“WETUAWU! Bishi lelu?”

Kakuyi mpata, kudi misangu ya bungi iukadi muele muntu muoyo nunku. Uvua mene pamuapa mumuele muoyo ku tshianza anyi mumuele mu tshitupa. Mishindu ya kuelangana muoyo idi ishilangana bilondeshile muaba ne muaba, kadi tshipatshila tshia muoyo tshidi anu tshia muomumue. Mu bulelela, bantu badi mua kuangata muntu udi kayi welangana muoyo anyi udi ubenga kuwitaba bu muntu udi kayi ne dinanga ne mupange malu.

Ki mbantu bonso batu bapepeje diela bakuabu muoyo to. Bua bundu ne didimona ne mushinga mukese, bamue batu batshina bua kuelangana muoyo. Bitu bikolela bamue bua kuela bantu ba dikoba, ba bibidilu, anyi ba nsombelu mukuabu muoyo. Pabi kuela muntu muoyo nansha mu lupitapita, kudi mua kupatula bipeta bimpe.

Diebeja ne: ‘Ntshinyi tshidi dielangana muoyo dienzelangana? Ntshinyi tshidi Dîyi dia Nzambi ditulongesha bua dielangana muoyo?’

Pavua mupostolo Petelo muakidile Kônelio muntu wa tshisamba tshikuabu bimpe mu tshisumbu tshia bena Kristo, wakamba ne: “Nzambi kena ne kansungansunga to.” (Bien. 10:34) Panyima pa matuku, Petelo wakafunda ne: Nzambi “mmusue bua bonso bafike ku dinyingalala bua mpekatu yabu.” (2 Pet. 3:9) Padi muntu ubala mêyi aa bua musangu wa kumpala, udi mua kuamba ne: adi atangila muntu utshidi ulonga bulelela. Kadi Petelo wakasengelela kabidi bena Kristo ne: “Nunemeke bantu ba mishindu yonso, nunange tshisumbu tshijima tshia bana betu.” (1 Pet. 2:17) Nunku, nansha bantu bobu ba dikoba kayi, bikale ne bibidilu kayi, anyi ne nsombelu kayi, katuenaku mua kubela muoyo anyi? Tuetu benze nanku nebileje ne: tudi tubanemeka ne tudi babanange.

Mupostolo Paulo wakasengelela bena Kristo ne: “Nuakidilangane bimpe anu muvua Kristo munuakidile bimpe.” (Lomo 15:7) Paulo wakatamba kuakula bua bena Kristo bavua balue ‘diambuluisha didi dikolesha’ kudiye. Lelu, bantu ba Nzambi badi dijinga ne dikoleshibua mu mikolo kupita mu tshikondo tshia Paulo bualu Satana udi ubaluisha ne tshiji tshikole mu matuku a ku nshikidilu aa.​—Kolos. 4:11, dim.; Buak. 12:12, 17.

Mu Bible mudi bilejilu bidi bileja ne: dielangana muoyo kadiena dienza anu bua muntu adiumvue bimpe patupu to, didi kabidi mua kumupetesha malu mimpe a bungi.

Pakakumbana tshikondo bua Yehowa kuela muoyo wa Muanende munda mua Mariya, wakatuma muanjelu bua kuyukila nende. Muanjelu wakatuadija ne mêyi a ne: “Muoyo au, wewe udi muanyishibue bikole, Yehowa udi nebe.” Mariya “wakapampakana bikole,” kayi mumanye bua tshinyi muanjelu uvua uyukila nende. Pakamona muanjelu nanku, wakamuambila ne: “Mariya, kutshinyi to, bualu udi muanyishibue kudi Nzambi.” Wakamumvuija ne: Nzambi uvua mulongolole bua alele Masiya. Pamutu pa Mariya kushala ne dipampakana, wakandamuna ne muoyo wa ditumikila ne: “Mona! meme nsongakaji mupika wa Yehowa! Bingenzekele anu muudi muambe.”​—Luka 1:26-38.

Bua muanjelu au, kuikala mutumibue wa Yehowa kuvua diakalenga dinene; kavua udimona mupuekeshibue milongo bua muvuaye ne bua kuyukila ne muntu mupange bupuangane to. Bua kutuadija, wakela Mariya muoyo. Tshilejilu tshiende tshidiku mua kutulongesha anyi? Mbimpe tuikale badiakaje bua kuela bakuabu muoyo ne kubakankamija. Mêyi makese patupu adi mua kuambuluisha bantu ne kubajadikila ne: badi bushuwa bantu ba Yehowa.

Paulo wakafika ku dimanya bena Kristo ba bungi mu bisumbu bionso bia mu Asia mukese ne bia ku Mputu. Kudi bantu ba bungi bavuaye muele muoyo mu mikanda  yende. Tshilejilu, mu Lomo nshapita wa 16, Paulo uvua muele bena Kristo nende ba bungi muoyo. Uvua mubikile Foibe ne: “muanetu wa bakaji,” kulombaye bena Kristo nende bua ‘bamuakidile mu Mukalenge mu mushindu udi muakanyine bansantu, ne bua bamuambuluishe mu bionso bidiye mua kuikala nabi dijinga.’ Paulo wakela Pisika ne Akila muoyo, wamba ne: “ndi mbela tuasakidila, ki nganu meme nkayanyi to, kadi kabidi bisumbu bionso bia mu bisamba bikuabu.” Wakela bamue bena Kristo badi kabayi batambe kumanyika lelu muoyo, bu mudi: “munangibue Epaineto” ne “Tufaina ne Tufoso, bantu bakaji badi benza mudimu mukole mu Mukalenge.” Eyowa, Paulo uvua mudiakaje bua kuela bena Kristo nende muoyo.​—Lomo 16:1-16.

Elabi meji bua disanka divuabu nadi bua kumanya ne: bavua babavuluke ne dinanga dionso. Bakananga Paulo bikole ne kunanganganabu pabu kabidi bikole! Pavua bena Kristo bakuabu bapete mioyo ivua Paulo mubele ne dinanga ayi, bakakankamijibua, kushindamabu mu ditabuja. Eyowa, dielangana muoyo didi dileja mutudi tutabalela bakuabu ne dielangana kalumbandi ne muoyo mujima bitu bikolesha bulunda bua batendeledi ba Nzambi ba lulamatu ne bibasangisha mu buobumue.

Pavua Paulo mufike ku dilobo dia Potiolo, wakaya mutangile ku Lomo, bena Kristo ba ku Lomo bakalua bua kusambakena nende. Pavua Paulo mubamuenene ku bule, “wakasakidila Nzambi, kukolaye ku muoyo.” (Bien. 28:13-15) Kudi misangu itudi anu mua kutuila muntu mimuemue anyi kumukupa tshianza bua kumuela muoyo. Kadi nansha kuelangana muoyo mushindu eu kudi mua kusanguluja muntu udi pamuapa ne kanyinganyinga anyi ne dibungama.

Muyidi Yakobo uvua muenzejibue bua kupesha bena Kristo nende mibelu mikole. Bamue bena Kristo bakatuadija kudia bulunda ne bena panu, nunku bavua benda balua bakaji bena masandi mu ngumvuilu wa mu nyuma. (Yak. 4:4) Kadi mona muvua Yakobo mutuadije mukanda wende:

“Yakobo, mupika wa Nzambi ne wa Mukalenge Yezu Kristo, kudi bisa 12 bidi bitangalake: Muoyo wenu au!” (Yak. 1:1) Kakuyi mpata, bivua bipepele bua babadi ba mukanda wende kuitababu mibelu yende pavuabu bamone muvua muoyo uvuaye mubele uleja muvuaye pende mupika wa Nzambi anu bobu. Eyowa, muoyo muela ne budipuekeshi buonso udi mua kukangula tshialu bua bantu kuyukila nansha bua bilumbu binene.

Muoyo muela bimpe, nansha wa mu lupitapita, ngewu udi muntu welangana ne muoyo mujima ne dinanga. Bidi nanku nansha biobi bimueneka ne: muntu ki mmuwumvue anyi ki mmuwitabe. (Mat. 22:39) Musangu kampanda, muanetu mukuabu wa bakaji wa mu Irlande wakafika ku Nzubu wa Bukalenge pakavua bisangilu bibanga. Bu muvuaye lukasa, muanetu kampanda wa balume wakakudimuka, kumutuila mimuemue umuela muoyo ne: “Wetuawu. Wafiki! Bimpe be!” Muanetu wa bakaji au kuyaye kusomba mu tshimuma.

Mbingu mikese pashishe, wakayukila ne muanetu wa balume au umuambila ne: kukavua matuku ndambu avuaye mu nsombelu mukole kumbelu. Wakamba ne: “Mvua mumvue bibi dilolo adi muambe kushala too ne mu bisangilu. Tshiena mvuluka malu a bungi a mu bisangilu abi to, anu muoyo uuvua mungele. Mvua mudiumvue bimpe be! Tuasakidila wa bungi.”

Muanetu au kavua mumanye tshivua muoyo uvuaye muele muanetu wa bakaji mu lupitapita mumuenzele to. Udi wamba ne: “Pavuaye mungambile tshivua mêyi makese au mamuenzele, ngakasanka bikole bua mumvua mudienzeje bua kumuela muoyo. Biakansankisha panyi bikole.”

Solomo wakafunda ne: “Kupa diampa diebe pa mâyi, bualu neudipete kabidi panyima pa matuku a bungi.” (Muam. 11:1) Patudi tuela bantu muoyo, nangananga bena Kristo netu, tudi tubenzela bimpe, tudienzela ne tuetu bine bimpe. Nunku bana betu, katupepeji bukole budi nabu dielangana muoyo to.