TSHIENA-BUALU TSHIA KULONGA 23
MUSAMBU WA 28 Mua kudia bulunda ne Yehowa
Yehowa mmusue bua tutudile mu ntenta wende
“Ntenta wanyi neikale nabu, ne meme nengikale Nzambi wabu.”—YEH. 37:27.
LUNGENYI LUNENE
Tshiena-bualu etshi netshituambuluishe bua kuanyisha Yehowa bikole bua mudiye mutubikile mu ntenta wende ne ututabalela.
1-2. Ndiakalenga kayi dinene didi Yehowa upesha batendeledi bende ba lulamatu?
MUNTU yeye mukuebeje ne: ‘Yehowa nnganyi kuudi?’ Neumuandamune tshinyi? Udi mua kumuandamuna ne: ‘Yehowa nTatu wanyi, nNzambi wanyi, ne mMulunda wanyi.’ Yehowa udi kabidi ne mianzu mikuabu ya bungi. Kadi utuku kabidi umona Yehowa bu muntu udi ukuakidila kuende anyi?
2 Mukalenge Davidi wakafuanyikija bulunda budi Yehowa mudie ne batendeledi bende ba lulamatu ne bulunda butu pankatshi pa muena nzubu ne bantu badiye muakidile kuende. Wakamba ne: “Yehowa, nnganyi udi mua kutudila mu ntenta webe? Nnganyi udi mua kusombela mu mukuna webe wa tshijila?” (Mis. 15:1) Mêyi mafunda ku bukole bua nyuma aa adi atulongesha ne: tudi mua kutudila mu ntenta wa Yehowa, tuambe ne: kulua balunda bende. Edi ndiakalenga dinene ditudi nadi.
YEHOWA MMUSUE BUA TUTUDILE MU NTENTA WENDE
3. Muntu wa kumpala uvua mutudile mu ntenta wa Yehowa uvua nganyi? Mmunyi muvua Yehowa mumvue bua Muanende? Mmunyi muvua Yezu mumvue bua Yehowa?
3 Yehowa uvua nkayende kumpala kua kufukaye bintu bionso. Pashishe kufukaye Yezu Muanende muanabute. Bivua anu bu ne: Yehowa wakakidila muntu wa kumpala mu ntenta wende. Uvua ne disanka dia bungi. Bible udi uleja ne: Yehowa uvua “nangananga mutambe kunanga” Muanende. Muanende eu, uvua wa kumpala ku ditudila mu ntenta wende, uvua ‘usanka kumpala kua Yehowa dîba dionso.’—Nsu. 8:30.
4. Mbanganyi bakuabu bakalua kubuela mu ntenta wa Yehowa?
4 Yehowa mumane kufuka Muanende, wakalua kufuka banjelu. Bobu pabu bakatudila mu ntenta wende. Bible udi ubikila banjelu ne: ‘bana ba balume ba Nzambi.’ Udi uleja kabidi ne: bobu pabu bavua basanka kumpala kua Yehowa. (Yobo 38:7; Dan. 7:10) Munkatshi mua bidimu bia bungi, Yehowa uvua mudie bulunda anu ne bifukibua bivuaye nabi mu diulu. Pashishe wakalua kufuka bantu, kubuelabu pabu mu ntenta wende. Mu bantu amu muvua Henoka, Noa, Abalahama, ne Yobo. Bible udi ubikila batendeledi balelela aba ne: mbalunda ba Nzambi, anyi bantu ‘bakenda ne Nzambi mulelela.’—Gen. 5:24; 6:9; Yobo 29:4; Yesh. 41:8.
5. Mêyi a buprofete adi mu Yehezekele 37:26, 27 adi atulongesha tshinyi?
5 Munkatshi mua bidimu nkama ne nkama, Yehowa wakatungunuka ne kubikila balunda bende mu ntenta wende. (Bala Yehezekele 37:26, 27.) Tshilejilu, mêyi a buprofete a Yehezekele adi aleja ne: Yehowa mmusue bua batendeledi bende ba lulamatu badie nende bulunda bukole. Mmulaye bua kudia “nabu tshipungidi tshia ditalala.” Mêyi a buprofete au avua akula bua tshikondo tshidi Yehowa usangisha bantu badi ne ditekemena dia kuya mu diulu ne bantu badi ne ditekemena dia kupeta muoyo pa buloba mu ntenta wende bua benze “tshisumbu tshimue.” (Yone 10:16) Tukadi mu tshikondo atshi mpindieu!
NZAMBI UDI UTUTABALELA MUABA ONSO UTUDI
6. Mmunyi mudi muntu mua kutudila mu ntenta wa Yehowa? Ntenta wende eu udi kuepi?
6 Ku kale, ntenta uvua muaba wa kuikishila uvua ukuba muntu ku mvula ne mivu mibi. Pavua muntu utudila mu ntenta wa mukuende, uvua mumanye anu ne: muenayi uvua ne bua kumutabalela. Patudi tudilambula kudi Yehowa, tudi tutudila mu ntenta wende. (Mis. 61:4) Tudi ne biakudia bia mu nyuma bia bungi mu ntenta wa Yehowa; mudi kabidi balunda bimpe badi pabu batudilamu. Ntenta wende eu kena mu ditunga kampanda to. Pamuapa ukadi muye kubuela mu mpungilu wa pa buende ku babende, wewe kupetanganamu ne bana betu bakuabu badi pabu mu ntenta wa Nzambi. Nansha tuetu muaba kayi, tudi mua kutudila mu ntenta eu.—Bua 21:3.
7. Bua tshinyi tudi tuamba ne: batendeledi ba Yehowa ba lulamatu bakadi bafue batshidi anu mu ntenta wende? (Tangila kabidi tshimfuanyi.)
7 Netuambe tshinyi bua batendeledi ba Yehowa ba lulamatu bakadi bafue? Bobu pabu badi mu ntenta wa Yehowa anyi? Eyowa! Bualu badi anu ne muoyo ku mêsu kua Yehowa. Yezu wakamba ne: “Bualu bua ne: bafue badi bajudibua, nansha Mose uvua mubuleje mu muyuki wa bualu bua kamutshi ka mêba, padiye ubikila Yehowa ne: ‘Nzambi wa Abalahama, Nzambi wa Izaka, ne Nzambi wa Yakoba.’ Yeye kena Nzambi wa bafue, kadi ngua badi ne muoyo, bualu ku mêsu kuende, buonso buabu badi ne muoyo.”—Luka 20:37, 38.
Batendeledi ba lulamatu ba Yehowa bakadi bafue batshidi anu mu ntenta wende (Tangila tshikoso tshia 7)
MABENESHA NE MIDIMU ITUDI NAYI
8. Mmabenesha kayi adi badi batudile mu ntenta wa Yehowa bapeta?
8 Anu mutu muntu mua kuikishila mu ntenta ne kudikuba ku mvula ne mivu mibi, ntenta wa Yehowa udi ukuba badimu ku tshintu tshionso tshidi mua kunyanga bulunda buabu nende ne udi ubapesha ditekemena bua matuku a tshilualua. Tuetu bashale ne lulamatu, Satana kena mua kuenza bualu budi mua kututatshisha bua kashidi to. (Mis. 31:23; 1 Yone 3:8) Mu bulongolodi bupiabupia, Yehowa neatungunuke ne kukuba balunda bende ba lulamatu ku lufu ne ku malu onso adi mua kunyanga bulunda buabu nende.—Buak. 21:4.
9. Ntshinyi tshidi Yehowa ulomba bantu badi mu ntenta wende?
9 Tudi ne diakalenga dinene dia kuikala mu ntenta wa Yehowa ne kudia nende bulunda bua kashidi. Tuetu basue kushala mu ntenta wa Nzambi, tudi ne bua kutungunuka ne kuenza tshinyi? Muntu yeye mukubikile kuende, mbimpe wenze tshidiye ukulomba. Tshilejilu, udi mua kukulomba bua ukopole bisabata kumpala kua kubuela mu nzubu muende. Mbimpe ubikopole kuyi ukandamana to. Bia muomumue, tuetu basue kushala mu ntenta wa Nzambi, tudi ne bua kuenza bionso bidiye utulomba. Bu mutudi banange Yehowa, tudi tuenza muetu muonso “bua kumusankisha mu malu onso.” (Kolos. 1:10) Yehowa mmulunda wetu, kadi udi kabidi Nzambi wetu ne Tatu wetu; nunku mmukumbane bua tuetu kumunemeka. (Mis. 25:14) Katupu bualu ebu muoyo to. Tuetu bashale anu tumunemeka bikole, katuakuenza bualu budi mua kumunyingalaja to. Netuikale anu ne dijinga dia ‘kuenda ne Nzambi wetu ne bupuekele.’—Mika 6:8.
MUVUA YEHOWA MUENZELE BENA ISALELE MALU KAYI NE KANSUNGANSUNGA
10-11. Mmunyi muvua Yehowa muenzele bena Isalele malu mu tshipela tshia Sinai? Mmunyi mudi bualu abu buleja ne: Yehowa kena ne kansungansunga?
10 Yehowa utu wenzela bantu badi batudila mu ntenta wende malu kayi ubasunguluja to. (Lomo 2:11) Tudi tumona bualu ebu ku mushindu uvuaye muenzele bena Isalele malu mu tshipela tshia Sinai.
11 Yehowa mumane kusungila bantu bende mu bupika mu Ejipitu, wakasungula bakuidi bua benzele mudimu ku ntenta wa tshitendelelu. Wakatekaku kabidi bena Lewi bua benzaku midimu mikuabu. Yehowa uvuaku utabalela bantu bavua benza midimu ku ntenta wa tshitendelelu anyi bavua basombele pabuipi ne ntenta au kupita bakuabu anyi? Tòo! Yehowa katu ne kansungansunga to.
12. Mmunyi muvua malu avua Yehowa muenzele tshisamba tshiende tshipiatshipia aleja ne: kena ne kansungansunga? (Ekesode 40:38) (Tangila kabidi tshimfuanyi.)
12 Muntu yonso uvua mu tshitudilu uvua mua kudia bulunda ne Yehowa, nansha yeye ne midimu ya pa buayi anyi kayi nayi, peshi musombele pabuipi ne ntenta anyi kule nende. Tshilejilu, Yehowa wakenza bua tshisamba tshijima tshia Isalele tshikale tshimona dikunji dia ditutu ne dikunji dia kapia divua dimana pa mutu pa ntenta wa tshitendelelu. (Bala Ekesode 40:38.) Pavua ditutu adi diasa luendu, too ne bantu bavua kule menemene ne ntenta wa tshitendelelu bavua badimona. Bavua basangisha bintu biabu, batula ntenta yabu, ne basa luendu pamue ne tshisamba tshijima. (Nom. 9:15-23) Muntu yonso uvua umvua muadi mukole wa pa buawu wa mpungi ibidi ya tshiamu tshia arjan ivuabu bela bua bantu kuasa luendu. (Nom. 10:2) Ki ndisombela pabuipi ne ntenta wa tshitendelelu divua dileja ne: muntu mmudie bulunda bukole ne Yehowa to. Bantu bonso bavua benza tshisamba tshipiatshipia tshia Yehowa abu bavua mua kutudila mu ntenta wende, batuishibue ne: uvua ne bua kubalombola ne kubakuba. Bia muomumue kabidi lelu, nansha tuetu basombele muaba kayi, Yehowa mmutunange, udi ututabalela, ne utukuba.
Muaba uvua Nzambi muteke ntenta wa tshitendelelu udi uleja mudiye kayi ne kansungansunga to (Tangila tshikoso tshia 12)
MALU ADI YEHOWA WENZA LELU ADI ALEJA MUDIYE KAYI NE KANSUNGANSUNGA
13. Mmalu kayi adi Yehowa wenza lelu adi aleja mudiye kayi ne kansungansunga?
13 Bamue bantu ba Nzambi lelu mbasombele pabuipi ne biro binene bia Bantemu ba Yehowa anyi pabuipi ne Betele. Bakuabu badi benzaku ne midimu. Badi ne mushindu wa kuambuluisha mu midimu idi yenzeka miaba eyi ne kuenza mudimu ne bana betu badi batulombola. Bakuabu mbatangidi ba bijengu anyi badi benza midimu mikuabu ya pabuayi ya ku dîba ne ku dîba. Biwikala kuyi mupete mpunga wa kuenza midimu eyi, ikala mumanye ne: Yehowa mmunange bantu bonso badi mu ntenta wende. Udi utabalela yonso wa kudibu. (1 Pet. 5:7) Udi upesha mutendeledi wende yonso biakudia bia mu nyuma, umulombola, ne umukuba.
14. Mbualu kayi bukuabu budi Yehowa wenza budi buleja mudiye kayi ne kansungansunga?
14 Bualu bukuabu budi buleja mudi Yehowa kayi ne kansungansunga budi ne: mmuenze bua bantu bonso bikale ne mushindu wa kupeta Bible. Bavua bafunde Mifundu ya tshijila ya ku ntuadijilu mu miakulu isatu eyi: tshiena Ebelu, tshiena Alama, ne tshiena Greke. Tudiku mua kuamba ne: bantu badi babala Bible ya mu miakulu ayi mbadie bulunda bukole ne Yehowa kupita badi kabayi bamanye miakulu ayi anyi? Tòo!—Mat. 11:25.
15. Mbualu kayi budi buleja ne: Yehowa kena ne kansungansunga? (Tangila kabidi tshimfuanyi.)
15 Yehowa kena udia netu bulunda anu bualu tudi balonge tulasa tua bungi anyi bualu tudi bamanye miakulu ivuabu bafunde Bible ku ntuadijilu to. Yehowa ki mmupeshe anu bantu badi balonge tulasa tua bungi meji to, mmuapeshe bantu bonso, too ne badi kabayi batulonge. Bible, Dîyi diende, mmukudimuna mu miakulu binunu bia bungi; nunku, bantu bonso badi ne mushindu wa kupeta malongesha adimu ne kumanya tshia kuenza bua kulua balunda bende.—2 Tim. 3:16, 17.
Bua tshinyi dikudimuna dia Bible mu miakulu ya bungi matuku etu aa didi dileja ne: Nzambi kena ne kansungansunga? (Tangila tshikoso tshia 15)
SHALA MU NTENTA WA YEHOWA
16. Bilondeshile Bienzedi 10:34, 35, ntshinyi tshitudi ne bua kuenza bua kushala mu ntenta wa Yehowa?
16 Tudi ba diakalenga bua mudi Yehowa mutuitabile bua kutudila mu ntenta wende. Kakuena muntu mukuabu udi ne dinanga, ne bulenga, ne muikale muakididi wa benyi bu yeye to. Bualu bukuabu budi ne: kena ne kansungansunga to; udi wakidila bantu bonso kayi utangila kudibu bafumine, muaba udibu bakolele, kalasa kadibu balonge, dikoba diabu, tshisa tshiabu, bukole budibu, anyi bikalabu bantu balume anyi bantu bakaji to. Kadi anu bantu badi batumikila mikenji yende ke badiye witabila bua kushala mu ntenta wende.—Bala Bienzedi 10:34, 35.
17. Mmuaba kayi utudi mua kupetela malu makuabu a kuenza bua kushala mu ntenta wa Yehowa?
17 Mu Misambu 15:1, Davidi wakebeja ne: “Yehowa, nnganyi udi mua kutudila mu ntenta webe? Nnganyi udi mua kusombela mu mukuna webe wa tshijila?” Yehowa wakamusaka bua kuandamuna nkonko eyi mu Musambu wa 15. Mu tshiena-bualu tshialonda, netumone malu a kuenza bua kushala mu ntenta wa Yehowa.
MUSAMBU WA 32 Luaku ku luseke lua Yehowa
