Badi mua kutuenzela malu ne kansungansunga kudi bantu ba mu ditunga dikuabu, ba tshisa tshikuabu, ba dikoba dikuabu nansha ba muakulu mukuabu; badi mua kutuelela meji mabi nansha kudi bantu badi kabayi ba mu tshitendelelu tshietu, badi kabayi balume anyi bakaji bu tuetu, anyi mene badi kabayi ba tshipidi tshietu. Kudi bantu badi bamona bakuabu bibi anu bua bukole budibu, bua tulasa tudibu balonge, bua bulema buabu anyi bua tshimuenekelu tshiabu. Kadi badi mua kuikala bamba ne: kabatu ne kansungansunga to.

Wewe pebe udi mua kuikala ne kansungansunga anyi? Tutu tutamba kumona kansungansunga anu mu malu adi bakuabu benza. Kadi bidi mua kutukolela bua kumona ne: tudi petu naku. Tshia kumanya ntshia ne: tuetu bonso, bakadi anu batuenzele malu ne kansungansunga mu mushindu kampanda. Mulongeshi mukuabu wa malu a nsombelu wa bantu diende David Williams udi wamba ne: “Bantu bobu bamona bantu ba tshisumbu kampanda bibi ne pashishe balue kutuilangana ne umue wa kudibu, nebamuenzele malu mushindu mukuabu, kabayi nansha bamanya ne: mbenze malu mushindu au to.”

Tshilejilu, mu ditunga dia Balkan mudi Jovica musombele, mudi amu kasumbu kakese ka bantu. Udi wamba ne: “Mvua ngela meji ne: mu kasumbu aku kamuvua muntu muimpe nansha umue to. Kadi tshivua mmona ne: mvua mbelela meji mabi to. Meme kudiambila ne: ‘Nansha nanku, kakuena anu bualu to!’”

Mbulamatadi ya bungi itu yela mikenji bua kuluisha ditapulula dia makoba, ne mishindu mikuabu ya kansungansunga. Nansha nanku, kansungansunga kadi anu koku. Bua tshinyi? Bualu mikenji ayi idi itangila anu malu adi bantu benza, kadi kayitu ikenketa kabidi meji adi bantu bela ne mudibu bumvua nansha. Kadi kansungansunga katu katuadijila mu meji ne mu muoyo wa muntu. Nanku bidibu benza abi bidi biya mu mâyi anyi? Kudiku buanga budi mua kujikija kansungansunga anyi?