Le I Bika Bifwaninwe Kulonga Bene Kidishitu Dyalelo?

BENE Kidishitu ba bine dyalelo kebekujangapo mu politike. Mwanda waka? Mwanda balondanga kimfwa kya Yesu. Yesu wēsambīle padi aye mwine amba: ‘Nkidipo wa ino ntanda.’ Wēsambīle kadi pa bandi bana ba bwanga amba: “Kebakidipo bapanopantanda.” (Yoano 15:19; 17:14) Tubandaulei’ko bidi bubinga bumo-bumo bulombola’mba Bene Kidishitu kebafwaninwepo kwikuja mu politike.

1. Bukomo bwa muntu budi na mikalo. Bible unena amba bantu kebadipo na bukomo nansha bubinga bwa kwiludika abo bene. Mupolofeto Yelemia wāsonekele amba, “kekidipo mu muntu unañanga kolola matabula andi.”—Yelemia 10:23.

Monka kemwāpangilwepo bantu na bukomo bwa kutumbuka abo bene mu lwelele, kebāpangilwepo kadi mwanda wa kwiludika biyampe abo bene. Pa kwisambila pa mikalo ya umbikalo, David Fromkin mulembi wa mānga walembele mu dibuku dyandi (The Question of Government) amba: “Imbikalo i mibundwe na bantu; o mwanda keidipo na bukomo kadi bupeta bwayo i bwa bitupu. Ingidijanga bukomo kampanda, ino bukadikila’nka kukadikila.” Nanshi ke kya kutulumukapo shi Bible witudyumuna tuleke kukulupila mu muntu!—Mitōto 146:3.

2. Mishipiditu mibi idi na lupusa dyalelo. Satana paānene kupa Yesu buludiki bwa ntanda, Yesu kāpatenyepo amba Dyabola kādipo na bukomo bwa kumupa malopwe onso a ino ntanda. Bine, kyaba kikwabo Yesu wātelele Satana bu “mwine panopantanda.” Mwenda myaka, mutumibwa Polo watela Satana bu “Leza wa panopantanda.”  (Yoano 14:30; 2 Kodinda 4:4) Polo wāsonekēle bana babo Bene Kidishitu amba: “Kwikwata kwetu . . . i kwa ku balopwe ba fukutu ya panopanshi, ne ku bibumbo bya bushipiditu bya bubi bya momwa mūlu.” (Efisesa 6:12) Mishipiditu mibi iludikanga bine ino ntanda pampikwa kumweka. Le uno mwanda ufwaninwe kwitutonona tumone politike namani?

Langulukila bidi pa kuno kwenzakanya: Pamo’nka na muselelwanga bwato butyetye na mulungu wa kalunga ka mema, malongolodi a kipolitike nao endejibwanga na mishipiditu mibi ya bukomo. Kadi monka kemubwaninyapo bangovi kushinta bukomo bwa mulungu, politike nayo keibwanyapo kushinta lupusa lwa ino mishipiditu ya bukomo. Ino mishipiditu idi na kitungo kya konakanya bantu ne kuleta ‘malwa pano panshi.’ (Kusokwelwa 12:12) Nanshi, kushinta kwa binebine kukokeja kuletwa’nka na muntu umo kete udi na bukomo kupita bwa Satana ne bademona bandi. Uno muntu i Yehova Leza.—Mitōto 83:18; Yelemia 10:7, 10.

3. Bene Kidishitu ba bine batumbijanga’nka Bulopwe bwa Leza. Yesu ne bandi bana ba bwanga bādi bayukile amba pa kitatyi kitungwe, Leza ukashimika umbikalo umo momwa mūlu wa kuludika ntanda yonso. Bible utela uno umbikalo bu Bulopwe bwa Leza ne kulombola patōkelela amba Yesu Kidishitu i mutongwe bu Mulopwe wabo. (Kusokwelwa 11:15) Buno Bulopwe byobutala bantu bonso, Yesu wātongele “myanda-miyampe ya bulopwe bwa Leza” bu mutwe wa mwanda wa bufundiji bwandi. (Luka 4:43) Kadi wāfundije bandi bana ba bwanga kulombela amba: “Bulopwe bobe bufike.” Mwanda waka? Mwanda mu buno Bulopwe, kiswa-mutyima kya Leza kikalongeka mūlu ne pano panshi.—Mateo 6:9, 10.

Le penepa, i bika bikafikila imbikalo ya bantu? Bible ulondolola’mba imbikalo ya “panopantanda ponsololo” ikonakanibwa. (Kusokwelwa 16:14; 19:19-21) Shi muntu ukulupile bya binebine amba, Bulopwe bwa Leza busa kutalula’ko malongolodi onso a bantu a kipolitike, i bimwendele’mo aleke kwiakwatakanya. Ne kadi, shi wātompele kukwatakanya imbikalo ya bantu isa konakanibwa, bine wādi ulwa na Leza.

[Bushintuludi pa paje 6]

Batumoni ba Yehova bakwatakenye na bukomo Bulopwe bwa Leza, ke kushintapo myanda ya kipolitike