1-3. a) Mmunyi mudi bena Kristo baleje ne: badi ne dijinga dikole dia kudisangisha pamue? (Tangila tshimfuanyi tshia ntuadijilu tshia tshiena-bualu.) b) Ntshinyi tshituakonkonona mu tshiena-bualu etshi?

PAVUA Corinna ne bidimu 17, bakakuata mamuende ne kuyabu nende mu kamponya ka dienzejangana midimu mikole. Pashishe bakaya ne Corinna pende mu Sibérie, mutantshi wa kilometre binunu bia bungi. Uvua wenzamu mudimu mu madimi ne bavua bamuenzela malu bu mupika. Imue misangu bavua bamuenzeja bua kuenzaye mudimu pambelu mu mashika makole kayi ne bilamba bia mashika. Nansha nanku, Corinna ne muanetu wa bakaji mukuabu bakangata dipangadika dia ne: bavua ne bua kuenza muabu muonso bua kumbuka mu madimi au bua kuya mu bisangilu bia tshisumbu.

² Corinna wakamba ne: “Tuakumbuka muaba wetu wa mudimu dilolo ne tuakenda kilometre 25 bua kufika ku gare wa kawulu. Kawulu kakajuka patshiatshia pa dîba ibidi, tuetu kuenza mêba asambombo mu kawulu ne pashishe kuenda ku makasa kilometre 10 bua kufika muaba wa bisangilu.” Corinna uvua ne disanka dia  bungi bua muvuaye muenze luendu alu. Wakamba ne: “Mu bisangilu, tuakalonga Tshibumba tshia Nsentedi ne kuimba misambu ya Bukalenge. Bivua bitukoleshe bikole ne bikoleshe ditabuja dietu.” Bana betu ba bakaji babidi aba bakapingana ku madimi matuku asatu pashishe, kadi muena madimi kavua nansha mujingulule ne: bavua bumbuke to.

³ Bantu ba Yehowa batu misangu yonso bindila ne muoyo kuulu kuulu bua kudisangisha pamue ne bakuabu. Tshilejilu, bena Kristo ba kumpala bavua basanka bikole bua kudisangisha pamue bua kutendelela Yehowa ne kulonga malu ende. (Bienzedi 2:42) Bushuwa, wewe pebe udi mua kuikala muindile ne muoyo kuulu kuulu bua kuya mu bisangilu. Kadi anu bu bana betu bakuabu, udi mua kumona ne: mbikukolele bua kubuela mu bisangilu pa tshibidilu. Pamuapa udi musue kuenza mudimu mêba a bungi anyi udi ne bia bungi bia kuenza peshi udiumvua misangu yonso mutshioke. Nunku, ntshinyi tshiatuambuluisha bua kuenza muetu muonso bua kubuela mu bisangilu bietu? ^[1] (Tangila note ku ndekelu.) Mmunyi mutudi mua kukankamija balongi betu ba Bible ne bantu bakuabu bua kubuela mu bisangilu pa tshibidilu? Tshiena-bualu etshi netshileje mudi kubuela mu bisangilu 1) kuimpe buetu tuetu, 2) kuambuluisha bantu bakuabu ne 3) kusankisha Yehowa. ^[2]​—Tangila note ku ndekelu.

4. Mmunyi mudi kudisangisha pamue kutuambuluisha bua kulonga malu a Yehowa?

⁴ Bisangilu bidi bitulongesha. Tshisangilu tshionso tshidi tshituambuluisha bua kulonga malu a bungi pa bidi bitangila Yehowa. Tshilejilu, matuku mashale aa, bisumbu bia bungi mbilonge mukanda wa Semena pabuipi ne Yehowa mu Dilonga dia Bible dia tshisumbu. Mmunyi muuvua mudiumvue patuvua balonge ngikadilu ya Yehowa ne pauvua uteleja muvua bana betu badiumvua bua Yehowa? Kakuyi mpata bualu ebu buvua bukusake bua kunanga Yehowa bikole. Mu bisangilu, tudi tulonga kabidi malu a bungi a mu Bible patudi tuteleja ne ntema miyuki, manaya a bilejilu ne dibala dia Bible. (Nehemiya 8:8) Ela meji bua malu a bungi atutu tupeta lumingu luonso patudi tudilongolola bua dibala dia Bible ne pashishe tumvua malu adi bakuabu bapete mu dibala edi.

5. Mmunyi mudi bisangilu bikuambuluishe bua kutumikila malu a mu Bible audi mulonge ne bua kuakaja mushindu uudi uyisha?

⁵ Bisangilu bidi bitulongesha mua kutumikila malu atudi tulonga mu Bible. (1 Tesalonike 4:9, 10) Tshilejilu, ukadiku mubuele mu Dilonga dia Tshibumba tshia Nsentedi divua dikusake bua kuenzela Yehowa mudimu bikole, kuakaja masambila ebe anyi kufuila muena Kristo nebe luse anyi? Bisangilu bia munkatshi mua lumingu bidi bitulongesha mushindu wa kuyisha lumu luimpe ne mutudi mua kuambuluisha bantu bakuabu bua kumvua bulelela bua mu Bible.​—Matayi 28:19, 20.

6. Mmunyi mudi bisangilu bietu bitukankamija ne bituambuluisha bua kushala bakole?

⁶ Bisangilu bidi bitukankamija. Bulongolodi bua Satana budi buteta bua kutekesha ditabuja dietu ne budi mua kuenza bua tudiumvue babungame ne batekeshibue mu mikolo. Kadi bisangilu bietu bidi bitukankamija  ne bitupetesha bukole bua kutungunuka ne kuenzela Yehowa mudimu. (Bala Bienzedi 15:30-32.) Misangu ya bungi, tutu tulonga mushindu udi mêyi a buprofete a mu Bible makumbane. Ebi bidi bituambuluisha bua kuikala bashindike ne: malu adi Yehowa mulaye bua matuku atshilualua neakumbane. Bana betu ba balume ne ba bakaji badi batukankamija ki nganu padibu benza miyuki to, kadi nansha padibu bafila mandamuna ne batumbisha Yehowa padibu bimba misambu ne muoyo mujima. (1 Kolinto 14:26) Patudi tuyukila nabu kumpala kua bisangilu kutuadija ne padibi bijika, tudi tudiumvua bakoleshibue bualu tudi ne balunda ba bungi badi bushuwa batutabalela.​—1 Kolinto 16:17, 18.

7. Bua tshinyi bidi ne mushinga wa bungi bua kubuela mu bisangilu?

⁷ Mu bisangilu tudi tupeta diambuluisha dia nyuma muimpe wa Nzambi. Yezu udi wenza mudimu ne nyuma muimpe eu bua kulombola bisumbu. Bulelela, wakatuambila ne: tudi ne bua ‘kumvua tshidi nyuma wambila bisumbu.’ (Buakabuluibua 2:7) Nyuma muimpe udi utuambuluisha bua kukandamena mateta ne kuyisha ne dikima dionso. Udi kabidi utuambuluisha bua kuangata mapangadika mimpe. Ke bualu kayi tudi ne bua kuenza muetu muonso bua kuikala mu bisangilu bietu ne kupeta diambuluisha dia nyuma muimpe wa Nzambi.

8. Padi bana betu batumona mu bisangilu, bateleja mandamuna etu ne mutudi tuimba misambu, mmunyi mudibi bibambuluisha? (Tangila kabidi kazubu ka ne: “ Utu misangu yonso udiumvua bimpe panyima pa bisangilu.”)

⁸ Mu bisangilu tudi ne mishindu ya kuleja bana betu mutudi babanange. Bana betu ba bungi mu tshisumbu badi batantamena ntatu mikole. Mupostolo Paulo wakafunda ne: “Tutabalelanganayi muntu ne muntu.” (Ebelu 10:24, 25) Tudi mua kuleja mutudi tutabalela bana betu patudi tudisangisha pamue nabu bua kukoleshangana. Patudi tuya mu bisangilu, tudi tuleja bana betu ne: tudi basue kuikala nabu ne kuyukila nabu, ne tudi tutabalela mudibu badiumvua. Tudi kabidi tubakankamija padibu bateleja mandamuna etu ne mutudi tuimba misambu ne muoyo mujima.​—Kolosayi 3:16.

9, 10. a) Leja mudi mêyi a Yezu adi mu Yone 10:16 atuambuluisha bua kumanya mudi kudisangisha pamue ne bana betu kuikale ne mushinga. b) Tuetu tubuela mu bisangilu pa tshibidilu, mmunyi mutudi mua kuambuluisha muntu udibu babenge kudi bena mu dîku diabu?

 ⁹ Patudi tuya mu bisangilu tudi tuambuluisha tshisumbu bua kushalatshi mu buobumue. (Bala Yone 10:16.) Yezu wakadifuanyikija ne mulami wa mikoko ne kufuanyikijaye bayidi bende ne tshisumbu tshia mikoko. Elabi meji bua bualu ebu: Mikoko ibidi yoyi pa mukuna, mikuabu ibidi mu tshibandabanda ne umue muikale muaba kampanda, tudiku mua kuamba ne: mikoko itanu eyi idi mu tshisumbu tshimue anyi? Tòo, bualu tshisumbu tshia mikoko tshitu tshishala pamue ne tshilonda mulami umue. Bia muomumue, katuena ne bua kushala kule ne bana betu pa kubenga kubuela mu bisangilu to. Tudi ne bua kudisangisha pamue bua kuenza “tshisumbu tshimue” ne kulonda “mulami umue.”

¹⁰ Bisangilu bietu bidi bituambuluisha bua kuikala mu buobumue bu bena mu dîku badi banangangane. (Musambu 133:1) Bamue bana betu mu tshisumbu mbababenge kudi bena mu mêku abu bu mudi baledi babu anyi bana babu ba balume peshi bana babu ba bakaji. Kadi Yezu uvua mulaye bua kubapesha dîku divua ne bua kubananga ne kubatabalela. (Mâko 10:29, 30) Paudi ubuela mu bisangilu pa tshibidilu, udi mua kulua kudi muena mu tshisumbu kampanda bu tatuende anyi mamuende peshi muanabu wa balume anyi wa bakaji. Patudi tuela meji bua bualu ebu, bidi bitusaka bua kuenza muetu muonso bua kubuela mu bisangilu bionso.

11. Mmunyi mudi kubuela mu bisangilu kutuambuluisha bua kupesha Yehowa tshidi tshimuakanyine?

¹¹ Mu bisangilu tudi tupesha Yehowa tshidi  tshimuakanyine. Bu mudiye Mufuki wetu, tudi ne bua kumuela tuasakidila, kumunemeka ne kumutumbisha. (Bala Buakabuluibua 7:12.) Tudi tuenza nunku mu bisangilu bietu patudi tusambila Yehowa, tumuimbila misambu ne tuakula bua malu ende. Bushuwa, lumingu luonso tudi ne mpunga muimpe wa kutendelela Yehowa!

12. Mmunyi mudi Yehowa udiumvua patudi tutumikila mukenji wende wa kubuela mu bisangilu?

¹² Yehowa mmutufuke ne tudi ne bua kumutumikila. Mmutuelele mukenji bua kutungunuka ne kudisangisha pamue nangananga bu mukadi nshikidilu musemene pabuipi. Nunku patudi tutumikila mukenji eu, Yehowa udi usanka. (1 Yone 3:22) Nzambi udi umona ne: tudi bushuwa basue kubuela mu bisangilu ne udi wangata madikolela atudi tuenza bua kubuelamu ne mushinga.​—Ebelu 6:10.

13, 14. Mmunyi mutudi tusemena pabuipi ne Yehowa ne Yezu mu bisangilu?

¹³ Patudi tuya mu bisangilu tudi tuleja Yehowa ne: tudi basue kusemena pabuipi nende ne pabuipi ne Muanende. Mu bisangilu tudi tulonga Bible, ne Yehowa udi utulongesha tshitudi ne bua kuenza ne nsombelu utudi ne bua kuikala nende. (Yeshaya 30:20, 21) Nansha padi bamue bantu badi kabayi batendelela Yehowa babuela mu bisangilu, badi bamona ne: Nzambi udi utulombola. (1 Kolinto 14:23-25) Yehowa udi ulombola bisangilu bietu ku diambuluisha dia nyuma wende ne malu atudi tulongamu adi afumina kudiye. Nunku patudi tuya mu bisangilu, tudi tuteleja tshidi Yehowa utuambila, tumona mudiye mutunange bikole ne tusemena pabuipi nende.

¹⁴ Yezu, Mfumu wa tshisumbu wakamba ne: “Muaba udi bantu babidi anyi basatu badisangishe mu dîna dianyi, meme ndi munkatshi muabu.” (Matayi 18:20) Bible udi wamba kabidi ne: Yezu “udi wenda munkatshi” mu bisumbu. (Buakabuluibua 1:20–2:1) Bidi bimueneka patoke ne: Yehowa ne Yezu badi netu ne badi batukolesha mu bisangilu bietu. Udi wela meji ne: Yehowa udi udiumvua mushindu kayi padiye ukumona udienzeja bua kusemena pabuipi nende ne pabuipi ne Muanende?

15. Mmunyi mutudi tuleja Nzambi ne: tudi basue kumutumikila patudi tubuela mu bisangilu?

¹⁵ Patudi tuya mu bisangilu tudi tuleja Yehowa ne: tudi basue kumutumikila. Yehowa kena utuenzeja ku bukole bua kuenza anu tshidiye wamba to. (Yeshaya 43:23) Nunku patudi tutumikila mukenji wende wa kubuela mu bisangilu, tudi tumuleja ne: tudi bamunange ne tudi tuitaba bukenji budiye nabu bua kutuambila tshitudi ne bua kuenza. (Lomo 6:17) Tshilejilu, ntshinyi tshituenza bikala mfumuetu wa mudimu utulomba bua kuenza mudimu wa bungi udi utupangisha bua kubuela mu bisangilu pa tshibidilu? Pamuapa mbulamatadi udi mua kuamba ne: muntu yeye mubuele mu bisangilu bua kutendelela Yehowa, neafute tshibawu, nebamuele mu buloko anyi nebamunyoke mu mushindu mubi. Anyi imue misangu tudi mua kujinga bua kuenza bualu bukuabu pamutu pa kuya mu bisangilu. Mu nsombelu yonso eyi, tudi ne bua kudisunguila tshitudi ne bua  kuenza. (Bienzedi 5:29) Kadi misangu yonso itudi tusungula bua kutumikila Yehowa, tudi tumusankisha.​—Nsumuinu 27:11.

16, 17. a) Mmunyi mutudi bamanye ne: bisangilu bivua ne mushinga wa bungi kudi bena Kristo ba mu bidimu lukama bia kumpala? b) Mmunyi muvua muanetu George Gangas udiumvua bua bisangilu bia bena Kristo?

¹⁶ Panyima pa tshisangilu tshia mu Pentekoste wa mu tshidimu tshia 33, bena Kristo bakatungunuka ne kudisangisha pa tshibidilu bua kutendelela Yehowa. ‘[Bakatungunuka ne kudifila] bua kuteleja malongesha a bapostolo, badisanga kaba kamue bu bena muntu.’ (Bienzedi 2:42, MMM) Nansha pavua mbulamatadi wa bena Lomo ne bamfumu ba bitendelelu bia bena Yuda babakengesha, kabakalekela kudisangisha pamue to. Nansha muvuabi kabiyi bipepele, bakenza muabu muonso bua kutungunuka ne kudisangisha pamue.

¹⁷ Lelu batendeledi ba Yehowa badi pabu ne dianyisha dia bungi bua bisangilu ne badi ne disanka dia kubuelamu. Muanetu George Gangas uvua muenze bidimu 22 mu Kasumbu Kaludiki wakamba ne: “Buanyi meme, kudisangisha ne bana betu mbualu butu bunsankisha bikole mu nsombelu wanyi ne butu bunkolesha bikole. Ntu musue kuikala munkatshi mua bantu ba kumpala badi bafika ku Nzubu wa Bukalenge, ne koku mushindu kuikala munkatshi mua bantu ba ndekelu badi bumbukaku. Ntu ngumvua disanka dia bungi pantu nyukila ne bena Kristo nanyi. Pandi munkatshi muabu, ntu ndiumvua bu ndi ku nzubu kuanyi ne bena mu dîku dianyi, mu mparadizu wa mu nyuma.” Wakasakidila ne: “Munda muanyi ntu ne dijinga dikole dia kubuela mu bisangilu.”

18. a) Mmunyi muudi udiumvua bua bisangilu bietu? b) Udi mudisuike bua kuenza tshinyi?

¹⁸ Utu pebe udiumvua mushindu eu bua kuya mu bisangilu bua kutendelela Yehowa anyi? Bikalabi nanku, tungunuka ne kuenza muebe muonso bua kubuela mu bisangilu ne bena Kristo nebe nansha padibi bikole. Leja Yehowa ne: udi bushuwa udiumvua anu bu mukalenge Davidi wakamba ne: ‘Yehowa, ndi munange muaba uudi mushikame mu nzubu muebe.’​—Musambu 26:8.