1-2. Ntshinyi tshidi tshienza bua batendeledi ba Nzambi bikale ne disanka? (Yakobo 1:​22-25)

 YEHOWA ne Muanende munanga mbasue bua tuikale ne disanka. Mufundi wa Misambu 119:2 udi wamba ne: “Ba diakalenga mbadi batumikila mavuluija ende, badi bamukeba ne muoyo wabu mujima.” Yezu wakalua pende kutujadikila, wamba ne: “Bantu badi bateleja dîyi dia Nzambi ne badilama ke ba diakalenga!”—Luka 11:28.

² Tutu ne disanka bualu tudi batendeledi ba Yehowa. Kudi malu a bungi adi atusaka bua kuamba nanku. Kadi bualu butudi katuyi ne bua kulengulula budi ne: tudi ne bua kubala Dîyi dia Nzambi pa tshibidilu ne kudienzeja bua kuditumikila.—Bala Yakobo 1:​22-25.

3. Patudi tutumikila bitudi tubala mu Dîyi dia Nzambi, bidi bituambuluisha mushindu kayi?

³ Patudi ‘tulua benji ba dîyi’, bidi bituambuluisha mu mishindu ya bungi. Tudi bamanye bimpe ne: ebu ke bualu bunene butudi ne bua kuenza bua kusankisha Yehowa. Dîba adi bidi bitupetesha petu disanka. (Muam. 12:13) Tuetu tutumikila malu atudi tulonga mu Dîyi dia Nzambi, netuikale mu malanda mimpe ne bena mu dîku dietu ne bena mu tshisumbu tshietu. Pamuapa diatumikila dikadi dikuambuluishe mushindu au. Bualu bukuabu, kuatumikila kudi kutuepula ku ntatu itu ifikila bantu badi kabayi batumikila mikenji ya Nzambi. Tudi tuitaba tshivua mukalenge Davidi muambe. Yeye mumane kutela mikenji, mêyi matuma, ne mêyi a dilumbuluisha a Yehowa, wakajikija, wamba ne: “Kubilama kudi ne difutu dinene.”—Mis. 19:​7-11.

4. Bua tshinyi kabitu anu bipepele bua kulua benji ba dîyi?

 ⁴ Mu bulelela, kabitu anu bipepele bua kulua benji ba dîyi to. Nansha mutudi ne bia bungi bia kuenza, tudi ne bua kuditekela dîba dia kubala Bible ne kumulonga bua tumanye tshidi Yehowa musue bua tuenze. Nunku tutangilulayi imue ngenyi idi mua kutuambuluisha bua kuikala ne tshibidilu tshia kumubala. Netumone kabidi tshidi mua kutuambuluisha bua kuelangana meji a malu atudi tubala ne mushindu wa kuatumikila.

DITEKELA DÎBA DIA KUBALA DÎYI DIA NZAMBI

5. Mmalu kayi atu atuanganta dîba dia bungi?

⁵ Batendeledi ba Yehowa ba bungi batu ne bia bungi bia kuenza. Tutu tupitshisha dîba dia bungi mu malu adi Bible wamba ne: nga mushinga. Tshilejilu, ba bungi ba kutudi batu benza mudimu bua kudiambuluisha ne kuambuluisha bena mu mêku abu. (1 Tim. 5:8) Bena Kristo ba bungi batu batabalela balela babu badi basama anyi bakadi bakulakaje. Tuetu bonso tudi ne bua kutabalela makanda etu a mubidi; mbualu butu butulomba dîba. Pa kumbusha malu atudi batele aa, tudi kabidi ne malu a kuenza mu tshisumbu. Mudimu munene utudi nawu ngua kuyisha ne tshisumi. Mpindieu ntshinyi tshiudi ne bua kuenza bua kupeta dîba dia kubala Bible dituku dionso, kuelangana meji a malu audi ubala, ne kuatumikila?

6. Ntshinyi tshiudi ne bua kuenza bua wikale anu ubala Bible? (Tangila kabidi tshimfuanyi.)

⁶ Dibala dia Bible mbumue bua ku malu adi ne mushinga buetu tuetu bena Kristo; nunku tudi ne bua kuenza muetu monso bua kumubala. (Filip. 1:10) Mukanda wa misambu udi utuadija ne mêyi adi aleja tshidi muntu mua kuenza bua kupeta diakalenga a ne: “Udi ubala mikenji Yende ne dîyi dia panshi panshi munya ne butuku.” (Mis. 1:​1, 2) Mbiumvuike bimpe ne: mêyi aa adi atulomba bua kuditekela dîba dia kubala Bible. Ndîba kayi ditambe buimpe ditudi mua kubala Bible? Mandamuna neikale mashilangane bilondeshile muntu ne muntu. Kadi tudi mua kuandamuna mu tshikoso ne: ndîba diudi ne mushindu wa kumubala dituku  dionso. Muanetu wa balume mukuabu, diende Victor, udi wamba ne: “Ntu musue kubala Bible pa dinda, kadi tshitu musue kujuka pa bulalu mu dinda dinda to. Pabi ke dîba dituku kakuyi malu a bungi adi mua kumbueja mu ditanaji. Meji anyi atu mapole dîba adi, kabiyi mua kunkolela bua kuteka lungenyi kaba kamue to.” Bidi nanku buebe pebe anyi? Diebeja ne: ‘Ndîba kayi ditambe buimpe dindi mua kubala Bible?’

ELANGANA MEJI A BIUDI UBALA

7-8. Ntshinyi tshidi mua kuenza bua malu atudi tubala kaatambi kutuambuluisha?

⁷ Bulelela budi ne: tudi mua kuikala ne tshibidilu tshia kubala malu a bungi, kadi katuyi tuelela meji menemene to. Bikadiku bikufikile bua kubala bualu kampanda, katupa kakese pashishe wewe kupua bionso biuvua mubale abi muoyo anyi? Bikadi bitufikile tuetu bonso. Diakabi, bidi mua kutuenzekela kabidi nanku patudi tubala Bible. Pamuapa tudi mua kudifundila tshipatshila tshia kubala nshapita bungi kampanda ku dituku. Mbualu budibu mua kutuelela kalumbadi. Tudi ne bua kudifundila bipatshila ne kudienzeja bua kubikumbaja. (1 Kol. 9:26) Kubala Bible nkuenze anu bu kulabula tshintu; tuetu basue ne: kutuambuluishe bikole, tudi ne bua kuenza malu makuabu.

⁸ Fuanyikijabi bualu ebu mushindu eu: patu mvula uloka, utu wambuluisha bikunyibua bua kumenabi. Kadi yeye muloke wa bungi menemene mu dîba dikese, buloba butu butalala bikole. Dîba adi kabiakukengela ne: mukuabu aloke to, bualu buloba budi dijinga ne dîba dia kumina mâyi a mvula uvua muloke bua kuambuluisha bikunyibua bua kusampila. Bia muomumue, ki mbimpe tubale Bible lubilu lubilu katuyi ne dîba dia kuelangana meji bua kuvuluka malu atudi babale ne kuatumikila to.—Yak. 1:24.

9. Tuetu ne tshibidilu tshia kubala Bible lubilu lubilu, ntshinyi tshitudi ne bua kuenza?

⁹ Bitu bikufikila bua kubala Bible lubilu lubilu anyi? Biobi nanku, ntshinyi tshiudi ne bua kuenza? Bala bitekete bitekete. Dienzeja bua kuelangana meji a malu audi ubala anyi audi ufuma ku dibala. Ki mbikole to. Bualu wewe  mumone ne: mbikole, udi mufuane kumona kuelangana meji bu kutuma meji patupu ku biudi ubala. Udi mua kupangadija bua kupitshisha dîba dia bungi paudi udilongela bua umone mua kuelangana meji. Udi pamuapa mua kubala mvese mikese, bua upete dîba dia kuelangana meji a biudi mubale. Victor utukadi batele udi wamba ne: “Pantu mbala Bible, tshitu ngangata minite ya bungi to; ntu mbala nansha nshapita umue. Bu muntu mbala Bible mu dinda dinda, bitu bingambuluisha bua kuelangana meji a malu andi mubale munda mua dituku dijima.” Tshia mushinga nkumubala mu mushindu udi ukuambuluisha bua kuelangana meji a malu audi ubala.—Mis. 119:97; Tangila kazubu ka “ Nkonko ya kuelela meji.”

10. Fila tshilejilu tshia muudi mua kutumikila malu audi ulonga? (1 Tesalonike 5:​17, 18)

¹⁰ Nansha wewe ubala Bible tshikondo kayi ne upitshisha dîba dia bungi anyi dikese, ela meji a mushindu wa kutumikila malu audi ubala. Paudi umubala, diebeja ne: ‘Mmunyi mundi mua kutumikila bualu ebu lelu anyi matuku makese kumpala eku?’ Tshilejilu, tutekabi ne: udi ubala 1 Tesalonike 5:​17, 18. (Bala.) Wewe mumane kubala mvese ibidi eyi mujikije, udi mua kuimana katupa bua kuela meji, udiebeja ni utu usambila pa tshibidilu ne muoyo mujima. Udi kabidi mua kuela meji bua malu audi mua kuelela Yehowa tuasakidila. Pamuapa bidi mua kukuambuluisha bua umanye malu asatu a kuelela Yehowa tuasakidila. Nansha wewe wangata minite mikese bua kuelangana meji a malu audi ulonga mu Bible, nebikuambuluishe bua kulua muntu udi uteleja Dîyi dia Nzambi ne uditumikila. Wewe ubala mvese mikuabu mu mushindu wa muomumue eu, nansha mu minite mikese, nebikuambuluishe bikole! Tudi tukujadikila ne: neulue muenji wa Dîyi dia Nzambi. Kadi newenze tshinyi wewe umona bu ne: kudi malu a bungi audi ne bua kuakaja?

DIFUNDILA BIPATSHILA BIUDI MUA KUKUMBAJA

11. Bua tshinyi bidi mua kukutekesha mu mikolo wewe mumone ne: udi ne malu a bungi a kuakaja? Fila tshilejilu.

¹¹ Paudi ubala Bible, imue misangu udi mua kudiumvua mutekeshibue mu mikolo bualu udi mumone ne: kudi malu a bungi audi ne bua kuakaja. Ela meji ne: dimue dituku udi ubala mukenji udi ukandika disungulujangana. (Yak. 2:​1-8) Udi ufika ku dimona ne: mbimpe wakaje mushindu uutu wenzela bakuabu malu. Udi wangata mpindieu dipangadika dia kushintulula malu. Bimpe be! Pashishe, malaba udi ubala mvese udi uleja mushinga wa kulama ludimi. (Yak. 3:​1-12) Udi ujingulula wewe nkayebe ne: kutu misangu iutu wambangana mêyi mabi; udisuika mpindieu bua kutamba kuikala ne mêyi mimpe adi akoleshangana. Dituku didi dilonda, udi ubala bualu bua mu Bible budi bukudimuija bua kubenga kulua mulunda  wa malu a panu. (Yak. 4:​4-12) Udi umona ne: bidi bikengela usungule malu audi mua kujikija nawu lutetuku. Dituku dinayi, udi mua kudisangana ne malu mapite bungi a kuakaja, bikutekesha ne mu mikolo.

12. Dibala diebe dia Bible diodi dikuambuluishe bua kumanya malu audi ne bua kuakaja, bua tshinyi kuena ne bua kuteketa mu mikolo? (Tangila kabidi dimanyisha dia kuinshi kua dibeji.)

¹² Kuteketshi mu mikolo wewe umona ne: kudi malu a bungi audi ne bua kuakaja to. Paudi ujingulula ne: bidi bikengela wakaje malu, bidi bileja ne: udi ne didipuekesha ne meji mimpe. Muntu muena budipuekeshi utu ubala Bible ne meji a kuakaja bilema bidiye nabi. a Vuluka kabidi ne: kuvuala “bumuntu bupiabupia” mbualu butudi ne bua kutungunuka ne kuenza. (Kolos. 3:10) Ntshinyi tshiakuambuluisha bua kutungunuka ne kuikala muenji wa Dîyi dia Nzambi?

13. Mmunyi muudi mua kudifundila bipatshila biudi mua kukumbaja? (Tangila kabidi tshimfuanyi.)

¹³ Pamutu pa kukeba bua kutumikila musangu umue malu onso audi mubale, difundila tshipatshila tshia kukumbaja bumue anyi abidi. (Nsu. 11:2) Teta kuenza nansha nunku: enza liste wa malu audi ne bua kuakaja, wanji usungule bumue anyi abidi mu owu au; makuabu neulue kuakaja pashishe. Neutuadije ne buepi mu audi musungule au?

14. Mbipatshila kayi biudi mua kutuadija nabi?

¹⁴ Udi mua kutuadija ne tshipatshila tshidi tshipepele bua kukumbaja, anyi bualu buudi umona ne: bidi bikengela kuanji kubuakaja buobu. Wewe mumane kubusungula, enza makebulula mu mikanda yetu; kuenza pamuapa ku diambuluisha dia Index des publications des Témoins de Jéhovah anyi dia Mukanda wa makebulula  wa Bantemu ba Yehowa. Sambila bua bualu abu, ulomba Yehowa bua akupeshe “dijinga ne bukole bua kuenza malu adi amusankisha. (Filip. 2:13) Pashishe tumikila malu audi mubale. Wewe mufike ku dikumbaja tshipatshila tshiebe tshia kumpala, pamuapa nebitambe kukusaka bua kukumbaja tshikuabu, tuambe ne: wewe mufike kudishintuluka mu bualu kampanda, neudiumvue mukankamijibue bua kutungunuka ne kuakaja malu. Dîba adi, nebikale bipepele bua kuakaja malu makuabu.

ENZA BUA DÎYI DIA NZAMBI ‘DIKUATE MUDIMU MUNDA MUEBE’

15. Bua tshinyi bantu ba Yehowa mbashilangane ne bantu ba bungi batu babala pabu Bible? (1 Tesalonike 2:13)

¹⁵ Bamue bantu batu bamba mukadibu babale Bible misangu ya bungi. Kadi batu bitabuja malu adimu menemene anyi? Batu baatumikila anyi baalekela alombola nsombelu wabu anyi? Tòo (1 Tesalonike 2:13). Bantu ba Nzambi mbashilangane nabu bikole be! Tuetu tudi bu bena Kristo ba mu bidimu lukama bia kumpala bualu tudi tuitabuja Bible ‘bu mudiye mu bulelela dîyi dia Nzambi.’ Tutu kabidi tudienzeja bua kutumikila mibelu idimu.—Bala 1 Tesalonike 2:13.

16. Ntshinyi tshidi mua kutuambuluisha bua kulua benji ba Dîyi?

¹⁶ Kabitu anu bipepele bua kubala Dîyi dia Nzambi ne kuditumikila to. Bidi mua kutukolela bua kupeta dîba dia kubala Bible anyi bidi mua kutufikila bua kumubala lukasa lukasa, katuyi ne dîba dia kuelangana meji a bitudi babale to. Peshi tudi mua kudisangana ne malu a bungi a kuakaja, bitutekesha ne mu mikolo. Nansha nanku Yehowa neatuambuluishe. Netufike anu ku dimubala ne ku ditumikila malu adimu. Tuetu badisuike bua kuitaba bua Yehowa atuambuluishe, netulue benji ba dîyi, katuakulua bateleji badi bapua muoyo to. Kakuyi mpata, tuetu tubala Dîyi dia Nzambi ne tuditumikila, netuikale ne disanka dia bungi.—Yak. 1:25.