1. Ntshinyi tshitudi ne bua kuenza bua kupeta disanka dilelela? Bua tshinyi? (Yeshaya 48:17, 18)

 TATU wetu wa mu diulu mmutunange bikole; mmusue bua tuikale ne muoyo mpindieu ne mu matuku atshilualua. (Muam. 3:12, 13) Mmutufuke ne bukole bua kuenza amue malu a dikema, kadi ki mmutupeshe bukokeshi bua kudilombola nkayetu anyi bua kudisunguila tshidi tshimpe ne tshidi tshibi to. (Muam. 8:9; Yel. 10:23) Mmumanye ne: bua tuetu kupeta disanka dilelela, tudi ne bua kumuenzela mudimu ne kutumikila mikenji yende.​—Bala Yeshaya 48:17, 18.

2. Satana mmusue bua tuitabe tshinyi? Kadi ntshinyi tshidi Yehowa muenze?

² Satana mmusue bua tuitabe ne: tudi anu mua kuikala ne disanka nansha tuetu katuyi basungule bua kuenzela Yehowa mudimu. Mmusue tuitabe kabidi ne: bantu badi mua kudilombola nkayabu bimpe. (Gen. 3:4, 5) Bua kuleja mudi Satana muena dishima, Yehowa mmulekele bua bantu badilombole nkayabu bua tshikondo kampanda. Malu mabi adi enzeka adi aleja ne: bantu ki mbakumbane bua kulombola to. Kadi mu Bible mudi bilejilu bia bungi bia balume ne bakaji bavua ne nsombelu wa disanka bualu bavua benzela Yehowa mudimu. Mu bantu abu, Yezu Kristo ke uvua ne disanka dia bungi menemene. Tshia kumpala, netukonkonone malu avua mamusake bua kuenzela Yehowa mudimu. Tshibidi, netumone bua tshinyi anu Tatu wetu wa mu diulu ke udi mukumbane bua tuetu kumutendelela. Tshisatu, netukonkonone amue malu adi atusaka bua kumuenzela mudimu.

 TSHIVUA TSHISAKE YEZU BUA KUENZELA YEHOWA MUDIMU

3. Ntshinyi tshivua Satana ukeba kupesha Yezu? Kadi ntshinyi tshiakenza Yezu?

³ Pavua Yezu pa buloba, wakasungula wa yeye kuenzela mudimu. Matuku makese yeye mumane kubatijibua, Satana wakamuambila ne: yeye muenze tshienzedi tshia dimukukuila, uvua ne bua kumupesha makalenge onso a pa buloba. Yezu wakamuandamuna ne: “Umbuka, Satana! Bualu mbafunde ne: ‘Yehowa Nzambi webe ke uudi ne bua kutendelela, ne yeye nkayende ke uudi ne bua kuenzela mudimu wa tshijila.’” (Mat. 4:8-10) Bua tshinyi Yezu wakabenga? Tumonayi malu avua mamusake bua kubenga.

4-5. Mmalu kayi avua masake Yezu bua asungule bua kuenzela Yehowa mudimu?

⁴ Bualu bunene buvua busake Yezu bua kuenzela Yehowa mudimu budi ne: uvua mumunange bikole menemene. (Yone 14:31) Bualu bukuabu mbuobu ebu: uvua mumanye ne: kumuenzelawu ke bualu buimpe buvuaye ne bua kuenza. (Yone 8:28, 29; Buak. 4:11) Uvua mumanye ne: Yehowa ke Mpokolo wa muoyo, ngua kueyemena, ne mmuena muoyo wa kupa. (Mis. 33:4; 36:9; Yak. 1:17) Yehowa uvua anu wambila Yezu bulelela, ne bionso bivuaye nabi Yehowa ke uvua mumupeshabi. (Yone 1:14) Kadi Satana yeye wakakebesha lufu. Lukuka ne budinangi ke bidi bimusaka bua kushima bantu. (Yone 8:44) Bu muvua Yezu mumanye tshidi Satana, kakamuidikija bua kutombokela Yehowa to.​—Filip. 2:5-8.

⁵ Bualu bukuabu buvua busake Yezu bua kuenzela Yehowa mudimu budi ne: uvua mumanye ne: kuwenza kuvua mua kulela malu mimpe a bungi. (Eb. 12:2) Uvua mumanye ne: yeye mushale ne lulamatu, uvua ne bua kuvuija dîna dia Tatuende dia tshijila ne kuambuluisha bua kujikija ntatu yonso ivua Diabolo mukebeshe.

TSHIDI TSHIVUIJA YEHOWA MUKUMBANE BUA TUETU KUMUTENDELELA

6-7. Bua tshinyi bantu ba bungi lelu kabena benzela Yehowa mudimu? Kadi bua tshinyi Yehowa mmukumbane bua tuetu kumutendelela?

⁶ Bantu ba bungi lelu kabena benzela Yehowa mudimu bualu ki mbamanye ngikadilu yende mimpe ne ki mbamanye malu mimpe adiye mubenzele to. Mbafuanangane ne bena mu Atena bavua Paulo muyishe.​—Bien. 17:19, 20, 30, 34.

⁷ Paulo wakumvuija bantu ne: Nzambi mulelela “udi upesha bantu bonso muoyo, ne mueyelu ne bintu bionso.” Kuambaye kabidi ne: “Tudi ne muoyo, tudi tuenda, ne tudiku bua bualu buende.” Nzambi ke Mufuki wetu, wakafuka ‘bisamba bionso bia bantu bafumine mu muntu umue,’ nunku anu yeye ke utudi ne bua kutendelela.​—Bien. 17:25, 26, 28.

8. Ntshinyi tshikala Yehowa kayi mua kuenza? Umvuija.

⁸ Bu mudi Yehowa Mufuki wetu, muikale kabidi Mukalenge wa diulu ne buloba, uvua mua kuenzeja bantu bua bamuenzele mudimu. Kadi kakuenza nanku nansha kakese. Mmutujadikile ne: udiku ne mmunange yonso wa kutudi bikole menemene. Mmusue bua bantu ba bungi menemene balue balunda bende. (1 Tim. 2:3, 4) Ke bualu kayi mmutulongeshe bua tulongeshe petu bakuabu malu adiye mulongolole bua kuenza ne tubambile malu mimpe enzelaye bukua bantu. (Mat. 10:11-13; 28:19, 20) Mmututeke mu bisumbu bia bena Kristo bishilashilangane ne mmututekelamu batangidi badi batunange bua kututabalela.​—Bien. 20:28.

9. Mmushindu kayi udi Yehowa muleje ne: mmunange bantu?

⁹ Mushindu udi Yehowa wenzela bantu badi kabayi basue kumuitabuja malu udi uleja mudiye mubanange bikole. Ela meji bua bualu ebu: kukadi bidimu binunu bia bungi bidi bantu ba bungi basungula bua kuenza tshidi  muoyo musue pamutu pa kutumikila Yehowa. Nansha nanku, Yehowa mmubapeshe bidibu nabi dijinga bua bikale anu ne muoyo, bikale kabidi ne disanka. (Mat. 5:44, 45; Bien. 14:16, 17) Mmubapeshe mushindu wa kudia bulunda buimpe munkatshi muabu, wa kulela bana ne wa kupeta difutu ku mudimu wabu mukole udibu benza. (Mis. 127:3; Muam. 2:24) Malu aa adi aleja ne: Tatu wetu wa mu diulu mmunange bantu bonso. (Ekes. 34:6) Tuvulukayi mpindieu malu adi atusaka bua kuenzela Yehowa mudimu ne mudiye utubenesha bua bualu abu.

TSHIDI TSHITUSAKA BUA KUENZELA YEHOWA MUDIMU

10. a) Mbualu kayi bunene budi butusaka bua kuenzela Yehowa mudimu? (Matayi 22:37) b) Lutulu lua Yehowa ndukuambuluishe mushindu kayi? (Misambu 103:13, 14)

¹⁰ Bualu bunene budi butusaka bua kuenzela Yehowa mudimu anu bu Yezu budi ne: tudi bamunange bikole menemene. (Bala Matayi 22:37.) Patudi tulonga ngikadilu ya Yehowa, bidi bitukoka kudiye. Tshilejilu, tuakule bua mutuye utuenzela malu ne lutulu. Pavua bena Isalele bamutombokele, wakabasengelela ne: “Umbukayiku ku njila yenu mibi.” (Yel. 18:11) Yehowa mmumanye ne: tudi bantu bapange bupuangane ne tudi lupuishi. (Bala Misambu 103:13, 14.) Paudi uvuluka bungi bua misangu ikadi Yehowa mukufuile luse, kabienaku bikusaka bua kumuenzela mudimu bua kashidi anyi?

11. Mmalu kayi makuabu adi atusaka bua kuenzela Tatu wetu wa mu diulu mudimu?

¹¹ Tutu kabidi basue kuenzela Yehowa mudimu bualu ke bualu buimpe butudi ne bua kuenza. (Mat. 4:10) Bualu bukuabu butudi bamanye budi ne: tuetu bashale ne lulamatu kudi Yehowa, nebilele malu mimpe a bungi. Patudi tuenzela Yehowa mudimu ne lulamatu, tudi tujidila dîna diende, tuleja ne: Diabolo mmuena dishima ne tudi tusankisha muoyo wa Tatu wetu. Tuetu basungule bua kuenzela Yehowa mudimu lelu eu, netupete mpunga wa kumuenzelawu kashidi!​—Yone 17:3.

12-13. Bualu bua Jane ne Pam budi butulongesha tshinyi?

¹² Tudi mua kunanga Yehowa bikole nansha patutshidi bapuekele. Nunku patudi tuenda tukola, netumunange bikole menemene. Tuangate tshilejilu tshia bana ba bakaji ba muntu babidi, Jane ne Pam. a Jane wakabanga kulonga Bible pavuaye ne bidimu 11; Pam pende wakabanga kumulonga pavuaye ne bidimu 10. Bu muvua baledi babu kabayi banange kulonga Bible, bakambila Jane ne Pam ne: bua bobu kubanyishila bua kulonga Bible ne Bantemu bivua bikengela bikale baya mu disambila diabu pamue ne bena mu dîku diabu bonso. Jane udi wamba ne: “Malu a mu Bible avua Bantemu mbandongeshe akangambuluisha bua kubenga kuenza malu avua balongi nanyi benza bu mudi kunua makanya ne kuenda masandi.”

¹³ Bidimu bikese pashishe, bubidi buabu bakalua bambi ba lumu luimpe. Panyima pa matuku, bakalua bampanda-njila ba pa tshibidilu nansha muvuabu balama baledi babu bakavua bakulakaje. Jane udi uvuluka malu avua mabafikile, wamba ne: “Ndi mulonge ne: Yehowa utu utabalela balunda bende; mulonge kabidi ne: ‘Yehowa mmumanye badi bende,’ anu mudi 2 Timote 2:19 wamba.” Bushuwa, Yehowa udi utabalela bantu badi bamunange ne bamuenzela mudimu!

14. Mmunyi mutudi mua kubingisha dîna dia Yehowa ku mêyi etu ne ku bienzedi bietu? (Tangila kabidi bimfuanyi.)

¹⁴ Tudi basue kubingisha dîna dia Yehowa mu malu onso. Difuanyikijilabi bualu ebu: udi ne mulunda webe wa pa muoyo, mmuena malu malenga, muena muoyo wa kupa ne mufuidianganyi  wa luse. Dimue edi, udi umvua bamba mulunda webe au ne: mmuena tshikisu ne mmupange bululame. Newenze tshinyi? Neumuakuile. Bia muomumue, padi Satana ne bantu bonso badi bamutue mu nyima bamuangalajila Yehowa malu a dishima bua kumunyangila lumu, tudi tubingisha Yehowa, tuambila bantu malu malelela adi amutangila. (Mis. 34:1; Yesh. 43:10) Tudi tuleja ne: tudi basue kuenzela Yehowa mudimu ne muoyo wetu mujima ku mêyi etu ne ku bienzedi bietu.

15. Mmalu kayi mimpe avua mafikile Paulo pavuaye mushintulule nsombelu wende? (Filipoyi 3:7, 8)

¹⁵ Tutu tuitaba bua kushintulula malu mu nsombelu wetu bua kusankisha Yehowa anyi bua kumuenzela mudimu mu mushindu udiye wanyisha. Tshilejilu, mupostolo Paulo wakitaba bua kulekela muanzu uvuaye nawu mu ntendelelu wa buena Yuda bua kushala muyidi wa Kristo ne kuenzela Yehowa mudimu. (Gal. 1:14) Biakamupetesha nsombelu muimpe ne diakalenga dia kulua kukokesha ne Kristo mu diulu. Kakadiela meji bua dipangadika divuaye muangate dia kuenzela Yehowa mudimu adi to, nansha tuetu petu katuakudiela meji to.​—Bala Filipoyi 3:7, 8.

16. Bualu buvua bufikile Julia budi butulongesha tshinyi? (Tangila kabidi bimfuanyi.)

¹⁶ Tuetu bavuije kuenzela Yehowa mudimu bualu bua kumpala mu nsombelu wetu, netupete mabenesha lelu ne mu matuku atshilualua. Tumonayi tshivua tshifikile muanetu wa bakaji mukuabu, diende Julia. Patshivuaye mupuekele, kumpala kua kulongaye bulelela, uvua mu tshisumbu tshia bimbi ba misambu mu tshitendelelu tshiabu. Bu muvua kangimba kakuabu kanene ka misambu kamone ne: uvua ne dîyi dimpe dia misambu, wakamulongesha bua alue pende kangimba kanene. Matuku makese pashishe, Julia wakatumba bikole,  kutuadijaye kuimba miaba minene. Umue musangu pavuaye mu kalasa ka malu a mijiki, mulongi wabu wakatuadija kumuambila malu a Nzambi, umuleja ne: Yehowa ke dîna dia Nzambi. Matuku makese pashishe kutuadijaye kulonga Bible misangu ibidi ku lumingu. Ndekelu wa bionso wakapangadija bua kuenzela Yehowa mudimu pamutu pa kukeba anu bua kulua kangimba kanene. Divua dipangadika dikole. Udi wamba ne: “Bantu ba bungi bakangambila ne: mvua nyanga tshipedi tshianyi tshia kuimba kua misambu. Kadi meme mvua musue kuenzela Yehowa mudimu ne muoyo mujima.” Kukadi bidimu bipite pa 30 katshia wangata dipangadika adi. Mmunyi mudiye umvua lelu eu? Udi wamba ne: “Ndi ne ditalala dia mu muoyo ne ndi mutuishibue ne: Yehowa neankumbajile majinga anyi onso matuku atshilualua.”​—Mis. 145:16.

TUNGUNUKA NE KUENZELA YEHOWA MUDIMU

17. Dikala mu matuku a ku nshikidilu didi disaka bantu badi basungule bua kuenzela Nzambi mudimu ne badi kabayi banji kusungula bua kumuenzelawu bua kuenza tshinyi?

¹⁷ Nshikidilu ukadi mulembelele. Mupostolo Paulo wakafunda ne: “Bualu nkushale ‘tshikondo tshîpi menemene,’ ne ‘yeye udi ulua neafike, kakunengakana to.’” (Eb. 10:37) Bualu ebu budi bututangila mushindu kayi? Tshia kumpala, tshikondo tshia bantu kusungula bua kuenzela Yehowa mudimu ntshishale tshîpi. (1 Kol. 7:29) Tshibidi, bituikala tukadi tuenzela  Nzambi mudimu, tudi bamanye ne: nansha mutuikala ne bua kunanukila mu ntatu, nebikale anu bua “tshikondo tshîpi menemene.”

18. Yehowa ne Yezu mbasue bua tuenze tshinyi?

¹⁸ Yezu wakakankamija bantu bua balue bayidi bende ne batungunuke ne kumulonda. (Mat. 16:24) Bituikala tuenzela Yehowa mudimu kukadi bidimu, katulekedi to. Tutungunukayi anu ne kudienzeja bua kumuenzelawu. Tudi bamanye ne: ki mbualu butekete to, kadi tuetu batungunuke ne kumuenzelawu, netuikale ne disanka ne netupete mabenesha a bungi, nansha mpindieu.​—Mis. 35:27.

19. Bualu buvua bufikile Gene budi butulongesha tshinyi?

¹⁹ Bamue badi bamona ne: bobu benzela Yehowa mudimu kabakuikala ne disanka to. Biwikala nsonga, udi wela meji ne: wewe wenzela Yehowa mudimu kuakuikala ne disanka anyi? Muanetu wa balume mukuabu, diende Gene, udi wamba ne: “Ngakamona ne: kulua Ntemu wa Yehowa kuvua anu bu muntu udibueja mu buloko. Bivua bimueneka ne: bansonga nanyi ba bungi batuvua tukola nabu bavua bobu ne disanka bua muvuabu baya mu mafesto, banangangana ne tuana tua bakaji anyi banaya manaya a tshikisu a mu biamu, meme eku mufue anu ne kuya mu bisangilu ne mu buambi.” Ngelelu wa meji au wakafikisha Gene ku dienza tshinyi? Udi wamba ne: “Ngakatuadija kuenza malu mabi mu musokoko. Kuvua misangu imvua ngenza bivua bansonga nanyi abu benza. Kadi kabiakampetesha disanka dilelela to. Ngakatuadija kuela meji a mudi kutumikila tshidi Bible wamba mua kumpetesha masanka. Ke meme kupangadija bua kuenzela Yehowa mudimu ne muoyo mujima. Katshia anu dîba adi, ndi mumona anu bu ne: Yehowa mmuandamune masambila anyi onso.”

20. Tudi ne bua kudisuika bua kuenza tshinyi?

²⁰ Mufundi wa misambu wakimbila Yehowa ne: “Wa diakalenga mmuntu uudi usungula ne usemeja pabuipi bua kusombaye mu mbanza yebe.” (Mis. 65:4) Tuikalayi anu badisuike bu Yoshua, wakamba ne: “Buanyi meme ne ba mu nzubu muanyi, netuenzele Yehowa mudimu.”​—Yosh. 24:15.