Difesto dia Nowele ndifesto dia bena Kristo anyi?

NOWELE ukadi pabuipi. Wewe ne dîku dienu ne balunda bebe, ntshinyi tshinudi nutekemenaku mu Nowele? Ntshibilu tshia malu a nzambi anyi peshi udi anu tshikondo tshia kuenza fete ne kutshionkomoka? Ntshikondo tshia kuelangana meji bua diledibua dia Yezu Kristo anyi peshi ntshia kubenga kutangila tshidi mikenji ya bena Kristo yamba?

Bua kuandamuna nkonko eyi, ikala mumanye ne: malu atubu benza mu Nowele adi mua kushilangana bilondeshile muaba udi muntu musombele. Tshilejilu, mu ditunga dia Mexique ne mu matunga makuabu a mu Amerike wa ku Sud, Nowele utu ne dikuabu dîna. Badi bamubikila ne: La Navidad peshi Diledibua. Nowele ne La Navidad bidi bimvuija diledibua dia Kristo. Kadi anji anyishaku tumone amue malu atu enzeka dia Nowele mu Mexique. Malu aa adi mua kukupesha lungenyi pa bidi bitangila fete utu wenzeka ku ndekelu kua tshidimu eu.

Difesto dia Posada, dia “bena meji basatu” ne dia Nacimiento

Masanka a mafesto a posada atu atuadija dia 16 Tshisua-munene. Mukanda mukuabu udi umvuija ne: “Ntshikondo tshia mafesto a posada, matuku tshitema a disanka divule kumpala kua Muladilu wa Nowele, atu avuluija muvua Yosefe ne Mariya benda batambakana nkayabu mu tshimenga tshia Beteleheme ne dîba diakapetabu muntu wakabambuluisha ne kubapeshaye muaba wa kutudila. Balela ne balunda batu batuilangana butuku bua kuenza manaya a malu akenzeka matuku a kumpala kua diledibua dia Kristo.”​—Mexico’s Feasts of Life.

Pa tshibidilu bantu tshisumbu batu bambula tshimfuanyi tshia Mariya ne tshia Yosefe batangile nabi ku nzubu kampanda benda bimba misambu ne bakeba muaba wa kutudila, anyi posada. Bantu badi mu nzubu badi bapunguluja pabu too ne padibu bitabila benyi badi pambelu bua kubuela mu nzubu. Pashishe fete udi utuadija. Pa tshibidilu mu fete amu mudi bamue bantu (basuika bilamba ku mêsu bakuate mitshi ku bianza) baya muntu ku muntu bua kuteta kutayisha dibungu dinene dilembeleja ku muonji (dibikila ne: piñata). Padibu baditayisha, badi mu fete eu badi bunguija bombo, bimuma ne bintu bikuabu bivua munda muadi. Mpindieu kudia, kunua, mijiki ne maja bituadija. Kadi lelu’eu, kabatu nangananga bimba kabidi misambu ne bambula bimfuanyi to, anu dienza dia fete ke didi dishale. Fete muanda-mukulu ya posada itu yenzeka kubangila mu dia 16 too ne dia 23 Tshisua-munene. Mu dia 24, batu basekelela Nochebuena (Muladilu wa Nowele), balela batu benza muabu muonso bua kutuilangana bua kudia biakudia bilongolola anu bua dituku adi.

Mutantshi eu Tshidimu Tshipiatshipia tshituadija, tshitubu basekelela ne fete ya mitoyi ya bungi menemene. Dilolo dia matuku 5 a ngondo wa kumpala, batu bamba mudi “bena meji basatu” (anyi Tres Reyes Magos) batuadila bana bintu bia kunaya nabi. Masanka atu ajika ne fete wa mu dituku 6 dia ngondo wa kumpala, patubu badisha bantu kato ka tshijengu kadibu babikila ne: rosca de Reyes. Mu kato emu mutu ka-popi ka Yezu muikale muana mutoke. Muntu udi upeta ka-popi aka udi ne bua kuenzeja fete wa ndekelu dia matuku 2 a ngondo muibidi. (Miaba mikuabu kutu tu-popi tukese tusatu, tuleja “bena meji basatu.”) Wewe nkayebe udi umona ne: fete ya Nowele eyi idi anu ilunguluka kayiyi ijika.

Nacimiento (anyi Dinaya dia Diledibua) utu  wenzeka bikole mu tshikondo etshi. Mmalu kayi atu enzekamu? Pambelu miaba idi bantu ba bungi, nansha mu bitanda bia nzambi ne mu nzubu ya bantu, batu batuadija kuenza manaya ne mpingu (minene anyi mikese) mienza ne mabumba, mitshi peshi dima. Mpingu eyi idi ileja Yosefe ne Mariya batue binu kumpala kua tshidilu tshia nyama, muana mutoke muladikamu. Misangu mivule kutu mpingu mikuabu ileja balami ba mikoko ne “Bena meji” (Los Reyes Magos). Badi benza muaba wa kunayila muenze bu tshikumbi tshia nyama, muikale imue nyama. Kadi lupingu ludi ne bualu muaba eu ndua muana mutoke, ludibu babikila mu tshiena-Espagne ne: el Niño Dios (Nzambi Muana). Batu batekamu imue misangu lupingu lua mushinga elu dia Muladilu wa Nowele.

Tukonkononayi bimpe bimpe malu atu enzeka dia Diledibua

Mukanda mukuabu udi wamba bua mushindu utubu basekelela Nowele pa buloba bujima ne: “Malu a bungi adibu benza mu Nowele mpindieu adi bitendelelu bia bena Kristo biangate kaavua matuadije ne Nowele to, kadi bavua baenza kudi bantu ba kumpala kua Buena-Kristo ne ki nga Buena-Kristo to. Satirnale (fete wa bena Lomo utubu benza munkatshi mua ngondo wa 12) ke wakafila njila wa malu a bungi a masanka atu bantu benza mu Nowele. Tshilejilu, ku fete eu ke kudi bantu bangatshile bilele bia dienza fete ya biakudia bia dinono, dipeshangana tudo ne ditemesha buji.”​—The Encyclopedia Americana.

Mu Amerike wa ku Sud, bantu batu balonda malu atubu benza bua Diledibua aa, basakidilaku ne makuabu. Pamu’apa udi mua kudikonka ne: ‘Malu aa mmumbukile penyi?’ Bua kuamba bulelela, bantu bavule badi basue kulamata Bible badi bitaba ne: bimue bilele mmikiya ya ba Azteke. Tshikandakanda tshikuabu tshia mu tshimenga tshia Mexico tshiakamba ne: “Badiambike ba mu biota bishilangane bakasanka bua muvua kalandriye ka fete ya mikiya ya bena Inde kapetangana ne kalandriye ka ntendelelu wa bena Katolike, ke bua tshinyi bakangata dipetangana edi bu mushindu wa kutumabu nawu mudimu wabu wa dilongesha ne wa bu-misionere kumpala. Bakapingaja mafesto menzela nzambi ya bena Kristo pa muaba wa malu avuabu benza bua kuvuluka nzambi ya kumpala kua kukuatabu Amerike ku bupika; bakasambakaja mafesto a ku Mputu ne mafesto a bena Inde aa, ke  kudi kupatukile malu ne bilele bisambakane, kudi miaku ya tshiena-Mexique eyi mifumine.”​—El Universal.

Mukanda mukuabu udi umvuija ne: “Ku ntuadijilu bavua benza manaya a Diledibua mu musekelelu wa Nowele . . . Batu bamba ne: Saint Francis ke wakabangisha dinaya dia Diledibua [dia mu tshidilu tshia nyama].” (The Encyclopedia Americana) Bavua benza manaya avua aleja diledibua dia Kristo aa mu bitendelelu ku ntuadijilu pakakuatabu ditunga dia Mexique ku bupika. Avua malongolola kudi badiambike badibu babikila ne: bafrere fransisken bua kulongesha bena Inde malu a Diledibua. Pashishe mafesto a posada akatangalaka mu bantu bikole. Nansha bamanye anyi katuyi bamanye tshiakapatuilabu mafesto a posada, mushindu udibu baenza lelu udi usokolola tshidiwu. Wewe mu Mexique tshikondo etshi, udi mua kumona anyi kujingulula bualu buvua mufundi mukuabu wa tshikandakanda tshia El Universal muleje mu mêyi ende a se: “Mafesto a posada, avua mikale mushindu wa kutuvuluija baledi ba Yezu benda bakeba muaba wa kutudila uvuabu mua kulelela Nzambi Muana, akadi lelu anu matuku a kukuatshika maluvu, a kuenza malu kunekesha, budiavi, a kuenza malu a bulembakane ne a kubunda bilumbu bitule bipuwe.”

Lungenyi lua dinaya dia nacimiento luakatuadija mu bikondo bivua Mexique ku bupika, lufumine ku manaya avuabu benza kumpala mu bitendelelu. Nansha mudi bamue bantu bamona dinaya edi dibasankisha, didiku dileja bimpe menemene tshidi Bible ulongesha anyi? Lukonko elu ludi ne mushinga. Pavua bantu badibu babikila ne: bena meji abu (pabu bikale bena lubuku lua mitoto) baye bua kumona Yezu ne baledi bende, kabatshivua kabidi mu tshikumbi tshia nyama to. Matuku akavua mapite, bakavua basombele mu nzubu. Nebikusankishe pawapeta diumvuija edi mu malu mafundisha kudi Nzambi adi mu Matayo 2:1, 11. Neumone kabidi ne: Bible kêna utela bungi bua bena lubuku lua mitoto bavua bayeku to. *

Mu Amerike wa ku Sud, pamutu pa bena meji basatu batu buobu ne Santa Claus (anyi Père Noël mu Mfualansa). Kabidi, anu mutubu benza mu matunga makuabu, baledi bavule batu basokoka bintu bia bana kunaya nabi mu nzubu. Pashishe mu dinda dia 6 ngondo wa kumpala, bana badi babikeba, bienze anu bu se: bena meji basatu abu ke badi balue nabi. Edi ke dîba ditu bapanyishi ba bintu bia kunaya nabi bapeta makuta a bungi, ne bamue mbapete makuta mapite bungi ku bintu bidi bantu bavule bamona ne: mbintu bia tshidingishilu patupu. Bantu bungi tshianana, nansha bana bine kabidi kabatshiena bitaba muanu wa bena meji basatu nansha. Nansha mudi banga bantu banyingalala bua mukadi bantu bavule benda babenga muanu eu, ntshinyi tshidi muntu mua kuipatshila bua kupeta mu bintu bia tshidingishilu bidibu benza anu bua kutungunuja bilele bia bantu ne malu a bungenda?

Bena Kristo ba kumpala kabavua badia Nowele to. Mukanda mukuabu udi wamba bua muanda eu ne: “Bena Kristo ba mu ekeleziya wa mu bidimu nkama bia kumpala kabavua benza musekelelu eu to, bualu bena Kristo bonso bavua ne tshibidilu tshia kusekelela lufu lua bamue bantu banene pamutu pa kusekelela diledibua diabu.” Bible udi uleja muvua bantu ba bisamba bia bende basekelela mifikilu ya diledibua, kadi ki mbatendeledi balelela ba Nzambi nansha.​—Matayo 14:6-10.

Kadi bualu ebu kabuena bumvuija ne: kulonga anyi kuvuluka malu malelela avua menzeke pakaledibua Muana wa Nzambi nkubi to. Bible udi ulonda malu malelela adi mua kuambuluisha bonso  badi basue kuenza disua dia Nzambi bua kujingululabu malu bimpe ne kulongesha malu a mushinga.

Tshidi Bible wamba bua diledibua dia Yezu

Udi mua kupeta malu malelela adi atangila diledibua dia Yezu mu mukanda wa Matayo ne wa Luka. Mikanda eyi idi ileja muvua muanjelo Gabriele muye kudi nsongakaji utshivua mujike diende Mariya, mu musoko wa Nazaleta mu Galela. Uvua mumutuadile mukenji kayi? ‘Mona, wewe newimite difu, neulele muana mulume, neumuinyike ne: Yezu; yeye neikale munene, nebamuinyike dîna ne: Muana wa Udi Mutambe Bunene wa mu diulu; Mukalenge Nzambi neamupe nkuasa wa butumbi wa tatu wende Davidi; neikale mukalenge wa nzubu wa Yakoba tshiendelele; bukalenge buende kabuena ne tshishikidilu.’​—Luka 1:31-33.

Mukenji eu wakapampakaja Mariya bikole. Bu muvuabu kabayi banji kumusela, wakamba ne: ‘Bualu ebu nebulue munyi, meme tshiyi muanji kumanya mulume?’ Muanjelo kumuandamuna ne: ‘Nyuma muimpe nealue kuudi, ne bukole bua Udi Mutambe Bunene wa mu diulu nebukubuikile bu ditutu; nebinyike muana wa tshijila uwalela ne: Muana wa Nzambi.’ Pakajingulula Mariya ne: bualu abu buvua disua dia Nzambi, wakamba ne: ‘Mona, mukaji mupika wa mukalenge; bangenzele bu muwakuamba.’​—Luka 1:34-38.

Muanjelu wakamanyisha Yosefe bualu bua diledibua dia tshishima adi bua kabengi Mariya to, bualu ke tshikavuaye mulongolole bua kuenza pakamanyaye ne: Mariya uvua ne difu. Nanku Yosefe wakitaba bua kuambula bujitu bua kulama Muana wa Nzambi.​—Matayo 1:18-25.

Pashishe, mukenji wakela Kaisa Augusto wakenzeja Yosefe ne Mariya bua kumbuka mu Nazaleta (mu Galela) kuya ku Beteleheme (mu Yudaya), musoko wa bankambua babu, bua kudifundisha mêna ku mikanda ya mbulamatadi. ‘Pakadibu aku, matuku akakumbana a kulelaye. Wakalela muanende mulume, muan’a bute, yeye wakamujingila tshilulu, wakamuladika mu tshidilu tshia nyama, bualu bua mu nzubu wa tshilala benyi kamuakadi muaba.’​—Luka 2:1-7.

Luka 2:8-14 udi umvuija malu akenzeka pashishe ne: ‘Mu luseke alu muakadi balami ba mikoko, balala mu mpata, balama mikoko yabu mu butuku. Muanjelo wa Mukalenge wakimana pabuipi nabu, butumbi bua Mukalenge buakabatemena; bakatamba kutshina. Muanjelo wakabambila ne: Kanutshinyi, bualu bua ngakunuluila ne lumu luimpe lua disanka dinene, nedikale kudi bantu bonso; lelu bakunulelela Musungidi mu musoko wa Davidi, yeye udi Kristo Mukalenge. Etshi ntshimanyinu kunudi ne: nenusangane muana mujingila tshilulu, mulale mu tshidilu tshia nyama. Tshisumbu tshia masalayi a mu diulu tshiakadisangisha lukasa ne muanjelu, batumbisha Nzambi, bamba ne: Butumbi buikale kudi Nzambi mu diulu, ditalala dikale panshi pa buloba munkatshi mua bantu badi basankisha Nzambi.’

Bena lubuku lua mitoto

Matayo udi uleja ne: bena lubuku lua mitoto bakafumina ku Est bakalua mu Yelushalema benda bakeba muaba uvuabu balele Mukalenge wa bena Yuda. Mukalenge Helode uvua ujinga kumanya bualu abu bilenga, kadi kavua ne meji mimpe to. ‘Wakabatuma ku Beteleheme, wakamba ne: yayi bienu, nulonde bualu bua muana bitulu bitulu; panuamusangana, nulue kundi ne dîyi, nunku meme kabidi nendue kumukukuila.’ Pakaya bena lubuku lua mitoto abu kupeta muana mukese, ‘bakabulula bibutshilu biabu, bakamusawila bintu, ngolo ne manananshi ne mula.’ Kadi kabakapingana kudi Helode to. ‘Bakabadimuija kudi Nzambi mu tshilota ne: kanupinganyi kudi Helode.’ Nzambi wakatuma muanjelu bua kuambila Yosefe meji avua nawu Helode. Pakumvua Yosefe ne Mariya nanku, bakanyemena ku Ejipitu ne muanabu. Pashishe, bu muvua Helode Mukalenge wa tshikisu ukeba bua kushipa Mukalenge mupiamupia eu, wakatuma dîyi bua kushipabu bana ba balume ba mu Beteleheme. Bana kayi? Kutuadijila ku ba bidimu bibidi kupueka.​—Matayo 2:1-16.

Ntshinyi tshidi muyuki eu utulongesha?

Bena lubuku lua mitoto bavua balue abu (nansha mutudi katuyi bamanye bungi buabu to) kabavua batendelela Nzambi mulelela to. Nkudimuinu mukuabu wa Bible wa mu 1989 (La Nueva Biblia Latinoamérica) udi ne diumvuija edi kuinshi kua dibeji ne: “Bena meji kabavua bakalenge to, kadi bavua bena lubuku ne bakuidi ba ntendelelu wa bampangano.” Bavua balua bilondeshile dimanya diabu dia mitoto divuabu balamate. Bu Nzambi musue kubaludika bua kufikabu muaba uvua muana, bavua mua kuikala bafike muaba au kabiyi  bibalomba bua kuanji kupitshila mu Yelushalema anyi kua Helode nansha. Kunyima, Nzambi wakenza bua bapinganyine mu njila mukuabu bua kukuba muanende.

Tshikondo tshia Nowele, misangu mivule bantu batu bakondakaja muyuki eu ne mianu ne malu mafuikakaja atu ajibakaja muanda udi ne mushinga wa bungi: muana eu uvua muledibue bua kuikala Mukalenge munene, anu muvuabu bamanyishe Mariya ne balami ba mikoko. Yezu Kristo katshiena kabidi muana to. Ukadi Mukalenge; udi ukokesha mu Bukalenge bua Nzambi bukadi pa kulua mutantshi mukese eu bua kubutula makokeshi onso adi abengangana ne disua dia Nzambi, pashishe Yezu neajikije ntatu yonso idi nayi bantu. Bukalenge abu ke bututu tulomba mu disambila dia Tatu wetu.​—Danyele 2:44; Matayo 6:9, 10.

Mêyi avua banjelu bambile balami ba mikoko adi atulongesha ne: mbakanguile bantu bonso badi bitaba bua kuteleja mukenji wa lumu luimpe njila wa kupetela lupandu. Aba badi Nzambi wanyisha ke badi balua ‘bantu badi bamusankisha.’ Nekulue ditalala pa buloba bujima mu Bukalenge bua Yezu Kristo, kadi bantu badi ne bua kuitaba bua kuenza tshidi disua dia Nzambi bua kudipeta. Nowele utuku wambuluisha bua kukumbaja bualu ebu anyi? Patubu bamuenza, batu bamuenza ne dijinga edi anyi? Bantu bavule ba bulelela badi basue kulonda tshidi Bible ulongesha badi bamona ne: diandamuna dia lukonko elu nditoke.​—Luka 2:10, 11, 14.

[Mêyi adi kuinshi]

[Kazubu mu dibeji 4]

BAMUE BADI MUA KUKEMA

Mufundi Tom Flynn wakaleja malu aa mu mukanda wende mukuabu (The Trouble With Christmas) panyima pa bidimu bivule bia dikeba bua kumvua malu adi atangila Nowele:

“Bilele bipite bungi bitudi tubueja mu Nowele lelu mbifumine ku bilele bia ntendelelu wa bantu ba bisamba bia bende ba kumpala kua bena Kristo. Bimue bia kudibi bidi bitangila malu a bantu, a dimanyangana dia mulume ne mukaji peshi a bintu bifuka adi mua kufikisha bantu balonge mukanda badi balondesha malu a dishidimuka dia buena lelu ku dilekela bilele ebi musangu umue padibu bajingulula kudibi bifumine.”​—Dibeji dia 19.

Panyima pa Flynn mumane kufila bijadiki bungi tshianana bia muanda eu, udi upingana ku bualu bunene bua se: “Bumue bua ku malu manene a Nowele adi enza tuseku budi se: malu adi enzekamu kaena a buena-Kristo nansha kakese to. Pa kumbusha malu avua enzeka kumpala kua Buena-Kristo adimu, mavule a ku adi mashale aa nga panyima pa Buena-Kristo, ki nga Buena-Kristo bulelela to.”​—Dibeji dia 155.

[Tshimfuanyi mu dibeji 7]

Dimanyisha dia diledibua dia Yezu diakaleja mudimu uvuaye ne bua kulua kuenza bu Mukalenge musungula kudi Nzambi