Eyowa, bualu Nzambi mmusue bua bantu badisangishe bua kutendelela. Bible udi wamba ne: “Tuelelanganayi kabidi meji bua kusakangana ku dinanga ne ku bienzedi bimpe, katuyi tulekela kudisangisha kuetu pamue.”​—Ebelu 10:24, 25, dimanyisha dia kuinshi.

 Yezu wakaleja ne: bayidi bende bavua ne bua kulua tshisumbu tshilongolola pakambaye ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:35) Bayidi ba Kristo bavua ne bua kudisangisha ne bena Kristo nabu, ke mushindu munene uvuabu baleja dinanga edi. Bavua ne bua kulua bisumbu bilongolola bua kuikala kudisangisha bua kutendelela. (1 Kolinto 16:19) Buonso buabu bavua balue dîku dia bana betu pa buloba bujima.​—1 Petelo 2:17.

Kudi malu makuabu a kuenza pa kumbusha dikala mu tshitendelelu

 Nansha mudi Bible uleja ne: bantu badi ne bua kudisangisha bua kutendelela Nzambi, abi kabiena bitulongesha ne: muntu udi mua kusankisha Nzambi anu bualu udi mu tshitendelelu kampanda to. Bua Nzambi kuanyisha muntu, tshitendelelu tshidiye tshidi ne bua kumuambuluisha mu nsombelu wende dituku dionso. Tshilejilu, Bible udi wamba ne: “Ntendelelu udi mukezuke ne kayi munyanguke ku mêsu kua Nzambi wetu ne Tatu udi nunku: kutangila bana ba nshiya ne bakaji bakamba mu makenga abu, ne kudilama katuyi katoba ka malu a panu.”​—Yakobo 1:27, dimanyisha dia kuinshi.