“MASHINYI akadi ajuka, kadi nsongalume muena Chine eu udi ushala!” Ke tshivua Alexandra mumvue pavuaye musombe mu mashinyi bindile bua kusabuka mikalu idi pankatshi pa matunga abidi kampanda a Amerike wa ku Sud. Wakatuluka bua kumona tshivua tshienzeka ne kusangana nsongalume muena Chine uvua kayi mumanye tshiena Espange bimpe utata bua kumvuija bantu batu balama mikalu ya ditunga tshilumbu tshiende. Bu mukavua Alexandra mubuele mu tshisumbu tshia Bantemu ba Yehowa mu muakulu wa tshiena Chine, wakamuambuluisha tshianana bua kukudimuna bivuaye wamba.

Kadi nsongalume wakamba ne: mbulamatadi uvua mumuanyishile bua kusomba mu ditunga, kadi bavua bamuibe mikanda yende ne makuta. Mfumu wa balami aba wakanji kubenga tshivuaye ubambila ne wakabanda Alexandra bu mupanyishi wa bantu. Ndekelu wa bionso, wakitaba tshivua nsongalume eu wamba, kadi nsongalume eu uvua ne bua kufuta tshibawu bua muvuaye kayi ne mikanda. Bu muvuaye kayi ne makuta, Alexandra wakamusombesha makuta dolare 20. Nsongalume wakapanga too ne mêyi makumbane a kumuela nawu tuasakidila, kumuambilaye ne: nenkufute makuta a bungi kupita dolare 20. Alexandra wakamuleja ne: kavua ukeba difutu to, kadi uvua ne disanka dia kumuambuluisha bualu uvua mumone ne: ke bualu buimpe buvuaye ne bua kuenza. Wakapesha nsongalume imue mikanda itu yumvuija malu a mu Bible, kumusengelelaye bua kulonga Bible ne Bantemu.

Bidi bienza disanka bua kumvua mudi bantu bapesha benyi bintu. Kakuyi mpata, nansha bantu ba mu bitendelelu bionso ne badi kabayi batendelela batu benza pabu bia muomumue. Uvuaku pebe mua kuitaba bua kudifila bua kuikala ne muoyo wa kupa mu mushindu eu anyi? Lukonko elu ludi ne mushinga bualu Yezu wakamba ne: “Disanka dia kupa ndipite dia kuangata.” (Bienzedi 20:35) Ludi kabidi ne mushiga mu malu a sianse, bualu bakebuludi mbamone ne: kufila nkuimpe buebe wewe. Tumonayi mudibi nanku.

Dimonamona dia malu didi dileja ne: difila ne disanka bitu misangu ya bungi biende pamue. Mupostolo Paulo wakafunda ne: “Nzambi mmunange muntu udi ufila ne disanka.” Uvua wakula bua bena Kristo bavua bafile mapa bua kuambuluisha bena Kristo nabu bavua mu lutatu lua makuta. (2 Kolinto 8:4; 9:7) Paulo kavua wamba ne: bavua bafile bualu bavua ne disanka to. Kadi bavua ne disanka bualu bavua basue kufila.

Bushuwa, bilondeshile dikebulula kampanda, kufila “kudi kusaka bitupa bia buongo bia muntu, bimupetesha disanka, ufika ku disomba bimpe ne bantu, ku dimueyemena ne ku ‘didiumvua bimpe.’” Dikebulula dikuabu diakaleja ne: “Kupesha muntu makuta kudi kupetesha baafidi disanka dia bungi kupita padibu baatula bua malu abu nkayabu.”

Ukadiku mudiumvue ne: bua nsombelu uudi nende kuena ne tshiudi mua kuenza anyi? Bulelela budi ne: muntu yonso udi mua kupeta disanka dia kuikala “muntu udi ufila ne disanka.” Padi muntu ufila ne meji mimpe,  bungi bua makuta kabuena ne bualu to. Ntemu wa Yehowa kampanda wakatumina mupatudi wa tshibejibeji etshi mukenji ne dipa diende dia budisuile, wamba ne: “Bidimu bionso ebi ndi mupete anu mushindu wa kufila makuta makese amvua nawu ku Nzubu wa Bukalenge.” Kadi udi utunguka wamba ne: “Yehowa Nzambi mmupingajile bia bungi kupita bimvua mufile. Tuasakidila bua muuvua muenze bua mfile dipa edi, mbinkoleshe bikole.”

Bushuwa kufila kakuena kumvuija anu kufila makuta to. Kudi mishindu mikuabu ya bungi ya kufila.

Bible udi wamba ne: ‘Muena luse udi wenzela muoyo wende bimpe, kadi muena tshikisu udi ukengesha mubidi wende.’ (Nsumuinu 11:17) Bantu bimpe batu ne muoyo wa kupa, batu bitaba bua kufila ku budisuile, tuambe ne: dîba diabu, makanda abu, ntema yabu ne bikuabu. Kuenza nunku kudi kubapetesha masanka mu mishindu mishilashilangane, kudi kubambuluisha kabidi bua kuikala ne makanda a mubidi mimpe.

Makebulula adibu benze adi aleja ne: bantu badi badifila bua kuambuluisha bakuabu, mubidi wabu kawutu usamakanangana to, ne batu ne tunyinganyinga tukese. Kadi batu nangananga ne makanda a mubidi mimpe. Bantu batu ne muoyo wa kupa batu bakaja makanda a mubidi a bamue bantu batu ne masama a munanunanu bu mudi disama dibi dia mu buongo ditu dienda ditekesha mubidi (sclérose en plaques) ne dia Sida. Adi aleja kabidi ne: bantu batu bambuluisha bakuabu bua kulekela kunua maluvu batu ne tunyinganyinga tukese ne badi mua kuakaja bikadilu biabu bua kabaanu kabidi.

Bua bualu abu, bakaleja ne: “Kumvuilangana luse, kuenzelangana malu tshianana ne kuikala ne bulenga kakutu kuenza bua muntu atambe kudiumvua bibi mu meji ende to.” Padi muntu ufila, udi ne tunyinganyinga tukese ne udi ne luendu luimpe lua mashi. Bua bantu bavua bafuishe muena dibaka nabu, tunyinganyinga tuabu tuakajika diakamue pakalombabu diambuluisha kudi bantu bakuabu.

Katuena mua kuelesha mpata to. Kufila kudi kuenza bua udiumvue bimpe.

Yezu wakambila bayidi bende ne: “Ikalayi nupesha bantu bintu, nebanupeshe penu. Nebanuelele mu tshibombi tshienu bintu bipima ne tshipiminu tshimpe, tshishindika, tshinyukula, tshiuwuja tente biyila ne panshi. Bualu nebanupimine ne tshipiminu tshinudi nupimina natshi bakuabu.” (Luka 6:38) Paudi upa, bantu bakuabu nebakuleje pamuapa dianyisha bua muoyo webe wa kupa, ne nebakuidikije. Nunku kupa kudi kukolesha bulunda ne dieleshangana diboko.

Bakebuludi badi balonge malu adi atangila Malanda adi pankatshi pa bantu mbamone ne: “bantu batu misangu yonso ne muoyo wa kupa batu bakankamija bakuabu bua kuenza bia muomumue.” Bushuwa, “kubala patupu malu a dikema a mudi bantu balengejangana bulenga kudi kuenza bua bakuabu bikale ne muoyo wa kupa.” Bilondeshile dikebulula kampanda, “muntu yonso udi usomba ne bakuabu udi mua kuikala ne buenzeji kudi bantu ba bungi anyi nkama ya bungi batuye kayi mumanye anyi mutuilangane nabu.” Mmumue ne: tshienzedi tshimue tshia dipeshangana bintu tshidi mua kutuadija kusaka muntu ne muntu,  bienza bua bantu bonso batuadije kuenza bia muomumue. Kuenaku musue kusomba muaba udi bantu ba nunku anyi? Eyowa, bantu ba bungi bobu bapangana bintu, nekuikale masanka a bungi.

Kudi bualu bua mu Floride, mu Amerike budi buleja ne: kupa kudi kupetesha masanka. Kasumbu kampanda ka Bantemu ba Yehowa kakadifila bua kuenza mudimu wa kuambuluishangana pavua tshipepele tshikole tshinyange nzubu ya bantu. Pavuabu bindile bintu bia kulongolola nabi nzubu uvuabu baluile, bakamona ne: tshimanu tshia lupangu lua bena mutumba tshivua tshinyanguke, kubalombabu bua kubalongoluelatshi. Muena mutumba au wakafundila biro binene bia Bantemu ba Yehowa matuku makese pashishe ne: “Ndi ne dianyisha kadiyi ndekelu bua mundi mumone bantu aba bikale bantu bimpe bantu tshiyi muanji kumona.” Dianyisha divuaye nadi diakamusaka bua kufila ne muoyo mujima dipa bua benze nadi mudimu wa tshivuaye ubikila ne: mudimu wa pa buawu wa Bantemu.

Bualu bua dikema budibu bapete kudi bena sianse budi ne: “Kudi dijinga dikole dia kuambuluisha bantu bakuabu.” Dilonga kampanda didi diamba ne: “bana batu bapeshangana bintu nansha kumpala kua bobu kumanya kuakula.” Bua tshinyi? Bible udi wandamuna padiye wamba ne: bantu bavua bafukibue ‘mu tshimfuanyi tshia Nzambi,’ mmumue ne: bikale ne ngikadilu minene ya buena ya Nzambi.​—Genese 1:27.

Mu ngikadilu mimpe ya Mufuki wetu Yehowa Nzambi mudi ngikadilu wa muoyo wa kupa. Mmutupeshe muoyo ne bintu bionso bitudi nabi dijinga bua tuikale ne disanka. (Bienzedi 14:17; 17:26-28) Tudi mua kumanya bimpe Tatu wetu wa mu diulu ne malu adiye mutulongoluele patudi tulonga Bible, Dîyi diende. Mukanda au udi kabidi uleja ne: Nzambi wakafila Muanende bua tupete nsombelu wa disanka kumpala eku. * (1 Yone 4:9, 10) Bu mudi Yehowa Nzambi muikale muena muoyo wa kupa ne mukufuke mu tshimfuanyi tshiende, katuena ne bua kukema bua mudi kufila, mu didikija Nzambi kuikale kuimpe buebe wewe ne kuenza bua akuanyishe to.​—Ebelu 13:16.

Udi muvuluke tshilejilu tshia Alexandra utudi batele ku ntuadijilu anyi? Tshilumbu tshiende tshiakapita bishi? Nansha muvua muntu uvuabu nende mu mashinyi mumuambe ne: mmunyange makuta ende, nsongalume uvuaye muambuluishe wakaya kukuatshila balunda bende mu tshimenga kampanda muvua mashinyi mimanyine, ne bobu kupingajilabu diakamue Alexandra dolare yende 20. Bualu bukuabu, nsongalume wakalonda anu tshivua Alexandra mumulombe, kutuadijaye kulonga Bible. Wakasanka bikole pakaluaye kutuilangana nende kabidi ngondo isatu pashishe mu mpungilu wa Bantemu ba Yehowa uvua wenzeka mu muakulu wa tshiena Chine mu Pérou. Bua kuleja dianyisha diende bua bionso bivua Alexandra mumuenzele, nsongalume wakamubikidisha yeye ne bantu bakuabu bavuabu balue nabu mu mpungilu mu restoran wende.

Kufila ne kuambuluisha bantu kudi kupetesha disanka dia bungi. Kudi mene kupetesha masanka a bungi paudi wambuluisha bakuabu bua kumanyabu bimpe kudi mapa onso mimpe afumina, mmumue ne: kudi Yehowa Nzambi! (Yakobo 1:17) Udiku mupete masanka a difila anyi?