“Kakuena muntu udi ne dinanga dinene kupita edi: bua muntu afile muoyo wende bua balunda bende.”​—Yone 15:13, Nkudimuinu wa bulongolodi bupiabupia.

 “Dinanga dipite bunene didi muntu mua kuleja ndia kufila muoyi wende bua balunda bende.”​—Yone 15:13, Mukanda wa Mvidi Mukulu [Mishonyi].

 Yezu uvua wambuluisha bayidi bende bua kumvua ne: bavua ne bua kunangangana, bitaba too ne bua kufila mioyo yabu bua bakuabu.

 Bangabanga, Yezu uvua muambile bapostolo bende ne: “Eu mmukenji wanyi: bua nunangangane anu bu mundi mununange.” (Yone 15:12) Ndinanga kayi divuaye mubanange nadi? Kavua ukeba anu malu avua amusankisha to, kadi uvua uditatshisha buabu. Pavuaye uyisha pa buloba, wakateka majinga a bayidi bende ne a bantu bakuabu kumpala kua ende. Uvua wondopa bantu ne ubayisha Bukalenge bua Nzambi. a Wakenza too ne midimu mipuekele bua kuambuluisha bakuabu. (Matayi 9:35; Luka 22:27; Yone 13:3-5) Kadi mu Yone 15:13, uvua wakula bua dinanga dipite bunene. Mêba makese Yezu mumane kuamba mêyi aa, wakaleja dinanga ditambe bunene edi pakitabaye bua kufila “muoyo wende bu tshia kupikulangana natshi pa muaba wa bantu ba bungi.” (Matayi 20:28; 22:39) Nunku wakaleja patoke ne: uvua munange bakuabu kupita too ne muvuaye mudinange.

 Yezu mmunange bantu. Kadi mmunange nangananga badi batumikila malongesha ende. Uvua wangata bayidi bende bu balunda bende ba pa muoyo bualu bavua batumikila mikenji yende ne bakashala nende mu makenga ende. (Luka 22:28; Yone 15:14, 15) Ke tshivua tshimusake kabidi bua kufila moyo wende bua bualu buabu.

 Bena Kristo ba mu bidimu lukama bia kumpala bakatumikila mêyi a Yezu ne bavua pabuipi bua kufila mioyo yabu bua bakuabu. (1 Yone 3:16) Bushuwa dinanga didi kadiyi didikebela anu masanka adi divua Yezu muleje adi divua ne bua kulua tshimanyinu tshinene tshia bena Kristo balelela.​—Yone 13:34, 35.

 Nshapita wa 13 too ne wa 17 wa Evanjeliyo wa Yone idi yakula bua mibelu ya ndekelu ivua Yezu mupeshe bapostolo bende ba lulamatu 11 ne disambila dia ndekelu divuaye muenze nabu. Mêba makese pashishe yeye kufua. Mu nshapita wa 15, Yezu udi ufuanyikija bayidi bende ne matamba a muonji wa tumuma tua mvinyo udi ukuama tumuma. Ne tshimfuanyi etshi udi usua kumvuija ne: muntu udi musue kulua muyidi wende udi ne bua kushala mu buobumue nende. Udi ubasengelela bua ‘batungunuke ne kukuama mamuma a bungi.’ (Yone 15:1-5, 8) Umue mushindu udibu benza nanku mpadibu baleja bakuabu dinanga didi kadiyi didikebela anu masanka adi pa kubayisha mukenji uvua Yezu muyishe, mmumue ne: “lumu luimpe lua Bukalenge bua Nzambi.”​—Luka 4:43; Yone 15:10, 17.

 Tangila filme muîpi eu bua kumona kadiosha ka mukanda wa Yone.