1. Nditeta kayi diakapeta Jozefe? Tshiakenzaye ntshinyi?

 JOZEFE muana wa Yakoba wakatuilangana ne diteta dikole. Mukaji wa mfumuende, Potifâ, wakamuambila ne: “Lala nanyi.” Jozefe wakabenga. Lelu muntu udi mua kudiebeja ne: ‘Bua tshinyi Jozefe wakakandamena diteta edi?’ Potifâ kavuaku to. Jozefe kabidi uvua mupika mu dîku adi; mukaji au uvua mua kumukengeshisha bikole yeye mubenge tshivuaye umulomba. Kadi Jozefe wakatungunuka anu ne kubenga dimuambisha diende adi. Bua tshinyi? Wakamba ne: “Mmunyi mundi mua kuenza bualu bubi bunene nunku, ne bushuwa kuenzela Nzambi mpekatu?”​—Gen. 39:7-12.

2. Mmunyi muvua Jozefe mumanye ne: masandi mpekatu muenzela Nzambi?

² Mmunyi muvua Jozefe mumanye ne: Nzambi wende uvua mua kumona dienda masandi ne mukaji wa bende au bu “bualu bubi bunene?” Bena Isalele bakapeta Mikenji ya Mose bidimu bibidi pashishe. Mu mikenji ayi muvua mukenji uvua wamba ne: “Kuena ne bua kuenda masandi.” (Ekes. 20:14) Kadi Jozefe uvua mumanye Yehowa bimpe menemene. Ke kuelaye meji a muvuaye mua kumvua bu yeye muende masandi. Tshilejilu, Jozefe uvua mumanye bimpe ne: Yehowa uvua muenze dibaka bua dituangaje mulume umue ne mukaji umue. Uvua kabidi mua kuikala mumvue tshivua Yehowa muenze misangu ibidi bua lumu lua Sala, mamuende wa kakuende, kalunyanguki pavuabu bakeba kulala nende ku bukole. Bia muomumue, Nzambi wakakeba kabidi tshia kuenza bua kukuba Lebeka, mukaji wa Izaka. (Gen. 2:24; 12:14-20; 20:2-7; 26:6-11) Pavua Jozefe welangana meji a malu aa, wakajingulula tshivua tshiakane ne tshivua tshibi ku mêsu kua Nzambi. Bu muvuaye munange Nzambi wende, uvua kabidi munange mêyi ende a buakane, ne uvua mudisuike bua kushala mualamate.

3. Ntshinyi tshituamona mu tshiena-bualu etshi?

³ Utu munange buakane anyi? Kakuyi mpata utu mubunange.  Kadi bu mutudi bapange bupuangane, tuetu katuyi badimuke, mushindu udi bena panu bamona buakuane udi mua kutunyanga bipepele. (Yesh. 5:20; Lomo 12:2) Nunku netumone tshidi buakane bumvuija ne tshitudi tupeta patudi tubunanga. Pashishe netumone malu asatu atudi mua kuenza atuambuluisha bua kunanga mikenji ya Yehowa bikole.

4. Mmushindu kayi mubi udi bantu ba bungi bamona buakane?

⁴ Bantu ba bungi badi mua kuela meji ne: muntu udibu bamba ne: mmuakane ngeu udi udisua, ubipisha bakuabu, anyi udimona muena malu mimpe kupita bakuabu. Kadi Nzambi katu munange ngikadilu eyi to. Pavua Yezu pa buloba, wakabipisha bamfumu ba bitendelelu ba tshikondo tshiende bua muvuabu bele yabu mikenji ya buakane. (Muam. 7:16; Luka 16:15) Muntu udi ne buakane bua bushuwa kena mua kudimona muena malu mimpe kupita bakuabu to.

5. Bilondeshile Bible, buakane budi bumvuija tshinyi? Fila bilejilu.

⁵ Buakane nngikadilu mulenga. Mu tshikoso, budi bumvuija kuenza tshidi tshiakane ku mêsu kua Yehowa Nzambi. Mu Bible, miaku idibu bafunde bua kuakula bua buakane idi ifila lungenyi lua kuenza malu bilondeshile mêyi matumbuke a Yehowa anyi mikenji yende. Tshilejilu, Yehowa uvua muele mukenji wa ne: bangenda mushinga bavua ne bua “kuikala ne tshintu tshia kupima natshi bujitu [tshia] tshimpe.” (Dut. 25:15) Muaku wa mu tshiena Ebelu wa ntuadijilu udibu bakudimune ne: “tshimpe” badi mua kuwukudimuna kabidi ne: “tshiakane.” Nunku, muena Kristo udi musue kuikala muakane ku mêsu kua Yehowa neenze bua ikale ne bululame mu midimu anyi mu malu ende onso. Muntu muakane mmunange kabidi kuenza malu adi makane, ki mmusue kumona muntu wenzela mukuabu malu mabi to. ‘Bua kusankisha Yehowa mu malu onso,’ muntu muakane udi wela meji a muikala Yehowa mua kumona mapangadika angataye.​—Kolos. 1:10.

6. Bua tshinyi tudi tueyemena mikenji ya Yehowa ya tshidi tshimpe ne tshidi tshibi? (Yesh. 55:8, 9)

⁶ Bible utu wamba bua Yehowa ne: udi mpokolo wa buakane. Ke bualu kayi badi bamubikila ne: ‘Muaba wa kusombela wa buakane.’ (Yel. 50:7) Bu mudiye Mufuki, yeye ke udi mukumbane bua kutuelela mikenji ya tshidi tshimpe ne tshidi tshibi. Bu mudi Yehowa mupuangane, mushindu udiye umona tshidi tshimpe ne tshidi tshibi mmushilangane kule ne kule ne wetu tuetu, bualu misangu ya bugi dipanga dietu dia bupuangane ne mpekatu ke bitu binyanga mmuenenu wetu. (Nsu. 14:12; bala Yesh. 55:8, 9.) Kadi bu mutudi bafukibue mu tshimfuanyi tshia Nzambi, tudi ne mushindu wa kutumikila mikeji yende. (Gen. 1:27) Tudi basue kuenza nanku. Dinanga ditudi banange Tatu wetu didi ditusaka bua kuenza muetu muonso bua kumuidikija.​—Ef. 5:1.

7. Bua tshinyi tudi dijinga ne mikenji ya kueyemena? Fila tshilejilu.

⁷ Kutumikila mikenji ya Yehowa ya tshidi tshimpe ne tshidi tshibi kudi kutupetesha mabenesha. Bua tshinyi tudi tuamba nanku? Anji elabi meji, munganga yeye kayi mulonde mikenji ya diondapangana, tshidi mua kuenzeka ntshinyi? Bamue babedi badi mua kufua. Bushuwa, mikenyi ya kueyemena itu ikuba. Bia muomumue, mikenji ya Nzambi ya tshidi tshimpe ne tshidi tshibi idi itukuba.

8. Mmalu kayi mimpe apeta bantu badi banange kuenza malu makane?

⁸ Yehowa udi ubenesha bantu badi batumikila mikenji yende. Mmulaye ne: “Bantu bakane nebapiane buloba, nebasombapu bua kashidi.” (Mis. 37:29) Udiku mua kuela meji  muikala bantu mu buobumue, mu ditalala, ne bikale ne disanka tshikondo tshikala muntu yonso utumikila mikenji ya Yehowa anyi? Yehowa mmusue bua wikale ne nsombelu wa mushindu au. Bushuwa, yonso wa kutudi udi ne malu adi amusaka bua kunanga buakane! Ntshinyi tshitudi mua kuenza bua kunanga ngikadilu eu bikole? Tukonkononayi malu asatu a kuenza.

9. Ntshinyi tshiatuambuluisha bua kunanga buakane?

⁹ Bualu 1: Nanga muntu udi muele mikenji. Bua kunanga buakane, tudi ne bua kunanga Muntu udi muele mikenji ya tshidi tshimpe ne tshidi tshibi. Tuetu banange Yehowa bikole, netujinge bua kutumikila mikenji yende ya buakane. Tshilejilu, bu Adama ne Eva banange Yehowa, kabavua mua kupanga kutumikila mukenji wende muakane to.​—Gen. 3:1-6, 16-19.

10. Ntshinyi tshivua Abalahama muenze tshivua tshimuambuluishe bua kumvua ngelelu wa meji wa Yehowa?

¹⁰ Katuena basue kuenza tshilema tshia muomumue atshi, tshivua Adama ne Eva benze to. Tudi mua kutshiepuka tuetu tutungunuka ne kulonga malu a Yehowa, tuanyisha ngikadilu yende, ne tudienzeja bua kumanya ngelelu wende wa meji. Dîba adi dinanga ditudi bamunange nedikole bushuwa. Tuakulabi bua Abalahama. Uvua munange Yehowa bikole. Nansha pavuabi bimukolele bua kumvua mapangadika a Yehowa, kavua mumutombokele to. Kadi wakakeba bua kumanya Yehowa bimpe. Tshilejilu, pakamanyaye ne: Yehowa uvua mupangadije bua kubutula Sodoma ne Amola, wakanji kumvua buôwa bua ne: “Mulumbuluishi wa buloba bujima” uvua mua kubutula bantu bakane ne bantu babi popamue. Bua Abalahama bivua bimueneka ne: kabivua bikengela kuenza nanku to. Nunku wakela Yehowa nkonko ne didipuekesha. Yehowa kumuandamunaye ne lutulu. Ndekelu wa bionso, Abalahama wakamona ne: Yehowa utu ukonkonona muoyo wa muntu yonso ne katu unyoka bapile ne babinge popamue to.​—Gen. 18:20-32.

11. Mmunyi muvua Abalahama muleje ne: uvua munange Yehowa ne mumueyemene?

¹¹ Diyukidilangana divua dienzeke pankatshi pa Abalahama ne Yehowa bua tshimenga tshia Sodoma ne Amola divua dimulenge bikole ku muoyo. Kakuyi mpata, diakamufikisha ku dinanga Tatu wende eu ne ku dimunemeka bikole menemene kupita ne kumpala. Bidimu bia bungi pashishe, dieyemena dikole divua Abalahama nadi kudi Yehowa diakatetshibua bikole menemene. Yehowa wakamulomba bua kumulambula Izaka, muanende uvuaye munange. Kadi mpindieu bu mukavuaye mumanye Nzambi bimpe, kavua kabidi ne nkonko ya kumuela to. Wakadilongolola bua kuenza tshivua Yehowa mumulombe. Nansha nanku, ela meji muvuaye mumvue bibi pavuaye udilongolola apu! Pamuapa uvua ne bua kuikala wela meji bikole bua tshivuaye mulonge bua Yehowa. Uvua mumanye ne: Yehowa kena mua kuenza bualu bubi nansha bumue anyi kena mua kuenza bualu kayi ne dinanga to. Bilondeshile mupostolo Paulo, Abalahama uvua mudiambile ne: Yehowa uvua ne bua kubisha Izaka wende ku lufu. (Eb. 11:17-19) Yehowa mene uvua mulaye ne: Izaka uvua ne bua kulela tshisamba, ne dîba adi Izaka kavua ne bana to. Abalahama uvua munange Yehowa, ke bualu kayi uvua mutuishibue ne: Tatu wende uvua ne bua kuenza malu ne buakane. Wakatumikila ne ditabuja nansha muvuabi kabiyi bipepele.​—Gen. 22:1-12.

12. Mmunyi mutudi mua kuidikija Abalahama? (Musambu 73:28)

¹² Mmunyi mutudi mua kuidikija Abalahama?  Mbimpe tutungunuke ne kulonga malu a Yehowa. Patudi tuenza nanku, netusemene pabuipi nende bikole menemene ne netumunange kabidi bikole. (Bala Musambu 73:28.) Netuikale ne kondo ka muoyo kalongesha kikala katulombola bilondeshile ngelelu wa meji wa Nzambi. (Eb. 5:14) Dîba adi, pakeba muntu bua kutuenzeja bualu bubi, katuakuitaba to. Netukine lungenyi luonso lua kuenza bualu budi mua kunyingalaja Tatu wetu ne kunyanga malanda etu nende. Mmushindu kayi mukuabu utudi mua kuleja ne: tudi banange buakane?

13. Mmunyi mutudi mua kulonda buakane? (Nsumuinu 15:9)

¹³ Bualu 2: Dienzeja bua kunanga buakane ku dituku ne ku dituku. Tuetu basue bua mubidi wetu wikale mupatakane bimpe, tudi ne bua kudienzeja bua kuwibidija dituku dionso. Ke mudibi kabidi bua mikenji ya Yehowa ya buakane; bidi bikengela kudienzeja dituku dionso bua kuyinanga. Yehowa katu ne malu makole to, katu ukeba ne: tuenze malu atudi katuyi mua kuenza to. (Mis. 103:14) Udi utujadikila ne: “Udi unanga muntu udi ulonda buakane.” (Bala Nsumuinu 15:9.) Tuetu ne tshipatshila kampanda mu mudimu wa Yehowa, tutu anu tuenza muetu muonso bua kutshikumbaja. Ke mudibi kabidi patudi tulonda buakane. Yehowa udi utuambuluisha ne lutulu luonso bua kuya kumpala, mmumue ne: bua kunanga buakane bikole mu kupita kua matuku.​—Mis. 84:5, 7.

14. “Tshibuikilu tshia pa tshiadi tshia buakane” ntshinyi? Bua tshinyi tudi natshi dijinga?

¹⁴ Yehowa udi utuvuluija ne: buakane ki mbujitu to. (1 Yone 5:3) Kadi mbukubi, tudi nabu dijinga dituku dionso edi. Vuluka bia mvita bionso bivua mupostolo Paulo mumvuije. (Ef. 6:14-18) Ntshia mvita kayi tshivua tshikuba muoyo wa musalayi? “Tshibuikilu tshia pa tshiadi tshia buakane.” Tshidi tshileja mikenji miakane ya Yehowa. Anu mudi tshibuikilu etshi tshikuba muoyo wetu muena dîna eu, mikenji miakane ya Yehowa idi mua kukuba muoyo webe wa mu tshimfuanyi, mmumue ne: tshiudi munda. Nunku enza muebe muonso bua ne: mu bia mvita biebe  bionso muikale tshibuikilu tshia pa tshiadi tshia buakane!​—Nsu. 4:23.

15. Leja muudi mua kuvuala tshibuikilu tshia pa tshiadi tshia buakane.

¹⁵ Mmushindu kayi uudi mua kuvuala tshibuikilu tshia pa tshiadi tshia buakane? Udi utshivuala paudi unemeka mikenji ya Nzambi mu mapangadika audi wangata dituku dionso. Kumpala kua kusungula malu a kuakula, mijiki ya kuteleja, malu a kutangila bua kujikija lutetuku, anyi mikanda ya kubala, anji diebeja ne: ‘Pangikala ngenza malu aa, mbinganyi bingikala mbueja mu muoyo wanyi? Yehowa udi wanyisha bualu ebu anyi? Budi busakangana ku malu adi kaayi makane ku mêsu kua Yehowa, bu mudi malu a masandi, tshikisu, lukuka, ne budinangi anyi?’ (Filip. 4:8) Mapangadika ebe owu apetangana ne disua dia Yehowa, mmumue ne: udi musue bua mikenji yende miakane ikube muoyo webe.

16, 17. Mmunyi mudi Yeshaya 48:18 utujadikila ne: tudi ne mushindu wa kutumikila mikenji ya Yehowa bua kashidi?

¹⁶ Udiku udiebeja bua kumanya ni udi mua kukumbana bua kutungunuka ne kutumikila mikenji miakane ya Yehowa dituku dionso peshi tshidimu tshionso anyi? Tangila tshilejilu tshidi Yehowa mufile mu Yeshaya 48:18. (Bala.) Yehowa udi ulaya ne: buakane buetu nebuikale “bu mavuala a mbuu.” Difuanyikije wewe musombe ku muelelu wa mbuu mualabale mutangile mudi mavuala adikupa, enda alondangana. Ku muaba kuudi musombele mu ditalala aku, udi mua kusamisha mutu bua ne: dimue dituku mavuala au adi mua kuimana anyi? Tòo! Bualu udi mumanye ne: kukadi bidimu binunu bia bungi bidi mavuala au adikupa ku dilobo adi, ne neatungunuke anu ne kudikupaku.

¹⁷ Buakane buebe budi anu bu mavuala a mbuu au! Mushindu kayi? Paudi ne dipangadika dia kuangata, anji ela meji bua tshidi Yehowa musue ne: wenze; pashishe utshienze. Nansha dipangadika diudi wangata dikale dikole mushindu kayi, Tatu webe wa dinanga neikale anu nebe, ukuambuluisha bua wikale anu mushindame tshishiki ne bua wenze malu bilondeshile mikenji yende ya buakane dituku dionso.​—Yesh. 40:29-31.

18. Bua tshinyi katuena ne bua kulumbuluisha bakuabu bilondeshile yetu mikenji?

¹⁸ Bualu 3: Lekeela Yehowa dilumbuluisha. Dîba ditudi tudienzeja bua kuikala ne nsombelu udi umvuangana ne mikenji miakane ya Yehowa, katuena ne bua kulumbuluisha bakuabu anyi kudimona bakane kubapita to. Pamutu pa kubapetula bienze anu bu ne: tudi ne bukenji bua kubalumbuluisha bilondeshile yetu mikenji, mbimpe tuvuluke ne: Yehowa ke “Mulumbuluishi wa buloba bujima.” (Gen. 18:25) Yehowa ki mmutupeshe bukokeshi bua kulumbuluishangana mushindu au to. Ke bualu kayi Yezu wakatuma dîyi, wamba ne: “Lekelayi kulumbuluishangana.”​—Mat. 7:1. *

19. Mmunyi muvua Jozefe muleje ne: uvua mueyemene dilumbuluisha dia Yehowa?

¹⁹ Tupinganayi ku tshilejilu tshia muntu muakane Jozefe. Uvua wepuka dilumbuluisha bakuabu, nansha aba bavua bamukengeshe. Bana babu ba munda mudi nzala bakamukengesha bibi, kumupanabu bu mupika; pashishe kuitabijijabu tatuabu ne: Jozefe uvua mufue. Bidimu bia bungi pashishe, Jozefe wakatuilangana ne bana babu abu. Bu mukavuaye mukokeshi wa bukole, uvua mua kubalumbuluisha mu mushindu mubi ne kudisombuela.  Ke tshivua bana babu mua kuikala bumvuila buôwa menemene, nansha muvuabu bumvua bibi bua tshivuabu benze. Kadi Jozefe wakabajadikila ne: “Kanutshinyi to. Meme ndi pa muaba wa Nzambi anyi?” (Gen. 37:18-20, 27, 28, 31-35; 50:15-21) Didipuekesha diakasaka Jozefe bua kulekeela Yehowa dilumbuluisha.

20, 21. Mmunyi mutudi mua kuepuka lungenyi lua kudimona bakane bapite bakuabu?

²⁰ Anu bu Jozefe, tudi tulekeela Yehowa dilumbuluisha. Tshilejilu, katuena tuleja bu ne: tudi bamanye tshidi tshisaka bena Kristo netu bua kuenza malu kampanda to. Katuena mua kumona mu mioyo yabu to, anu “Yehowa [ke] udi ukonkonona malu adi mu meji.” (Nsu. 16:2) Mmunange bantu ba mishindu yonso, ba miaba mishilangane. Yehowa udi kabidi utukankamija bua ‘tunzulule mioyo yetu bikole.’ (2 Kol. 6:13) Dijinga dietu ndia kunanga bena mu dîku dietu dia mu nyuma bonso, ki ndia kubalumbuluisha to.

²¹ Abi bidi biumvuija kabidi ne: katuena ne bua kulumbuluisha bantu badi pambelu pa tshisumbu to. (1 Tim. 2:3, 4) Tuetu tuamba bua mulelela wetu udi kayi Ntemu ne: “Bua eu kakulua mutendeledi wa Yehowa to,” mbimpe anyi? Tòo, tuetu tuamba nanku, tudi tulua bena dikamakama, ne tudimona bakane bapite bakuabu. Yehowa utshidi upesha “bantu ba miaba yonso” mpunga wa bobu kunyingalala bua malu abu mabi. (Bien. 17:30) Ikala muvuluke misangu yonso ne: muntu udi udimona muakane mupite bakuabu, ku mêsu kua Yehowa ki mmuakane to.

22. Bua tshinyi udi mudisuike bua kunanga buakane?

²² Dinanga ditudi banange mikenji ya Yehowa ya buakane ivudijaku disanka dietu, dituambuluishaku kabidi bua kuikala tshilejilu tshimpe kudi bakuabu bua bibambuluishe bua kutunanga tuetu ne Nzambi wetu bikole. Tutungunukayiku anu ne kuikala ne “nzala ne nyota ya buakane.” (Mat. 5:6) Ikala mushindike ne: Yehowa mmumone mushindu uudi udienzeja ne utu anu usanka bua muudi uya kumpala. Padi bena panu apa benda badiina mu malu adi kaayi makane, kutambi kusamisha mutu to! Ikala muvuluke misangu yonso ne: “Yehowa mmunange bantu bakane.”​—Mis. 146:8.