Lelo ukulupile mu mulao wa Bible wa lusangukilo? * Shi tunene, dyese dya kukekala monka na baswe betu bafwile i disangaja. Ino, le i biyampe kwikala na luno lukulupilo? Pa kutana malondololo ku kino kipangujo, i biyampe tulangulukile pa kimfwa kya batumibwa ba Yesu Kidishitu.

Batumibwa bādi bakulupile na kusuminwa mu lusangukilo lwa bafwe. Mwanda waka? Mwanda wa bubinga bidi bubidi. Bubajinji, lukulupilo lwabo lwādi lwimanine dibajinji pa buno bubinebine: Yesu aye mwine wāsangukile mu lufu. Batumibwa​—ne “banabetu 500 ne musubu”​—bāmwene kyaba kimo Yesu musanguke. (1 Kodinda 15:6) Kadi, bantu bavule balombwele bukamoni bwa lusangukilo lwa Yesu ne kwilwitabija, namulombwela’kyo Maevanjile aná.​—Mateo 27:62–28:20; Mako 16:1-8; Luka 24:1-53; Yoano 20:1–21:25.

Bwa bubidi, batumibwa bēmwenine Yesu usangula bantu basatu​—mubajinji ku Neni, kupwa ke ku Kapanama, ne wa mfulo ku Betani. (Luka 7:11-17; 8:49-56; Yoano 11:1-44) Muntu wa mfulo kusangulwa, i mutelwe ku ngalwilo kwa kino kiteba, wa mu kisaka kya ba Yesu. Tutalei bidi bintu bikwabo byālongekele.

“Mwanenu usa kusanguka.” Yesu wānene Mata bino binenwa, wa mwanabo Lazalasa, wāfwile ke padi ne mafuku aná. Mata kāivwanijepo dibajinji mwādi mushintulwila binenwa bya Yesu. Wālondolwele amba, “Ndyukile amba ukasangukanga,” ino wādi ulanga’mba i mu mafuku a kumeso. Langa’po bidi mwaātulumukile paāivwene Yesu unena’mba, “ami ne lusangukilo,” ne paāmwene Yesu usangula mwanabo mu lufu!​—Yoano 11:23-25.

Le Lazalasa wādi kwepi mu mafuku aná aādi mufwe? Lazalasa kānenepo kintu kilombola’mba wādi mūmi mu kifuko kikwabo mu bula bwa ano mafuku aná. Kadi Lazalasa kādipo na muya keufu wāendele mūlu. Yesu pa kusangula Lazalasa, kāmwalwijijepo pano panshi, na kumukoka momwa mūlu mwa nsangaji, kīkalo kya kubwipi na Leza. Penepa, Lazalasa wādi kwepi mu ano mafuku aná? Na bubine, wādi ulēle mu kibundu.​—Musapudi 9:5, 10.

Vuluka’mba, Yesu wādingakenye lufu na tulo tubwanya muntu kulanguka kupityila ku lusangukilo. Tutanga nsekununi amba: “‘Lazalasa mulunda netu walāla, ino keñenda’ko nkamulangule.’ Ebiya bana ba bwanga bamunena’mba:  ‘A Mfumwetu, shi ulēle, nankyo usa kukoma.’ Inoko, Yesu wādi wisambila pa lwandi lufu. Ino abo balanga’mba wisambilanga pa kukōkolokwa mu tulo. Penepa, Yesu webalombola patōkelela’mba: ‘Lazalasa wafu.’” (Yoano 11:11-14) Yesu pa kusangula Lazalasa, wāmwalwijije būmi ne kumujokejeja mu kyandi kisaka. Bine, Yesu wāpele kino kisaka kyabuntu kya kutendelwa!

Bantu bāsangwilwe na Yesu paādi pano pa ntanda, yādi’tu ntompejo ya byakalonga mu mafuku āya kumeso pamo bwa Mulopwe wa Bulopwe bwa Leza. * Pakaludika ino ntanda, Yesu ukasangula aye momwa mūlu bantu balele mu kibundu mujikwanga bantu bonso. O mwanda wānene’mba: “Ami ne lusangukilo.” Langa’po bidi nsangaji yokevwana kitatyi kyokamona baswe bobe monka! Langa kadi ne nsangaji ikemvwana boba bakasangulwa!​—Luka 8:56.

Yesu wānene Mata amba: “Yewa ulombola lwitabijo mudi ami, nansha wafwa, ukekala mūmi monka; kadi muntu ense mūmi ulombola lwitabijo mudi ami kakafupo nansha dimo.” (Yoano 11:25, 26) Boba bakasangulwa na Yesu mu bula bwa myaka kanunu ya umbikalo wandi, bakekala na dyese dya kwikala’ko nyeke​—shi baketabije bya binebine mwadi.

Yesu pa kupwa kunena bino binenwa bya kutendelwa pa mwanda utala lusangukilo, wāipangwile Mata kipangujo kya kumuloba tudi mukanwa amba: “‘Le ubaitabija’byo, a?’ Nandi wāmunena amba: ‘Eyo mwa, Mfumwami; pano naitabija’mba wi Kidishitu Mwanā Leza.’” (Yoano 11:26, 27) Le abe nobe​—usakanga kutamija lwitabijo na lwādi na Mata mu lukulupilo lwa lusangukilo? Ditabula dibajinji i dya kuyuka mpango ya Leza itala pa bantu. (Yoano 17:3; 1 Temote 2:4) Buno buyuki bukakutwala ku kwitabija. Ubulwe’po kunena Batumoni ba Yehova bakulombola byobya bifundija Bible pa uno mwanda? Bakasangela kwisambila nobe pa lukulupilo lwa kutendelwa lwa lusangukilo.