1-2. Ntshinyi tshivua Yakoba muenze pakavuaye mikolo ku tshina? Bua tshinyi? (Tangila kabidi tshimfuanyi.)

 PAKAVUA Yakoba mukulakaje bikole, wakumbuka mu Kanâna, kuyaye kusombela ne dîku diende mu Ejipitu muvuaye mutungunuke ne kuenzela Yehowa mudimu ne lulamatu munkatshi mua bidimu 17. (Gen. 47:28) Wakasanka bikole pakamonaye kabidi muanende Jozefe, umona dîku diende dijima dituilangane. Kadi uvua mumanye ne: ukavua pa kufua. Ke yeye kubikila bana bende bonso bua kuyukila nabu.​—Gen. 49:28.

² Tshikondo atshi, tatu wa dîku yeye ukeba kufua, uvua ubikila ba mu nzubu muende bua kubambila malu avuabu ne bua kushala kuenza. (Yesh. 38:1) Dîba adi ke divuaye pamuapa ubaleja muntu uvua ne bua kushala kulombola dîku.

3. Bilondeshile Genese 49:1, 2, bua tshinyi mêyi avua Yakoba muambe adi ne mushinga wa bungi?

³ Bala Genese 49:1, 2. Malu avua Yakoba muambe avua a pa buawu. Uvua muakule bua malu avua ne bua kulua kuenzeka. Yehowa uvua mumusake ku bukole bua nyuma wende bua kuambila bana bende malu a mushinga avua ne bua kubafikila, bobu ne ndelanganyi yabu, matuku atshivua alua. Ke bualu kayi batu bamba ne: mêyi a Yakoba avua mêyi a buprofete.

4. Ntshinyi tshituamona mu tshiena-bualu etshi? (Tangila kabidi kazubu ka “Dîku dia Yakoba.”)

 ⁴ Mu tshiena-bualu etshi, netuakule bua malu avua Yakoba muambile bana bende ba balume banayi aba: Lubena, Simeona, Lewi, ne Yuda. Mu tshialonda, netuakule bua malu avuaye muambile bana bende bakuabu ba balume muanda mukulu. Netumone ne: mêyi a Yakoba au kaavua atangila anu bana bende nkayabu to, avua atangila kabidi ndelanganyi yabu ivua ne bua kulua tshisamba tshia Isalele. Tuetu bakonkonone tshivua tshifikile tshisamba atshi, netumone ne: malu onso avua Yakoba muambe avua makumbane. Tuetu bakonkonone kabidi mêyi enda au, netupete malongesha a mushinga mukole atuambuluisha bua kusankisha Tatu wetu wa mu diulu, Yehowa.

LUBENA

5. Ndibenesha kayi divua Lubena mutekemene bua kupeta kudi tatuende?

⁵ Yakoba wakatuadija ne Lubena, kumuambilaye ne: “Wewe udi muananyi muanabute.” (Gen. 49:3) Bu muvua Lubena muanabute,  pamuapa uvua mutekemene bua tatuende amupeshe yeye bintu bia bungi bipite bia bana babu bakuabu. Pamuapa uvua kabidi mutekemene bua tatuende amuteke mulombodi wa dîku diabu, anyi bua bashale balombola dîku diabu adi anu kudi muntu wa mu ndelanganyi yende yeye.

6. Bua tshinyi Lubena kakapeta bumpianyi bua buanabute? (Genese 49:3, 4)

⁶ Kadi Lubena kakapeta bumpianyi bua buanabute to. (1 Kul. 5:1) Bua tshinyi? Kukavua bidimu ndambu bivuaye mulale ne Bileha, mukaji uvua tatuende Yakoba mubanjije. Bileha uvua muena mudimu wa Lakele. Lakele uvua mukaji uvua Yakoba munange bikole, kadi ukavua mufue. (Gen. 35:19, 22) Lubena uvua muana wa mukaji mukuabu wa Yakoba, diende divua Lea. Pamuapa Lubena uvua mulale ne Bileha bualu uvua mumusamine muoyo anyi bualu uvua musue kumupangisha bua kuangata muaba uvua nawu mamuende mu muoyo wa Yakoba. Nansha biobi nanku anyi kabiyi nanku, tshivuaye muenze atshi tshiakayingalaja Yehowa ne tatuende.​—Bala Genese 49:3, 4.

7. Ntshinyi tshiakafikila Lubena ne ndelanganyi yende (Tangila kabidi kazubu ka “ Mêyi a buprofete a Yakoba pakavuaye mikolo ku tshina.”)

⁷ Yakoba wakambila Lubena ne: “Kuakupita bana benu to.” Mêyi aa akakumbana, bualu bilondeshile Bible, kakuena muntu nansha umue wa mu ndelanganyi ya Lubena uvua mulue mukalenge, muakuidi anyi muprofete to. Nansha nanku Yakoba wakapesha Lubena bumpianyi, ne dîku diende diakalua tshimue tshia ku bisa bia Isalele. (Yosh. 12:6) Kuvua misangu ivua Lubena muleje ngikadilu mimpe, ne bidi bimueneka ne: kakenda kabidi masandi musangu nansha umue to.​—Gen. 37:20-22; 42:37.

8. Tshilejilu tshia Lubena tshidi tshitulongesha tshinyi?

⁸ Dilongesha: Tudi ne bua kudienzeja bikole bua kuikala ne didikanda ne bua kubenga kuenda masandi. Tuetu bamone ne: tudi tusua kuenza mpekatu, mbimpe tuele meji a mudi malu atuenza mua kunyingalaja Yehowa, bena mu dîku dietu, ne bantu bakuabu. Mbimpe tuvuluke kabidi ne: “Tshionso tshidi muntu ukuna, ke tshiapuolaye kabidi.” (Gal. 6:7) Kadi tshiakenzekela Lubena tshidi tshituvuluija mudi Yehowa ne luse. Nansha mutuikala anu mua kukenga bua bilema bitudi benze, tuetu banyingalale ne badienzeje bua kuenza malu mimpe, Yehowa neatufuile luse ne neatubeneshe.

SIMEONA NE LEWI

9. Bua tshinyi Yakoba kakanyisha Simeona ne Lewi? (Genese 49:5-7)

⁹ Bala Genese 49:5-7. Pashishe Yakoba wakabanga kuyukila ne Simeona ne Lewi. Kadi malu akambaye akaleja ne: bavua bamunyingalaje. Kukavua kupite bidimu ndambu bivua Shekeme muena Kanâna, mulale ne Dina, muana wa bakaji wa Yakoba, ku bukole. Tudi tumvua bua tshinyi bana ba balume ba Yakoba bonso bavua bafiike munda bua bualu abu, kadi Simeona ne Lewi kabakakanda tshiji tshiabu to. Bakashima Shekeme ne bantu bende bonso ne: bua bobu kusomba nabu mu ditalala, bivua bikengela batengudibue. Bakitaba, bobu kutengudibua. Anu patshivuabu ne mputa ya ditengudibua ayi ibasama, Simeona ne Lewi “bakangata miele yabu ya mvita, kuyabu mu tshimenga muvua bantu kabayi batekemene bualu, kushipabu bantu balume bonso.”​—Gen. 34:25-29.

10. Mmunyi muvua mêyi a buprofete avua Yakoba muambe bua Simeona ne Lewi makumbane? (Tangila kabidi kazubu ka “ Mêyi a buprofete a Yakoba pakavuaye mikolo ku tshina.”)

¹⁰ Yakoba wakumvua bibi menemene bua muvua bana bende babidi abu bashipe bantu bapite bungi. Wakamba ne: bavua ne bua kubatangalaja ne kubamuangalaja mu Isalele. Mêyi  a buprofete au akalua kukumbana panyima pa bidimu bipite pa 200 pavua tshisamba tshia Isalele tshibuele mu Buloba bulaya. Tshisa tshia Simeona tshiakapeta atshi maloba a bumpianyi mu tshitupa tshia buloba tshia tshisa tshia Yuda. (Yosh. 19:1) Tshisa tshia Lewi tshiakapeta bimenga 48 mu Isalele mujima.​—Yosh. 21:41.

11. Tshisa tshia Simeona ne tshia Lewi bivua bienze malu mimpe kayi?

¹¹ Ndelanganyi ya Simeona ne ya Lewi kayakenza bilema bia muomumue ne bia bankambua babu to. Bena mu tshisa tshia Lewi ba bungi bavua balamate ntendelelu mukezuke bikole. Dîba divua Yehowa upesha Mose Mikenji ku mukuna wa Sinai, bena Isalele ba bungi bavua bashale batendelela lupingu lua kana ka ngombe. Kadi bena Lewi bobu bakambuluisha Mose bua kubutula bonso bavua batendelela lupingu alu. (Ekes. 32:26-29) Yehowa wakateka tshisa tshia Lewi bua tshishale tshisa tshia bakuidi mu Isalele. (Ekes. 40:12-15; Nom. 3:11, 12) Pashishe, tshisa tshia Simeona tshiakambuluisha tshia Yuda bua kuluisha bena Kanâna bua kubanyenga bitupa bia maloba bivuabu babapeshe mu Buloba bulaya.​—Bal. 1:3, 17.

12. Tshilejilu tshia Simeona ne tshia Lewi bidi bitulongesha tshinyi?

¹² Dilongesha: Kuangatshi mapangadika anyi kuenji malu mu tshiji to. Bobu bakuenzele wewe anyi muntu uudi munange bualu bubi, bidi anu mua kukufiikisha munda. (Mis. 4:4) Kadi mbimpe tuvuluke ne: tuetu bapingajilangane bubi ku bubi, Yehowa kakusanka to. (Yak. 1:20) Padibu batuenzela bibi kudi muntu, nansha yeye Ntemu anyi kayi Ntemu, mbimpe tuenze malu mudi Yehowa musue. Dîba adi katuakuandamuna bakuabu bibi anyi kubenzela petu bibi to. (Lomo 12:17, 19; 1 Pet. 3:9) Nansha baledi bebe benza malu adi anyingalaja Yehowa, manya ne: kuena muenzejibue bua kubidikija to. Kuambi ne: kuakukumbana bua kusankisha Yehowa to. Neakuambuluishe bua kuenza malu makane ne neakubeneshe bua bualu abu.

YUDA

13. Bua tshinyi bivua mua kuikala bisamishe Yuda mutu pakakumbana dîba dia tatuende kuyukila nende?

¹³ Yuda uvua muntu muinayi uvua tatuende muyukile nende. Yeye mumane kumvua mêyi avua tatuende muambile batutuende, pamuapa biakamusamisha mutu. Uvua pende muenze bilema binene. Bidi bimueneka ne: uvua pende mupawule tshimenga tshia Shekeme. (Gen. 34:27) Uvua mudisange kudi bana babu bua kupanyisha Jozefe bu mupika ne kushima tatuabu bua bualu abu. (Gen. 37:31-33) Pashishe wakenda masandi ne Tamâ, mukaji wa muanende uvuaye umona bu ndumba.​—Gen. 38:15-18.

14. Mmalu kayi mimpe avua Yuda muenze? (Gen. 49:8, 9)

¹⁴ Yakoba wakatumbisha Yuda, kumulayaye ne: yeye ne ba mu dîku diende bavua ne bua kupeta malu mimpe. (Bala Genese 49:8, 9.) Yuda wakaleja muvuaye uditatshisha bikole bua tatuende ukavua mukulakaje. Wakaditeka kabidi pa muaba wa Benyamina, muanabu wa mukala.​—Gen. 44:18, 30-34.

15. Mmushindu kayi uvuabu babeneshe Yuda?

¹⁵ Yakoba wakamba ne: Yuda ke uvua ne bua kulua mulombodi wa bana babu. Kadi dîyi edi diakakumbana panyima pa bidimu bitue ku 200. Pavua bena Isalele bumbuke mu Ejipitu, bapitshila mu tshipela batangile mu Buloba bulaya, tshisa tshia Yuda ke tshivua kumpala kua mulongo. (Nom. 10:14) Bidimu bia bungi pashishe, tshisa tshia Yuda ke tshiakaya tshia kumpala bua kuluisha bena Kanâna bua kunyenga Buloba bulaya. (Bal. 1:1, 2) Davidi ke mukalenge wa kumpala mu bakalenge ba bungi bavua bapatukile mu tshisa tshia Yuda. Kadi dîyi dia  buprofete adi ndikumbane mu mishindu mikuabu.

16. Dîyi dia buprofete didi mu Genese 49:10 diakakumbana mushindu kayi? (Tangila kabidi kazubu ka “ Mêyi a buprofete a Yakoba pakavuaye mikolo ku tshina.”)

¹⁶ Yakoba wakaleja ne: Mukokeshi wa bukua bantu uvua ne bua kupatukila mu ndelanganyi ya Yuda. (Bala Genese 49:10 ne dimanyisha dia kuinshi kua dibeji.) Mukalenge au ke Yezu Kristo. Yakoba wakamubikila ne: Shilo. Muanjelu kampanda wakamba bua Yezu ne: “Yehowa Nzambi neamupeshe nkuasa wa bukalenge wa tatuende Davidi.” (Luka 1:32, 33) Batu babikila kabidi Yezu ne: “Ntambue wa mu tshisa tshia Yuda.”​—Buak. 5:5.

17. Leja mutudi mua kuidikija Yehowa mu mushindu utudi tumona bakuabu.

¹⁷ Dilongesha: Nansha muvua Yuda muenze bilema binene, Yehowa wakamubenesha. Bana babu bavua pamuapa badiebeja bua kumanya tshivua tshisake Yehowa bua kumubenesha. Katuena bamanye tshivuabu natshi mu meji to, tshitudi bamanye ntshia ne: Yehowa uvua mumone ngikadilu mimpe ivua Yuda nayi, ke  yeye kumubenesha. Mmunyi mutudi mua kuidikija Yehowa? Bobu bapeshe muena Kristo netu mudimu kampanda wa pa buawu, tudi mua kupanga kumvua tshidibu bamupeshilawu, nangananga tuetu bamanye bilema biende. Kadi mbimpe tuvuluke ne: Yehowa udi wanyisha ngikadilu yende mimpe. Yehowa utu wimanyina pa malu mimpe a batendeledi bende. Tudienzejayi bua kumuidikija.

18. Bua tshinyi mbimpe tuikale ne lutulu?

¹⁸ Bualu bukuabu budi tshilejilu tshia Yuda tshitulongesha budi ne: mbimpe tuikale ne lutulu. Yehowa utu anu ukumbaja milayi yende, kadi katu wenza nanku dîba ditudi tuetu batekemene anyi mu mushindu utudi basue to. Bantu ba mu ndelanganyi ya Yuda kabakatuadija kulombola bantu ba Nzambi diakamue to. Kadi bakatua bantu bavua Yehowa musungule bua kulombola mpanda ne muoyo mujima, bu mudi Mose uvua muena Lewi, Yoshua uvua muena Efelayima, anyi mukalenge Shaula uvua muena Benyamina. Bu mudi Yehowa muteke bantu bua kutulombola lelu, mbimpe tubatue petu mpanda.​—Eb. 6:12.

19. Dikonkonona dia mêyi a buprofete a Yakoba pakavuaye mikolo ku tshina didi ditulongesha tshinyi bua Yehowa?

¹⁹ Mêyi a ndekelu avua Yakoba muambile bana bende banayi mmatulongeshe tshinyi? Mmatulongeshe ne: “Mushindu udi muntu umona ki ngudi Nzambi umona to.” (1 Sam. 16:7) Yehowa udi ne lutulu lua bungi ne udi ufuilangana luse ne muoyo mujima. Bushuwa, patudi tuenza malu mabi bidi bimunyingalaja, kadi kena ukeba ne: tuikale bapuangane to. Nansha bantu bavua benze bilema binene kale, udi mua kubabenesha bobu banyingalale ne muoyo mujima bua bilema binene biabu abi ne batuadije kuenza malu mimpe. Mu tshiena-bualu tshialonda, netuakule bua malu avua Yakoba muambile bana bende ba balume bakuabu muanda mukulu.