1. Lungenyi lua ditembangana ludi mua kufikisha bantu ku dienza malu kayi?

LELU lungenyi lua ditembangana ndufikishe bantu ba bungi ku budinangi. Tshilejilu, bangenda-mushinga ba bungi batu basue kupeta bia bungi kupita bakuabu kabayi nansha bamona ne: malu adibu benza adi atatshisha bantu bakuabu to. Munayi wa manaya udi nansha mua kuteyangana anu bua kukeba mushindu wa kutshimuna. Mulongi kansanga udi ufuila bua kubuela ku iniversite munene udi nansha mua kuibila ku mateta anu bua apete muaba. Bu mutudi bena Kristo, tudi bamanye ne: kuenza malu mushindu eu nkubi; bionso ebi ‘mmalu a mubidi.’ (Gal. 5:19-21) Kadi, bidiku mua kuenzeka bua bamue batendeledi ba Yehowa batuadije kukebesha lungenyi lua ditembangana mu tshisumbu pamuapa kabayi bajingulula bualu ebu anyi? Elu lukonko ndua mushinga mukole bualu lungenyi lua ditembangana ludi mua kunyanga buobumue buetu.

2. Ntshinyi tshituamona mu tshiena-bualu etshi?

² Mu tshiena-bualu etshi netumone bikadilu bibi bidi mua kukebesha ditembangana munkatshi muetu. Netumone kabidi bilejilu bia balume ne bakaji ba lulamatu badibu bakuile mu Bible bavua bepuke lungenyi lua ditembangana. Kadi tuanji kumona mutudi mua kumanya tshitu tshitusaka bua kuenza malu kampanda.

3. Nnkonko kayi itudi ne bua kudiela?

³ Mbimpe tuikale tukeba bua kumanya tshitu tshitusaka bua kuenza malu kampanda. Tudiebeje ne: ‘Ntu ngumvua bimpe anu  pantu mmona ne: ndi mupite bakuabu anyi? Ntu ndifila bikole mu tshisumbu anu bualu ntu musue bua bikale batamba kunganyisha meme bikole peshi bua kumueneka mupite bakuabu anyi? Peshi ntu ngenza malu onso anu bualu ndi musue kusankisha Yehowa?’ Bua tshinyi mbimpe tudiele nkonko eyi? Mona tshidi Dîyi dia Nzambi diamba.

4. Bua tshinyi ki mbimpe tuikale tudifuanyikija ne bakuabu anu mudi Galatiya 6:3, 4 uleja?

⁴ Bible udi utubela bua kubenga kudifuanyikija ne bakuabu. (Bala Galatiya 6:3, 4.) Bua tshinyi? Bualu ku lumue luseke, tuetu tuela meji ne: tudi bapite bakuabu tudi mua kulua bena lutambishi. Ku lukuabu luseke, tuetu tudifuanyikija ne bantu bakuabu tumona ne: mbatupite, bidi mua kulua kututekesha mu mikolo. Kuela meji mu mishindu yonso ibidi eyi ki nkuimpe to. (Lomo 12:3) Muanetu wa bakaji mukuabu wa mu Grèce diende Katerina * udi wamba ne: “Mvua ne tshibidilu tshia kudifuanyikija ne bana betu bakuabu bavua bimpe kumona, bayisha bimpe, ne bamanye kukeba balunda. Nunku ngakatuadija kudimona muntu tshianana.” Tudi ne bua kuvuluka ne: Yehowa mmutukoke kudiye bualu tudi bitabe bua kumunanga ne kuteleja Muanende, kadi ki mbua bulenga buetu bua mpala, bua mutudi tuakula bimpe, anyi bualu bakuabu mbatunange to.​—Yone 6:44; 1 Kol. 1:26-31.

5. Tshivua tshifikile muanetu Hyun tshidi tshikulongesha tshinyi?

⁵ Mona lukonko lukuabu lutudi mua kudiela: ‘Batu bammanye bu mukebi wa ditalala anyi? Peshi batu bammanye bu muntu utu anu bilumbu ne bakuabu?’ Mona tshivua tshifikile muanetu wa balume mukuabu udi musombele mu Corée du sud diende Hyun. Tshikondo kampanda ukavua umona bana betu badi ne midimu mu tshisumbu bu baluishi bende. Udi wamba ne: “Mvua ngakula bibi bua bana betu abu, ne misangu ya bungi tshivua ngitaba bivuabu bamba to.” Ntshinyi tshiakalua kuenzeka? Udi ujadika ne: “Mushindu umvua ngenza malu au wakakebesha ditapuluka mu tshisumbu.” Bamue balunda ba Hyun bakamuambuluisha bua kujingululaye lutatu luvuaye nalu. Hyun wakashintuluka bikole, lelu mmukulu muimpe be! Tuetu tumona ne: malu atudi tuenza adi akebesha ditembangana pamutu pa kukeba ditalala, mbimpe tukebe tshia kuenza lukasa.

6. Bilondeshile Galatiya 5:26, mbikadilu kayi bibi bidi mua kufikisha bantu ku dikala ne lungenyi lua ditembangana?

⁶ Bala Galatiya 5:26. Mbikadilu kayi bibi bidi mua kufikisha bantu ku dikala ne lungenyi lua ditembangana? Tshia kumpala ndungenyi lua budinangi. Muntu udi mudinange anu yeye udi udisua ne utabalela anu malu ende nkayende. Tshibidi mmukawu anyi dialakana.  Muena mukawu mubi udi ujinga bintu bidi mukuabu nabi anyi mene ujinga bua muntu au ajimije nansha bidiye nabi abi. Mu kuamba kuimpe, mukawu mmuanabu ne lukinu. Mbimpe tuepuke bikadilu bibi ebi anu mutubu bepuka disama dibi dia tshiambu.

7. Ntshilejilu kayi tshidi tshileja mudi kuikala ne budinangi anyi ne mukawu kubi?

⁷ Budinangi ne mukawu (anyi dialakana), tudi mua kubifuanyikija ne musuasua udi wenda udia musaka wa nzubu. Nansha musaka wa nzubu wowu umueneka bu udi tumatuma, udi anu ulua kupuka ndekelu wa bionso pakadiwu mudike nanku. Mushindu wa muomumue, muntu udi mua kuenzela Yehowa mudimu tshikondo kampanda, kadi yeye uwenza bua budinangi ne dialakana, neafike anu ku dikuluka. (Nsu. 16:18) Udi mua kufika ku dilekela dienzela Yehowa mudimu, udienzela yeye muine bibi ne bantu bakuabu. Ntshinyi tshitudi mua kuenza bua kuepuka budinanyi ne mukawu?

8. Ntshinyi tshitudi mua kuenza bua kuluisha budinangi?

 ⁸ Tudi mua kuluisha budinangi tuetu balame mubelu uvua mupostolo Paulo mupeshe bena Filipoyi eu mu lungenyi: “Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu.” (Filip. 2:3) Tuetu tumona bakuabu bu batupite, katuakutembangana ne bantu badi mua kuikala ne mamanya a bungi kutupita to. Pamutu pa kuenza nanku, netuikale tusanka bua bualu buabu. Netuenze nanku nangananga bobu badifila ne mamanya abu au bua kuenzela Yehowa mudimu udi umutumbishisha. Nunku bobu balonde pabu mubelu wa Paulo eu, nebamone ngikadilu mimpe itudi petu nayi. Ndekelu wa bionso, tuetu bonso netukebe ditalala ne buobumue mu tshisumbu.

9. Ntshinyi tshitudi mua kuenza bua kuepuka diumvuila bana betu mukawu?

⁹ Bua kuepuka diumvuila bana betu mukawu, mbimpe tuvuluke ne: katutu tuenza petu malu onso bimpe to. Tuetu bikale ne budipuekeshi, katuakujinga kuleja ne: tudi bapite bana betu bakuabu to. Kadi netukebe tshia kuenza bua kulongela malu a bungi kudi bana betu badi ne dimanya batupite. Tshilejilu, fuanyikijabi ne: muanetu kampanda utu wenza miyuki mimpe mitambe mu tshisumbu. Tudi mua kumuebeja atuambile mutuye ulongolola miyuki yende. Muanetu wa bakaji kansanga yeye mumanye kulamba bimpe, tudi mua kumulomba bua atuleje mua kulengeja petu ndambilu. Muanetu wa balume kankenge utshidi nsonga yeye kayi mumanye mua kupeta balunda bipepele, udi mua kulomba mibelu kudi mukuabu utu yeye ubapeta bipepele. Tuetu tuenza malu mushindu eu tudi mua kuepuka mukawu ne netuvudije mamanya etu.

10. Ndutatu kayi luvua Gideona mupete?

¹⁰ Ela meji a tshivua tshienzeke pankatshi pa Gideona uvua wa mu tshisa tshia Manashe ne bena mu tshisa tshia Efelayima. Bu muvua Yehowa muenze bua Gideona ne bantu bende 300 batshimune mvita, bivua mua kubapesha lutambishi. Bena mu Efelayima bakalua kudi Gideona, kabiyi bua kumuela kalumbandi to,  kadi bua kumubunda. Bidi bimueneka ne: bavua bumvue tshiji bualu Gideona kavua mubabikile bua balue kumuambuluisha bua kuluisha baluishi ba Nzambi to. Bavua bajinga bua bantu bikale banemeka tshisa tshiabu bikole, kadi bapua muoyo ne: tshivua Gideona yeye muenze mbua kutumbishisha dîna dia Yehowa ne kukuba bantu bende.​—Bal. 8:1.

11. Mmushindu kayi uvua Gideona muandamune bena mu Efelayima?

¹¹ Gideona wakambila bena mu Efelayima ne budipuekeshi buonso ne: “Tshindi muenze ntshinyi pa kudifuanyikija nenu?” Pashishe wakabavuluija muvua Yehowa mubambuluishe pabu bua kuenza malu manene. Ndekelu wa bionso, bena mu Efelayima abu “bakatukija.” (Bal. 8:2, 3) Gideona wakitaba bua kudipuekesha bua kulama ditalala munkatshi mua bantu ba Nzambi.

12. Tshilejilu tshia bena mu Efelayima ne tshia Gideona tshidi tshitulongesha tshinyi?

¹² Bualu ebu budi butulongesha tshinyi? Tshilejilu tshia bena mu Efelayima tshidi tshitulongesha ne: ki mbimpe tuikale tujinga anu bua kulama lumu luetu bitufikisha ku dipua muoyo bua kutumbisha Yehowa to. Tshilejilu tshia Gideona tshidi mua kuambuluisha bamfumu ba mêku ne bakulu. Bualu kampanda butudi benze bobu butonde muntu, mbimpe tujinge kumanya bua tshinyi mbimutonde. Tudi kabidi mua kumuela kalumbandi bua malu onso mimpe adiye muenze. Bua kuenza nanku bidi bilomba tudipuekeshe, nangananga biobi bimueneka ne: muntu au ke udi mu tshilema. Tshidi ne mushinga menemene nkukeba ditalala munkatshi muetu pamutu pa kukeba bua kudibingisha.

13. Ndutatu kayi luvua nalu Hana? Mmunyi muvuaye mulutshimune?

¹³ Ela kabidi meji bua tshilejilu tshia Hana. Bavua bamusele kudi muena Lewi mukuabu diende Elekana; bayende eu uvua mumunange wamba kufua. Kadi uvua ne mukaji mukuabu, diende Penina. Elekana uvua munange Hana bikole kupita Penina; nansha nanku “Penina uvua ne bana, kadi Hana kavua ne bana to.” Nunku Penina uvua usendeka Hana “kakuyi dikisha bua kumutatshisha mu lungenyi.” Hana uvua umvua mushindu kayi? Bivua bimutonda bikole! ‘Uvua udila ne ubenga kudia.’ (1 Sam. 1:2, 6, 7) Nansha nanku, Bible kena uleja muaba nansha umue ne: Hana wakajinga kudisombuela kudi Penina to. Kadi uvua wambila Yehowa malu ende onso, umueyemena mumanye ne: neakaje malu. Mushindu uvua Penina wenzela Hana malu uvuaku mushintuluke anyi? Bible kena uleja bualu ebu to. Kadi tudi bamanye ne: Hana wakapingana kuende ne kushalaye mulame ditalala dia mu muoyo. “Mpala wende katshivua kabidi mubungame to.”​—1 Sam. 1:10, 18.

14. Tshilejilu tshia Hana tshidi tshitulongesha tshinyi?

¹⁴ Tshilejilu tshia Hana tshidi mua kutulongesha tshinyi? Muntu kampanda yeye ujinga bua nutembangane nende mu mushindu  kansanga, vuluka ne: wewe udi mua kudikanda. Kuitabi bua nufike ku ditembangana nansha. Pamutu pa wewe kupingaja bubi ku bubi, keba mushindu wa kushala mu ditalala ne muntu au. (Lomo 12:17-21) Nansha yeye kayi mushintuluke to, wewe neulame ditalala dia mu muoyo.

15. Apolo ne Paulo bavua bafuanangane mu malu kayi?

¹⁵ Bua kujikija, tumonayi tshidi tshilejilu tshia Apolo ne tshia Paulo mua kutulongesha. Bonso babidi bavua bamanye Mifundu bimpe menemene. Bavua bamanyike bikole ne bavua balongeshi ba dipoko. Bavua kabidi bambuluishe bantu ba bungi bua kulua bayidi. Kadi kabavua bumvuilangana mukawu nansha.

16. Apolo uvua muntu wa mushindu kayi?

¹⁶ Apolo uvua “mulelela ku Alesandelia,” muaba uvua bantu baya kulongela tulasa tubandile mu bidimu lukama bia kumpala. Bidi bimueneka ne: uvua ngamba-malu wa dipoko, uvua “mumanye Mifundu bikole.” (Bien. 18:24) Pavua Apolo muenze matuku ndambu mu Kolinto, bamue bena Kristo ba mu tshisumbu bakaleja muvuabu bamunange kupita bena Kristo nabu bakuabu, kupita too ne Paulo. (1 Kol. 1:12, 13) Apolo ke uvuaku mukebeshe matapuluka au anyi? Katuena mua kuamba ne: nyeye to. Mu kuamba kuimpe, matuku makese yeye mumane kumbuka mu Kolinto, Paulo wakamusengelela bua apinganamu. (1 Kol. 16:12) Paulo kavua mua kuenza nanku bu yeye mumone ne: Apolo ke uvua ukebesha matapuluka mu tshisumbu to. Bidi bimueneka patoke ne: Apolo uvua mukuate mudimu bimpe ne mamanya ende bua kuambuluisha mu mudimu wa kumanyisha lumu luimpe ne bua kukolesha bena Kristo nende. Tudi kabidi bajadike ne: Apolo uvua ne budipuekeshi. Tshilejilu, kakuena muaba nansha umue mu Bible udibu bambe ne: uvua mudibingishe pavua Akila ne Pisikila ‘bamumvuije njila wa Nzambi mu mushindu mujalame menemene’ to.​—Bien. 18:24-28.

17. Ntshinyi tshivua Paulo wenza bua kulama ditalala?

 ¹⁷ Paulo uvua mumanye mudimu muimpe wonso uvua Apolo wenza. Kadi kakasamisha mutu wela meji ne: bantu bavua mua kulua kumona Apolo bu udi mumupite yeye to. Budipuekeshi bua Paulo ne lungenyi luimpe luvuaye nalu bidi bimuenekela mu mibelu ivuaye mupeshe bena mu tshisumbu tshia ku Kolinto pavuaye mubafundile. Kavua usanka pavua bantu bamba ne: “Meme ndi wa Paulo” to, kadi uvua ubasaka bua batume ntema kudi Yehowa Nzambi ne kudi Yezu Kristo.​—1 Kol. 3:3-6.

18. Bilondeshile 1 Kolinto 4:6, 7, mmalu kayi adi tshilejilu tshia Paulo ne tshia Apolo bitulongesha?

¹⁸ Mmalu kayi adi tshilejilu tshia Paulo ne tshia Apolo bitulongesha? Tudi mua kuenzela Yehowa mudimu wa bungi ne kuambuluisha bantu ba bungi bua bafike ku dibatijibua. Kadi tudi tumona ne: tudi tuenza malu onso au anu bualu Yehowa udi utuambuluisha. Tshilejilu tshia Apolo ne tshia Paulo tshidi tshitulongesha kabidi ne: patudi ne midimu ya bungi mu tshisumbu, tudi kabidi ne mushindu wa kuenza bia bungi bua kulamamu ditalala. Bitu bituenza disanka patudi tumona bana betu badi ne midimu mu tshisumbu bambuluisha bua kulama ditalala ne buobumue munkatshi muetu. Batu benza nanku padibu batupesha mibelu miangatshila mu Dîyi dia Nzambi, ne padibu kabayi bakoka ntema ya bantu kudibu kadi bayituma kudi Yezu Kristo utudi ne bua kuidikija.​—Bala 1 Kolinto 4:6, 7.

19. Ntshinyi tshidi yonso wa kutudi ne bua kuenza? (Tangila kabidi kazubu ka ne: “ Tuepuke kukebesha ditembangana.”)

¹⁹ Tuetu bonso tudi ne mamanya ne bipedi bia kudi Nzambi. Tudi mua kukuata nabi mudimu bua “kukuatshishangana.” (1 Pet. 4:10) Tudi mua kumona ne: katuena ne bua nsongo butudi tuenza to. Kadi tuvuluke ne: bikese bitudi tuenza bua kulama ditalala mu tshisumbu bidi anu bu tumanda tudi tukuatakaja bipese bia tshilamba tshijima. Mbimpe tudienzeje bua kumbusha lungenyi lua ditembangana munkatshi muetu. Tudisuikayi ne muoyo mujima bua kuenza tshionso tshitudi mua kuenza bua kulama ditalala ne buobumue mu tshisumbu.​—Ef. 4:3.