Eyowa, banjelu babi badiku. Mbafumine kuepi? Vuluka ne: Nzambi uvua mufuke banjelu ne tshipedi tshia kudisunguila malu. Mutantshi mukese bamane kufuka Adama ne Eva, mulume ne mukaji ba kumpala, muanjelu kampanda mupuangane wakenza mudimu bibi ne budikadidi buende bua kudisunguila malu, kujudijaye buntomboji pa buloba. Wakafikisha Adama ne Eva ku ditombokela Nzambi. (Genese 3:1-7; Buakabuluibua 12:9) Bible kena utela dîna dia muanjelu au anyi muanzu uvuaye nawu mu diulu kumpala kua kutombokelaye Nzambi to. Kadi yeye mumane kutombokela Nzambi, Bible udi umubikila mu dîna didi dimuakanyine dia Satana, didi diumvuija “Muluishi,” ne Diabolo, didi diumvuija “Mushiminyinyanganyi wa malu.”​—Matayi 4:8-11.

Diakabi, buntomboji ebu kabuakimanyina apu to. Mu matuku a Noa, banjelu bungi kabuyi bumanyike ‘bakalekela muaba wabu wa kusomba’ mu dîku dia Nzambi dia mu diulu. Bakalua pa buloba, kuvualabu mibidi ya buntu bua kuenza malu mabi a bukoya, balekela tshivuabu babafukile.​—Yuda 6; Genese 6:1-4; 1 Petelo 3:19, 20.

Ntshinyi tshiakafikila banjelu babi abu? Pavua Nzambi mulokeshe mvula wa kabutu pa buloba bujima bua kubukezula, banjelu abu bakalekela mibidi ya buntu, kupinganabu miaba ya mu nyuma. Nzambi kakanyishila banjelu babi abu bua kupingana “muaba wabu wa ku ntuadijilu” to. Kadi wakabapuekesha milongo, kubelaye mu “mîdima mikole” ya mu nyuma itudi tubikila ne: Tartare. (Yuda 6; 2 Petelo 2:4) Bademon aba bakaditeka ku bukokeshi bua Satana Diabolo, “mfumu wa bademon,” udi “udivuija bu muanjelu wa butoke.”​—Matayi 12:24; 2 Kolinto 11:14.

Bible udi ulongesha ne: bakajadika Bukalenge bua Nzambi budi Masiya ulombola, mbuena kuamba ne: mbulamatadi wa mu diulu, mu 1914. * Bobu bamane kubujadika, bakipata Satana ne bademon bende mu diulu ne kubimanshabu pabuipi ne buloba. Malu mabi ne buenzavi bidi biuwule pa buloba lelu bidi bileja tshiji ne buenzeji bubi bidi nabi banjelu aba.​—Buakabuluibua 12:9-12.

Kadi divulangana dia buenzavi ne tshikisu tshikole bidi bileja ne: nshikidilu wa dikokesha diabu dibi ukadi pabuipi. Mu katupa kîpi emu, nebanyenge banjelu babi aba bukole budibu nabu. Padi Bukalenge bua Nzambi bujikija kukokesha munkatshi mua bidimu 1 000 pa buloba bukudimuna mparadizu, nebalekele banjelu babi aba bua tshitupa tshîpi bua batete bantu bua musangu wa ndekelu. Pashishe nebababutule bua kashidi.​—Matayi 25:41; Buakabuluibua 20:1-3, 7-10.