TSHIENA-BUALU TSHIA KULONGA 27
MUSAMBU WA 79 Nubalongeshe mua kushala bashindame
Ambuluisha mulongi wa Bible bua alue mutendeledi wa Yehowa
‘Nushindame mu ditabuja, nulue ne bukole.’—1 KOL. 16:13.
LUNGENYI LUNENE
Mutudi mua kuambuluisha balongi betu ba Bible bua kupeta ditabuja ne dikima biabambuluisha bua kulua batendeledi ba Yehowa.
1-2. a) Bua tshinyi bamue balongi ba Bible batu belakana bua kulua batendeledi ba Yehowa? b) Ntshinyi tshituamona mu tshiena-bualu etshi?
KUVUA malu avua menze bua welakane bua kulua Ntemu wa Yehowa anyi? Pamuapa uvua ne buôwa, wela meji ne: bena mudimu benu, balunda bebe, anyi bena mu dîku dienu bavua mua kukufiikila munda. Peshi uvua muele meji ne: kuakukokesha bua kutumikila mikenji ya Nzambi to. Biobi nanku, udi mua kumvua bipepele mudi balongi bebe ba Bible bumvua padibu belakana bua kulua batendeledi ba Yehowa.
2 Yezu uvua mumanye ne: malu a buena au avua mua kupangisha muntu bua kutungunuka ne kuenzela Yehowa mudimu. (Mat. 13:20-22) Kadi wakatungunuka anu ne kuambuluisha bantu bavua belakana bua kulua bayidi bende. Wakaleja bayidi bende mua kuambuluisha bantu ba mushindu au bua 1) bajingulule malu adi mua kubapangisha bua kuya kumpala, 2) banange Yehowa bikole, 3) bamanye malu adi ne mushinga wa bungi, ne 4) batantamene ntatu. Paudi ulonga ne mulongi webe wa Bible ku diambuluisha dia mukanda wa Shala ne muoyo kashidi! bua kuluaye mutendeledi wa Yehowa, mmunyi muudi mua kutumikila malu avua Yezu muambile bayidi bende?
MUAMBULUISHA BUA AJINGULULE TSHIDI TSHIMUPANGISHA BUA KUYA KUMPALA
3. Ntshinyi tshivua mua kuikala tshipangishe Nikodemo bua kulua muyidi wa Yezu?
3 Nikodemo uvua mukokeshi munene wa bena Yuda. Kadi bualu kampanda bua kenza bua bimukolele bua kulua muyidi wa Yezu. Ngondo isambombo patupu Yezu mumane kutuadija mudimu wa diyisha, Nikodemo wakamanya ne: Yezu uvua muleji mpala wa Nzambi. (Yone 3:1, 2) Nansha nanku, wakajinga bua kutuilangana ne Yezu mu musokoko bualu uvua ‘utshina bena Yuda.’ (Yone 7:13; 12:42) Pamuapa uvua muele meji ne: yeye mulue muyidi wa Yezu, uvua mua kujimija muanzu ne tshitupa tshia bubanji buende. a
4. Mmunyi muvua Yezu muambuluishe Nikodemo bua amanye tshivua Nzambi musue bua enze?
4 Nikodemo uvua mumanye Mikenji ya Mose, kadi bivua bikengela kumuambuluisha bua amanye tshivua Yehowa musue bua enze. Mmunyi muvua Yezu mumuambuluishe? Yezu uvua mudiakaje bua kufila dîba diende bua kuyukila ne Nikodemo nansha butuku. Yezu wakaleja Nikodemo patoke tshivuaye mua kuenza bua kuluaye muyidi wende, kumuambilaye ne: uvua ne bua kunyingalala bua mpekatu yende, kubatijibua mu mâyi, ne kuitabuja Muana wa Nzambi.—Yone 3:5, 14-21.
5. Mmunyi mutudi mua kuambuluisha mulongi wetu wa Bible bua amanye tshidi tshimupangisha bua kulua mutendeledi wa Yehowa?
5 Nansha mulongi wa Bible mumanye Mifundu bikole, mbimpe anu tumuambuluishe bua amanye tshidi tshimupangisha bua kulua mutendeledi wa Yehowa. Mudimu wende wa bianza anyi buluishi bua kudi bena mu dîku diabu bidi mua kumupangisha bua kuya kumpala. Nunku ikala mudiakaje bua kumuambuluisha anu bu Yezu. Udi mua kumubikila bua kudia nende kantu. Dîba adi bidi mua kumuambuluisha bua akuleje ntatu idiye nayi. Mukankamija bua akaje amue malu bua kusankisha Yehowa, ki mbua kukusankisha wewe to.
6. Mmunyi muudi mua kuambuluisha mulongi wa Bible bua apete dikima dia kutumikila malu adiye ulonga? (1 Kolinto 16:13)
6 Mulongi wa Bible yeye mutuishibue ne: Yehowa neamuambuluishe bua kutumikila mikenji yende, neapete dikima dia kutumikila bidiye ulonga. (Bala 1 Kolinto 16:13.) Mudimu webe mmufuanangane ne wa mulongeshi wa mu kalasa. Mmulongeshi kayi uuvua munange bikole mu kalasa kenu? Pamuapa ngewu uvua ukuambuluisha ne lutulu luonso bua umone ne: uvua anu mua kukokesha bua kuenza amue malu. Bia muomumue, mulongeshi muimpe wa Bible ngewu udi ulongesha mulongi wende malu adi Nzambi musue bua enze ne umujadikila kabidi ne: Yehowa neamuambuluishe bua kuakaja malu mu nsombelu wende. Ntshinyi tshiudi mua kuenza bua kulua mulongeshi muimpe?
MUAMBULUISHA BUA ANANGE YEHOWA BIKOLE
7. Mmunyi muvua Yezu muambuluishe bantu bavua bamuteleja bua kunangabu Yehowa bikole?
7 Yezu uvua mumanye ne: bayidi bende bobu banange Nzambi, bavua mua kutumikila bipepele malu avuabu balonga. Uvua ubalongesha malu avua mua kubambuluisha bua kunanga Tatu wabu wa mu diulu bikole. Tshilejilu, wakafuanyikija Yehowa ne tatu udi upesha bana bende bintu bimpe. (Mat. 7:9-11) Pamuapa bamue ba ku bantu bavua bateleja Yezu kabavua ne batatuabu bavua babanange to. Ela meji muvuabu bumvue pavuaye mubapeshe tshilejilu tshia tatu kampanda wa luse uvua muakidile muanende muenzavi pavuaye mupingane kumbelu. Biakabambuluisha bua kumona mudi Yehowa umvuila bantu luse lua bungi.—Luka 15:20-24.
8. Mmunyi muudi mua kuambuluisha mulongi webe wa Bible bua anange Yehowa bikole?
8 Wewe utamba kuakula bua ngikadilu ya Yehowa paudi ulonga ne mulongi webe wa Bible, udi mua kufika ku dinanga Yehowa bikole. Dîba dionso dinudi nulonga, muambuluisha bua amone mudi malu adiye ulonga aleja mudi Yehowa mutunange. Panudi nulonga malu adi atangila tshia kupikulangana natshi, mushindikila ne: Yehowa mmutshifile bualu mmumunange. (Lomo 5:8; 1 Yone 4:10) Mulongi wa Bible yeye mumone ne: Yehowa mmumunange bikole, bidi mua kumusaka bua kumunanga pende bikole.—Gal. 2:20.
9. Ntshinyi tshivua tshiambuluishe Michael bua kushintulula nsombelu wende?
9 Tuangate tshilejilu tshia Michael wa mu Indonésie. Uvua mulonge Bible mu dikola diende, kadi kavua mufike ku dibatijibua to. Pakakumbajaye bidimu 18, wakaya mu ditunga dikuabu bua kuenza mudimu wa kuendesha mashinyi manene. Panyima pa bidimu, wakapingana mu Indonésie, kuselaye. Kadi wakashiya dîku diende, kuyaye kutungunuka ne mudimu wende au. Mukajende ne muanende wa bakaji bakashala kulonga Bible, kuyabu kumpala. Pavua Michael mufuishe mamuende, wakapingana kuabu bua kulama tatuende; kutuadijaye pende kulonga Bible. Pakafikabu mu dilongesha dia 27 mu mukanda wa Shala ne muoyo kashidi!, malu akakonkononabu mu tshitupa tshia “Buela mu buondoke” akamulenga ku muoyo bikole. Pakelanganaye meji a muvua Yehowa ne bua kuikala mumvue pavuaye mumone bakengesha Muanende, wakapuekesha binsonji. Pakajingululaye ne: Yehowa ne Yezu bavua bamunange bikole, biakamusaka bua kushintulula nsombelu wende, yeye kubatijibua.
MUAMBULUISHA BUA AMANYE MALU ADI NE MUSHINGA WA BUNGI
10. Mmunyi muvua Yezu muambuluishe bayidi bende bua kumanya malu avua ne mushinga wa bungi? (Luka 5:5-11) (Tangila kabidi tshimfuanyi.)
10 Bayidi ba Yezu bakajingulula diakamue ne: Yezu uvua Masiya mulaya, kadi bivua bikengela kubambuluisha bua bamanye malu a kuteka pa muaba wa kumpala. Petelo ne Andele bakavua bayidi ba Yezu pavuaye mubalombe bua bamulonde, kabayi bapingana kabidi ku malu abu to. (Mat. 4:18, 19) Mudimu wabu wa diloba mishipa uvua ubambuluisha bikole menemene. Pamuapa bavua bawenza ne Yakobo ne Yone. (Mâko 1:16-20) Pavua Petelo ne Andele ‘balekele tupamba tuabu,’ balonde Yezu, pamuapa bakalongolola malu bua bena mu mêku abu bikala anu bapeta bivuabu nabi dijinga. Bua tshinyi bakitaba bua kulekela mudimu wabu au? Bualu budibu balonde mu mukanda wa Luka bua muvua Yezu muenze tshishima buvua bubajadikile ne: Yehowa uvua ne bua kubatabalela.—Bala Luka 5:5-11.
Mushindu uvua Yezu muambuluishe bayidi bende bua kumanya malu adi ne mushinga wa bungi udi utulongesha tshinyi? (Tangila tshikoso 10) b
11. Ntshinyi tshiudi mua kuambila mulongi webe bua kukolesha ditabuja diende?
11 Katuena mua kuenza bishima bu Yezu to, kadi tudi mua kuambila mulongi wetu wa Bible muvua Yehowa muambuluishe bana betu bavua bateke malu ende pa muaba wa kumpala. Tshilejilu, udi uvuluka muvua Yehowa mukuambuluishe pauvua mutuadije kubuela mu bisangilu anyi? Pamuapa bivua bikulombe bua kuyukila ne mfumuebe wa mudimu bua kumumvuija ne: bu muvua dienza mudimu mêba a pa mutu dikupangisha bua kubuela mu bisangilu, kabivua bikumbana kabidi bua kuwenza mêba au to. Ambila mulongi webe muvua ditabuja diebe dikole bua muvua Yehowa mukuambuluishe pauvua muangate dipangadika dia kuteka ntendelelu wende pa muaba wa kumpala.
12. a) Patudi tuya kulonga Bible ne muntu, bua tshinyi mbimpe tuikale tuya ne bamanyishi ba lumu luimpe bashilashilangane? b) Ntshinyi tshikuabu tshiudi mua kuambuluisha natshi mulongi wa Bible bua kuteka malu a Yehowa pa muaba wa kumpala? Fila tshilejilu.
12 Mulongi webe yeye mumvue muvua bena Kristo bakuabu bashintulule nsombelu wabu bua kuteka malu a Yehowa pa muaba wa kumpala, bidi mua kumuambuluisha bikole. Nunku paudi uya kumulongesha, ikala uya ne bena Kristo ba mishindu yonso. Ubalombe bua bambe muvuabu balue Bantemu ne tshivuabu benze bua kuteka mudimu wa Yehowa pa muaba wa kumpala. Muleja kabidi Filme ya mu tshitupa tshia “Buela mu buondoke” anyi idi mu tshitupa tshia “Bia kutangila kabidi.” Bitupa ebi bidi mu mukanda wa Shala ne muoyo kashidi!. Tshilejilu, nuenu mu dilonga dia 37, tangilayi filme wa Yehowa neatukumbajile majinga etu, pashishe wakule bua mêyi manene adimu bua kuleja mulongi ne: Yehowa neambuluishe.
MUAMBULUISHA BUA ATANTAMENE NTATU
13. Mmunyi muvua Yezu mulongolole lungenyi lua bayidi bende bua buluishi?
13 Yezu wakambila bayidi bende misangu ne misangu ne: bantu bakuabu, too ne bena mu mêku abu bavua mua kubaluisha. (Mat. 5:11; 10:22, 36) Pakavua mudimu wende utua ku tshibungubungu, wakabadimuija ne: bavua mua kubashipa. (Mat. 24:9; Yone 15:20; 16:2) Wakabalomba bua bikale ne budimu mu mudimu wa buambi. Wakababela bua kabikadi bakokangana ne baluishi babu to, kadi bikale ne budimu bua batungunuke anu ne kuyisha.
14. Mmunyi mutudi mua kulongolola lungenyi lua mulongi wetu wa Bible bua buluishi? (2 Timote 3:12)
14 Tuetu basue kulongolola lungenyi lua mulongi wa Bible bua buluishi buapetaye, mbimpe tumuambile ne: bena mudimu babu, balunda bende, ne balela bende badi mua kumuamba. (Bala 2 Timote 3:12.) Bamue bena mudimu babu badi mua kumuseka bua mukadiye utumikila malongesha a mu Bible. Bantu bakuabu, too ne balela bende badi mua kuakula bibi bua malu adiye witabuja. Tuetu balongolole lungenyi lua balongi betu pa lukasa bua buluishi, nebamanye tshia kuenza pabaluishabu.
15. Ntshinyi tshidi mulongi wa Bible mua kuenza bena mu dîku diabu bobu bamuluisha?
15 Bobu baluisha mulongi webe kudi bena mu dîku diabu, muambuluisha bua amone ne: mbamufiikile munda bua mudiye ulonga Bible ne Bantemu ba Yehowa. Badi mua kuela meji ne: badi bamupambuisha anyi badi mua kuikala bamona Bantemu ba Yehowa mu mushindu mubi. Nansha bamue balela ba Yezu kabavua banyisha bivuaye wenza to. (Mâko 3:21; Yone 7:5) Ambila mulongi webe ne: padiye uyukila ne bena mu dîku diabu anyi ne bantu bakuabu mbimpe ikale ne lutulu ne bukalanga.
16. Mmunyi muudi mua kuambuluisha mulongi webe bua ikale ne bukalanga padiye umvuija malu adiye witabuja?
16 Ambila mulongi webe ne: nansha mulela wende yeye musue kumanya malu a mu Bible, ki mbimpe amumvuije malu onso musangu umue to, bualu neamone ne: malu au mmapite bungi; dîba adi kakuitaba kabidi bua kuyukila nende to. Nunku muambila bua amumvuije malu makese. (Kolos. 4:6) Udi mua kuambila mulela wende bua abuele mu site wa jw.org. Nunku nebiambuluishe mulele wende au bua adisunguile bungi bua malu adi atangila Bantemu ba Yehowa adiye mua kubala.
17. Mmunyi muudi mua kuambuluisha mulongi webe bua kuandamuna nkonko itu itangila Bantemu ba Yehowa? (Tangila kabidi tshimfuanyi.)
17 Udi mua kuambuluisha mulongi webe ne malu adi mu jw.org., mu tshitupa tshia “Nkonko itu bantu batamba kuela” bua alongolole mandamuna mapepele a kupesha balela bende padibu bamuela nkonko. (2 Tim. 2:24, 25) Ku ndekelu kua dilongesha dionso, ikala ukonkonona nende tshitupa tshia “Bamue batu bamba ne:” tshidi mu mukanda wa Shala ne muoyo kashidi!. Umukankamije bua ikale wambulula mandamuna mu ende mêyi. Kuelakanyi bua kumupesha ngenyi ya mua kuandamuna mu mushindu muimpe to. Wewe wenza nende nanku, neakuile ditabuja diende ne dishindika dionso.
Panudi nulonga, ikalayi nudilongolola ne mulongi webe, umuambuluisha bua amanye mua kuyisha bipepele (Tangila tshikoso 17) c
18. Mmunyi muudi mua kukankamija mulongi webe bua alue mumanyishi wa lumu luimpe? (Matayi 10:27)
18 Yezu wakalomba bayidi bende bua kuyisha bantu lumu luimpe. (Bala Matayi 10:27.) Tuetu bambuluishe mulongi bua ambile bantu malu adiye witabuja, neyemene Yehowa bikole. Mmunyi muudi mua kumukankamija bua atuadije kuyisha? Padibu bamanyisha tshisumbu ne: nekuikale kampanye ka mudimu wa kuyisha, mukankamija bua ele meji a tshidiye mua kuenza bua alue mumanyishi wa lumu luimpe. Muambila ne: bitu bipepele bua kuyisha padiku kampanye. Udi mua kumukankamija kabidi bua atuadije kuenza midimu ya mu tshisangilu tshia munkatshi mua lumingu. Dienza midimu ayi nedimuambuluishe bua kumvuija bantu malu adiye witabuja ne dishindika dionso.
EYEMENA MULONGI WEBE WA BIBLE
19. Mmunyi muvua Yezu muleje ne: uvua mueyemene bayidi bende? Mmunyi mutudi mua kumuidikija?
19 Kumpala kua Yezu kuya mu diulu, wakambila bayidi bende ne: bavua ne bua kutuilangana kabidi nende. Kabavua bumvue ne: uvua wakula bua diya diabu mu diulu to. Kadi nansha muvuabu kabayi bumvue tshivuaye muambe, yeye uvua mumone ne: bavua ne lulamatu. (Yone 14:1-5, 8) Uvua mumanye ne: bavua mua kulua kumvua amue malu panyima pa tshipolu kampanda, bu mudi bualu bua ditekemena dia kuya mu diulu. (Yone 16:12) Mbimpe tuetu petu tuikale batuishibue ne: mulongi wetu wa Bible mmusue kusankisha Yehowa.
Tuetu bambuluishe mulongi bua ambile bantu malu adiye witabuja, nebimuambuluishe bua kueyemena Yehowa bikole
20. Mmunyi muvua muanetu wa bakaji wa mu Malawi muleje ne: uvua mueyemene mulongi wende wa Bible?
20 Ikala mutuishibue ne: mulongi webe wa Bible mmusue kuenza malu makane. Tuangate tshilejilu tshia muanetu wa bakaji Chifundo wa mu Malawi. Wakatuadija kulonga Bible ne nsongakaji kampanda, diende Alinafe, ku diambuluisha dia mukanda wa Shala ne muoyo kashidi!. Nsongakaji au uvua muena Katolike. Pakafikabu ku ndekelu kua dilongesha dia 14, Chifundo wakamuebeja bua ambe muvuaye umona ditendelela ne mpingu. Alinafe wakafiika munda, kumuandamunaye ne: “Nansha meme mutendelele ne mpingu ki mbualu bua muntu to!” Pakumvua muanetu au nanku, wakamona bu ne: Alinafe kakutungunuka ne dilonga dia Bible to. Kadi lutulu luakamuambuluisha bua kutungunuka ne kumulongesha Bible, mutuishibue ne: neafike anu ku dimona ne: kutendelela ne mpingu nkubi. Ngondo mikese pashishe, Chifundo wakamuela lukonko ludi mu dilongesha dia 34, lua ne: “Katshia watuadija kulonga, mmunyi mudi malu a mu Bible ne a Yehowa Nzambi mulelela makuambuluishe?” Chifundo udi utuambila muvua Alinafe mumuandamune, wamba ne: “Alinafe wakatela malu mimpe a bungi. Bumue bua kudiwu mbua ne: malu atu Bible mukandike, Bantemu kabatu baenza to.” Panyima pa matuku, Alinafe wakalekela kutendelela ne mpingu, yeye kubatijibua.
21. Mmunyi mutudi mua kuambuluisha mulongi wetu wa Bible bua kuangata dipangadika dia kuenzela Yehowa mudimu?
21 Nansha biobi ne: Yehowa ke “udi ubikolesha,” tudi petu ne mudimu wa kuambuluisha mulongi wetu wa Bible bua aye kumpala. (1 Kol. 3:7) Tudi ne bua kumulongesha malu adi Yehowa musue bua enze ne kumuambuluisha bua amunange bikole. Tudi kabidi mua kumukankamija bua ikale anu uteka malu a Yehowa pa muaba wa kumpala ne bua atungunuke ne kumueyemena padibu bamuluisha. Mulongi wetu wa Bible yeye mumone ne: tudi tumueyemena, neapete dikima dia kuenzela Yehowa mudimu ne kulua Ntemu.
MUSAMBU WA 55 Kanubatshinyi to!
a Nikodemo utshivua anu muena mu Tshilumbuluidi tshinene tshia bena Yuda nansha mukavuaku kupite bidimu bibidi ne tshitupa bivua Yezu mutuilangane nende. (Yone 7:45-52) Bamue bantu batu bamba ne: Nikodemo wakalua muyidi anu panyima pa lufu lua Yezu.—Yone 19:38-40.
