1. Mparadizu wa mu nyuma ntshinyi? Tudi ne bua kudisuika bua kuenza tshinyi?

 MPARADIZU wa mu tshimfuanyi udiku lelu mmuule tente ne bantu badi baditue mu dienza dia malu mimpe. Badi kabidi mu ditalala dia bungi. Bantu bakadi mu Mparadizu eu mbadisuike bua kubenga kupatukamu. Mbasue kabidi kuambuluisha bantu ba bungi bua babuele muaba wa pa buawu eu. Kadi mmuaba kayi au? Mmu Mparadizu wa mu nyuma! a

2. Tshidi tshikemesha ntshinyi bua Mparadizu wa mu nyuma?

² Tshidi tshikemesha tshidi ne: Yehowa mmuenze muaba wa mu tshimfuanyi udi bantu bende mu buobumue ne mu ditalala, nansha mudibu mu bulongolodi bubi bua Satana budi ne njiwu ne buikale ne bantu bakinangane. (1 Yone 5:19; Buak. 12:12) Nzambi wetu wa dinanga mmumone mudi ndongoluelu wa malu eu wenzela bantu bibi. Kadi udi utukuba bua tumuenzele mudimu ne disanka. Dîyi diende didi dileja Mparadizu wa mu nyuma eu bu “bukubi” ne “budimi bua mâyi a bungi.” (Yesh. 4:6; 58:11) Yehowa udi ubenesha bantu badi mu Mparadizu eu bua badiumvue ne disanka ne mu bukubi mu matuku makole a ku nshikidilu aa.—Yesh. 54:14; 2 Tim. 3:1.

3. Mmunyi muvua dîyi dia buprofete didi mu Yeshaya 65 dikumbane mu tshitupa tshiadi tshia kumpala?

³ Yehowa wakaleja nsombelu wa bantu badi mu Mparadizu wa mu nyuma ku diambuluisha dia muprofete Yeshaya. Mmuleje nsombelu au mu Yeshaya 65 wakakumbana mu tshitupa tshiende tshia kumpala mu 537 K.Y. Bena Yuda bavua banyingalale bakumbuka mu bupika mu Babilona mu tshidimu atshi kupinganabu  kuabu. Yehowa wakababenesha, kubambuluishaye bua bibakulule Yelushalema ukavuabu babutule ne bua bajadikulule ntendelelu mukezuke uvua ne bua kuenzekela ku ntempelo mu Yelushalema.—Yesh. 51:11; Zek. 8:3.

4. Mmunyi mudi Yeshaya 65 mukumbane matuku etu aa?

⁴ Tshitupa tshibidi tshia dikumbana dia dîyi dia buprofete dia Yeshaya adi tshiakatuadija mu 1919 P.Y., pavua batendeledi ba Yehowa ba matuku etu aa bumbuke ku bupika bua Babilona Munene. Ke Mparadizu wa mu nyuma kutuadijaye kualabala ku kakese ku kakese. Bu muvua bamanyishi ne tshisumi, bakenza bisumbu bia bungi, kupetabu kabidi ne ngikadilu ya dimuma dia nyuma muimpe. Bantu ba bungi ba tshikisu bavua ne nsombelu mubi ‘bakavuala bumuntu bupiabupia buvua bufukibue bilondeshile disua dia Nzambi.’ (Ef. 4:24) Malu a bungi adi Yeshaya mufunde neakumbane anu mudiwu amu mu bulongolodi bupiabupia. Kadi nansha mpindieu, bantu ba bungi badi mu Mparadizu wa mu nyuma badi ne masanka a bungi. Tumonayi tshidi Mparadizu eu utuenzela ne bua tshinyi katuena ne bua kupatukamu.

NSOMBELU WA BANTU BADI MU MPARADIZU WA MU NYUMA

5. Anu mukavua Yeshaya 65:13 muleje, nsombelu kayi udi nende bantu badi mu Mparadizu wa mu nyuma?

⁵ Badi badia bimpe ne bapetulula bukole. Mêyi a buprofete a Yeshaya adi aleja dishilangana dinene didi pankatshi pa bantu badi mu Mparadizu wa mu nyuma ne badi kabayimu to. (Bala Yeshaya 65:13.) Yehowa udi upesha batendeledi bende tshionso tshidi tshikengela bua bashale pabuipi nende. Mmutupeshe nyuma wende muimpe, Bible, ne bintu bidi bimumvuija bua ‘tudie, tunue, ne tusanke.’ (Fuanyikija ne Buakabuluibua 22:17.) Kadi bantu badi pambelu pa Mparadizu wa mu nyuma, ‘badi ne nzala, ne nyota, ne bafue bundu.’ Ki mbamanye Nzambi to.—Amosa 8:11.

6. Mmunyi mudi Yoele 2:​21-24 umvuija biakudia bia mu nyuma bidi Yehowa utupesha? Mmunyi mutudi mua kubipeta?

⁶ Mu mêyi a buprofete adi Yoele mufunde, uvua muakule bua biakudia bu mudi: ntete, mvinyo, ne mafuta a olive; tuambe ne: biakudia bia mu nyuma bidi Yehowa utupesha bua tushale ne ditabuja dikole. Mu biobi abi mudi mibelu ya mu Bible. (Yoele 2:​21-24) Tudi tupeta biakudia ebi mu Bible, mu mikanda idi imumvuija, mu site wetu wa jw.org, mu bisangilu, mu mpuilu, ne mu mpungilu. Tutu tupeta biakudia ebi dituku dionso, ke bualu kayi tutu tudia bimpe ne tupeta bukole bua bungi.

7. ‘Muoyo wetu udi bimpe’ bua malu kayi? (Yeshaya 65:14)

⁷ Badi ne disanka dia bungi. Bantu ba Nzambi badi bela mbila ya disanka bualu badi ne dianyisha kudi Yehowa. (Bala Yeshaya 65:14.) ‘Muoyo wetu udi bimpe’ bua ditekemena dietu dikole didi dimanyine pa mulambu wa tshia kupikulangana natshi wa Kristo, bua bulelela bua mu Bible budi butukankamija, ne bua milayi ya Nzambi idi itusamba. Kuambilangana malu aa ne bena Kristo netu kudi kutuenza disanka dia bungi!—Mis. 34:8; 133:​1-3.

8. Mbimanyinu kayi binene bibidi bia bantu ba Yehowa badi mu Mparadizu wa mu nyuma?

⁸ Bimanyinu bibidi binene bia bantu ba Yehowa badi mu Mparadizu wa mu nyuma bidi ne: mbanangangane ne badi mu buobumue. ‘Tshisuikidi tshia buobumue’ etshi tshidi tshituleja nsombelu wa mu bulongolodi bupiabupia muikala bantu ba Yehowa banangangane bikole ne bikale mu buobumue bukole bupite bua lelu. (Kolos. 3:14) Muanetu wa bakaji mukuabu udi uleja tshintu tshiakamukoka  ntema pakatuilanganaye ne Bantemu ba Yehowa bua musangu wa kumpala. Udi wamba ne: “Tshivua ne disanka to, nansha pamvua mu dîku dietu. Kadi musangu wa kumpala ungakatuilangana ne Bantemu ba Yehowa, ngakamona muvuabu banangangane ne muoyo mujima.” Muntu yonso udi musue kupeta disanka dia bungi udi ne bua kubuela mu Mparadizu wetu wa mu nyuma. Nansha bena panu batumona mushindu kayi, tudi ne dîna dimpe anyi lumu luimpe kudi Yehowa ne kudi bena Kristo netu.—Yesh. 65:15.

9. Ntshinyi tshidi Yeshaya 65:​16, 17 utulaya bua malu adi atukebela ntatu lelu?

⁹ Mbasuule ne mbatukije. Yeshaya 65:14 udi wamba bua bantu badi pambelu pa Mparadizu wa mu nyuma ne: ‘badi bela mbila bua kusama kua muoyo ne bela kabobo ka muadi bua dishikila dia lungenyi.’ Kadi ntshinyi tshienzekela malu avua makebele bantu ba Nzambi ntatu ne makenga? ‘Nebaapue muoyo ne neikale masokoka ku mêsu kua Nzambi.’ (Bala Yeshaya 65:​16, 17.) Yehowa neajikije ntatu yetu. Ndekelu wa bionso, katuakuvuluka nansha tshivuayi mituenzele to.

10. Bua tshinyi tudi ne dianyisha bua mutudi ne bena Kristo netu? (Tangila kabidi tshimfuanyi.)

¹⁰ Nansha mpindieu, tudi mua kutukija bikole patudi mu bisangilu bualu tudi tudiumvuamu basuule ne tubenga kutuma meji ku malu a mu bulongolodi bubi ebu atu atusamisha mutu. Tudi tuambuluisha bana betu bua batukije patudi ne ngikadilu ya dimuma dia nyuma muimpe bu mudi: dinanga, disanka, ditalala, bulenga, ne buimpe. (Gal. 5:​22, 23) Tudi ne dianyisha dia bungi bua mutudi mu bulongolodi bua Yehowa! Bantu badi bashala mu Mparadizu wa mu nyuma, nebamone dikumbana dionso dia mulayi wa Nzambi wa kufuka “diulu dipiadipia ne buloba bupiabupia.”

11. Bilondeshile Yeshaya 65:​18, 19, mmunyi mutudi ne bua kumvua bua Mparadizu wa mu nyuma udi Yehowa muenze?

¹¹ Badi ne dianyisha ne luzuku. Yeshaya mmuleje bualu bukuabu budi ne bua kutusaka bua ‘kusanka bikole ne kuikala ne disanka.’ Yehowa ke udi muenze Mparadizu wa mu nyuma eu. (Bala Yeshaya 65:​18, 19.) Nanku kabiena bitukemesha bua mudi Yehowa utusaka bua kuambuluisha bantu bakuabu bua bumbuke mu bulongolodi bubi ebu ne babuele mu Mparadizu wa mu nyuma eu to. Masanka atudi tupetamu adi atusaka bua kuambila bakuabu bua bualu buawu.—Yel. 31:12.

12. Mmunyi mutudi tumvua bua mulayi udi mu Yeshaya 65:​20-24? Bua tshinyi?

¹² Tudi kabidi ne dianyisha ne disanka bua  ditekemena ditudi nadi bua mutudi mu Mparadizu wa mu nyuma eu. Ela meji a malu atuamona mu bulongolodi bupiabupia ne atuenzamu. Bible mmulaye ne: “Kakuakuikala kabidi muana mutekete . . . udi ushala ne muoyo anu matuku makese to, peshi muntu mukole udi upanga kumana matuku ende a muoyo.” ‘Netuase nzubu ne netusombelamu, ne netudime madimi a tumuma tua mvinyo ne netudie tumuma tuawu.’ ‘Katuakukuata mudimu mukole bua tshianana’ to, bualu netuikale bantu “badi Yehowa mubeneshe.” Mmutulaye nsombelu muimpe udi usankisha wa bukubi. ‘Nansha kumpala kua bantu kumubikila,’ neikale mumanye dijinga dia muntu yonso ne ‘neakumbaje dijinga dia tshintu tshionso tshidi ne muoyo.’—Yesh. 65:​20-24; Mis. 145:16.

13. Mmunyi mudi Yeshaya 65:25 uleja mudi bantu balekela bibidilu bibi padibu babuela mu Mparadizu wa mu nyuma?

¹³ Badi mu ditalala ne mu bukubi. Nyuma muimpe wa Nzambi mmuambuluishe bantu bavua ne tshikisu, bena luonji, ne bavua kabayi ne bululame bua kuakaja nsombelu wabu. (Bala Yeshaya 65:25.) Mbalekele bikadilu biabu bibi abi. (Lomo 12:2; Ef. 4:​22-24) Kadi bu mutshidi bantu ba Nzambi bapange bupuangane, nebatungunuke ne kuenza bilema. Yehowa mmusangishe “bantu ba mishindu yonso” mu tshisuikidi tshikole tshia dinanga ne ditalala. (Tito 2:11) Etshi ntshishima tshidi anu Nzambi wa Bukole buonso nkayende mua kuenza!

14. Mmunyi muvua Yeshaya 65:25 mukumbanyine nsonga kampanda?

¹⁴ Mbushuwa ne: bantu badi mua kulekela bibidilu biabu bibi anyi? Tumonayi bualu buvua buenzeke ebu: nsongalume mukuabu uvua wenza malu mabi matambe ne uvua tshikisu tshia bungi. Pavuaye ne bidimu 20, bakavua bamuele mu buloko njila ne njila. Bavua bamuelamu bualu uvua wibangana mashinyi, ubuelelangana mu nzubu, ne wenza malu mabi makuabu. Uvua pabuipi bua kuluangana ne muntu yonso. Pakamulongeshabu bulelela bua mu Bible bua musangu wa kumpala ne kutuadijaye kubuela mu bisangilu, wakamona ne: uvua mupete tshintu tshia mushinga mukole, ke Mparadizu wa mu nyuma. Yeye mumane kubatijibua, uvua wela meji a muvua Yeshaya 65:25 mumukumbanyine. Katshivua kabidi muntu wa luonji bu ntambue to, kadi ukavua muntu wa ditalala bu mukoko.

15. Bua tshinyi tudi ne bua kubikila bantu bakuabu bua balue kubuela mu Mparadizu wa mu nyuma? Mmunyi mutudi tubafikisha ku dibuelamu?

¹⁵ Yeshaya 65:13 utu utuadija ne mêyi a ne: “Mona tshidi Mukalenge Mutambe Bunene Yehowa wamba.” Mvese wa 25 udi ujika ne mêyi a ne: “Ke mudi Yehowa wamba.” Mêyi ende atu anu akumbana. (Yesh. 55:​10, 11) Mparadizu wa mu nyuma ukadiku lelu eu. Yehowa mmubueje batendeledi bende mu dîku dia pa buadi. Bu mutudi mu dîku edi, tudi mu ditalala ne mu bukubi nansha mutudi munkatshi mua bantu badi benza malu ne tshikisu. (Mis. 72:7) Bua malu aa, tudi ne bua kuambuluisha bantu bakuabu bua balue kubuela pabu mu dîku dietu edi. Tudi tubambuluisha nanku patudi tubavuija bayidi.—Mat. 28:​19, 20.

MUA KUFIKISHA BAKUABU MU MPARADIZU WA MU NYUMA

16. Mmunyi mudi bantu mua kukokibua mu Mparadizu wa mu nyuma?

¹⁶ Yonso wa kutudi udi ne tshidiye ne bua kuenza bua kufikisha bakuabu ku dibuela mu Mparadizu wa mu nyuma. Tudi mua kutshienza bimpe tuetu bidikije Yehowa. Katu ukoka bantu kudiye ku bukole to. Utu ‘ubakoka’  kudiye ne bulenga buonso. (Yone 6:44; Yel. 31:3) Padi bantu ba muoyo muimpe balonga ngikadilu milenga ya Yehowa ne bumuntu buende, badi bakokibua kudiye. Mmunyi mudi ngikadilu yetu milenga ne bumuntu buetu buimpe bukoka bantu mu Mparadizu wa mu nyuma?

17. Mmunyi mutudi mua kukoka bakuabu mu Mparadizu wa mu nyuma?

¹⁷ Tudi tukoka bantu mu Mparadizu wa mu nyuma patudi banange bena Kristo netu ne tubenzela malu mimpe. Padi badi kabayi bena Kristo babuela mu bisangilu, mbimpe bumvue pabu anu bu bantu bavua kabayi bena Kristo bavua pamuapa babuela bisangilu mu tshisumbu tshia Kolinto. Bavua mua kuikala bambe ne: “Bulelela, Nzambi udi munkatshi muenu.” (1 Kol. 14:​24, 25; Zek. 8:23) Nunku, tudi ne bua kutungunuka ne kutumikila mubelu wa ne: “Nusombe mu ditalala.”—1 Tes. 5:13.

18. Mmalu kayi adi mua kukoka bantu mu Mparadizu wa mu nyuma?

¹⁸ Tuikalayi tudienzeja bua kumona bena Kristo netu mudi Yehowa ubamona. Netubamone mudi Yehowa ubamona tuetu tuimanyina pa ngikadilu yabu mimpe, katuyi tuimanyine pa ngikadilu yabu mibi ikalabu kabatshiyi nayi kumpala eku to. Tudi mua kujikija bilumbu bidi pankatshi petu mu mushindu muimpe tuetu ‘bikale tuenzelangana malu ne bulenga, tuditeka pa muaba wa bakuabu ne dinanga dionso, ne tufuilangana luse ne muoyo mujima.’ (Ef. 4:32) Dîba adi, muntu yonso udi musue bua bamuenzele malu mushindu au neakokibue mu Mparadizu wa mu nyuma. b

 KUPATUKI MU MPARADIZU WA MU NYUMA TO

19. a) Anu mudi kazubu ka “ Bakaya, kualukilabu” kaleja, ntshinyi tshivua bamue bambe pakapinganabu mu Mparadizu wetu wa mu nyuma? b) Tudi ne bua kudisuika bua kuenza tshinyi? (Tangila kabidi tshimfuanyi.)

¹⁹ Tudi ne dianyisha bua Mparadizu wetu wa mu nyuma eu. Katu muanyi kulengela bu mudiye lelu emu to, ne mudi bantu ba bungi badi batendelela Yehowa kupita ba kuonso eku. Tutungunukayiku ne kuikala ne dianyisha kudi Yehowa bua Mparadizu udiye mutuenzele eu. Muntu yonso udi musue kupetulula bukole, kuikala ne disanka, kuikala mutukije, ne kuikala mu bukubi udi ne bua kubuela mu Mparadizu wa mu nyuma ne kushalamu! Kadi tuatapa ntala tuadimuka bualu Satana udi udienzeja ne muende muonso bua kutulobesha bua tupatukamu. (1 Pet. 5:8; Buak. 12:9) Katumulekedi utufikisha ku dipatukamu to. Tudienzeje bua kukuba bulengele, bukezuke, ne ditalala bidi mu Mparadizu wetu wa mu nyuma.