“Ndi nnushila ditalala; ndi nnupesha ditalala dianyi. Tshiena nnupeshadi bu mudi ba pa buloba badipeshangana to. Mioyo yenu kayipampakanyi peshi kayiteketshi bua buôwa.”​—Yone 14:27, Nkudimuinu wa bulongolodi bupiabupia.

 “Ndi nushila ditalala, ndi nuha ditalala dianyi; tshiena nuhadi bu mudi ba ha buloba banuhadi. Mitshima yenu kaizakadi, kaitshinyi.”​—Yone 14:27, Mukanda wa Nzambi.

 Yezu wakajadikila bapostolo bende ne mêyi aa bua kabatambi kusamisha mutu patuilanganabu ne ntatu to. Kuenza nanku kuvua mua kubapetesha ditalala mu muoyo anu muvua Nzambi mudipeteshe Yezu pende.

 Nditalala dia mushindu kayi divua Yezu mushile, anyi mupeshe bapostolo bende? Yezu uvua mubapeshe ditalala diende anyi ditalala divuaye mupete. Ditalala adi kadiena diumvuija dijika dia mvita anyi makenga to. (Yone 15:20; 16:33) Nansha muvua bantu bakengeshe Yezu too ne ku lufu, uvua ne ditalala mu muoyo. (Luka 23:27, 28, 32-34; 1 Petelo 2:23) Uvua mupete ditalala adi bualu uvua mumanye ne: Tatu wende Yehowa a uvua mumunange ne umuanyisha.​—Matayi 3:16, 17.

 Yezu wakapesha bapostolo bende ditalala pa kubajadikila ne: yeye ne Tatuende mbabanange ne badi babanyisha. (Yone 14:23; 15:9, 10; Lomo 5:1) Ditalala dibakila pa ditabuja diabu mu Yezu Muana wa Nzambi adi diakabambuluisha bua kumbusha buôwa ne kudiabakena. (Yone 14:1) Nansha muvua Yezu ne bua kubashiya pa buloba, wakabalaya ne: nyuma muimpe wa Nzambi uvua ne bua kubambuluisha bua bikale ne muoyo mukole ne ditalala mu muoyo. (Yone 14:25-27) Bayidi ba Yezu bavua ne bua kutantamena malu makole ne dikima, bualu Yehowa uvua ubanyisha ne ubakuatshisha.​—Ebelu 13:6.

 Tshikondo tshivua Yezu pa buloba, bantu bavua ne tshibidilu tshia kuelangana muoyo pa kujingilangana ditalala. (Matayi 10:12, 13) Kadi Yezu yeye kavua mujingile anu bapostolo bende ditalala patupu to; wakabapeshadi. Kabidi, ditalala diakabapeshaye ndishilangane ne ditalala didi ba pa buloba b bafila. Ba pa buloba badi mua kufila ditalala dikese ku diambuluisha dia malanda abu, mabanji, lumu, anyi mianzu idibu nayi. Kadi ditalala dia Yezu kadiena difumina ku bintu bidi bimueneka ne mêsu to. Nditalala dia mu muoyo didi dishala kashidi.

 Yezu wakambila bapostolo bende ba lulamatu mêyi aa butuku bua muladilu wa lufu luende. Butuku abu, wakabamanyisha ne: uvua ne bua kubashiya. (Yone 13:33, 36) Bualu abu buakababungamija bikole be! (Yone 16:6) Yezu wakabakankamija pa kubaleja bua tshinyi kabavua ne bua kupampakana bua bualu abu.

 Mêyi a Yezu adi mua kukankamija kabidi bena Kristo lelu. Tudi petu mua kupeta ditalala. (2 Tesalonike 3:16) Patudi tulua bayidi ba Yezu, yeye ne Tatu wende Yehowa mbatunange ne badi batuanyisha. (Kolosayi 3:15; 1 Yone 4:16) Nanku, katuena ne bua kutamba kusamisha mutu to. Bua tshinyi? Bualu Nzambi udi netu.​—Misambu 118:6; Filipoyi 4:6, 7; 2 Petelo 1:2.

 Tangila filme muîpi eu bua kumona kadiosha ka mukanda wa Yone.