1. Mmu mishindu kayi mutudi mua kuenza mudimu pamue ne Yehowa?

MUFUKI wetu uvua mulongolole bua bantu bapuangane benze nende mudimu pamue bua kukumbaja disua diende. Nansha mudi bantu lelu bapange bupuangane, bantu badi ne lulamatu badi anu mua kuenza mudimu ne Yehowa dituku dionso. Tshilejilu, tudi tulua “benzejanganyi ba mudimu ne Nzambi” patudi tuyisha lumu luimpe lua Bukalenge ne tuvuija bantu bayidi. (1 Kol. 3:5-9) Anji elabi meji diakalenga ditudi nadi dia Mufuki wa bukole buonso wa diulu ne buloba utusungula bua kuenza nende mudimu udiye wangata ne mushinga wa bungi! Kadi katuena tuenza mudimu ne Yehowa anu patudi tuyisha ne tuvuija bantu bayidi to. Mu tshiena-bualu etshi netukonkonone mishindu mikuabu ya kuenza mudimu pamue ne Yehowa patudi tuambuluisha dîku dietu ne bena Kristo netu, patudi tuakidila benyi, patudi tudifila ku budisuile mu midimu ya mu bulongolodi buetu, ne patudi tuvudija mudimu wetu wa tshijila.​—Kolos. 3:23.

2. Bua tshinyi ki mbimpe kufuanyikija mudimu uudi wenzela Yehowa ne wa bakuabu?

² Patudi tukonkonona malu aa, kufuanyikiji mudimu uudi wenzela Yehowa ne wa bakuabu to. Vuluka ne: tudi bashilangane ku bidimu, ku makanda a mubidi, ku nsombelu, ne ku bipedi. Mupostolo  Paulo wakamba ku nyuma ne: “Muntu yonso akonkonone bienzedi biende, dîba adi neapete tshidiye mua kusankila bua bualu buende nkayende, kayi udifuanyikija ne muntu mukuabu to.”​—Gal. 6:4.

3. Bua tshinyi tudi tuamba ne: muntu yonso udi ukumbaja majinga a dîku diende udi wenza mudimu pamue ne Nzambi?

³ Yehowa mmusue bua batendeledi bende batabalele mêku abu. Tshilejilu, udi mua kuenza mudimu bua kukumbaja majinga a bena mu dîku diebe. Bamamu ba bungi batu bashala kumbelu bua kulama bana. Bamue bana bakadi batantamane badi mua kutabalela baledi babu bakadi bakulakaje bikole. Eyi mmidimu ya mushinga. Dîyi dia Nzambi didi diamba ne: “Bikala muntu kayi ukumbaja majinga a bende yeye, nangananga a ba mu nzubu muende, yeye mmuvile ditabuja ne mmubi kupita muntu udi kayi ne ditabuja.” (1 Tim. 5:8) Biwikala ne bujitu bua nunku, pamuapa udi mua kupangila dîba dia bungi dia kuenza midimu ya mu bulongolodi bu muuvua mujinge. Kuteketshi mu mikolo to! Yehowa udi usanka paudi ukumbajila bena mu dîku diebe majinga abu.​—1 Kol. 10:31.

4. Mmunyi mudi baledi mua kuteka malu a Bukalenge kumpala kua abu? Ntshinyi tshidibu bapeta?

⁴ Baledi bena Kristo badi benza mudimu pamue ne Yehowa padibu basaka bana babu bua kudifundila bipatshila bia mu nyuma. Baledi ba bungi badi benze nunku mbalue kumona mudi bana babu bangate mudimu wa ku dîba ne ku dîba ne baye miaba ya kule. Bamue mbamisionere; bakuabu mbampanda-njila miaba idibu dijinga ne bamanyishi ba bungi; banga badi ku Betele. Bu mudibu kule ne mêku abu, baledi babu kabena ne mushindu wa kupitshisha nabu dîba pamue bu mudibu basue to. Nansha nanku, baledi badi badipangisha malu badi bakankamija bana babu bua batungunuke ne midimu yabu. Bua tshinyi? Bualu bu mudibu bamanye ne: bana babu badi bateka malu a Bukalenge pa muaba wa kumpala, bidi bibasankisha bikole. (3 Yone 4) Pamuapa baledi ba bungi badi badiumvua anu bu Hana wakamba ne: uvua ‘musombeshe’ Yehowa muanende Samuele. Baledi aba badi bamona kuenza nunku bu diakalenga dinene. Kabena mua kujinga bua malu aye mushindu mukuabu to.​—1 Sam. 1:28.

5. Mmunyi muudi mua kuambuluisha bena mu tshisumbu tshienu? (Tangila tshimfuanyi tshia ntuadijilu tshia tshiena-bualu.)

⁵ Wewe kuyi ne bujitu bunene bua dîku, kuenaku mua kuambuluisha bena Kristo nebe badi balama baledi babu anyi bana betu badi basama, bakulakaje, peshi bantu bakuabu anyi? Kuenaku mua kukeba muntu uudi mua kuambuluisha mu tshisumbu tshienu anyi? Tshilejilu, kudi mua kuikala muanetu udi ulama baledi bende bakadi bakulakaje. Kuenaku mua kusomba ne baledi bende abu bua amone mua kuenza midimu mikuabu anyi? Anyi udi mua kulomba bana betu badi kabayi ne mushindu wa kufika mu bisangilu bua ubafikishamu, bua kusumba bintu, ne kuenza midimu mikuabu, anyi kuya mu lupitadi bua kusamba muntu. Pamuapa ke mudi Yehowa mua kuandamuna disambila diabu ku butuangaji buebe, ne ke muudi mua kuenza nende mudimu pamue.​—Bala 1 Kolinto 10:24.

6. Mmunyi mutudi mua kuleja ne: tudi bakididi ba benyi?

⁶ Benzejanganyi ba mudimu ne Nzambi mbamanyike bu bantu batu bakidila benyi. Mu Mifundu ya tshiena Greke ya buena Kristo, muaku udibu bakudimune ne: “diakidila dia benyi” udi umvuija “dileja benyi muoyo mulenga.” (Eb. 13:2; dim.) Mu Bible mudi malu adi atulongesha mua kunangangana mushindu eu. (Gen. 18:1-5) Tudi ne bua kuikala tuambuluisha bakuabu padi mpunga umueneka, nansha bobu bikale “bana betu mu ditabuja” anyi kabayi bena Kristo.​—Gal. 6:10.

7. Bua tshinyi kupesha bana betu badi mu mudimu wa ku dîba ne ku dîba kaba ka kulala kudi ne mabenesha?

 ⁷ Bua kuleja muudi wenza mudimu ne Nzambi, kuenaku mua kupesha bana betu badi mu mudimu wa ku dîba ne ku dîba kaba ka kulala anyi? (Bala 3 Yone 5, 8.) Nebinuambuluishe bua “kukankamijangana.” (Lomo 1:11, 12) Tangila tshivua tshifikile Olaf. Patshivuaye nsonga, mutangidi wabu wa tshijengu utshivua mujike uvua ukumbula tshisumbu tshiabu ne uvua dijinga ne muaba wa kutudila, kadi muena mu tshisumbu tshiabu nansha umue kavua ne mushindu wa kumuakidila to. Olaf wakalomba baledi bende bavua kabayi Bantemu bua alue kutudila kuabu. Bobu kuitaba, kadi kumuambilabu ne: nanku yeye neikale ulala mu nkuasa. Kakamona bu bualu to. Olaf udi wamba ne: “Lumingu lua pa bualu alu luvua lulenga be! Tuvua tujuka ne mutangidi wa tshijengu patshiatshia dituku dionso, tuyukila malu a mushinga tuenda tudia tshiakudia. Malu avuaye unkankamija nawu akakolesha dijinga dianyi dia kuangata mudimu wa ku dîba ne ku dîba.” Bidimu 40 bishale ebi, Olaf uvua misionere mu matunga a bungi.

8. Bua tshinyi tudi ne bua kuleja bakuabu bulenga nansha bobu kabayi ne dianyisha? Fila tshilejilu.

⁸ Udi mua kuleja muudi munange benyi mu mishindu ya bungi, nansha bobu kabayi kumpala banyisha biudi wenza. Tuangate tshilejilu etshi. Dîba divua muanetu wa bakaji kampanda wa mu Espagne ulonga Bible ne Yesica uvua ufumina mu Équateur, wakamumona wenda anu udila. Yeye kumuebeja tshivuaye udidila. Yesica kumuambilaye ne: kumpala kua kuluaye mu Espagne, uvua mupele wa menemene. Dimue dituku yeye kupangila too ne tshiakudia tshia kupesha muanende wa bakaji, kumupeshaye anu mâyi patupu. Yesica wakasambila ulomba Nzambi diambuluisha eku wenda ubembeleja muana bua alale. Katupa aka, bana betu ba bakaji babidi kuluabu kumutangila, kadi Yesica kakabakidila bimpe to, wakapanda ne bibejibeji bivuabu bamupeshe. Yeye kubakonka ne: “Ke biakudia bindi mua kupesha muananyi ebi anyi?” Bionso bivua bana betu benze bua kumukolesha biakaya mu mâyi. Panyima pa matuku, bakaya kumushila tshitunga tshia biakudia ku tshiibi. Tshienzedi tshiabu tshia bulenga etshi tshiakamulenga ku muoyo bikole. Pakavulukaye ne: kavua muteye ntema bua kujingulula ne: tshivua diandamuna dia disambila diende, wakumvua bibi. Kadi wakadisuika bua kuenzela Yehowa mudimu. Mona mudi muoyo wabu wa kupa mupatule bipeta bimpe!​—Muam. 11:1, 6.

9, 10. a) Mmpunga kayi ivua nayi bena Isalele ya kudifila bu badisuile? b) Mmu mishindu kayi mudi bana betu ba balume bambuluisha mu tshisumbu lelu?

⁹ Ku kale, bena Isalele bavua ne mpunga ya bungi ya kudifila bu badisuile. (Ekes. 36:2; 1 Kul. 29:5; Neh. 11:2) Lelu, udi pebe ne mpunga ya bungi ya kufila dîba diebe, bintu biebe, ne bipedi biebe bua kuambuluisha bena Kristo nebe. Neupete disanka ne mabenesha a bungi bua muudi udifila ku budisuile.

¹⁰ Dîyi dia Nzambi didi dilomba bana betu ba balume bua kulua basadidi ba mudimu anyi bakulu bua benze mudimu pamue ne Yehowa. (1 Tim. 3:1, 8, 9; 1 Pet. 5:2, 3) Bana betu badi benza nunku mbasue kuambuluisha bakuabu mu nyuma ne ku mubidi. (Bien. 6:1-4) Bakulu benu mbakulombaku bua kuenza mudimu wa kuakidilangana mu bisangilu, kuambuluisha mu mikanda, mu teritware, kuenza mudimu wa kulama Nzubu wa Bukalenge bimpe ne mankenda, anyi midimu mikuabu anyi? Bana betu batu benza midimu eyi nebakuambile ne: kuambuluisha bakuabu kutu kusankisha bikole.

11. Mmunyi muvua balunda bavua muanetu wa bakaji mukuabu mupete mu midimu yetu ya luibaku bamuambuluishe?

¹¹ Bana betu batu badifila ku budisuile mu  midimu yetu ya luibaku batu misangu ya bungi bapeta balunda bapiabapia. Tuangate tshilejilu tshia Margie, muanetu wa bakaji uvua muenze mudimu wa dibaka Nzubu ya Bukalenge munkatshi mua bidimu 18. Pavuaye wenza mudimu au, uvua ne bana betu ba bakaji bansonga bavuaye ulongesha mudimu au. Udi wamba ne: mudimu eu uvua mpunga muimpe wa kukankamijangana mu nyuma. (Lomo 1:12) Pakatuilanganaye ne nsombelu mikole, balunda bavuaye mupete mu midimu eyi bakamukolesha. Ukadiku mudifile bua kuenza midimu yetu ya luibaku anyi? Nansha wewe mumanye kuyenza anyi kuyi mumanye, kuenaku mua kuitaba bua kuyenza anyi?

12. Mmunyi muudi mua kuambuluisha bena Kristo nebe badi bipupu bikuate?

¹² Mushindu mukuabu utudi mua kuenza mudimu pamue ne Nzambi nkuambuluisha bena Kristo netu badi bipupu bikuate. Tshilejilu, tudi mua kufila makuta etu. (Yone 13:34, 35; Bien. 11:27-30) Tudi kabidi mua kubalongoluela mu nzubu anyi kubibakilayi kabidi. Tuangate tshilejilu tshia Gabriela, muanetu wa bakaji wa mu Pologne. Mâyi avua mapasalale mamunyangile nzubu bibi bitambe. Wakasanka pavua bana betu ba mu bisumbu bia pabuipi balue kumuambuluisha. Udi wamba ne: “Tshiena musue kuakula bua bindi mujimije to, bualu bidi anu bintu. Kadi ndi musue kunuambila bua bindi mupete. Bualu budi bumfikile ebu mbunjadikile ne: kuikala mu tshisumbu tshia bena Kristo ndiakalenga dia pa buadi ne kudi kupetesha muntu disanka.” Bantu ba bungi badibu bambuluishe panyima pa tshipupu, batu bamba ne: batu bumvua disanka dia bungi. Bantu badi benza mudimu pamue ne Yehowa bua kuambuluishangana mushindu eu batu pabu bumvua disanka dia muomumue.​—Bala Bienzedi 20:35; 2 Kolinto 9:6, 7.

13. Mmunyi mudi kuenza midimu ya budisuile mua kukolesha malanda etu ne Yehowa? Fila tshilejilu.

¹³ Stephanie ne bena Kristo netu bakuabu bavua ne disanka dia kuenza mudimu pamue ne Nzambi, bambuluisha Bantemu bena tshimuanyi bavua balue kutudila mu États-Unis banyema mvita miaba ivuabu basombele. Bakapetela mêku a bana betu abu Nzubu ne bia mu nzubu. Stephanie udi wamba ne: “Disanka divua bana betu abu nadi ne dianyisha diabu bua dinanga  divua bana betu ba pa buloba bujima babaleje, biakatulenga bikole ku muoyo. Bena mu mêku au badi bela meji ne: tuvua babambuluishe, kadi mu bulelela, bobu ke badi batambe kutuambuluisha. Dinanga diabu, buobumue buabu, ditabuja diabu, ne mushindu uvuabu beyemene Yehowa, biakakolesha dinanga dituvua nadi bua Yehowa, kutusakabi bua kuikala ne dianyisha dia bungi bua bionso bitudi tupeta mu bulongolodi buende.”

14, 15. a) Muprofete Yeshaya uvua muleje lungenyi kayi? b) Mmunyi mudi bamanyishi ba Bukalenge bamuidikija lelu?

¹⁴ Udiku musue kuenza mudimu pamue ne Yehowa bikole menemene anyi? Udiku musue kuya kuambuluisha muaba udi bulongolodi buende dijinga ne bena mudimu ba bungi anyi? Bushuwa, batendeledi ba Nzambi ki mbenzejibue bua kushiya mbanza yabu, kuya miaba ya kule bua kumuenzela mudimu to. Kadi kudi bana betu badi mua kuya. Badi ne meji a buena a muprofete Yeshaya. Pavua Yehowa muebeje ne: “Nentume nganyi, ne nnganyi watuyila?” Wakandamuna ne: “Mmeme eu! Untume!” (Yesh. 6:8) Udiku ne dijinga ne mushindu wa kuambuluisha bulongolodi bua Yehowa anyi? Mmidimu kayi ya kuenza idiku?

¹⁵ Yezu wakamba bua mudimu wa kuyisha ne kuvuija bantu bayidi ne: “Bia kunowa bidi bia bungi, kadi bena mudimu mbakese. Nunku, lombayi Mfumu wa dinowa bua atume bena mudimu mu dinowa diende.” (Mat. 9:37, 38) Kuenaku mua kulua mpanda-njila bua kuya muaba udibu dijinga ne bamanyishi ba bungi anyi? Peshi kuenaku mua kuambuluisha muanetu mukuabu bua enze pende bia muomumue anyi? Bena Kristo netu ba bungi mbamone ne: mushindu mutambe buimpe wa kuleja mudibu banange Nzambi ne bantu nabu nkuenza mudimu bu bampanda-njila miaba idibu dijinga ne banowi ba bungi. Kuenaku mua kukeba mishindu mikuabu ya kuvudija mudimu webe anyi? Neupete disanka dia bungi wewe muenze nanku.

16, 17. Ngimue mishindu kayi iudi mua kuvudija mudimu uudi wenzela Yehowa?

¹⁶ Udiku musue kuenza mudimu ku Betele anyi kuambuluisha mu dibaka dia nzubu yetu, nansha bua tshipolo kampanda anyi bua dituku dimue peshi a bungi ku lumingu anyi? Bulongolodi bua Yehowa butu anu dijinga ne bantu badi basue kuenza mudimu muaba wonso udibu mua kubatuma. Butu kabidi dijinga ne bana betu badi mua kuitaba bua kuenza midimu idibu babapesha nansha bobu bapiluke mu mikuabu. Kadi Yehowa udi wanyisha lungenyi lua didipangisha malu ludibu baleja kudi bana betu badi badifila bua kuenza mudimu muaba udi dijinga.​—Mis. 110:3.

¹⁷ Udi musue bakulongeshe malu makuabu bua wewe kukumbana bua kuenza mudimu wa tshijila anyi? Biobi nanku, udi mua kuwuja dilomba bua kubuela mu Kalasa ka bamanyishi ba Bukalenge. Badi balongeshamu bana betu ba balume ne ba bakaji bashindame mu nyuma badi mu mudimu wa ku dîba ne ku dîba bua batantshishe malu a Bukalenge. Bana betu badi buwuja dilomba bua kuya mu kalasa aka, badi ne bua kuitaba bua kuya muaba wonso udibu babatuma padi kalasa kajika. Udiku musue kubabidila mpunga eu bua kuenzela Yehowa mudimu bikole anyi?​—1 Kol. 9:23.

18. Ntshinyi tshiwapeta wewe wenza mudimu ne Yehowa dituku dionso?

¹⁸ Bu mutudi bantu ba Yehowa, tudi ne bua kuikala ne muoyo wa kupa, kuikala ne buimpe, bulenga, ne dinanga, ne tutabalela bakuabu dituku dionso. Tuetu tuenza nunku, netuikale ne disanka ne ditalala. (Gal. 5:22, 23) Nansha wewe ne nsombelu kayi, udi mua kupeta disanka wewe widikija Yehowa muena muoyo wa kupa, ne biwikala bushuwa muenzejanganyi nende wa mudimu.​—Nsu. 3:9, 10.