14.

Bantu bonso badi benza mudimu eu wa kuyisha ne kulongesha pa buloba bujima mbena budisuile. Patudi tubatangila tshianana, badi bamueneka anu bu bantu badi kabayi bakumbanyine mudimu eu to. Kadi ntshinyi tshidi tshibapesha dikima ne tshibambuluisha bua kuenza mudimu bimpe? Tshintu tshimue tshinene mbukole budi nabu lumu luimpe lua Bukalenge, bualu ndumu ludi luamba bualu bua mabenesha apeta bantu. Mabenesha aa ke adi bantu bonso bakeba: disanka, kakutshiyi lutatu bua kupeta mfranga, mbulamatadi mulenga, ditalala ne bukubi, ne tshintu tshikuabu tshinene tshitu bantu ba bungi kabayi batamba kuitaba: muoyo wa tshiendelele! Elu ke lumu luimpe ludibu bambila bantu badi bakeba kumanya bua tshinyi badi ne muoyo. Udi mua kupeta mabenesha onso aa ne makuabu kabidi biwitaba ne biwatumikila lumu luimpe lua Bukalenge ludibu bamanyisha.

Bukalenge ntshinyi?

Kadi Bukalenge budibu bayisha bu lumu luimpe ntshinyi? Mbukalenge butubu balongeshe bantu miliyo mivule bua kulomba mu miaku idi mimanyike ya se: ‘Tatu wetu udi mu diulu, banemeke dîna diebe. Bukalenge buebe bulue. Benze pa buloba bu muudi musue bu mudibu benza mu diulu.’​—Matayo 6:9, 10.

Mbukalenge buakambabu kudi Danyele muprofete muena Ebelu kukadi bidimu bipite pa 2 500, pakafundaye ne: ‘Mu matuku a bakalenge aba Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’​—Danyele 2:44.

Nenku, lumu luimpe ndua Bukalenge anyi mbulamatadi wa Nzambi wikala mua kumbusha bubi buonso ne wakokesha buloba bujima mu ditalala. Nebukumbaje dijinga divua nadi Mufuki ku ntuadijilu bua bantu ne buloba.​—Genese 1:28.

 “Bukalenge bua diulu bukadi pabuipi”

Kukadi kupite bidimu bu 2 000, bakamanyisha bantu lumu luimpe lua Bukalenge dia nzanzanza kudi muntu uvua mudilambule kudi Nzambi uvua bantu ba bungi bamanyine ku mvuadilu wende ne ngikadilu yende. Muntu au uvua Yone Mubatiji, muana wa Zakâya (muakuidi muena Yuda) ne Elisabeta. Yone uvua muvuale tshilamba tshienza ne miosa ya kamelu, ne mukaba wa tshiseba mu tshimonu anu muvua muprofete Eliya uvua tshimfuanyi tshiende. Kadi mukenji uvuaye umanyisha ke uvua ukoka ntema ya bantu ba bungi. Uvua wambila bantu ne: “Kudimunayi mioyo yenu, bualu bua Bukalenge bua diulu bukadi pabuipi.”​—Matayo 3:1-6, Mukanda wa Mvidi Mukulu.

Bantu bavua Yone wambila aba bavua bena Yuda, bavua badiamba muvuabu batendeledi ba Yehowa, Nzambi mulelela. Bidimu bu 1 500 bikavua bipite pavua tshisamba tshiabu tshidie tshipungidi tshia Mikenji yakabapeshabu kudi Mose. Mu Yelushalema mutshivua ntempelo mutambe bulenga, muvuabu bafidila milambu ivua Mikenji ibalomba. Bena Yuda bavua bela meji ne: ntendelelu wabu uvua muakane ku mêsu kua Nzambi.

Kadi pakateleja bantu diyisha dia Yone, bamue bakabanga kujingulula ne: Nzambi kavua wangata ntendelelu wabu bu ntendelelu muakane to. Nkindi ne bilele bia bena Gelika bikavua bibuele mu malongesha a ntendelelu wa bena Yuda. Mikenji ivua Nzambi nkayende mubapeshile ku bianza bia Mose bakayikonyangaja, ne kuyivuija mene kayitshiyi ne mushinga bualu bakayisambakaja ne mayisha ne bilele bia bantu. (Matayo 15:6) Bantu ba bungi kabatshivua kabidi batendelela Nzambi mu mushindu uvua umusankisha bualu bavua babapambuishe kudi balombodi babu bavua ne mitshima mipape ne kabayi luse. (Yakobo 1:27) Bavua ne bua kudilengeja ku mpekatu ivuabu benzele Nzambi ne tshipungidi tshia Mikenji kabidi.

Tshikondo atshi, bena Yuda ba bungi bavua bindile Masiya mulaya anyi Kristo, nunku bamue bavua badikonka bua Yone ne: “Yeye mene ke Kristo anyi?” Kadi Yone wakabenga, kubatumaye kudi muntu mukuabu wakambaye ne: “Tshiena muakanyine mua kusulula nshinga ya ku bisabata biende.” (Luka 3:15, 16, MMM) Yone wakaleja balongi bende Yezu wamba ne: ‘Tangilayi Muan’a mukoko wa Nzambi, udi umbusha bubi bua ba pa buloba!’​—Yone 1:29.

Alu luvua lumu luimpe bushuwa, bualu Yone uvua uleja bantu bonso njila wa muoyo ne wa disanka: ke Yezu, muntu ‘udi umbusha bubi bua ba pa buloba.’ Bu mudi bantu bonso bikale ndelanganyi ya Adama ne Eva, bonso mbaledibue anu mu bupika bua mpekatu ne lufu. Lomo 5:19 udi umvuija ne: ‘Bu muakavuijibua ba bungi bantu babi bua bupidia bua muntu umue [Adama], nunku ba bungi nebavuijibue bakane bua kutumikila kua muntu umue [Yezu].’ Bu muvua Yezu muikale bu muan’a mukoko wa kulambula, uvua ne bua ‘kumbusha bubi’ ne nsombelu wa lutatu udi nende bantu. Bible udi uleja ne: ‘Difutu dia bubi ndufu, kadi dipa dia luse dia Nzambi mmuoyo wa tshiendelele mu Kristo Yezu Mukalenge wetu.’​—Lomo 6:23.

 Bu muvua Yezu kayi ne bubi ne muikale muntu mutambe bunene wa katshia ne katshia, wakatuadija mudimu wa diyisha lumu luimpe. Bible udi ulonda mu Mâko 1:14, 15 ne: ‘Pakakuatabu Yone, Yezu wakalua mu Galela, wenda wambila bantu lumu luimpe lua Nzambi, wamba ne: Matuku akukumbana, bukalenge bua Nzambi budi pepi; kudimunayi mitshima yenu, nuitabuje lumu luimpe.’

Bantu bavua bateleje ne bitabuje lumu luimpe luvua Yezu uyisha bakapeta mabenesha a bungi. Yone 1:12 udi wamba ne: ‘[Yezu] wakapa bonso bakamuitabuja bukole bua kuluabu bana ba Nzambi, buobu mene badi bitabuja dîna diende.’ Bu muvuabu bana ba Nzambi, bavua ne mushindu wa kupeta difutu dia muoyo wa tshiendelele.​—1 Yone 2:25.

Kadi diakalenga dia kupeta mabenesha a Bukalenge kadivua anu kudi bantu ba mu bidimu lukama bia kumpala nansha. Anu mutudi baleje ku ntuadijilu, badi bamanyisha lumu luimpe lua Bukalenge lelu pa buloba bujima. Nenku kutshidi mushindu wa kupeta mabenesha a Bukalenge. Kadi ntshinyi tshiudi ne bua kuenza bua wewe kupeta pebe mabenesha aa? Tshiena-bualu tshidi tshilonda netshiumvuije muanda eu.