Batu batamba kuela lusumuinu lua “muena Samalea wa luse” bua kuleja muntu udi wambuluisha bantu badi bakengela diambuluisha. Lusumuinu alu ndufumine ku muyuki, anyi ku tshilejilu tshivua Yezu mufile bua kuleja ne: muntu muena luse udi wambuluisha bakuabu nansha bobu ba mu ditunga kayi peshi bakolele muaba kayi.

Mu tshiena bualu etshi

•  Lusumuinu lua “muena Samalea wa luse” ntshinyi?

•  Bua tshinyi Yezu wakela lusumuinu alu?

•  Ndilongesha kayi didi mu lusumuinu alu?

•  Bena Samalea bavua banganyi?

•  Muyuki wa “muena Samalea wa luse” wakenzeka anyi?

Mona mu tshikoso lusumuinu luakela Yezu: Muena Yuda mukuabu uvua mu luendu umbukila ku Yelushalema mutangile ku Yeliko. Mu njila, bakamuiba, bakamututa, bakamushiya mufue tshipuka.

Muakuidi mukuabu, pashishe mfumu wa tshitendelelu, bonso babidi bikale bena Yuda bakapitshila ku luseke lua muntu uvuabu batape mputa au. Nansha muvuabu ba mu ditunga dimue ne muntu au, kabakimana bua kumuambuluisha to.

Ndekelu wa bionso, muntu wa mu ditunga dikuabu wakalua. Uvua muena Samalea. (Luka 10:33; 17:16-18) Luse luakakuata muena Samalea au, kuondopaye muntu au. Pashishe wakaya nende ku nzubu wa tshilala benyi. Kuntu aku wakamulama butuku bujima. Dituku diakalonda, wakapesha mutangidi wa nzubu wa tshilala benyi makuta bua kulama muntu au bimpe; kumuambilaye ne: nealue kumupingajila makuta a pa mutu atulaye.​—Luka 10:30-35.

Lusumuinu alu Yezu wakaluelela muntu uvua wela meji ne: anu bantu ba dikoba diabu ne ba mu tshitendelelu tshiabu ke bavua bantu nende. Yezu uvua musue kulongesha muntu au dilongesha dia mushinga edi: uvua ne bua kualabaja ngumvuilu wende wa “mukuende” bua afike ku diumvua ne: ki nganu muena Yuda nende to. (Luka 10:36, 37) Mbalonde bualu abu mu Bible bua kulongesha bantu bonso badi basue kusankisha Nzambi.​—2 Timote 3:16, 17.

Lusumuinu alu ludi lutulongesha ne: tudi ne bua kuleja luse mu tshienzedi. Tudi ne bua kukuatshisha muntu udi mu dikenga nansha yeye mukolele penyi, wa dikoba kayi, anyi wa mu ditunga kayi. Tudi ne bua kuenzela bakuabu malu mutudi basue bua batuenzele.​—Matayi 7:12.

Bena Samalea bavua basombele mu buloba bua ku nord kua Yudaya. Bamue ba kudibu bavua bafumine mu bena Yuda bavua baselangane ne bantu bavua kabayi bena Yuda.

Mu bidimu lukama bia kumpala, bena Samalea bakenza wabu ntendelelu. Bavua bitaba mikanda itanu ya kumpala ya mu Mifundu ya mu tshiena Ebelu, kadi babenga mikuabu yonso.

Mu tshikondo tshia Yezu, bena Yuda ba bungi bavua bapetula bena Samalea, kabavua bapetangana to. (Yone 4:9) Bena Yuda bakuabu bavua bamba ne: “muena Samalea” bu tshipendu.​—Yone 8:48.

Bible kena uleja ni lusumuinu lua muena Samalea wa luse luvua lushindamene pa bualu buvua buenzeke to. Nansha nanku, pavua Yezu ulongesha uvua utamba kutela miaba ne bilele bivua bimanyike bimpe bua bamuteleji bende bumvue bipepele dilongesha divuaye musue kupatula.

Bilondeshile mianda ya kale, malu a bungi a mu muyuki au mmalelela. Tshilejilu:

• Njila uvua umbuka ku Yelushalema too ne ku Yeliko uvua ne kilometre mipite pa 20; uvua ne tshibandabanda tshia kilomometre umue. Muyuki au udi uleja bimpe ne: bantu bavua baya ku Yeliko ‘bavua bapueka bumbukila ku Yelushalema.’​—Luka 10:30.

• Pa tshidibilu bakuidi ne bena Yuda bavua mu Yeliko bavua bayila ku njila au bua kuya ku Yelushalema.

• Bivi bavua batamba kusokoma ku njila uvuabu kabayi bapitshila bikole au bua kubunda bena luendu, nangananga bavua benda nkayabu.