1. Mmalu kayi auvua mulonge pawakabanga kulonga Bible?

 UDI uvuluka malu onso auvua mulonge pauvua mutuadije kulonga Bible anyi? Pamuapa wakakema pawakamanya ne: Nzambi udi ne dîna. Wakumvua kabidi pamuapa disanka pawakamanya ne: Nzambi kena ukengesha bantu mu inferno wa kapia to. Pawakalonga ne: udi mua kumonangana ne balela bebe badi bafue ne kusomba nabu mu mparadizu pa buloba, pamuapa uvua musanke bikole.

2. Pakumbusha malu auvua mulonge mu Bible, mmushindu kayi mukuabu uudi muye kumpala? (Efeso 5:1, 2)

² Bu muuvua mulonge Dîyi dia Nzambi bikole, wakananga Yehowa bikole. Dinanga adi divua dikusake bua kutumikila malu auvua mulonge. Uvua wangata mapangadika mimpe mimanyine mu mêyi manene a mu Bible. Uvua muakaje ngelelu webe wa meji ne bienzedi biebe bualu uvua musue kusankisha Nzambi. Uvua widikija Tatuebe wa mu diulu anu mutu muana widikija muledi wende udi mumunange.​—Bala Efeso 5:1, 2.

3. Nnkonko kayi iudi mua kudiela?

³ Tudiebeja ne: ‘Ndi munange Yehowa bikole lelu kupita mumvua mumunange dîba dimvua mulue muena Kristo anyi? Katshia ngabatijibua, ntu ngela meji bu Yehowa ne ngenza malu bu yeye, nangananga mu tshilumbu tshia dinanga bena Kristo nanyi anyi?’ Wewe kutshiyi mumunange bikole, kuteketshi mu mikolo to. Bualu bua muomumue ebu buvua bufikile bena Kristo ba tshikondo tshia Yezu. Yezu kakababenga to. Kakukubenga pebe nansha. (Buak. 2:4, 7) Mmumanye ne: tudi mua kumunanga kabidi bikole bu kumpala.

4. Ntshinyi tshituamona mu tshiena-bualu etshi?

 ⁴ Mu tshiena-bualu etshi netumone mutudi mua kutungunuka ne kunanga Yehowa ne bantu bakuabu. Pashishe netumone amue malu mimpe atuikala tuetu ne bantu bakuabu mua kupeta patudi tunanga Yehowa ne bena Kristo netu bikole.

5-6. Nntatu kayi ivua mupostolo Paulo mupete mu mudimu wende? Kadi ntshinyi tshiakamuambuluisha bua kutungunuka ne kuenzela Yehowa mudimu?

⁵ Mupostolo Paulo uvua ne disanka bua muvuaye wenzela Yehowa mudimu, kadi uvua ne ntatu ya bungi ivuaye ne bua kutantamena. Misangu ya bungi uvua wenza ngendu mile, ne tshikondo atshi kabivua bipepele bua kuyenza to. Pavuaye mu ngendu ayi, kuvua misangu ivuaye “mu njiwu pa misulu” ne “mu njiwu ya kudi banyengianganyi ba bintu.” Kuvua kabidi misangu ivuabu bamukuma kudi baluishi. (2 Kol. 11:23-27) Bena Kristo nende kabavua bamuleja dianyisha misango yonso bua malu avuaye ubenzela to.​—2 Kol. 10:10; Filip. 4:15.

⁶ Ntshinyi tshiakambuluisha Paulo bua kutungunuka ne kuenzela Yehowa mudimu? Paulo uvua mulonge malu a bungi adi atangila ngikadilu ya Yehowa. Uvua mualonge mu Mifundu minsantu ne ku malu avua mamufikile. Wakatuishibua ne: Yehowa uvua mumunange. (Lomo 8:38, 39; Ef. 2:4, 5) Yeye kunanga pende Yehowa bikole. Kulejaye muvuaye mumunange “pa kukuatshila bansantu mudimu ne pa kutungunuka ne kubakuatshilawu.”​—Eb. 6:10.

7. Ngumue mushindu kayi utudi mua kunanga Yehowa bikole?

⁷ Bua kunanga Nzambi bikole, mbimpe tulonge Bible ne tshisumi. Paudi ubala Bible, keba bua kujingulula tshidi mvese yonso wamba bua Yehowa, udiebeje ne: ‘Mmunyi mudi muyuki undi mbala eu uleja ne: Yehowa mmunnange? Mmalu kayi adimu adi ansaka bua kumunanga?’

8. Mmunyi mudi disambila mua kutuambuluisha bua kunanga Nzambi bikole?

⁸ Bua tuetu kunanga kabidi Yehowa bikole, tudi ne bua kuikala ne tshibidilu tshia kumunzuluila muoyo wetu mu disambila. (Mis. 25:4, 5) Yehowa pende neandamune masambila etu. (1 Yone 3:21, 22) Khanh, muanetu wa bakaji wa mu Asie, udi wamba ne: “Malu amvua mulonge mu Bible ke akanji kunsaka bua kunanga Yehowa, kadi pangakamona muvuaye wandamuna masambila anyi ngakalua kumunanga bikole; kunsakabi bua kuenza malu avua amusankisha.” b

9. Mmunyi muvua Timote muleje ne: uvua munange bena Kristo nende bikole?

⁹ Bidimu ndambu Paulo mumane kulua muena Kristo, wakatuilangana ne nsonga mukuabu wa tshitembu, diende Timote. Timote uvua munange Yehowa ne batendeledi bende. Paulo wakambila bena Filipoyi bua Timote ne: “Tshiena ne muntu mukuabu udi ne lungenyi bu luende udi mua kuditatshisha bua malu anudi nawu ne muoyo mujima to.” (Filip. 2:20) Mu mvese eu, Paulo kena wakula bua muvua Timote mukumbane bua kulongolola malu anyi bua kuakula kumpala kua bantu to, kadi bidi bimueneka ne: tshivua tshimukemesha mmuvuaye munange bena Kristo nende. Kakuyi mpata, bisumbu bivua Timote ukumbula bivua bimuindila ne muoyo kuulu kuulu.​—1 Kol. 4:17.

10. Mmunyi muvua Anna ne bayende baleje muvuabu banange bena Kristo nabu?

¹⁰ Tuetu petu tudi tukeba mishindu ya  kuambuluisha bena Kristo netu. (Eb. 13:16) Tuangate tshilejilu tshia Anna utuvua bakuile mu tshiena-bualu tshishale. Panyima pa tshipepele tshikole tshivua tshitute, yeye ne bayende bakaya kutangila dîku kampanda dia Bantemu, kusanganabu ne: musaka wa nzubu wabu uvua musunsuke, bilamba biabu bitote ne manyanu. Anna udi wamba ne: “Tuakangata bilamba biabu, kubisukula ne kubipingaja bikoma bibunya bimpe. Buetu tuetu, kavua kabualu kakese katuvua benze, kadi kakenza bua tudie nabu bulunda bukole too ne lelu.” Anna ne bayende bavua babambuluisha bena Kristo netu bualu mbabanange.​—1 Yone 3:17, 18.

11. a) Mmunyi mudi bakuabu bumvua patudi tuleja mutudi babanange? b) Bilondeshile Nsumuinu 19:17, ntshinyi tshitu Yehowa wenza patudi tuleja mutudi banange bantu bakuabu?

¹¹ Tuetu banange bakuabu ne tubenzela malu mimpe, nebikale anu bamona mutudi tudienzeja bua kuidikija Yehowa. Badi kabidi mua kuleja dianyisha mu mushindu utuikala katuyi mua kumanya. Khanh utukadi batele udi uvuluka bimpe bantu bavua bamuambuluishe, wamba ne: “Ndi ne dianyisha dia bungi kudi bena Kristo nanyi ba bakaji bavua balua kungangata bua tuye nabu mu buambi, anyi tuye kuela tshianza mukana, ne benza bua mpingane kumbelu mu bukubi. Lelu ndi mufike kudimona ne: bavua badienzeja bikole; dinanga ke divua dibasaka bua kuenza nanku.” Bushuwa, bantu bonso kabakutuela tuasakidila bua malu atudi tubenzela to. Khanh udi wamba bua bantu bavua bamuambuluishe ne: “Mvua mua kubafuta bua malu mimpe avuabu bangenzele, kadi tshiena mumanye muaba udi yonso wa kudibu musombele to. Kadi Yehowa yeye mmumanye, ne ndi nsambila bua abamfutshile.” Tshidi Khanh muambe etshi ntshiotshi. Yehowa udi umona tumalu tuimpe nansha tukese tutudi tuenzela bakuabu. Udi  umona tumalu atu bu mulambu wa mushinga mukole ne bu dibanza diafutaye.​—Bala Nsumuinu 19:17.

12. Mmunyi mudi bana betu ba balume mua kuleja ne: mbanange tshisumbu? (Tangila kabidi bimfuanyi.)

¹² Biwikala muanetu wa balume, mmunyi muudi mua kuleja ne: udi munange bakuabu? Ntshinyi tshiudi mua kuenza bua kubambuluisha? Jordan, muanetu mukuabu utshidi nsonga, wakebeja mukulu kampanda tshivuaye mua kuenza kabidi bua kuambuluisha tshisumbu. Mukulu au wakamuela kalumbandi bua mukavuaye muye kumpala, kumulejaye kabidi malu makuabu a kuenza bu mudi kuikala kufika mu bisangilu kumpala kua dîba bua kuelangana muoyo ne bakuabu, kuandamuna mu bisangilu, kuikala ne tshibidilu tshia kuyisha ne bena mu kasumbu kabu ka buambi, ne kukeba mishindu ya kuambuluisha bakuabu. Pakatumikilaye mubelu au, wakamanya mua kuenza amue malu ne kufikaye ku dinanga bena Kristo nende bikole. Wakalonga ne: padi muanetu wa balume ulua musadidi wa mudimu, kena ubanga kuambuluisha bakuabu to; kadi udi utungunuka ne kubambuluisha.​—1 Tim. 3:8-10, 13.

13. Mmunyi muvua dinanga disake muanetu Christian bua kulua kabidi mukulu?

¹³ Kadi biwikala kutshiyi musadidi wa mudimu anyi mukulu? Yehowa udi uvuluka mudimu uuvua wenza ne dinanga divua dikusaka bua kuwenza. (1 Kol. 15:58) Udi kabidi umona muudi utungunuka ne kunanga bakuabu. Muanetu mukuabu, diende Christian, wakumvua bibi menemene pakamumbushabu mu mudimu wa bukulu. Nansha nanku udi wamba ne: “Bua dinanga, ngakapangadija bua kuenza tshionso tshimvua mua kuenza bua kuenzela Yehowa mudimu nansha meme mukulu anyi tshiyi mukulu.” Panyima  pa matuku, bakamuteka kabidi mukulu. Udi wamba ne: “Ngakumvua kabuôwa ka kuikala kabidi mukulu. Kadi ngakadiambila ne: bu mudi Yehowa munganyishile ku luse luende bua ndue kabidi mukulu, ndi ngitaba bualu ndi mumunange yeye ne bena Kristo nanyi.”

14. Malu adi Elena muambe adi akulongesha tshinyi?

¹⁴ Batendeledi ba Yehowa batu kabidi banange bantu nabu. (Mat. 22:37-39) Elena, muanetu wa mu Géorgie, udi wamba ne: “Mvua munange Yehowa bikole. Dinanga adi ke divua dinsake bua kuyisha. Kadi pakakola dinanga adi, ngakananga kabidi bantu bikole. Mvua ngela meji a ntatu ivuabu nayi ne a bualu buvua mua kubasanguluja. Bu mumvua mbelela meji nanku, ngakapeta dijinga dikole dia kubambuluisha.”​—Lomo 10:13-15.

15-16. Anu mudi bimfuanyi bileja, mmasanka kayi atudi tupeta patudi tunanga bakuabu?

¹⁵ Patudi tunanga bana betu, bidi bituambuluisha tuetu bonso. Pakatuadija tshipupu tshia korona, muanetu Paolo ne mukajende bakambuluisha bana betu ba bakaji bakavua bakulakaje bua bamanye mua kuyisha ne biamu biabu. Umue wa kudibu wakafika ku diyisha ne tshiamu tshiende nansha muvuabi bianji kumukolela. Wakabikila balela bende mu Tshivulukilu ne tshiamu tshiende atshi. Balela bende 60 bakalondela Tshivulukilu atshi ku biamu bia benda bamonangana! Bionso bivua muanetu Paolo ne mukajende benze biakambuluisha muanetu wa bakaji au ne balela bende. Wakalua kufundila Paolo ne: “Tuasakidila  bua muuvua mutulongeshe tuetu bakulakaje. Tshiakupua muoyo mudi Yehowa ututabalela ne munuvua kanuyi nutshioka bua kutuambuluisha.”

¹⁶ Malu a buena aa akalongesha Paolo bualu bua mushinga mukole ebu: dinanga ndipite dimanya dietu dia mua kuenza malu. Udi wamba ne: “Mvua mutangidi wa tshijengu. Lelu ndi mmona ne: nansha mudi bamanyishi mua kuikala bapue miyuki yanyi muoyo, batshidi anu bavuluka malu amvua ngenza bua kubambuluisha.”

17. Patudi tunanga bakuabu, mbanganyi bakuabu badibi biambuluisha?

¹⁷ Patudi tunanga bakuabu, bidi bituambuluisha petu mu mushindu utuvua katuyi belele meji. Jonathan udi mu Nouvelle-Zélande udi ujadika bualu ebu. Mu munya mukole, mu Disambombo kampanda mu mapingaja, wakamona mpanda-njila mukuabu uyisha kumpenga kua njila. Yeye kujinga bua kuikala kuyisha nende mu Disambombo dionso mu mapingaja. Kakajingulula dîba adi muvua tshienzedi tshiende tshimpe atshi mua kumuambuluisha to. Udi wamba ne: “Tshikondo atshi, tshivua munange kuyisha to. Kadi pamvua nteleja muvua mpanda-njila au ulongesha ne mmona muvuaye upatula bipeta bimpe, ngakananga buambi bikole. Tuakadia nende bulunda bukole. Wakangambuluisha kabidi bua kunanga mudimu wa buambi ne kusemena pabuipi menemene ne Yehowa.”

18. Ntshinyi tshidi Yehowa musue bua tuenze?

¹⁸ Yehowa mmusue bua tumunange yeye ne bantu bakuabu bikole. Anu mutudi balonge, tuetu tubala Dîyi diende, tuelangana meji a malu adimu, ne bikale ne tshibidilu tshia kusambila, netumunange bikole. Tuetu tuenza malu kampanda bua kuambuluisha bena Kristo netu, netufike ku dibananga bikole. Padi dinanga dietu dikola, netusemene pabuipi menemene ne Yehowa ne bena Kristo netu, ne netushale balunda bua kashidi!