Bikalabi ne: ki nNzambi udi ukebesha makenga, netuambe tshinyi bua dipangila biakudia, bupele budi buenda buvula, mvita ya tshikisu, masama adi enda abudika, ne bikumina? Bible Dîyi dia Nzambi udi uleja malu manene asatu adi akebela bantu makenga:

1. Budinangi, lukuka, ne lukinu. ‘Muntu mmukokeshe muntu mukuabu bua kumukengesha.’ (Muambi 8:9) Bantu batu batamba kukenga bualu batu babakengesha kudi bantu badi bapange bupuangane, badi badinange, anyi badi ne tshikisu.

2. Tshikondo ne malu adi kaayi matekemena. Bantu batu batamba kukenga “bualu tshikondo ne malu adi kaayi matekemena bidi bibafikila.” (Muambi 9:11) Mbuena kuamba ne: badi mua kuikala muaba mubi ne dîba dibi, njiwu itu ibakuata, anyi badi mua kuikala mu kalengu peshi benza bilema.

3. Mukokeshi mubi wa buloba ebu. Bible udi uleja patoke udi utamba kukebela bantu makenga. Udi wamba ne: “Ba pa buloba bonso badi ku bukokeshi bua mubi.” (1 Yone 5:19) “Mubi” au n’Satana Diabolo, muanjelu wa bukole uvua kumpala muanjelu wa Nzambi, kadi “kakimana bikole mu bulelela” to. (Yone 8:44) Banjelu bakuabu bakatua ku tshia Satana, kutombokelabu Nzambi bua kukumbaja majinga abu mabi; ke kudivuijabu bademon. (Genese 6:1-5) Katshia anu Satana ne bademon bende batomboka, mbakebeshe malu mabi a tshikisu pa buloba ebu. Mbatambe kuenza nanku mu tshikondo tshietu etshi. Lelu Diabolo udi ne tshiji tshikole, ne “udi upambuisha ba pa buloba bonso,” ne bualu ebu mbukebeshe “diakabi bua buloba.” (Buakabuluibua 12:9, 12) Bushuwa, Satana mmukokeshi mubi wa tshikisu. Padi bantu bakenga yeye udi usanka. Nunku udi ukengesha bantu n’Satana ki nNzambi to.

ELABI MEJI: Anu muenji wa malu mabi wa kalanda-musenga ne wa muoyo mubi ke udi mua kukengesha bantu badi kabayi ne bualu. Kadi Bible udi wamba ne: “Nzambi udi dinanga.” (1 Yone 4:8) Mu diumvuangana ne bumuntu buende bua dinanga, “kabiena mua kuenzeka bua Nzambi mulelela kuenza malu mabi to, bua Wa Bukole Buonso kuenza bibi nansha!”​—Yobo 34:10.

Kadi udi anu mua kudiebeja ne: ‘Nzambi Wa Bukole Buonso nealekele Satana utungunuka ne bukokeshi buende bua lukinu ebu too ne dîba kayi?’ Anu mutukadi bamone, Nzambi mmukine malu mabi, ne makenga etu atu amusama ku muoyo. Bualu bukuabu, Dîyi diende didi ditusengelela ne: ‘Numupuile ntatu yenu yonso, bualu yeye udi unutabalela.’ (1 Petelo 5:7) Nzambi mmutunange ne udi ne bukole bua kumbusha makenga onso ne malu mabi, anu mutuabimona mu tshiena-bualu tshidi tshilonda. a