FWENAI KUDI LEZA

“Leza Uswele Wakupana ne Mutyima, Tō”

Le i kyabuntu kya muswelo’ka kyobwanya kusangela? Na bubine bavule mu bukata mwetu bakasangela kutambula kyabuntu kya muntu utonwenwe na buswe, kupita’ko muntu wibapa’kyo pa mwanda wa kuvuija kiselwa nansha kuningilwa. Mu mwanda utala kupāna, kukanina kwa mutyima kudi na kamweno. Kudi na kamweno kotudi. Kadi nakampata, kudi na kamweno kudi Leza. Tubandaulei bidi binenwa bya mutumibwa Polo bya ku bukomo bwa mushipiditu bidi mu 2 Kodinda 9:7.

Mwanda waka Polo wāsonekele bino binenwa? Wādi usaka kukankamika bene Kidishitu ba mu Kodinda bakwatakanye mwingilo wa kukwasha banababo mu lwitabijo ba mu Yudea bādi basakilwa bukwashi. Le wātompele kuningila bene Kodinda bapāne? Mhm, ino wāsonekele amba: “Bantu bonso mo bakaninina ku mityima yabo bapānine monka, wa byandi, wa byandi, kadi kenamutyimapo wa kufītwa, mhm, nansha wa kininga; mwanda aye Leza uswele wakupana ne mutyima, tō.” Tubandaulei kino kidyumu na katentekeji.

“Mo bakaninina ku mityima yabo.” Polo unena’mba, mwine Kidishitu wa bine upānanga monka mukaninina ‘mutyima wandi’ kulonga. Mu kitatyi kimo kyonka, mwine Kidishitu utanga mutyima bininge ku bisakibwa bya batōtyi-nandi. Mwifundi umo unena amba, kishima kya mu ludimi lubajinjibajinji kyalamwinwe bu ‘kukanina,’ “kidi na mulangwe wa kukwata butyibi kumeso kwa kulonga kintu.” O mwanda mwine Kidishitu ulangulukilanga bininge pa bisakibwa bya banababo mu lwitabijo ne kwiipangula kine kyabwanya kulonga mwanda wa kuvuija bino bisakibwa.​—1 Yoano 3:17.

“Kenamutyimapo wa kufītwa, mhm nansha wa kininga.” Polo utela miswelo ibidi ya kupāna keifwaninwepo kwikala mu bukata mwa bene Kidishitu ba bine​—na mutyima kanyonga ne na kuningilwa. Kishima kya Kingidiki kyalamwinwe bu “mutyima wa kufitwa” kishintulula pa bute pa bute “pampikwa bulanda (nansha njia).” Dibuku dimo dishintulula’mba, muntu upāna na mutyima ufita nansha na mutyima kanyonga, upānanga na “mutyima wa bulanda bwa milangwe ya kwela lupeto.” Muntu upāna ku bukomo upānanga mwanda wa kuningilwa. Lelo i ani mu bukata mwetu usakanga kutambula kyabuntu kya muntu upāna na mutyima kanyonga nansha na kuningilwa?

“Leza uswele wakupana ne mutyima, tō.” Polo unena amba, shi mwine Kidishitu wakwata butyibi bwa kupāna, ufwaninwe kupāna na mutyima tō nansha na mutyima wa nsangaji. Na bubine, kupāna na kukanina kuyampe kwa mutyima kuletanga nsangaji. (Bilongwa 20:35) Muntu upāna na mutyima tō kabwanyapo kufya nsangaji yandi. Na bubine, kishima “mutyima tō” kibwanya kulombola mwine mwiivwanina yewa upāna mu mutyima ne mwamwekela ku mpala. Muntu upāna na mutyima tō usangajanga wetu mutyima. Kadi usangajanga ne mutyima wa Leza. Bwalamuni bukwabo bunena amba: “Leza uswele yewa utūla na nsangaji.”​—Dibuku Dijila.

Binenwa bya mutumibwa Polo bya ku bukomo bwa mushipiditu i musoñanya wa kulonda mwine Kidishitu mu mwanda utala kupāna. Ekale shi tupāna kitatyi kyetu, bukomo ne bintu byetu bya ku ngitu, tupānei’byo na kusaka kwetu ne pa mwanda wa kumona nsangaji ya binebine mu kupa bakwetu byabuntu na kampata boba basakilwa bukwashi. Kuno kupāna kekuketuletelepo’nka nsangaji, ino kukalengeja Leza etuswe, mwanda “uswele wakupana ne mutyima, tō.”

Butangi bwa Bible bwa mu Kweji 9

1 Kodinda ne 2 Kodinda

[Bushintuludi pa paje 13]

“Leza uswele yewa utūla na nsangaji”