Wewe musue kumanya muntu bimpe, mbimpe kumanya malu akadiye muenze ne ntatu ikadiye mutantamene. Bia muomumue, wewe musue kumanya Nzambi bimpe, mbimpe umanye malu akadiye muenze. Paudi wenda uamanya, udi mua kukema bua kumona mudi malu a bungi avuaye muenze ku kale atuambuluisha lelu ne muikalawu mua kutuambuluisha mu matuku atshilualua.

Yehowa Nzambi ke Mufuki Munene, ne “ngikadilu yende idi kayiyi imueneka idi imueneka bimpe katshia buloba buafukibua, bualu badi bayijinguluila ku bintu bidi bifukibue.” (Lomo 1:20) “Yeye udi Mufuki wa buloba ku bukole buende, Yeye uvua mujadike buloba budi bumenesha bintu ku meji ende ne uvua mubalule diulu ku lungenyi luende.” (Yelemiya 10:12) Bintu bia dikema bidi Nzambi mufuke bidi kabidi bileja mudiye ututabalela.

Ela meji bua mudi Yehowa muenze bua muoyo wetu wikale tshintu tshia pa buatshi bualu mmutufuke “mu tshimfuanyi tshiende.” (Genese 1:27) Bidi biumvuija ne: wakenza bua tuikale tuleja ngikadilu yende mimpe mu mushindu mushadile. Wakatufuka ne dijinga dia kumanya malu ende, mmumue ne: bukole bua kumona malu mudiye uamona ne kumvua mikenji yende. Patudi tudienzeja bua kulonda malu aa, tudi tupeta disanka dia bungi ne nsombelu muimpe. Bualu bua mushinga kupita bionso, mmutupeteshe mushindu wa kudia nende bulunda.

Buloba budi bujadika mudi Nzambi ututabalela. Mupostolo Paulo wakamba muvua Nzambi ‘kayi mudishiye kakuyi tshijadiki bu muvuaye muenze malu mimpe, utulokeshila mvula ya mu diulu, utupesha mivu ya biakudia, utukutshisha ne biakudia ne uwuja mioyo yetu ne disanka.’ (Bienzedi 14:17) Nzambi mmutupeshe bintu bia bungi kupita too ne bitudi nabi dijinga bua kuikala ne muoyo. Mmutupeshe bintu bia bungi menemene bia mishindu mishilashilangane bua tuikale ne disanka. Kadi Nzambi uvua mutulongoluele bintu bia bungi menemene kupita.

 Yehowa wakafuka buloba bua bantu basombelapu bua kashidi. Bible udi wamba ne: “Buloba mmubupeshe bana ba bantu,” ne kavua “mubufuke anu bua tshianana, kadi uvua mubuenze bua bantu basombelapu.” (Misambu 115:16; Yeshaya 45:18) Mbantu ba mushindu kayi basombelapu ne mbua tshikondo bule kayi? Bible udi wamba ne: “Bantu bakane nebapiane buloba, nebasombapu bua kashidi.”—Misambu 37:29.

Mu diumvuangana ne bualu ebu, Yehowa wakafuka Adama ne Eva, mulume ne mukaji ba kumpala, kubatekaye mu mparadizu pa buloba ‘bua kumudima ne bua kumulama.’ (Genese 2:8, 15) Nzambi wakabapesha mudimu udi usankisha wa kuenza mu bitupa bibidi eu: “Nulelangane, nuvulangane, nuwuje buloba tente, nubukokeshe.” (Genese 1:28) Nunku Adama ne Eva bavua ne mushindu wa kushala ne muoyo kashidi pa buloba. Kadi diakabi, bakasungula bua kubenga kutumikila Nzambi, kujimijabu diakalenga dia kuikalabu munkatshi mua ‘bantu bakane bapiana buloba.’ Nansha nanku tshivuabu benze atshi katshivua tshishintulule malu akavua Yehowa mutulongoluele anyi mulongolole bua buloba, anu mutuabimona. Kadi tuanji tukonkonone bualu bukuabu bukadi Nzambi muenze.

Badi kabidi babikila Bible ne: Dîyi dia Nzambi. Bua tshinyi Yehowa mmutupeshe Bible? Mmutupeshayi nangananga bua tumanye malu ende. (Nsumuinu 2:1-5) Bushuwa, Bible kena wandamuna nkonko yonso itudi mua kudiela bua Nzambi, ne kakuena mukanda mukuabu udi mua kuyandamuna to. (Muambi 3:11) Nansha nanku bualu buonso budi mu Bible budi butuambuluisha bua kufika ku dimanya Nzambi. Tudi tumumanya ku malu adiye wenzela bantu. Tudi tumanya bantu badiye munange ne badiye kayi munange. (Misambu 15:1-5) Tudi tumanya mudiye musue bua tumutendelele, bikadilu bidiye ujinga bua tuikale nabi, ne mutudi ne bua kumona bintu bia ku mubidi. Bible udi utuleja kabidi tshidi Yehowa menemene ku diambuluisha dia malu avua Muanende Yezu Kristo muambe ne muenze.—Yone 14:9.

Bualu bukuabu, Yehowa mmutupeshe Bible, Dîyi diende, bua tumanye tshia kuenza bua kuikala ne nsombelu wa disanka udi ne tshipatshila. Yehowa udi utuleja mu Bible tshia kuenza bua kuikala ne disanka mu dîku, bua kusanka ne bitudi nabi, ne bua kupita bimpe ne kanyinganyinga. Anu mudibu bumvuije mu tshiena-bualu tshikuabu mu tshibejibeji etshi, Bible udi wandamuna nkonko minene ya mushinga bu mudi: Bua tshinyi kudi makenga a bungi nunku? Mmalu kayi adi matuindile kumpala eku? Bible udi kabidi umvuija malu adi Nzambi muenze bua kukumbaja tshivuaye mulongolole ku ntuadijilu.

Kudi malu makuabu a bungi adi aleja mudi Bible mukanda wa pa buawu menemene udi ufumina kudi Nzambi. Bavua bamufunde munkatshi mua bidimu bipite pa 1600 kudi bantu batue ku 40. Kadi malu onso adimu adi anyungulukila anu ku bualu bunene bumue, bualu Nzambi ke muenaye mulelela. (2 Timote 3:16) Bishilangane ne mikanda mikuabu ya kale, mbatentule Bible ne bujalame buonso munkatshi mua bidimu ne bidimu, anu mudi mikanda ya kale ya Bible mifunda ku tshianza ya bungi ijadika. Bualu bukuabu, Bible udi anuku nansha muvua baluishi bende benze ne muabu muonso bua kabamukudimunyi, kabamupetshi kudi bantu ba bungi, ne kabamubadi to. Lelu Bible ke mukanda udi mu bantu wa bungi ne ke udibu batamba kukudimuna. Bu mudi Bible mutungunuke ne kuikalaku, ntshijadiki dia ne: “Dîyi dia Nzambi wetu didi dishala kashidi.”—Yeshaya 40:8.

Bualu bukuabu bukadi Nzambi muenze mbualu bua pa buabu budi butujadikila ne: neakumbaje malu adiye mutulongoluele. Anu mutukadi bamone, Nzambi uvua musue bua bantu basombe pa buloba bua kashidi. Kadi pavua Adama mubenge kumutumikila ku bukole, muenze mpekatu, wakajimija mpunga wa yeye ne ndelanganyi yende kupetabu muoyo wa tshiendelele. Bible udi wamba ne: ‘Mpekatu wakabuela mu ba pa buloba kupitshila kudi muntu umue, ne lufu luakabuela bua mpekatu, ne mushindu eu lufu luakatampakana kudi bantu bonso bua muvuabu bonso benze mpekatu.’ (Lomo 5:12) Pavua Adama muenze mpekatu, bivua bimueneke bu ne: malu avua Nzambi mulongolole bua buloba kaavua mua kukumbana to. Yehowa wakenza tshinyi?

Yehowa wakenza malu avua apetangana ne ngikadilu yende. Wakalumbuluisha Adama ne Eva ne buakane buonso bua tshivuabu benze, kadi kulongoluelaye bana babu malu ne dinanga dionso. Yehowa wakapangadija bua kupita ne tshilumbu etshi ne meji onso, kulejaye diakamue muvuaye mua kutshijikija. (Genese 3:15)  Wakalongolola bua kumbusha bantu ku mpekatu ne lufu ku butuangaji bua Muanende Yezu Kristo. Bivua bikengela tshinyi?

Bua kupikula bantu ku malu avua buntomboji bua Adama bukebeshe, Yehowa wakatuma Yezu pa buloba bua kuleja bantu njila udi ufikisha bantu ku muoyo ne “kufila muoyo wende bu tshia kupikulangana natshi pa muaba wa bantu ba bungi.” a (Matayi 20:28; Yone 14:6) Yezu wakafila tshia kupikulangana natshi bualu uvua muntu mupuangane anu bu Adama. Kadi Yezu mmushilangane ne Adama bualu yeye wakashala utumikila Nzambi mu mushindu mupuangane too ne ku lufu. Bu muvua Yezu kayi mukumbanyine lufu, Yehowa wakamubisha, kumupeshilulaye muoyo mu diulu. Nunku Yezu uvua mua kuenza tshivua Adama mupangile bua kuenza, mmumue ne: kupetesha bantu badi batumikila Nzambi ditekemena dia kuikala ne muoyo wa kashidi. “Bualu anu bu muvua ba bungi bavuijibue bena mpekatu ku dibenga kutumikila dia muntu umue au, bia muomumue kabidi, ba bungi nebavuijibue bakane ku ditumikila dia muntu umue eu.” (Lomo 5:19) Ku diambuluisha dia mulambu udi upikula wa Yezu eu, Nzambi neakumbaje mulayi wende wa kupesha bantu muoyo wa tshiendelele pa buloba.

Tudi tumanya malu a bungi a Yehowa ku mushindu uvuaye mupite ne tshilumbu tshia dibenga kutumikila dia Adama. Tudi tumona ne: kakuena bualu nansha bumue budi mua kupangisha Yehowa bua kujikija malu avuaye mutuadije; dîyi diende ‘nedikumbane bushuwa.’ (Yeshaya 55:11) Tudi kabidi tumanya mudi Yehowa mutunange bikole menemene. “Mu bualu ebu dinanga dia Nzambi diakamueneshibua bua bualu buetu, ne: Nzambi wakatuma Muanende mulela umuepele pa buloba bua tupete muoyo ku butuangaji buende. Dinanga didi dimuenekela mu bualu ebu, ki mbua ne: tuetu tuvua banange Nzambi to, kadi nne: yeye wakatunanga, kutumaye Muanende bu mulambu wa kulengejangana nawu ne Nzambi bua mpekatu yetu.”—1 Yone 4:9, 10.

Nzambi ‘kavua nansha muepule Muanende ku makenga, kadi wakamufila buetu tuetu bonso,’ ke bualu kayi tudi batuishibue ne: Nzambi ‘neatupeshe bintu bikuabu bionso’ bidiye mulaye. (Lomo 8:32) Mmalu kayi adi Nzambi mulaye bua kutuenzela? Tudi tukulomba bua ubale bidi bilonda.