1. Mmunyi mutudi mua kutumikila Nzambi ne mbulamatadi ya bantu?

BIBLE udi utuambila bua kutumikila mbulamatadi ya bantu, kadi udi utuambila kabidi ne: tudi ne bua kutumikila Nzambi misangu yonso. (Bienzedi 5:29; Tito 3:1) Mmunyi mutudi mua kuenza nunku? Yezu wakaleja dîyi dinene didi dituambuluisha bua kumanya bantu batudi ne bua kutumikila. Wakamba ne: tudi ne bua kufuta ‘Kaisa bintu bia Kaisa, kadi kufuta Nzambi bintu bia Nzambi.’ ^[1] (Tangila note ku ndekelu.) (Matayi 22:21) Tudi tufuta “Kaisa bintu bia Kaisa” patudi tutumikila mikenji ya mbulamatadi, tunemeka bamfumu ba mbulamatadi ne tufuta bitadi. (Lomo 13:7) Kadi padi mbulamatadi utuambila bua kuenza bualu kampanda budi Nzambi kayi musue bua tuetu kuenza, tudi tubenga bua kubuenza, kadi ne kanemu.

2. Mmunyi mutudi tuleja ne: katuena tubuelakana mu malu a tshididi a mu bulongolodi ebu?

² Umue mushindu utudi tufuta “Nzambi bintu bia Nzambi” mpatudi tubenga kulamata ku luseke kampanda mu malu a tshididi a mu bulongolodi ebu. Katuena tubuelakana mu malu aa to. (Yeshaya 2:4) Bu mudi Yehowa mulekele mbulamatadi ya bantu ikokesha, katuena ne bua kuyiluisha to. Katuena kabidi tubuelakana nansha mu malu a  buena muetu anyi a buena ditunga to. (Lomo 13:1, 2) Katuena tuenza bua kushintulula mbulamatadi anyi kusaka bena tshididi bua kuenza malu kampanda to. Katuena tuelela muntu kakanda mu tshikondo tshia masungulangana anyi tulua bena tshididi to.

3. Bua tshinyi katuena ne bua kubuelakana mu malu a pa buloba?

³ Kudi malu a bungi adi masake Nzambi bua kutuambila bua katubuelakanyi mu malu a pa buloba. Bumue bua kudiwu budi ne: tudi tuidikija Yezu uvua ‘kayi wa pa buloba.’ Kavua mulamate musangu nansha umue ku luseke kampanda mu malu a tshididi anyi a mvita to. (Yone 6:15; 17:16) Bualu bukuabu budi ne: tudi tutua Bukalenge bua Nzambi mpanda. Bu mutudi katuyi tutua makalenge a bantu mpanda, tudi ne kondo ka muoyo kimpe patudi tuyisha ne: anu Bukalenge bua Nzambi ke buajikija ntatu ya bantu. Bena mu bitendelelu bia dishima batu balamata ku luseke kampanda mu malu a tshididi ne bualu ebu butu butapulula bantu. Kadi bu mutudi katuyi tubuelakana mu malu a pa buloba, tudi mu buobumue ne bana betu ba balume ne ba bakaji pa buloba bujima.​—1 Petelo 2:17.

4. a) Mmunyi mutudi bamanye ne: netupete lutatu lukole lua kubenga kubuelakana mu malu a tshididi? b) Bua tshinyi tudi ne bua kudilongolola ku mpindieu bua kubenga kubuelakana mu malu a tshididi?

⁴ Tudi mua kuikala basombele muaba udi bantu bamanye ne: katutu tulamata ku luseke kampanda mu malu a tshididi to. Kadi bu mutudi tuenda tusemena bikole ku nshikidilu wa bulongolodi bua Satana, netupete lutatu lukole lua kubenga kubuelakana mu malu a tshididi. Lelu, bantu mbadianjile kuikala “kabayi ne lungenyi lua kumvuangana” ne “bena mutu mukole,” ne nebatapuluke kabidi bikole menemene. (2 Timote 3:3, 4) Kudi bamue bana betu bakadi bapete ntatu pavua malu a tshididi a mu matunga abu mashintuluke diakamue. Ke bualu kayi tudi ne bua kudilongolola ku mpindieu bua kubenga kubuelakana mu malu a pa buloba nansha mu nsombelu mikole. Tukonkononayi malu anayi atudi mua kuenza bua kudilongolola.

5. Mmunyi mudi Yehowa umona mbulamatadi ya bantu?

⁵ Bualu bua kumpala: mushindu utudi ne bua kudilongolola ku mpindieu bua kubenga kubuelakana mu malu a tshididi nkumona mbulamatadi ya bantu bu mudi Yehowa uyimona. Yehowa kavua mufuke bantu ne bukenji bua kulombola bantu bakuabu to. (Yelemiya 10:23) Udi umona bantu bonso bu dîku dimue. Kadi mbulamatadi ya bantu mmitapulule bantu padibu bamba ne: matunga abu mmimpe kupita a bakuabu. Nansha padi makalenge a bantu amueneka mimpe, kaena mua kujikija ntatu ya bantu to. Makalenge aa adi kabidi aluisha Bukalenge bua Nzambi budi butuadije kukokesha katshia mu 1914. Mu katupa kîpi emu, Bukalenge bua Nzambi nebubutule mbulamatadi yonso ya bantu.​—Bala Musambu 2:2, 7-9.

6. Mmunyi mutudi mua kuenzela bantu badi ne bukokeshi mu mbulamatadi malu?

⁶ Nzambi mmulekele mbulamatadi ya bantu bua yikalaku bualu idi mua kupetesha bantu ndambu wa ditalala ne bulongame. Bualu ebu budi butuambuluisha bua kuyisha lumu luimpe lua Bukalenge bua Nzambi. (Lomo 13:3, 4) Nzambi udi mene utuambila bua kusambila bua bantu badi ne bukokeshi bua tumone mua kumutendelela mu ditalala. (1 Timote 2:1, 2) Padi  bantu batuenzela malu mu mushindu mubi, tudi mua kulomba bantu badi ne bukokeshi mu mbulamatadi bua batuambuluishe. Ke tshivua Paulo muenze. (Bienzedi 25:11) Nansha mudi Bible wamba ne: Satana udi ulombola mbulamatadi ya bantu, kena wamba musangu nansha umue ne: utu ulombola muntu yonso udi ne bukokeshi mu malu a mbulamatadi to. (Luka 4:5, 6) Nunku, katuena mua kuambila muntu musangu nansha umue ne: munene kampanda wa mbulamatadi udi ulombodibua kudi Diabolo to. Bible udi uleja ne: katuena ne bua kupenda bantu bakuabu to.​—Tito 3:1, 2.

7. Ndungenyi kayi lutudi ne bua kuepuka?

⁷ Tudi tutumikila Nzambi patudi katuyi tuanyisha muena tshididi nansha umue anyi tshisumbu tshia tshididi, nansha padi ngenyi yabu anyi mmuenenu yabu mua kutuambuluisha. Imue misangu kabitu anu bipepele bua tuetu kuenza nunku to. Tshilejilu, elabi meji ne: bantu badi batombokela mbulamatadi kampanda udi ukengesha bantu bikole, ukengasha too ne Bantemu ba Yehowa. Bulelela, kuena ne bua kulonda bantomboji aba to, kadi udiku mua kuela meji ne: bantomboji aba mbenze bimpe ne kutekemena ne: nebalongolole malu anyi? (Efeso 2:2) Tuetu katuyi basue kubuelakana mu malu a tshididi, tudi ne bua kuepuka lungenyi lua ne: tshisumbu kampanda tshia tshididi ntshienze bimpe anyi ntshimpe kupita tshikuabu. Bualu ebu nebumuenekele ku bitudi tuamba ne bitudi tuenza.

8. Biobi bikole bua kubenga kubuelakana mu malu a pa buloba, mmunyi mutudi mua kuikala “badimuke” kadi ‘katuyi ne bualu’?

⁸ Bualu buibidi: mushindu utudi katuyi mua kubuelakana mu malu a pa buloba nkuikala ‘badimuke bu nyoka, kadi bikale bu nyunyi ya nkutshi idi kayiyi ne bualu.’ (Bala Matayi 10:16, 17.) Tudi “badimuke” patudi tudianjila kuela meji kumpala bua ntatu idi mua kutufikila. Tudi tushala ‘katuyi ne bualu’ patudi tubenga kubuelakana mu malu a pa buloba padi nsombelu mikole ayi itufikila. Tumonayi imue ya ku nsombelu eyi ne tshitudi mua kuenza bua kubenga kubuelakana mu malu a pa buloba.

9. Mbudimu kayi butudi ne bua kuikala nabu patudi tuyukila ne bantu bakuabu?

⁹ Miyuki. Tudi ne bua kuikala ne budimu bua bungi padi bantu batuadija kuakula malu a tshididi. Tshilejilu, patudi tuyukila ne muntu bua Bukalenge bua Nzambi, katuena ne bua kuamba ne: tudi tuitaba anyi tubenga ngenyi peshi mmuenenu wa tshisumbu kampanda tshia tshididi anyi ya mulombodi wa tshididi kansanga to. Pamutu pa kuyukila ne bantu malu adibu basue kuenza bua kujikija ntatu ya bantu, baleje mu Bible muikala Bukalenge bua Nzambi mua kuyijikija bua kashidi. Bantu bobu basue kuakula bua malu bu mudi bua dibaka dia mulume ne mulume anyi mukaji ne mukaji nansha bua ditula dia mafu, baleje tshidi Dîyi dia Nzambi diamba ne mushindu uudi udienzeja bua kuditumikila mu nsombelu webe. Muntu yeye muambe ne: badi ne bua kumbusha mikenji kampanda ya mbulamatadi anyi kuyishintulula, katuena tulamata ku luseke luende to, ne katuena tusuminyina bua ashintulule mmuenenu wende to.

10. Ntshinyi tshitudi ne bua kuenza bua kuleja ne: katuena tubuelakana mu malu a pa buloba patudi tuteleja anyi tubala ngumu idibu bafila ku tudiomba ne mu bikandakanda?

¹⁰ Tudiomba ne bikandakanda. Imue misangu badi bamanyisha lumu kampanda mu mushindu wa kutua luseke kampanda lua malu a tshididi nyama ku mikolo. Bualu ebu butu butamba kuenzeka mu matunga adi mbulamatadi utangila malu a ngumu. Bikala malongolodi a malu a ngumu anyi bafidi ba ngumu balamate ku luseke alu, tudi ne bua kuikala badimuke bua katutuadiji kuela meji mushindu udibu bela. Tshilejilu, diebeja ne: ‘Ntuku nsanka bua kuteleja mufidi wa ngumu kampanda bualu ndi ngitaba bidiye wamba bua malu a tshididi anyi?’ Bua kubenga kubuelakana mu malu a pa buloba, epuka  kutangila anyi kubala ngumu ya bungi idi milamate ku luseke kampanda mu malu a tshididi. Kadi, keba ngumu idi kayiyi ilamata ku luseke kampanda anyi kansanga. Ikala misangu yonso ufuanyikija malu audi umvua ne “tshilejilu tshia mêyi makane” adi mu Bible.​—2 Timote 1:13.

11. Mmunyi mudibi mua kutukolela bua kubenga kubuelakana mu malu a pa buloba patudi tuangata bintu bitudi nabi ne mushinga wa bungi?

¹¹ Bintu bia ku mubidi. Padi makuta ne bintu bitudi nabi bilua ne mushinga wa bungi kutudi, bidi mua kutukolela bua kubenga kubuelakana mu malu a pa buloba. Mu bidimu bia 1970, Bantemu ba bungi ba mu Malawi bakashiya bintu biabu bionso bualu bavua babenge bua kubuela mu tshisumbu kampanda tshia tshididi. Bia dibungama, bamue bana betu bakabenga bua kulekela nsombelu muimpe uvuabu nende. Muanetu wa bakaji mukuabu diende Ruth udi uvuluka wamba ne: “Kuvua bamue bana betu batuvua baye nabu mu bupika, kadi bakalua kubuela mu tshisumbu tshia tshididi ne kupingana ku nzubu yabu bualu kabavua basue nsombelu mubi utuvua nende mu kamponya to.” Kadi batendeledi ba Nzambi ba bungi kabatu benza nunku to. Batu babenga kubuelakana mu malu a pa buloba nansha padi kuenza nunku kubafikisha ku dikala ne makuta makese anyi ku dijimija bintu biabu bionso.​—Ebelu 10:34.

12, 13. a) Mmunyi mudi Yehowa umona bantu? b) Ntshinyi tshitudi mua kuamba tuetu batuadije kupeta lutambishi bua ditunga dietu?

¹² Lutambishi. Bantu ba bungi batu baditambisha ne badiuwuja bua dikoba diabu, tshisamba tshiabu, bibidilu biabu, tshimenga tshiabu anyi ditunga diabu. Kadi Yehowa katu umona muntu kampanda anyi tshisamba kansanga bu tshipite tshikuabu to. Buende yeye, tuetu bonso tudi mumue. Bushuwa, Yehowa mmutufuke tuetu bonso bashilangane, tudi ne bua kusanka ne kuanyisha dishilangana edi. Ki mmusue bua tulekele bibidilu bietu to. Kadi kena kabidi musue bua tudimone ne: tudi bimpe bapite bakuabu to.​—Lomo 10:12.

¹³ Katuena ne bua kuditambisha bua ditunga dietu anyi bua tshisamba tshietu, tufika too ne ku diela meji ne: ditunga dietu ndimpe kupita dia bakuabu to. Tuetu tuela meji mushindu eu, bidi mua kutukolela bua kubenga kubuelakana mu malu a pa buloba. Bualu bua nunku buvua buenzeke mu bidimu lukama bia kumpala. Bamue bana betu ba balume bena Ebelu bavua benzela bakaji bakamba bena Greke malu mu mushindu mubi. (Bienzedi 6:1) Ntshinyi tshitudi mua kuamba tuetu batuadije kupeta lutambishi lua nunku? Tshilejilu, muanetu wa balume anyi wa bakaji wa muaba mukuabu yeye mukupeshe lungenyi kampanda, neudiambilaku diakamue ne: ‘Tuetu tutu tuenza malu bimpe kuetu kuneku,’ ne pashishe kubenga lungenyi ludiye mukupeshe anyi? Wewe wela meji mushindu eu, vuluka mubelu wa mushinga mukole eu: “Ne didipuekesha, nuangate bakuabu bu banupite nuenu.”​—Filipoyi 2:3.

14. a) Mmunyi mudi disambila mua kutuambuluisha? b) Ntshilejilu kayi tshia mu Bible tshidi tshitujadikila bualu ebu?

¹⁴ Bualu buisatu: mushindu uudi mua kubenga kubuelakana mu malu a pa buloba mpaudi weyemena Yehowa. Umulombe nyuma muimpe udi mua kukupesha lutulu ne didikanda. Ngikadilu eyi neikuambuluishe bua padi mbulamatadi wenza bualu kampanda budi kabuyi buimpe anyi kabuyi buakane. Lomba Yehowa meji bua kujingulula  nsombelu udi mua kuenza bua bikukolele bua kubenga kubuelakana mu malu a pa buloba. Lomba Yehowa bua akuambuluishe bua kuenza tshidi tshimpe mu nsombelu au. (Yakobo 1:5) Badi mua kukuela mu buloko anyi kukunyoka mu mushindu mukuabu bua lulamatu luebe kudi Yehowa. Biobi bienzeke nanku, lomba Nzambi dikima bua umvuije bantu bakuabu mu mushindu muimpe bua tshinyi udi ubenga bua kubuelakana mu malu a pa buloba. Wikale mushindike ne: Yehowa neakuambuluishe bua kutantamena lutatu alu.​—Bala Bienzedi 4:27-31.

15. Mmunyi mudi Bible mua kukuambuluisha bua kubenga kubuelakana mu malu a pa buloba? (Tangila kabidi kazubu ka ne: “ Dîyi dia Nzambi divua dikoleshe dipangadika diabu.”)

¹⁵ Yehowa mmutupeshe Bible bua kutukolesha. Elangana meji bua mvese yakuambuluisha bua kubenga kubuelakana mu malu a pa buloba. Dienzeje bua kulonga mvese eyi ne bua kuyikuata ku muoyo bualu neyikuambuluishe biobi mua kuenzeka umue musangu ne: kuena ne Bible. Bible udi kabidi mua kukolesha ditekemena diebe bua malu adi Nzambi mulaye bua matuku atshilualua. Tudi dijinga ne ditekemena edi bua kutantamena buluishi. (Lomo 8:25) Sungula mvese idi ileja malu audi nangananga musue kupeta mu bulongolodi bupiabupia, ne difuanyikije bu ukadimu.

16, 17. Bilejilu bia batendeledi ba Nzambi ba lulamatu bavua babenge kubuelakana mu malu a pa buloba bidi bitulongesha tshinyi? (Tangila tshimfuanyi tshia ntuadijilu tshia tshiena-bualu.)

¹⁶ Bualu buinayi budi butuambuluisha bua kubenga kubuelakana mu malu a pa buloba nkuela meji ku bilejilu bia batendeledi ba Yehowa ba lulamatu. Ba bungi ba mu bikondo bia kale bavua ne dikima, ne bakangata mapangadika a meji avua mabambuluishe bua kubenga kubuelakana mu malu a pa buloba. Ela meji bua Shadalaka, Meshaka ne Abedenego bavua babenge kutendelela lupingu luvua tshimfuanyi tshia mbulamatadi wa Babilona. (Bala Danyele 3:16-18.) Muyuki wa mu Bible eu mmuambuluishe Bantemu ba bungi lelu bua kuikala ne dikima ne kubenga kukukuila dibendele dia ditunga dia muaba udibu basombele. Yezu kavua mubuelakane mu malu a tshididi anyi mu bilumbu  bikuabu bivua bitapulula bantu to. Uvua mumanye ne: tshilejilu tshiende tshimpe tshivua ne bua kuambuluisha bayidi bende. Wakamba ne: “Koleshayi muoyo! Ndi mutshimune ba pa buloba.”​—Yone 16:33.

¹⁷ Bantemu ba bungi ba mu tshikondo tshietu etshi mbabenge kubuelakana mu malu a pa buloba. Mbakengeshe bamue ba kudibu bikole, babele mu buloko anyi mene babashipe bualu bavua bashale ne lulamatu kudi Yehowa. Bilejilu biabu bidi mua kutuambuluisha bua kuikala ne dikima. Muanetu wa balume mukuabu wa mu ditunga dia Turquie wakamba ne: “Bavua bashipe Franz Reiter, muanetu wa balume kampanda utshivua nsonga bualu uvua mubenge kubuela mu tshiluilu tshia Hitler. Mukanda uvuaye mufundile mamuende kumpala kua lufu luende uvua uleja muvuaye ne ditabuja dikole ne mueyemene Yehowa, ne ndi musue kuidikija tshilejilu tshiende meme mutuilangane ne lutatu lua nunku.” ^[2]​—Tangila note ku ndekelu.

18, 19. a) Mmunyi mudi bena mu tshisumbu tshienu mua kukuambuluisha bua kubenga kubuelakana mu malu a pa buloba? b) Udi mudisuike bua kuenza tshinyi?

¹⁸ Bana betu ba balume ne ba bakaji ba mu tshisumbu tshienu badi mua kukuambuluisha bua kubenga kubuelakana mu malu a pa buloba. Umanyishe bakulu biwikala mu nsombelu mukole. Badi mua kukupesha mibelu mimpe idi ifumina mu Bible. Kabidi, bana betu ba mu tshisumbu bobu bamanye nsombelu uudi nende, badi mua kukukankamija. Balombe bua basambile bua bualu buebe. Tuetu petu tudi ne bua kukankamija bana betu ne kusambila bua bualu buabu. (Matayi 7:12) Bua kupeta mêna a bana betu badi mu buloko, bala tshiena-bualu tshidi mu site wetu wa jw.org tshia ne: “Bantemu ba Yehowa badibu bele mu buloko bua ditabuja diabu​—Bilondeshile miaba” tshidi mu tshitupa tshia NGUMU > BILUMBU BIA KU TUBADI (mu Mfualansa). Sungula mêna makese, ne lomba Yehowa bua ambuluishe bana betu ba balume ne ba bakaji aba bua kuikalabu ne dikima ne kushalabu ne lulamatu kudiye.​—Efeso 6:19, 20.

¹⁹ Bu mutudi tuenda tusemena bikole ku nshikidilu, tudi mua kutekemena ne: mbulamatadi neyituenzeje bikole menemene bua tuetu kulamata ku luseke kampanda. Ke bualu kayi bidi ne mushinga bua tuetu kudilongolola ku mpindieu bua kubenga kubuelakana mu malu a pa buloba mu bulongolodi ebu budi butapuluke!