1. Bamue batendeledi ba Yehowa badi mua kufika ku didiela lukonko kayi?

 PATUTU tumanya ne: Yehowa utu wanyisha bantu bende mu tshibungi, bitu bitukolesha! Bible udi wamba ne: “Yehowa udi usanka bua bantu bende.” (Mis. 149:4) Kadi kudi misangu itu bamue ba kutudi bateketa mu mikolo bafika ne ku didiebeja ne: ‘Yehowa utuku unganyisha anyi?’ Batendeledi ba Yehowa ba bungi badi Bible utela bavua mu nsombelu ivua mibafikishe ku didiela lukonko lua buena elu.—1 Sam. 1:6-10; Yobo 29:2, 4; Mis. 51:11.

2. Tuetu basue bua Yehowa atuanyishe, tudi ne bua kuenza tshinyi?

² Bible udi uleja patoke ne: Yehowa udi mua kuanyisha bantu bapange bupuangane. Udi utuanyisha anu tuetu baleje ditabuja kudi Yezu ne babatijibue. (Yone 3:16) Dîba adi, tudi tuleja mutudi banyingalale bua mpekatu yetu ne mutudi balaye Nzambi bua kuenza disua diende. (Bien. 2:38; 3:19) Yehowa udi usanka bikole patudi tuenza malu aa ne meji a kulua balunda bende. Tuetu tudienzeja bua kutungunuka ne kukumbaja bualu butudi balaye Yehowa bua kumuenzela mudimu, neatuanyishe ne netulue balunda bende banene.—Mis. 25:14.

3. Netuandamune nkonko kayi mu tshiena-bualu etshi?

³ Kadi bua tshinyi bamue batu bafika ku dimona ne: Yehowa kena ubanyisha? Mmunyi mudi Yehowa uleja ne: udi utuanyisha? Mmunyi mutudi mua kukolesha dishindika dietu dia ne: Nzambi udi utuanyisha?

 BUA TSHINYI BAMUE BATU BAFIKA KU DIMONA NE: YEHOWA KENA UBANYISHA?

4-5. Ntshinyi tshitudi ne bua kuvuluka tuetu tudimona katuyi ne mushinga?

⁴ Ba bungi ba kutudi mbadimone kabayi ne mushinga katshia ku buana buabu. (Mis. 88:15) Adrián udi wamba ne: “Mvua anu ndimona tshiyi ne mushinga to. Ndi mvuluka ne: pantshivua muana, mvua nsambila bua bena mu dîku dietu babuele mu Mparadizu, kadi tshivua ndimona meme mukumbane bua kubuelamu to.” Tony udi kayi mukolele mu dîku dia Bantemu udi wamba ne: “Baledi banyi kabatu bangambile musangu nansha umue ne: mbannange anyi ne: mvua mbasankisha to. Mvua ngela meji ne: kakuvua bualu bumvua ngenza buvua bubasankisha to.”

⁵ Tuetu tudimona katuyi ne mushinga, tuvuluke ne: Yehowa nkayende ke udi mutukoke kudiye. (Yone 6:44) Mmumanye ngikadilu yetu mimpe itudi pamuapa katuyi bamanye ne udi umona mu muoyo wetu. (1 Sam. 16:7; 2 Kul. 6:30) Nanku tuitabe padiye utuambila ne: tudi ne mushinga kudiye.—1 Yone 3:19, 20.

6. Mmunyi muvua Paulo umvua bua mpekatu ivuaye muenze ku kale?

⁶ Pamuapa tutshidi tudipisha bua malu mabi atuvua benze kumpala kua kulua Bantemu. (1 Pet. 4:3) Nansha bena Kristo badi ne lulamatu batu baluangana bua kulekela dijinga dia kuenza malu mabi. Kadi wewe utu umona ne: Yehowa kena mua kukufuila luse anyi? Biobi nanku, kola muoyo bualu meji au akadi maluile batendeledi bakuabu ba Yehowa. Tshilejilu, mupostolo Paulo uvua udimona muena dikenga pavuaye uvuluka bilema biende. (Lomo 7:24) Paulo ukavua mulekele kuenza bilema abi ne mubatijibue. Nansha nanku wakadibikila ne: “mutambe bukese ku bapostolo” ne muenji wa mpekatu “wa kumpala.”—1 Kol. 15:9; 1 Tim. 1:15.

7. Ntshinyi tshitudi ne bua kumanya bua mpekatu yetu ya kale?

⁷ Tatuetu wa mu diulu mmutulaye ne: neatubuikidile mpekatu yetu anu tuetu banyingalale. (Mis. 86:5) Tuetu banyingalale ne muoyo mujima, tuikale batuishibue ne: tshidi Yehowa muambe ntshilelela, ukadi mutufuile luse.—Kolos. 2:13.

8-9. Tshia kuenza ntshinyi bua kuepuka meji a ne: katuena ne tshitudi mua kuenza bua kusankisha Yehowa?

⁸ Tuetu bonso tutu basue kuenzela Yehowa mudimu ne muoyo mujima. Kadi bamue badi mua kumona ne: kabena ne tshidibu mua kuenza bua kumusankisha to. Amanda udi wamba ne: “Pa tshibidilu, mvua ndiambila ne: bua meme kupesha Yehowa tshidi tshitambe buimpe, ndi ne bua kumuenzela mudimu wa bungi menemene. Mvua ngenza mudimu wa bungi umvua tshiyi nkumbana bua kuenza to. Kadi pamvua tshiyi ‘ngukumbaja,’ mvua mmona ne: mvua mudiele mâyi ku makasa, muele ne Yehowa.”

⁹ Tshia kuenza ntshinyi bua kuepuka meji a ne: katuena ne tshitudi mua kuenza bua kusankisha Yehowa? Tumanye ne: Yehowa katu wenzejangana malu ku bukole to. Kena mua kutulomba tshitudi katuyi tukumbana bua kuenza to. Udi wanyisha tshionso tshitudi tumuenzela, patudi tumuenzelatshi ne muoyo mujima. Vuluka kabidi bantu badi Bible utela bavua benzele Yehowa mudimu ne muoyo mujima, bu mudi Paulo. Wakenza mudimu mukole munkatshi mua bidimu bia bungi, kuenzaye ngendu ya kilometre ya bungi, ne kuenzaye bisumbu bia bungi. Kadi pakavuaye katshiyi kabidi ne mushindu wa kuyisha bikole, Yehowa wakamubenga anyi? Tòo. Wakamubenesha pakatungunukaye ne  kuenza tshionso tshivuaye mua kuenza. (Bien. 28:30, 31) Tuetu petu, mudimu utudi tuenzela Yehowa udi mua kukepela anyi kuvula. Kadi tshidi ne mushinga kudiye ntshidi tshitusaka bua kuwenza. Tumonayi imue mishindu idi Yehowa utuleja ne: udi utuanyisha.

MMUNYI MUDI YEHOWA ULEJA NE: UDI UTUANYISHA?

10. Mmunyi mutudi mua “kuteleja” mudi Yehowa utuambila ne: udi utuanyisha? (Yone 16:27)

¹⁰ Mmutupeshe Bible. Yehowa udi uleja bantu bende ne: mmubanange ne udi ubanyisha. Bible mmutele misangu ibidi ivuaye muambile Yezu ne: uvua Muanende munanga uvuaye wanyisha. (Mat. 3:17; 17:5) Tudi basue Yehowa atuambile ne: udi utuanyisha anyi? Katuakumvua dîyi dia Yehowa difumina mu diulu to, kadi udi wakula netu ku diambuluisha dia Bible. Patudi tubala mêyi malenga avua Yezu muambile bayidi bende, tuamone anu bu ne: Yehowa ke udi utuambilawu. (Bala Yone 16:27.) Yezu wakaleja bumuntu bua Tatuende bimpe menemene ku malu avuaye muenze. Nanku patudi tubala muvuaye wanyisha bayidi bende ba lulamatu nansha muvuabu bapange bupuangane, tuikale petu tumona mêyi au bu ne: Yehowa ke udi utuambilawu.—Yone 15:9, 15.

11. Ntatu yetu idi ileja ne: Yehowa katshiena utuanyisha anyi? (Yakobo 1:12)

¹¹ Udi ukumbaja majinga etu. Yehowa udi uzuka bua kutuambuluisha, tshilejilu bua kukumbaja majinga etu a ku mubidi. Kudi misangu idiye ulekela ntatu itukuata bu muvuaye muyilekele ikuata Yobo. (Yobo 1:8-11) Ntatu yetu kayena ileja ne: Yehowa katshiena utuanyisha to. Kadi idi itupetesha mpunga wa kuleja mutudi bamunange bikole ne tumueyemena ne muoyo mujima. (Bala Yakobo 1:12.) Netumone mudiye ututabalela ne utupesha bukole bua kunanukila mu ntatu.

12. Bualu bua Dmitrii budi butulongesha tshinyi?

¹² Tuakulabi bua Dmitrii wa mu Asie. Mudimu wende wakafua, kushalaye mulofo ngondo ya bungi. Wakadifila mu mudimu wa buambi, kulejaye muvuaye mueyemene Yehowa. Panyima pa ngondo ya bungi, wakasama, kushalaye anu wa pa bulalu. Wakatuadija kudiamba ne: katshivua mulume muimpe ne tatu muimpe to; kufikaye ne ku diela meji ne: Yehowa katshivua umuanyisha to. Kadi dimue edi dilolo, muanende mutekete wa bakaji wakamufundila  mêyi adi mu Yeshaya 30:15 pa dibeji, a ne: “Bukole buenu nebuikale mu dishala talalaa ne dikala ne dieyemena.” Wakamutuadiladi ku bulalu aku, kumuambilaye ne: “Papa, malu owu makutonde, uvuluke mêyi a mvese eu.” Dmitrii wakajingulula ne: Yehowa utshivua upesha bena mu dîku diende biakudia, bia kuvuala, ne muaba wa kulala. Udi wamba ne: “Bivua bikengela nshale talalaa ne ntungunuke ne kueyemena Nzambi.” Biwikala pebe mu lutatu, manya ne: Yehowa udi anu ukutabalela ne neakupeshe bukole bua kulutantamena.

13. Nku diambuluisha dia banganyi kudi Yehowa mua kutujadikila ne: udi utuanyisha? Mushindu kayi?

¹³ Mmutupeshe bena Kristo netu. Yehowa utu ututumina bena Kristo netu bua kutuleja ne: udi utuanyisha. Udi mua kubasaka bua kutuambila mêyi a busambi mu tshikondo tshiakanyine. Ke tshiakenzekela muanetu mukuabu wa mu Asie pavuaye mu lutatu lukole. Mudimu wende uvua mufue, mulue kukuluka kabidi mu kusama kukole. Pashishe bayende kuenzaye mpekatu munene, kumumbushabu mu mudimu wa bukulu. Muanetu wa bakaji au wakamba ne: “Bivua bimpitshile. Meme kudiambila ne: pamuapa mvua muenze mpekatu, mufikishe Yehowa ku dibenga kunganyisha.” Wakalomba Yehowa bua amuleje ni utshivua umuanyisha. Mmunyi muakandamuna Yehowa disambila diende? Udi wamba ne: “Bakulu bakalua kuyukila nanyi, kunjadikilabu ne: Yehowa utshivua munnange.” Wakalua kulomba Yehowa musangu muibidi bua amujadikile kabidi ne: utshivua mumunange. Udi wamba ne: “Anu dituku dimvua musambile adi, ngakapeta mukanda uvua bena mu tshisumbu tshietu bamfundile. Pangakabala mêyi malenga avuabu bamfundile, ngakamona ne: Yehowa uvua muandamune disambila  dianyi.” Yehowa udi utuleja mudiye utuanyisha padiye ututumina bena Kristo netu bua kutusamba ne mêyi mimpe.—Mis. 10:17.

14. Mmu mushindu kayi mukuabu mudi Yehowa utujadikila ne: udi utuanyisha?

¹⁴ Yehowa udi utujadikila kabidi mudiye utuanyisha padiye ututumina bena Kristo netu bua kutubela padibi bikengela. Tshilejilu, mu matuku a bena Kristo ba kumpala, wakasaka mupostolo Paulo ku bukole bua nyuma wende bua kubafundila mikanda 14. Paulo uvua mubapeshe mibelu ne dîsu dikole mu mikanda ayi kadi mu mêyi malenga. Yehowa uvua mumusake bua kubapesha mibelu ayi bua tshinyi? Bualu udi Tatu muimpe udi ubela bana bende ‘badi bamusankisha.’ (Nsu. 3:11, 12) Nanku tuetu bapete mubelu mu Bible udi ututangila, tuwumone bu tshijadiki tshia mudi Yehowa utuanyisha. (Eb. 12:6) Mmalu kayi makuabu adi atujadikila ne: Yehowa udi utuanyisha?

BIJADIKI BIKUABU BIA MUDI YEHOWA UTUANYISHA

15. Mbanganyi badi Yehowa upesha nyuma muimpe? Bua tshinyi kumanya bualu abu kudi kutukolesha?

¹⁵ Yehowa udi upesha bantu badiye wanyisha nyuma muimpe. (Mat. 12:18) Tudiebeje ne: ‘Ndi ne ngikadilu ya dimuma dia nyuma muimpe anyi?’ Ukadiku lutulu ne bantu mpindieu kupita pauvua kuyi muanji kulua Ntemu anyi? Neutuishibue bikole ne: Yehowa udi ukuanyisha paudi wenda upeta ngikadilu ya dimuma dia nyuma wende!—Tangila kazubu ka “ Dimuma dia nyuma didi . . .”

16. Mbanganyi badi Yehowa mupeshe mudimu wa kuamba lumu luimpe? Mmunyi muudi umvua bua bualu abu? (1 Tesalonike 2:4)

¹⁶ Yehowa mmupeshe bantu badiye wanyisha mudimu wa kuamba lumu luimpe. (Bala 1 Tesalonike 2:4.) Mona muvua mudimu au muambuluishe Jocelyn. Wakabika mubungame dimue dituku. Udi wamba ne: “Tshivua ne makanda to, ne mvua ndiumvua tshiyi ne mushinga to. Kadi mvua mpanda-njila ne divua dituku dianyi dia buambi. Ke meme kusambila, kuya mu buambi.” Wakatuilangana ne mamu mukuabu mu dinda amu, diende Mariya, kuitabaye bua kulonga Bible. Mariya wakalua kuamba panyima pa ngondo ne: uvua wenda usambila pavua Jocelyn mulue kuende. Jocelyn udi wamba bua bualu abu ne: “Ngakamona anu bu ne: Yehowa uvua ungambila ne: ‘Ndi mukuanyishe.’” Bushuwa, ki mmuntu yonso witaba lumu luimpe to. Kadi  tuikale bamanye ne: Yehowa udi usanka patudi tudienzeja bua kuluambila bantu bakuabu.

17. Malu adi Vicky muambe bua tshia kupikulangana natshi adi akulongesha tshinyi? (Misambu 5:12)

¹⁷ Yehowa udi ufuila bantu badiye wanyisha luse ku diambuluisha dia tshia kupikulangana natshi. (1 Tim. 2:5, 6) Kadi ntshinyi tshitudi ne bua kuenza bituikala tumona ne: Yehowa kena utuanyisha tuetu bamane kuleja ditabuja mu mulambu wa Yezu ne babatijibue? Tuvuluke ne: ki mbimpe kueyemena muoyo wetu misangu yonso to, tueyemene Yehowa. Udi umona bantu badi ne ditabuja mu tshia kupikulangana natshi bu bakane ne mmulaye bua kubabenesha. (Bala Misambu 5:12; Lomo 3:26) Kuelangana meji a tshia kupikulangana natshi kuakakolesha Vicky. Dimue edi, yeye mumane kuelangana meji atshi bikole, wakamba ne: “Yehowa uvua nanyi lutulu munkatshi mua bidimu bia bungi. . . . Kadi bivua anu bu ne: mvua mmuambila ne: ‘Dinanga diebe ndikese, kadiena mua kufika kundi to. Mulambu wa Muanebe kawena mua kubuikila mpekatu yanyi to.’” Kadi pakelanganaye meji a tshia kupikulangana natshi, wakatuadija kumona ne: Yehowa uvua mumunange. Tuetu tuelangana petu meji a tshia kupikulangana natshi, netumone ne: Yehowa mmutunange ne udi utuanyisha.

18. Ntshinyi tshitudi ne bua kumanya tuetu batungunuke ne kunanga Tatuetu wa mu diulu?

¹⁸ Nansha tuetu badienzeje bikole bua kutumikila malu atudi balonge mu tshiena-bualu etshi, bidi anu mua kuenzeka bua tuetu kuteketa mu mikolo ne kudiebeja bikala Yehowa utuanyisha. Biobi bituenzekele nanku, tuvuluke ne: Yehowa udi wanyisha “bantu badi batungunuka ne kumunanga Yeye.” (Yak. 1:12) Nanku, tungunuka ne kusemena pabuipi ne Yehowa ne ukebe malu onso adi aleja ne: udi ukuanyisha. Ikala anu muvuluke ne: Yehowa kena “kule ne yonso wa kutudi” to.—Bien. 17:27.