TSHIENA BUALU TSHIA KULONGA 51
MUSAMBU 3 Bukole buetu, ditekemena dietu, tshieyemenu tshietu
Yehowa mmumone bisonji biebe
“Kelekeja binsonji bianyi mu kalondo kebe ka tshiseba. Ki mbifunda mu mukanda webe anyi?”—MIS. 56:8.
LUNGENYI LUNENE
Yehowa mmumanye tunyinganyinga tuebe bimpe ne neakusambe.
1-2. Mmalu kayi adi mua kutufikisha ku dipuekesha binsonji?
KUDI misangu itutu tuetu bonso tupuekesha binsonji. Tutu tubipuekesha pamuapa bua bungi bua disanka ditudi nadi, bua bualu kampanda bunene anyi bua pa buabu budi butuenzekele, bu mudi paudi mulele muana, paudi muvuluke bualu kampanda buimpe anyi panudi nutuilangana ne mulunda webe unuvua bashiyangane nende kukadi bidimu bia bungi.
2 Kadi misangu ya bungi tuetu bonso tutu tupuekesha binsonji bia tunyinganyinga. Tshilejilu, tudi mua kubipuekesha padi muntu utudi beyemene utukengesha, patudi ne disama dikole ditutatshisha anyi patudi bafuishe. Dîba dia buena adi, udi mua kumvua muvua muprofete Yelemiya mumvue pavua bena Babilona babutule Yelushalema. Yelemiya wakamba ne: “Tusulu tua mâyi tudi tupatuka mu mêsu anyi . . . Mêsu anyi adi adila kaayi alekela, kaayi ikisha.”—Muad. 3:48, 49.
3. Patu Yehowa umona batendeledi bende bakenga, utu umvua bishi? (Yeshaya 63:9)
3 Yehowa mmumanye bungi bua misangu itukadi bapuekeshe binsonji bia dibungama. Bible udi utujadikila ne: Yehowa mmumanye nsombelu mikole idi batendeledi bende batuilangana nayi. Matshi ende adi buashi patudi tumusengelela bua atuambuluishe. (Mis. 34:15) Yehowa udi umona binsonji bietu ne udi ututeleja; nunku bu mudiye Tatu wetu udi mutunange bikole, udi umvua bibi padiye utumona tupuekesha binsonji ne udi pabuipi bua kutuambuluisha.—Bala Yeshaya 63:9.
4. Mbilejilu kayi bia mu Bible bituakonkonona? Ntshinyi tshitualonga bua Yehowa?
4 Yehowa mmuleje mu Dîyi diende muvuaye umvua pavua batendeledi bende bapuekesha binsonji ne muvuaye ubambuluisha. Ke bualu butualonga patuikala tuenda tukonkonona bilejilu bia bantu aba: Hana, Davidi, ne mukalenge Hezikiya. Ntshinyi tshivua tshibadidisha? Ntshinyi tshiakenza Yehowa bua kubambuluisha? Mmunyi mudi tshilejilu tshiabu tshitukolesha ku muoyo patudi tupuekesha binsonji bia dibungama, bia diedibua mâyi ku makasa anyi bia dishikila?
BINSONJI BIA DIBUNGAMA
5. Ntatu ivua nayi Hana ivua mimufikishe ku diumvua bishi?
5 Hana uvua mutuilangene ne ntatu ya bungi ivua mimufikishe ku dipuekesha binsonji. Lumue lua ku ntatu ayi ludi ne: bayende uvua musele mukaji mukuabu, diende Penina. Penina uvua mukine Hana. Pakumbusha lutatu alu, Hana kavua mulele to. Kadi Penina yeye uvua ne bana ndambu. (1 Sam. 1:1, 2) Penina uvua umusendeka kakuyi dikisha bua muvuaye nkumba. Bu wewe muikale Hana, uvua mua kumvua bishi? Hana wakumvua dibungama dia bungi ‘kumufikishabi ku didila ne ku dibenga kudia,’ kumvuaye “kanyinganyinga ka bungi menemene.”—1 Sam. 1:6, 7, 10.
6. Ntshinyi tshivua Hana muenze bua kupeta disulakana?
6 Ntshinyi tshivua Hana muenze bua kupeta disulakana? Wakaya ku ntenta wa tshitendelelu bua kutendelela Yehowa. Pamuapa wakasombela pabuipi ne tshibuelelu tshia ntenta wa tshitendelelu au, ‘kutuadijaye kusambila Yehowa, udila bikole.’ Wakamulomba ne: ‘Tangila lutatu lua muena mudimu webe, umvuluke.’ (1 Sam. 1:10b, 11) Hana wakambila Yehowa ivuaye nayi munda. Bu muvua Yehowa mumunange bikole, wakumvua bibi menemene pavuaye mumumona udila nanku!
7. Ntshinyi tshivua tshikoleshe Hana pavuaye munzuluile Yehowa muoyo wende?
7 Hana mumane kunzuluila Yehowa muoyo wende, ne muakuidi munene mumane kumujakila ne: Yehowa neandamune disambila diende, wakumvua bishi? Bible udi wamba ne: “Mukaji au wakaya, yeye kudia, ne mpala wende katshivua kabidi mubungame to.” (1 Sam. 1:17, 18) Nansha muvua lutatu luende kaluyi luanji kujika, wakapeta disulankana. Uvua mulupuile Yehowa. Yehowa uvua mumone dikenga diende, mumvue muadi wende, ke bualu kayi wakalua kumubenesha, yeye kuimita.—1 Sam. 1:19, 20; 2:21.
8-9. Bilondeshile Ebelu 10:24, 25, bua tshinyi tudi ne bua kudienzeja bua kubuela mu bisangilu? (Tangila kabidi tshimfuanyi.)
8 Dilongesha. Udi ne lutatu ludi lukufikisha ku dipuekesha binsonji anyi? Pamuapa udi mufuishe mulela webe anyi mulunda webe. Dîba dia buena adi, bidi anu mua kuenzeka bua uditole. Kadi anu muvua diya ku ntenta wa tshitendelelu dikankamije Hana ne dimupeteshe disulakana, udi pebe mua kupeta busambi paudi ubuela mu bisangilu nansha lutatu luebe kaluyi luanji kujika. (Bala Ebelu 10:24, 25.) Patudi tuteleja mvese idi itukankamija mu bisangilu, Yehowa udi mua kutuambuluisha bua kumbusha meji etu ku ntatu itudi nayi, kuatuma ku malu mimpe adi mu mvese ayi. Dîba adi, netupete disulakana nansha lutatu luetu kaluyi luanji kujika.
9 Patudi mu bisangilu, bena Kristo netu badi batukankamija, baleja mudibu batunange ne tudi tudiumvua mbimpe patudi nabu. (1 Tes. 5:11, 14) Tuakulayi bua muanetu wa balume udi mpanda-njila wa pa buende uvua mufuishe mukajende. Wakamba ne: “Mvua anu mpuekesha binsonji. Imue misangu mvua nsomba pa nkayanyi bua kudila. Kadi bisangilu bivua binkankamija bikole. Mêyi mimpe avua bana betu bangambila ne mandamuna avuabu bafila bivua binkolesha. Nansha mumvua mbuelamu muikale ne malu adi mantonde, mvua ndiumvuamu bimpe.” Patudi mu bisangilu, Yehowa udi mua kusaka bena Kristo netu bua kutuambuluisha.
Bena Kristo netu badi mua kutukolesha (Tangila tshikoso 8-9)
10. Mmunyi mutudi mua kuidikija Hana patudi ne tunyinganyinga tukole?
10 Hana wakapeta kabidi disulakana pakambilaye Yehowa yende ya munda. Wewe pebe udi mua ‘kupuila [Yehowa ] ntatu yebe yonso’ mutuishibue ne: neakuambuluishe. (1 Pet. 5:7) Muanetu wa bakaji mukuabu muena bayende uvuabu base tshingoma kudi bangodavi bavua bababuelele, wakamba ne: “Ngakumvua anu bu ne: bavua basunsule muoyo wanyi, kawuyi mua kupingana kabidi mujima to. Kadi pangakasambila Yehowa, Tatu wanyi wa mu diulu, ngakapeta disulakana dia bungi. Imue misangu, mvua mpanga ne mêyi mimpe bua kumumvuija mumvua ngumvua. Kadi yeye uvua anu mumanye mumvua ngumvua. Pamvua ne dibungama dikole, mvua nsambila Yehowa bua ampeshe ditalala. Pashishe mvua ndiumvua mutukije, bingambuluisha bua kuenza malu anyi a dituku adi mudilekelele.” Paudi wambila Yehowa yebe idi mikutonde, Yehowa udi umvua pende bibi ne mmumanye kayinganyinga kebe. Nansha lutatu luebe luolu kaluyi lujike, Yehowa udi mua kukusamba ne kukupetesha disulakana. (Mis. 94:19; Filip. 4:6, 7) Neakufute bua muudi unanukila ne lulamatu.—Eb. 11:6.
BINSONJI BIA DIEDIBUA MÂYI KU MAKASA
11. Nsombelu mikole ivua Davidi mutuilangane nayi ivua mimufikishe ku diumvua bishi?
11 Davidi wakatuilangana ne nsombelu mikole ivua mimufikishe ku dipuekesha binsonji. Kuvua bantu bavua bamuluisha. Bakamuela mâyi ku makasa too ne kudi bantu bavuaye weyemena. (1 Sam. 19:10, 11; 2 Sam. 15:10-14, 30) Wakafunda ne: “Ndi mupungile ne kutua kuanyi kua mikemu; butuku bujima, ndi mbolesha bulalu buanyi bolabola ne binsonji; ndi nguwuja kalalu kanyi ne muadi.” Bua tshinyi uvua umvua nanku? Yeye nkayende udi wamba ne: “Bua bualu bua bonso badi bankengesha.” (Mis. 6:6, 7) Mushindu uvua bantu bakengesha Davidi wakamufikisha ku diumvua kanyinganyinga kakole, yeye kupuekesha binsonji bia bungi.
12. Bilondeshile Misambu 56:8, ndituishibua kayi divua nadi Davidi?
12 Nansha muvuabu bakengesha Davidi nanku, uvua mutuishibue ne: Yehowa uvua mumunange. Wakafunda ne: “Yehowa neateleje dîyi dia muadi wanyi.” (Mis. 6:8) Musangu mukuabu Davidi wakamba mêyi mimpe adi mu Misambu 56:8. (Bala.) Mêyi au adi aleja mudi Yehowa mutunange ne ututabalele. Davidi wakamba ne: bivua anu bu ne: Yehowa uvua ukelekeja binsonji biende mu mulangi anyi ubifunda mu mukanda. Davidi uvua mutuishibue ne: Yehowa uvua mumanye kanyinganyinga kende bimpe ne kavua mua kukapua muoyo to. Uvua mutuishibue ne: Tatuende wa mu diulu uvua mumunange uvua mumanye bimpe ntatu ivuaye nayi ne kanyinganyinga kavuaye umvua.
13. Padi bakuabu batuela mâyi ku makasa, ntshinyi tshitudi ne bua kuvuluka? (Tangila kabidi tshimfuanyi.)
13 Dilongesha. Udi ne kanyinganyinga bua mudi muntu udi mueyemene mukuele mâyi ku makasa anyi? Pamuapa udi ne kanyingayinga bualu muntu unuvua nutantshilangana nende bua dibaka mmukubenge anyi muena dibaka nebe mmushipe dibaka peshi bualu muntu uudi munange mmulekele kuenzela Yehowa mudimu. Mukaji wa muanetu wa balume kampanda wakenda masandi kubengaye bayende. Muanetu wa balume au wakamba ne: “Biakampitshila, meme kumvua bibi be! Ngakumvua dibungama ne tshiji tshikole, meme kudimona muntu tshianana.” Kumanya ne: Yehowa kakukulekela nansha muntu yeye mukuele mâyi ku makasa, nekukupeteshe disulakana. Muanetu au wakamba kabidi ne: “Malanda adi bantu badia adi mua kufua, kadi etu ne Yehowa adi ashala kashidi. Nansha malu kayi mua kutufikila, Yehowa neikale anu netu. Kakulekela bena lulamatu bende nansha.” (Mis. 37:28) Vuluka kabidi ne: Yehowa mmukunange kupita muntu kayi yonso. Nansha wewe ne kanyinganyinga bua mudibu bakuele mâyi ku makasa, Yehowa yeye udi ukutabalela bikole. (Lomo 8:38, 39) Bualu bua kukuata mbuobu ebu: Nansha muntu mukuenzele malu mabi a mushindu kayi, manya ne: Tatu webe wa mu diulu yeye mmukunange.
Mukanda wa Misambu udi utujadikila ne: Yehowa udi pabuipi ne badi ne muoyo musunsuke (Tangila tshikoso 13)
14. Misambu 34:18 udi utujadikila tshinyi?
14 Padi muntu utuela mâyi ku makasa, mêyi a Davidi adi mua kutukolesha adi mu Misambu 34:18. (Bala.) Mukanda mukuabu udi wamba ne: Bantu badi “bazajibue mu lungenyi luabu” badi mua kuikala “bantu badi kabayi ne bua nsongo budibu batekemene.” Mmunyi mudi Yehowa wambuluisha bantu ba mushindu eu? Anu mutu muledi muimpe ukuata muana udi udila ku tshianza ne umukolesha ku muoyo, Yehowa ‘udi pabuipi netu.’ Udi uditeka pa muaba wetu ne mmudiakaje bua kutuambuluisha patudi ne kanyinganyinga bua mudi muntu mutuele mâyi ku makasa anyi mutubenge. Mmusue kutusamba ne kutupetesha disulakana patudi ne muoyo musunsuke ne patudi tudimona balue bantu tshianana. Mmutulaye malu a bungi adi atuambuluisha bua kutantamena ntatu itudi nayi lelu.—Yesh. 65:17.
BINSONJI BIA DISHIKILA
15. Ntshinyi tshiakafikisha Hezikiya ku dibungama ne ku didila muadi?
15 Pavua Hezikiya mukalenge wa Yuda ne bidimu 39, bakamuambila ne: uvua ne disama dibi menemene. Muprofete Yeshaya wakamumanyisha mukenji wa kudi Yehowa wa ne: disama adi divua ne bua kumushipa. (2 Bak. 20:1) Biakamueneka ne: kuvua kujike bua Hezikiya. Pakumvuaye nanku, wakabungama, kudilaye muadi. Wakasambila Yehowa ne muoyo mujima.—2 Bak. 20:2, 3.
16. Mmunyi muvua Yehowa muandamune disambila divua Hezikiya muenze wenda udila?
16 Pakumvua Yehowa disambila dia Hezikiya ne kumona binsonji biende, biakamulenga ku muoyo; ke kumuambilaye ne: “Ndi mumvue disambila diebe. Ndi mumone binsonji biebe. Mona, ndi nkuondopa.” Luse luakasaka Yehowa bua kulaya Hezikiya ku butuangaji bua Yeshaya ne: nealepeshe matuku a muoyo wende ne neasungile Yelushalema mu bianza bia bena Ashû.—2 Bak. 20:4-6.
17. Mmunyi mudi Yehowa utuambuluisha patudi ne disama dinene? (Misambu 41:3) (Tangila kabidi tshimfuanyi.)
17 Dilongesha. Udi ne disama dikole diudi umona ne: kadiakujika anyi? Ambila Yehowa muudi umvua, nansha wewe ne binsonji bipueka. Bible udi utujadikila ne: “Tatu wa luse lua bungi ne Nzambi wa busambi buonso” neatusambe mu mateta etu onso. (2 Kol. 1:3, 4) Lelu eu, katuena mua kutekemena bua Yehowa ajikije ntatu yetu yonso to, kadi tudi bamanye ne: neatusambe. (Bala Misambu 41:3.) Yehowa neatupeshe bukole, meji ne ditalala dia mu muoyo ku diambuluisha dia nyuma wende muimpe bua tutantamene lutatu lutudi nalu. (Nsu. 18:14; Filip. 4:13) Udi utukolesha kabidi padiye utulaya ne: neajikije masama onso matuku atshilualua.—Yesh. 33:24.
Yehowa udi wandamuna masambila etu padiye utupesha bukole, meji, ne ditalala dia mu muoyo (Tangila tshikoso 17)
18. Mmvese kayi utu ukukolesha paudi ne lutatu lukole? (Tangila kazubu ka ne: “ Mêyi mimpe adi akamisha binsonji bietu.”)
18 Mêyi avua Yehowa muambile Hezikiya akamukolesha. Mêyi a Yehowa adi mu Bible adi mua kutukolesha petu ne kutuambuluisha bua kutukija patudi ne tunyinganyinga. (Lomo 15:4) Pavuabu bamanyishe muanetu wa bakaji kampanda wa ku Ouest kua Afrike ne: uvua ne kansere, ukavua udila anu kudila. Udi wamba ne: “Yeshaya 26:3 ke mvese uvua mutambe kunkolesha. Nansha mutudi katuyi mua kujikija ntatu yetu, mvese eu mmunjadikile ne: Yehowa udi mua kumpesha ditalala dia mu muoyo didi mua kungambuluisha bua kutukija ne kunanukila.” Udi ne mvese utu nangananga ukukolesha paudi ne ntatu mikole idi imueneka bu ne: kayakujika anyi?
19. Ntshinyi tshitudi bindile kumpala eku?
19 Nshikidilu wa ndongoluelu wa malu eu ukadi musemene bikole. Nunku netutuilangane ne malu a bungi adi atukebela tunyinganyinga ne adi atudidisha. Kadi anu mutudi bamone mu tshilejilu tshia Hana, tshia Davidi, ne tshia mukalenge Hezikiya, Yehowa udi umona binsonji bietu ne udi umvua bibi menemene, bileja mudiye mutunange bua mutudi bashale bamulamate. Nunku patudi ne ntatu, mbimpe tumuambile yetu yonso ya munda. Tushalayi pamue ne bena Kristo, mbatunange, katuditodi to. Tutungunukayi ne kubala malu a mu Bible adi atukolesha. Tudi batuishibue ne: tuetu batungunuke ne kunanukila ne lulamatu, Yehowa neatubeneshe ne neatukupule binsonji bionso bia dibungama, bia diedibua mâyi ku makasa ne bia dishikila anu mudiye mulaye. (Buak. 21:4) Dîba adi netupuekeshe anu binsonji bia disanka.
MUSAMBU 4 “Yehowa udi Mulami wanyi”
