Bible ke dibukupo na makwabo. Udi na madingi atamba kudi Umpangi wetu. (2 Temote 3:16) Musapu wandi ubwanya kwitushinta bininge. Bible mwine unena’mba: “Kinenwa kya Leza i kyūmi kadi kidi na bukomo.” (Bahebelu 4:12) Udi na bukomo bwa kulumbulula būmi bwetu mu miswelo ibidi mikatampe—kwituludika mu būmi bwa difuku ne difuku dyalelo ne kwitukwasha tuyuke Leza ne milao yandi.—1 Temote 4:8; Yakoba 4:8.

Kulumbulula būmi bobe dyalelo. Bible ubwanya kukukwasha mu makambakano obe onso. Ubwanya kukupa madingi a kamweno pa:

•   Kipwano na bakwabo.—Efisesa 4:31, 32; 5:22, 25, 28, 33.

• Bukomo bwa mu ñeni ne bwa ngitu.—Ñimbo ya Mitōto 37:8; Nkindi 17:22.

• Mwikadilo.—1 Kodinda 6:9, 10.

• Misokwe.—Nkindi 10:4; 28:19; Efisesa 4:28. *

Ba mulume ne mukaji bakisongasonga ba mu Azia basangedile bininge mvubu ya madingi a mu Bible. Enka na mwikadilanga bantu bakisongasonga, bano nabo balwile pa kushinta bumuntu bwabo ne kwisamba pampikwa kafinda. Ino bashilwile kwingidija byobya byobadi batanga mu Bible. Byaikala namani? Vicent unena’mba: “Bintu byontanga mu Bible byankwenshe nekenye myanda ya mu busongi bwami na buswe. Kulonda madingi a mu Bible i kwituletele nsangaji batwe bonso.” Mukajandi Annalou, unena’mba: “Kubandaula bimfwa bya mu Bible ko kwetukweshe. Pano ngidi na nsangaji ne kuloelelwa mu busongi bwami ne kwikala na bitungo mu būmi bwetu.”

Kuyuka Leza. Kutentekela pa byaanenanga pa busongi bwabo, Vicent ubweja’ko amba: “Kupityila ku butangi bwa Bible, pano nemonanga bu ngidi pabwipi bininge na Yehova kutabuka mafuku kunyuma.” Mumweno wa Vicent wimanine pa kintu kya mvubu kya amba—Bible ubwanya kukukwasha uyuke Leza. Nobe shi wikale na uno mumweno, nabya kukamwenapo’tu enka mu madingi andi ino kadi ukayuka Leza ne kwikala mulunda nandi. Kadi ukamona’mba Leza i musokole myanda palapala itala bintu biyampe bya kumeso, kitatyi kine kyokamona “būmi bwinebwine”—bwa kuladila’mo nyeke ne nyeke. (1 Temote 6:19) Kino i kintu kyo kukatanapo mu dibuku dikwabo.

Shi witūdile’ko kitungo kya kutanga Bible kuzoza mpika, nankyo nobe ukamona ano madyese—kulumbulula bobe būmi dyalelo ne kuyuka Leza. Inoko, potanga Bible, padi bipangujo bivule bikakwiya mu ñeni. Shi bibakwiya, vuluka nyeke kimfwa kiyampe kya ntungu mwine Efiopya wādi’ko pano ke padi myaka 2000. Wādi na bipangujo bivule bitala pa Bible. Pobāmwipangwile shi uyukile byatanga, wālondolwele amba: “Lelo binebine ndyuka’byo namani shi kekudipo muntu wa kunombola?” * Kupwa wāitabija bamukwashe kudi Fidipa, muntu wādi muyuke kala kufundija Bible, kadi wa mu bana bwanga babajinji ba Yesu. (Bilongwa 8:30, 31, 34) Mo monka nobe, shi usaka kuyukila’ko bivule pa Bible, nabya lomba kifundwa pa www.jw.org nansha kwitulembela ku adelese ya kubwipi pa oa atelelwe mu dino dipepala. Ubwanya ne kukimba Batumoni ba Yehova nansha kwenda ku Njibo ya Bulopwe ya kubwipi na kodi. Lelo ubulwe’po nobe dyalelo kushilula kutanga Bible, ne kwitabija akutwale ku būmi bulumbuluke?