Bible ki mmukanda wa malu a luondapu to. Kadi udi ufila mibelu idi mua kuambuluisha muntu udi ukenga ne disama dia mutu. Mona imue ya ku mibelu ayi.

“Bantu badi ne makanda a mubidi kabatu dijinga ne munganga to, kadi badi basama ke batu nende dijinga.”—MATAYI 9:12.

Bible udi ujadika ne: misangu mikuabu bitu bikengela bua batuondope. Padi bantu ba bungi bapeta miaba mijalame idibu bamanyina tshia kuenza bua masama abu a mitu ne bamonangana ne badoktere bapiluke, badi bumvua disulakana.

“Dibidija dia mubidi didi dikuatshisha.”—1 TIMOTE 4:8, Muanda Mulenga Lelu.

Kuenza bidi bikengedibua bua kulama makanda ebe a mubidi kudi mua kukuambuluisha bua kumvuaku bimpe paudi ne disama dia mutu. Mu biobi abi mudi kuikala ne tshibidilu tshia kuibidija mubidi, kuikala ne ndiilu muimpe, ne kulala bikole.

“Muoyo wa disanka udi buanga buimpe, kadi lungenyi ludi lushikile ludi lumana bukole bua muntu.”—NSUMUINU 17:22.

Udi mua kupeta disanka wewe ubala mvese ya mu Bible idi ikankamija ne wewe mudifundile bipitshila biudi mua kukokesha bua kukumbaja.  Bidi mua kukuambuluisha kabidi wewe mutume meji anu ku malu mimpe ne mushale mutekemena anu ne: dimue dituku disama diebe nedijike.

“Meji adi kudi bapuekele.”—NSUMUINU 11:2.

Udi mua kumona ne: kuakukokesha bua kuenza malu onso auvua mua kudienzela nkayebe to, nunku itaba ne budisuile buonso bua bakuambuluisha. Balunda bebe ne bena mu dîku dienu badi mua kuikala basue kukuambuluisha, kadi bapange mudibu mua kuenza nanku. Bambila tshidibu mua kuenza menemene bua kukuambuluisha. Kutekemenyi bua bakuenzela bia bungi bipitshidile, ne ikala ubela tuasakidila bua bionso bidibu bakuenzela.

“Mvua ngumvua anu bu ne: tshivua bimpe to, ke meme kuya kumonangana ne doktere. Wakajingulula lutatu lumvua nalu. Biobi kungambuluisha bua kumanya tshivua tshintatshisha menemene ne ngondapilu ivuaku ivua mua kungambuluisha bua kumvua bimpe.”—Nicole a udi ne disama dia mutu.

“Ndi mulue kumona ne: pa tshibidilu meme ne mukajanyi patutu tubala Bible pamue, bitu bingambuluisha bua kutuadija dituku ne ngenyi idi ikolesha ne kutuma meji anu ku malu mimpe. Ne misangu yonso matuku atu disama dianyi dintshiokesha bikole, kutu anu mvese kampanda musunguluke utu usamba.”—Peter udi ne disama dia kabungama.

“Bivua bikole bua meme kuambila bantu bakuabu disama dimvua nadi bualu mvua muntu wa bundu bua bungi. Kadi mulunda wanyi mukuabu wa pa muoyo wakanteleja bimpe, kudienzejaye bua kumvua muvua munda muanyi. Uvua bushuwa mungambuluishe bua meme kudiumvua bimpe ne kubenga kudimona nkaya.”—Ji-yoo udi utata ne disama dia ndilu mubi.

“Bible mungambuluishe bua kuikala ne nkatshinkatshi, ndala bikole, tshiyi ngenza mudimu mpitshisha ne pa mukenji to. Meji adimu mangambuluishe bua kupita bimpe ne malu adi ansamisha mutu.”—Timothy udi ukenga ne disama didi dimupangisha mua kudikanda.