BITU bikukolela bua kudilongela Bible bimpe pa tshibidilu anyi? Pamuapa bitu bitukolela tuetu bonso. Kadi teta kuela meji a malu makuabu autu wenza pa tshibidilu, bu mudi kuowa mâyi. Bitu bilomba dîba ne makanda bua kuowa mâyi, tshibi si tutu tumvua bilenga patukadi bamane kuowa mâyi. Kudilongela Bible kudi anu bu kuowa “mâyi ku diambuluisha dia dîyi” bua kupetulula bukole. (Ef. 5:26) Mona imue ngenyi.

• Enza programe. Kudilongela Bible kudi mu “malu adi ne mushinga wa bungi” adi muena Kristo kayi ne bua kulengulula to. (Filip. 1:10) Bua kunemeka programe webe au bimpe, mulamike muaba uudi mua kumumona bimpe, bu mudi ku tshimanu. Udi mua kuenza bua telefone webe ikale udila padi dîba dia kudilongela dikumbana.

• Sungula dîba ne mushindu muimpe wa kudilongela. Bitu bipepele bua wewe kudilongela munkatshi mua dîba dijima anyi mu minite mikese tshibi pa tshibidilu anyi? Wewe nkayebe udi mumanye tshidi tshimpe bua kuenza ne longolola bua wikale udilongela bilondeshile tshiotshi atshi. Wewe kuyi umvua mua kudilongela padi dîba diebe adi dikumbana, longa nansha mu minite 10. Wewe muenze nansha minite mikese, udi mua kulonga malu a bungi. Wewe anu mutuadije, neunangidile.—Filip. 2:13.

• Dianjila kusungula tshiena-bualu. Wewe mutuadije kukeba tshia kulonga, dîba dimane dikumbane, ‘kuakuenza malu bimpe bitambe ne dîba diebe’ to. (Ef. 5:16) Enza liste wa biena-bualu bia kudilongela. Lukonko luolu lukuluile mu lungenyi paudi wenda udilongela apu, lufunda. Paudi ujikija kudilongela, udi mua kukumbaja malu makuabu a kudilongela mu liste au.

• Ikala ushintulula malu. Udi mua kushintulula amue malu mu programe webe, bu mudi dîba dia kudilongela anyi malu a kulonga. Tshidi ne mushinga nkudilongela pa tshibidilu, ki ndîba, bungi bua minite anyi mêba audi udilongela peshi malu a kulonga to.

Wewe ne tshibidilu tshia kudilongela, neupete malu mimpe. Neusemene pabuipi ne Yehowa, neumanye mua kuenza malu ne meji, ne nebikukoleshe.—Yosh. 1:8.