1. Ndijinga kayi dia malu a mu nyuma ditudi nadi? Mmushindu kayi udidi ditupetesha disanka?

 DISANKA dilelela ki nkudiumvua ne disanka patupu to. Disanka dilelela ngedi didi muntu ushala nadi mu nsombelu wende mujima. Mushindu kayi? Yezu wakumvuija mu Muyuki wende wa pa mukuna ne: “Badi bamanye ne: badi dijinga ne malu a mu nyuma mba diakalenga.” (Mat. 5:3) Yezu uvua mumanye ne: bantu mbafukibue ne dijinga dikole dia kumanya Mufuki wabu, Yehowa Nzambi ne kumutendelela. Ke “dijinga [dietu dia] malu a mu nyuma” adi. Bu mudi Yehowa muikale “Nzambi wa disanka,” bantu badi bamutendelela badi mua kuikala pabu ne disanka.​—1 Tim. 1:11.

2, 3. a) Bilondeshile Yezu, mbanganyi bakuabu badi mua kuikala ne disanka? b) Netuakule bua tshinyi mu tshiena-bualu etshi? Bua tshinyi bidi ne mushinga?

² Bua kuikala ne disanka, anu tuetu ne nsombelu muimpe anyi? Tòo. Yezu uvua muambe bualu budi butukemesha mu Muyuki wende wa pa Mukuna, bua ne: “Badi badila” badi mua kuikala ne diakalenga. Bantu aba badi mua kuikala badila bualu badi bumvua bibi bua mpekatu yabu anyi bua ntatu mikole idibu nayi. Yezu wakamba bualu bua muomumue bua “bantu badibu bakengesha bua buakane” anyi badibu ‘bapenda’ bua mudibu bayidi ba Kristo. (Mat. 5:4, 10, 11) Kadi mmushindu kayi udi muntu mua kuikala ne disanka mu nsombelu eyi?

³ Yezu uvua usua kulongesha ne: nsombelu muimpe kena upetesha muntu disanka dilelela to, kadi udi udipeta padiye ukumbaja majinga ende a malu a mu nyuma ne usemena pabuipi ne Nzambi. (Yak. 4:8) Mushindu kayi? Mu tshiena-bualu etshi netuakule bua malu manene asatu a kuenza bua kupeta disanka dilelela.

4. Mbualu kayi bua kumpala butudi ne bua kuenza bua kupeta disanka dilelela? (Misambu 1:1-3)

⁴ BUALU 1: Bua kuikala ne disanka dilelela, tudi ne bua kudia biakudia bia mu nyuma. Bantu ne nyama badi ne bua kudia biakudia bia ku mubidi bua kushala ne muoyo. Kadi anu bantu ke badi mua kudia biakudia bia mu nyuma. Tudi nabi dijinga bushuwa. Ke bualu kayi Yezu wakamba ne: “Muntu udi ne bua kuikala ne muoyo, kabuyi anu bua diampa nkayadi, kadi bua dîyi dionso didi dipatuka mukana mua Yehowa.” (Mat. 4:4) Nunku, katupitshishi dituku katuyi badie biakudia bia mu nyuma bidi mu Bible, dîyi dia Nzambi dia mushinga mukole to. Muimbi wa misambu wakamba ne: ‘Wa diakalenga mmuntu udi disanka diende dikale mu mikenji ya Yehowa, ne udi ubala mikenji yende munya ne butuku.’​—Bala Misambu 1:1-3.

5, 6. a) Mmalu kayi atudi tumanya ku diambuluisha dia Bible? b) Mmushindu kayi udi Bible utuambuluisha?

⁵ Mu Bible mudi malu a mushinga mukole adi Yehowa mutupeshe ne dinanga dionso, utuleja mua kuikala ne nsombelu wa disanka. Tudi tumanya tshidiye mutupeshile muoyo. Tudi tumanya mua kusemena pabuipi nende ne tufuidibua luse bua mpekatu yetu. Tudi tumanya kabidi malu malenga adiye mutulaye kumpala eku. (Yel. 29:11) Malu malelela atudi tupeta mu didilongela dietu aa adi uwuja muoyo wetu ne disanka dia bungi be!

⁶ Anu mutudi bamanye, Bible mmuwule tente ne mibelu mimpe bua nsombelu wa buatshia buila. Patudi tuyitumikila, tudi mua kupeta disanka. Musangu wonso udi ntatu ikutekesha mu mikolo, angata dîba dia bungi dia kubala Dîyi dia Yehowa ne welangane meji a biudi mubale. Yezu wakamba ne: “Bantu  badi bateleja dîyi dia Nzambi ne badilama ke ba diakalenga!”​—Luka 11:28.

7. Bua dîba diudi wangata bua kubala Bible kukuambuluisha bua kumanya malu a bungi, ntshinyi tshiudi mua kuenza?

⁷ Paudi ubala Dîyi dia Nzambi, angata dîba dia kumvua muenya wa biudi mubale. Tshilejilu, bualu ebu bukadi bukufikile anyi? Badi balamba biakudia biutu munange bikole. Kadi bu muudi lukasa anyi muikale ne malu a bungi mu mutu, udi ubimina lukasa lukasa kuyi nangananga ubidia bionso bimpe to. Paudi ujikija kudia, udi umona ne: uvua mudie lubilu lubilu, udiambila mpindieu ne: bivua bikengela udie ne lutulu bua umvue butamu buabi. Ke mudibi mua kuikala kabidi patudi tubala Bible. Imue misangu tudi mua kumubala lubilu lubilu tupanga mua kumvua tshidiye wamba. Angata dîba dia kubala Dîyi dia Nzambi; udifuanyikijile malu audi ubala au enda enzeka, udifuanyikijile kabidi wenda mêyi a bantu, ne wele meji a biudi mubale. Bionso abi nebikupeteshe disanka.

8. Mmunyi mudi “mupika wa lulamatu udi mudimuke” ukumbaja mudimu wende? (Tangila kabidi dimanyisha.)

⁸ Yezu mmuteke “mupika wa lulamatu udi mudimuke” bua kutupesha biakudia mu tshikondo tshikanyine, ne tudi tudishibua bimpe mu nyuma. * (Mat. 24:45) Mifundu mifundisha ku nyuma ke bintu binene bidi bilengeja tshiakudia tshionso tshidi mupika wa lulamatu utupesha. (1 Tes. 2:13) Biakudia bia mu nyuma ebi bidi bituambuluisha bua kumanya ngelelu wa meji wa Yehowa udi Bible uleja. Ke bualu kayi tutu tubala tshibejibeji tshia Tshibumba tshia Nsentedi ne tshia Tabulukayi! ne biena-bualu bidi mu jw.org. Tutu tulongolola bisangilu bia tshisumbu, tshia munkatshi mua lumingu ne tshia ku ndekelu kualu. Ngondo yonso, tutu tutangila ndongamu wa ku TV wa JW padiyiku. Kutungunuka ne kubala Bible ne kumulonga nekutuambuluishe bua kuenza bualu buibidi budi butupetesha disanka dilelela.

9. Mbualu kayi buibidi butudi ne bua kuenza bua kupeta disanka dilelela?

⁹ BUALU 2: Bua kuikala ne disanka dilelela, tudi ne bua kutumikila mikenji ya Yehowa. Muimbi wa misambu wakafunda ne: “Wa diakalenga mmuntu yonso udi utshina Yehowa, udi wendela mu njila Yende.” (Mis. 128:1) Kutshina Yehowa kudi kumvuija kumunemeka bikole, kuepuka bua kuenza bualu budi bumunyingalaja. (Nsu. 16:6) Nunku tudi tudienzeja bua kutungunuka ne kuenza malu bilondeshile mikenji yende ya tshidi tshimpe ne tshidi tshibi anu mudi Bible uleja. (2 Kol. 7:1) Netuikale ba diakalenga tuetu tuenza malu adi Yehowa munange ne tubenga kuenza malu adiye mukine.​—Mis. 37:27; 97:10; Lomo 12:9.

10. Bilondeshile Lomo 12:2, ntshinyi tshitudi ne bua kuenza?

¹⁰ Bala Lomo 12:2. Muntu udi mua kumanya mudi Yehowa ne bukokeshi bua kuamba ne: etshi ntshimpe, etshi ntshibi; kadi udi ne bua kudiangatshila dipangadika dia kuitaba bua kutumikila mikenji ya Nzambi. Tshilejilu, muntu udi mua kumanya ne: mbulamatadi udi ne bukokeshi bua kukosela bena mioto ne mashinyi lubilu kampanda lua kunyema mu njila munene. Kadi pamuapa udi mua kubenga kuitaba bua kunemeka lubilu ludibu baleje alu, ke unyema mpindieu upitshisha. Tudi tuleja ku bikadilu bietu mutudi tuitaba ne muoyo mujima ne: kutumikila mikenji ya Yehowa ke nsombelu mutambe buimpe. (Nsu. 12:28) Ke tshiakajingulula Davidi, bualu wakamba ne:  “Wewe udi ummanyisha njila wa muoyo. Kumpala kuebe kudi disanka dipite bungi; ku tshianza tshiebe tshia balume kudi diakalenga bua kashidi.”​—Mis. 16:11.

11, 12. a) Tuetu ne ntatu anyi batekeshibue mu mikolo, ntshinyi tshitudi mua kudimukila? b) Mmunyi mudi mêyi adi mu Filipoyi 4:8 atuambuluisha patudi tusungula malu a kujikija nawu lutetuku?

¹¹ Tuetu ne ntatu anyi batekeshibue mu mikolo, tudi mua kujinga bua kuenza bualu budi mua kutuambuluisha bua katutambi kusamisha mutu. Mbimpe, kadi tuadimuka bua katulu kuenza bualu budi Yehowa ukina.​—Ef. 5:10-12, 15-17.

¹² Mupostolo Paulo wakafundila bena Kristo ba ku Filipoyi, ubalomba ne: malu ‘adi makane, . . . adi makezuke, . . . adibu ne bua kunanga, . . . [ne] adi mimpe, batungunuke ne kuelela meji.’ (Bala Filipoyi 4:8.) Nansha muvua malu avua Paulo mufunde aa kaayi aleja patoke bualu bua dijikija lutetuku, tshidiye muambe etshi tshidi ne bua kutusaka bua kumanya malu a kujikija nawu lutetuku. Teta kuenza nunku: Muaba wonso udi muaku “malu” mu mvese eu, pingaja miaku eyi: “misambu,” “filme,” “mikanda ne bikandakanda,” anyi “manaya a mitendo.” Wewe mutete nunku, nebikuambuluishe bua kujingulula malu a kujikija nawu lutetuku adi mua kuikala mimpe anyi mabi ku mêsu kua Nzambi. Tuenzayi malu adi umvuangana ne mêyi manene a Nzambi. (Mis. 119:1-3) Bu mutudi mpindieu ne kondo ka muoyo kimpe, tudi mua kuenza bualu budi bulonda ebu bua kupeta disanka dilelela.​—Bien. 23:1.

13. Mbualu kayi buisatu butudi ne bua kuenza bua kupeta disanka dilelela? (Yone 4:23, 24)

¹³ BUALU 3: Enza bua ntendelelu wa Yehowa ikale pa muaba wa kumpala mu nsombelu webe. Bu mudi Yehowa Mufuki wetu, mmukumbane menemene bua tuetu kumutendelela. (Buak. 4:11; 14:6, 7) Nunku bualu bua mushinga mukole menemene nkumutendelela mu mushindu udiye wanyisha, mmumue ne: kumutendelela “ne nyuma ne bulelela.” (Bala Yone 4:23, 24.) Tudi basue bua nyuma muimpe wa Nzambi alombole ntendelelu wetu bua umvuangane ne malongesha malelela adi mu Dîyi diende. Ntendelelu wetu udi ne bua kuikala pa muaba wa kumpala nansha tuetu mu ditunga didibu bakandike mudimu wetu. Patudi tuakula apa, mbele bana betu ba balume ne bakaji mu maloko anu bualu mBantemu ba Yehowa. * Nansha nanku badi ne disanka, benza tshionso tshidibu mua kuenza bua kusambila, kudilongela, ne kuambila bakuabu malu a Nzambi wetu ne Bukalenge buende. Padibu batupenda anyi batukengesha, tudi mua kuikala ne disanka bamanye ne: Yehowa udi netu ne neatufute.​—Yak. 1:12; 1 Pet. 4:14.

14. Ntshinyi tshivua tshifikile muanetu wa balume kampanda mu Tajikistan? Bua tshinyi?

¹⁴ Malu adi menzekele bantu adi ajadika ne: malu asatu atudi tufuma ku dimona aa adi apetesha muntu disanka dilelela, nansha yeye mu nsombelu kayi. Mona tshivua tshifikile Jovidon Bobojonov, muanetu wa balume wa bidimu 19 wa mu ditunga dia Tadjikistan, bua muvuaye mubenge kubuela ku busalayi. Mu dia 4/10/2019, bakalua kumukakula wa dikakula kuende, kumuelabu mu buloko bua ngondo ndambu, bamuangata bu muenzavi. Buloba bujima buakamanya muvuabu bamukuate kayi ne tshivuaye muenze. Lumu luvua luende ne: bavua bamutute ne meji a  kumuenzeja mutshipu wa kubuela ku busalayi ne kuvuala bilamba bia basalayi. Bena ku tshilumbuluidi bakamupisha, kumuela mu buloko bua midimu mikole too ne mua kalua mfumu wa ditunga adi kumufuila luse ne kumulekeesha. Mu tshikondo tshionso atshi, Jovidon uvua anu ne muoyo wende mutoke ne disanka diende. Tshivua tshimuambuluisha ntshinyi? Ndimanya divuaye anu nadi dia ne: uvua dijinga ne malu a mu nyuma.

15. Pavua Jovidon mu buloko, uvua ulonga malu a Yehowa bishi?

¹⁵ Pavua Jovidon mu buloko, uvua anu ulonga malu a Yehowa nansha muvuaye kayi ne Bible ne mikanda yetu. Kadi uvua ualonga bishi? Pavua bena Kristo nende ba muaba au bamutuadila biakudia mu mabuki, bavua bamufundilapu mvese wa ku dituku. Nunku uvua upeta mushindu wa kubala Bible ne kuelangana meji a bivuaye ubala dituku dionso. Pakamulekelabu, wakapatukamu ne mubelu uvuaye mua kupesha aba bavua kabayi banji kutuilangana ne ntatu mikole, wa ne: “Mu tshikondo tshiutshidi ne budikadidi buonso, bala Dîyi dia Yehowa ne mikanda yetu bua umumanye bikole.”

16. Nkuepi kuvua Jovidon mutambe kutuma meji ende?

¹⁶ Jovidon wakatumikila mikenji ya Yehowa. Pamutu pa kutuma meji anu ku majinga mabi ne kuditua mu bikadilu bibi, uvua uatuma anu  kudi Yehowa ne ku malu adi Nzambi wangata ne mushinga. Bulengele bua bifukibua bia Nzambi buvua bumusankisha bikole. Pavuaye ujuka mu dinda dionso, uvua umvua muvua nyunyi yimba misambu. Uvua ushala mulengemene ngondo ne mitoto butuku. Wakamba ne: “Mapa a kudi Yehowa au akampetesha disanka ne akankankamija.” Tuetu ne dianyisha bua bintu bia ku mubidi ne bia mu nyuma bidi Yehowa utupesha, netumvue disanka dia bungi, ne disanka edi neditupeshe bukole bua bungi bua kunanukila.

17. Mmunyi mudi mêyi adi mu 1 Petelo 1:6, 7 mua kukumbanyina muntu udi mua kuikala mu nsombelu wa buena wa Jovidon?

¹⁷ Jovidon uvua kabidi uteka ntendelelu wa Yehowa pa muaba wa kumpala. Uvua mumanye ne: kushala ne lulamatu kudi Nzambi mulelela kuvua ne mushinga. Yezu wakamba ne: “Yehowa Nzambi webe ke uudi ne bua kutendelela, ne yeye nkayende ke uudi ne bua kuenzela mudimu wa tshijila.” (Luka 4:8) Basalayi ne tumanda tuabu bavua basue bua Jovidon alekele tshitendelelu tshiende. Kadi uvua usambila bikole butuku ne munya, ulomba Yehowa bua amuambuluishe ashale anu ne lulamatu, kayi ulekela. Nansha muvuabu bamukengesha, wakashala anu ne lulamatu. Ke bualu kayi udi mpindieu ne disanka dia bungi bua mudiye ne tshintu tshivuaye kayi natshi kumpala kua kumukuatabu, kumututabu, ne kumuelabu mu buloko. Tshintu atshi ke ditabuja dikole divuaye mupete bua muvuadi dipitshile mu mateta.​—Bala 1 Petelo 1:6, 7.

18. Ntshinyi tshitudi mua kuenza bua kulama disanka dietu?

¹⁸ Yehowa mmumanye tshidi tshikengela bua tuetu kuikala ne disanka dilelela. Wewe muenze malu asatu adi afila disanka dilelela aa, neulame disanka diebe nansha mu ntatu. Nunku newambe pebe ne: “Ba diakalenga mbantu badi Yehowa muikale Nzambi wabu!”​—Mis. 144:15.