PA BULOBA bujima, bakulu batu banange bikole midimu idibu nayi munkatshi mua bantu ba Nzambi. Bushuwa, badi dibenesha kutudi tuetu bonso! Kadi bidimu bishale ebi, bavua bashintulule bualu kampanda. Bulongolodi buvua bulombe bakulu bakadi bakulakaje bua kushila bakulu batshidi bashadile ku bidimu imue midimu minene ivuabu nayi. Mushindu kayi?

Mbalongolole bua batangidi ba bijengu ne balongeshi ba mu tulasa tuetu tua malu a Nzambi balekele midimu yabu padibu bakumbaja bidimu 70. Mbalongolole kabidi bua bakulu bakadi ne bidimu 80 bashile bakulu batshidi bashadile ku bidimu imue midimu idibu nayi, bu mudi ya kuikala mutangidi wa malu a Komite wa Filiale anyi mutangidi wa malu a kasumbu ka bakulu mu tshisumbu. Ntshinyi tshivua bakulu bakavua bakulakaje aba benze bua dishintulula malu edi? Mbaleje lulamatu luabu kudi Yehowa ne kudi bulongolodi buende!

Ken, uvua mutangidi wa malu a Komite wa Filiale munkatshi mua bidimu bitue ku 49, udi wamba ne: “Mvua muitabe dipangadika adi ne muoyo mujima. Anu mu dinda dingakamanya bualu abu, ngakasambila Yehowa, mmulomba bua mukulu utshivua mushadile ku bidimu angate mudimu au.” Bana betu bakulakaje ba lulamatu pa buloba bujima bavua badiumvue pabu anu bu Ken. Bushuwa, bu muvuabu  banange kuenzela bena Kristo nabu mudimu, biakanji anu kubatonda.

Esperandio uvua mutangidi wa malu a kasumbu ka bakulu mu tshisumbu tshiabu udi wamba ne: “Biakambungamija ndambu.” Kadi udi witaba ne: “Mvua dijinga ne dîba dia bungi bua kutabalela makanda anyi a mubidi akadi makepe.” Anu mutudi mua kuikala bamanye, Esperandio udi utungunuka ne kuenzela Yehowa mudimu ne lulamatu ne udi dibenesha kudi bena mu tshisumbu tshiabu.

Kadi netuambe tshinyi bua batangidi bena ngendu ba matuku a bungi badibu bumbushe mu midimu yabu? Allan uvua mutangidi muena ngendu munkatshi mua bidimu 38 udi wamba ne: “Pangakamanya bualu abu, biakantonda bikole.” Nansha nanku, wakamona ne: kulongesha bana betu ba balume batshidi ne bidimu bishadile mudimu kudi ne mabenesha, lelu udi utungunuka ne kuenzela Yehowa mudimu ne lulamatu.

Russell, uvua mutangidi muena ngendu ne mulongeshi wa mu tulasa tuetu tua malu a Nzambi munkatshi mua bidimu 40, udi uleja muvuabi bianji kubatonda yeye ne mukajende. Udi wamba ne: “Tuvua banange mudimu wetu bikole ne tutshivua ne makanda a kutungunuka ne kuwenza.” Russell ne mukajende badi bambuluisha tshisumbu tshiabu ne malu avuabu balonge ne dimonamona diabu dia malu, bitu bisankisha bamanyishi batubu bayisha nabu.

Nansha wewe kuyi udiumvua anu bu bana betu batudi batele aba, muyuki udi mu Samuele muibidi udi mua kukuambuluisha bua kudiumvua pebe bu bobu.

Vuluka dîba divua Abashaloma muana wa mukalenge Davidi mumutombokele. Davidi wakanyema mu Yelushalema kuyaye ku Mahanayima ku est kua musulu wa Yadene. Pakafikaye kuntu aku ne bantu bavuaye nabu, bavua dijinga ne bimue bintu. Udi muvuluke tshiakenzeka anyi?

Bantu balume basatu ba muoyo muimpe ba muaba au bakabatuadila malalu, biakudia, ne bintu bikuabu. Bâzilai uvua umue wa ku bantu abu. (2 Sam. 17:27-29) Diakamue pakimana buntomboji bua Abashaloma, Davidi wakapingana mu Yelushalema, Bâzilai kumushindikijaye ku Yadene. Davidi wakamusengelela bua kuya nende ku Yelushalema. Mukalenge wakamuambila ne: uvua ne bua kuikala umupesha pende biakudia, nansha muvua Bâzilai “ne bubanji bua bungi menemene” ne kayi dijinga ne biakudia bivuabu ne bua kuikala bamupesha abi. (2 Sam. 19:31-33) Kadi Davidi uvua pamuapa wanyisha Bâzilai bua ngikadilu yende ne uvua musue bua ikale umupesha ngenyi. Uvua ne bua kuikala ne diakalenga dia kusombela mu lubanza lua mukalenge bua kuenzelamu mudimu!

Bu muvua Bâzilai umona malu muvuawu ne muikale ne bupuekele, wakaleja patoke mukavuaye ne bidimu 80. Pashishe wakamba ne: “Ndi mua kujingulula pankatshi pa tshidi tshimpe ne tshidi tshibi anyi?” (2 Sam. 19:35) Uvua musue kuamba tshinyi? Bâzilai uvua ne bua kuikala mupete meji munda mua bidimu bionso abi. Utshivua anu ne mibelu mimpe ya kupeshangana anu bu “bantu bakulumpe” bakalua kupesha mukalenge Lehabama mibelu. (1 Bak. 12:6, 7; Mis. 92:12-14; Nsu. 16:31)  Nunku, pavua Bâzilai muakule bua dijingulula dia tshidi tshimpe ne tshidi tshibi, uvua mua kuikala wakula bua mubidi wende ukavua mutekete bua bukole bukavuaye. Wakitaba ne: bukulakaja buende bukavua bumupangishe mua kumvua muenya wa bintu bivuaye udia ne bunyange lumvu luende. (Muam. 12:4, 5) Nunku Bâzilai nkayende wakasengelela Davidi bua aye ku Yelushalema ne Kimehama utshivua nsongalume. Pamuapa Kimehama uvua muana wa Bâzilai.​—2 Sam. 19:36-40.

Bâzilai wakabenga mudimu mumupesha bua bukole bukavuaye, kulejabi muvuaye umona malu muvuawu; ke tshidibu benzele mashintuluka atudi bakuile ku ntuadijilu. Mu kuamba kuimpe, matuku etu aa katuvua bimanyine pa nsombelu wa muntu umue bu muvuabi bua Bâzilai to. Bivua bikengela kukonkonona malu mudiwu bua kumona tshimpe tshia kuenza bua bakulu ba lulamatu ba pa buloba bujima.

Bakulakaje bena Kristo ba bupuekele aba bavua bamone ne muoyo mujima ne: bobu bashile bana betu badi ne bidimu bishadile kudibu midimu ivuabu benze munkatshi mua bidimu bia bungi, bulongolodi bua Yehowa buvua ne bua kuya bimpe kumpala. Misangu ya bungi, bana betu bakulakaje ke bavua balongeshe bansonga, anu muvua Bâzilai pamuapa mulongeshe muanende, ne muvua mupostolo Paulo mulongeshe Timote. (1 Kol. 4:17; Filip. 2:20-22) Bansonga betu balume aba mbaleje mudibu mpindieu “mapa mikale bantu,” bakumbane bua “kuibaka mubidi wa Kristo.”​—Ef. 4:8-12; fuanyikija ne Nomba 11:16, 17, 29.

Bana betu ba bungi bakadi bakulakaje badi pa buloba bujima badi balekele imue midimu badi ne mpunga mikuabu ya kuambuluisha mu mudimu wa Yehowa.

Marco uvua mutangidi muena ngendu munkatshi mua bidimu 19 udi wamba ne: “Mu tshisumbu tshietu mudi bana betu ba bakaji bavua ne babayabu kabayi Bantemu, nunku nsombelu unkadi nende udi umpetesha mushindu wa kuambuluisha babayabu abu.”

Geraldo uvua mutangidi muena ngendu munkatshi mua bidimu 28 udi wamba ne: “Mu bipatshila bitudi nabi mpindieu mudi tshia kuambuluisha bana betu bavua balekele bisangilu ne tshia kulombola malonga a Bible a bungi.” Udi wamba ne: yeye ne mukajende mbafike ku dilombola malonga a Bible 15 ne ba bungi ba ku bana betu bavua balekele bisangilu mbatuadijilule kubuelamu.

Allan, utukadi batele, udi wamba ne: “Mpindieu tudi tuyisha bikole mu mishindu ya bungi ya mudimu wa buambi. Tudi basue kuyisha muaba udi bantu ba bungi, muaba ya diendela mushinga, ne basue kuyisha bena mutumba betu; babidi ba kudibu mbalue mu bisangilu.”

Biwikala muanetu wa balume mukumbane udi ne lulamatu udibu bashintulule mudimu munkatshi mua bantu ba Nzambi, manya ne: kudi mushindu mukuabu wa pa buawu uudi mua kuambuluisha mu mudimu wa Yehowa. Udi mua kuambila bana betu ba balume badi ne bidimu bishadile ku biebe mu tshisumbu malu mimpe auvua mupete. Russell utukadi batele udi wamba ne: “Yehowa udi ulongesha bana betu ba balume bimpe ba bidimu bishadile aba ne wenza nabu mudimu. Ndongeshilu wabu muimpe ne mudimu wabu wa bulami bidi biambuluisha bana betu ba pa buloba bujima!”​—Tangila kazubu ka “ Ambuluisha bansonga betu balume bua benze mudimu ne bipedi biabu bionso.”

Pikalabu bakushintulule midimu matuku adi panshi aa, ikala anu ne meji mimpe. Uvua muambuluishe bantu bungi kabuyi kubala bua mudimu uuvua muenze ne muoyo mujima, ne udi mua kutungunuka anu ne kubambuluisha. Mbakunange bikole ne nebatungunuke anu ne kukunanga.

Bualu bua mushinga mukole budi ne: udi muenze bua Yehowa ikale nebe ku muoyo. ‘Kakupua mudimu webe muoyo ne dinanga diuvua muleje bua dîna diende pa kukuatshila bansantu mudimu ne pa kutungunuka ne kubakuatshilawu.’ (Eb. 6:10) Mvese mufundisha  ku nyuma eu udi utujadikila ne: mulayi wende eu udi utangila kabidi midimu mikole ituvua tuenza kumpala. Udi ne mushinga wa bungi kudi Yehowa, kena mua kukupua muoyo bua malu aukadi muenze ne audi utungunuka ne kuenza bua kumusankisha!

Kadi netuambe tshinyi biwikala kuyi umue wa ku bana betu badibu bashintulule midimu? Bualu ebu budi anu mua kukutangila pebe buludiludi. Mushindu kayi?

Biwikala mumanye muanetu mukulakaje udibu bashintulule midimu, dishindama diende mu nyuma ne malu a bungi adiye mumanye munda mua bidimu bia bungi bidi mua kukuambuluisha. Mulomba mibelu ne ngenyi. Ikala utangila mudi dimonamona diende dia malu dimuambuluisha padiye wenza mudimu udiye nawu lelu.

Nansha wewe mukulakaje ukadibu bashintulule mudimu ne ukadi wenza mukuabu anyi muikale muanetu wa balume peshi wa bakaji udi dijinga ne diambuluisha, ikala mumanye ne: lulamatu lua bantu badi benzele Yehowa mudimu ne batungunuka ne kumuenzelawu, ludi ne mushinga wa bungi kudiye.