Ikala na Mumweno Muyampe pa Busongi Bujinajina
Ikala na Mumweno Muyampe pa Busongi Bujinajina
“Ino kudi bakusonga nabo nebakome, kadi keamipo i Mfumwetu.”—1 KOD. 7:10.
LE UKOKEJA KUSHINTULULA?
Le Leza usambakanyanga pamo bantu besongele mu buluji’ka?
I muswelo’ka ubwanya bakulumpe kukwasha Bene Kidishitu badi na bikoleja mu busongi?
I muswelo’ka otufwaninwe kumona busongi?
1. Le Bene Kidishitu bamonanga busongi namani, ne mwanda waka?
KITATYI kisoñanga Bene Kidishitu, batyipanga mutyipo ku meso a Leza—kiselwa kekifwaninwepo kukwatyilwa ku nsongo ya minwe. (Mus. 5:4-6) Yehova byadi Mushiludi wa mpangiko ya busongi, ‘usambakanyanga pamo’ boba belunga mu busongi. (Mako 10:9) Nansha byokudi bijila bitabija butundaile, ino Leza ye usambakanyanga nyeke bantu pamo. Bengidi ba Yehova bafwaninwe kumona busongi bu mpangiko ikutyila bantu pamo, bekale bādi nansha kebādipo batōtyi bandi kitatyi kyobetundaile.
2. I bipangujo’ka byotusa kubandaula mu kino kishinte?
2 Busongi buyampe bubwanya kuleta nsangaji mikatampe. Ino le tukalonga namani shi kijimba kya busongi kibazela? Lelo busongi buzoze bubwanya kukomejibwa? Le i bika bikakwasha boba badi na ndoe miyayate mu busongi?
LE BUKEKALA BWA NSANGAJI’NI BWA NJIA?
3, 4. Le bibwanya kwikala namani shi muntu wakwata butyibi bubi pa kutonga mwinē pandi?
3 Shi busongi bwa Mwine Kidishitu bubanekenya, i nsangaji kadi bukapeja Yehova bulēme. Shi bubakankalwa, ikalanga njia ya binebine. Mwine Kidishitu kunga ulonda buludiki bwa Leza ukasonga nansha kusongwa mu muswelo muyampe. Ku mutamba mukwabo kadi, muntu ukwata butyibi bubi pa kutonga mulume nansha mukaji ubwanya kubulwa nsangaji ne kwikala na njia. Kimfwa, bankasampe bamo bashilulanga kwinangila mwanda wa kwisonga abo papo kebelongolwele mwa kuselela biselwa bya mu busongi. Bamo basokolanga obasaka kwisonga nandi ku Entelenete ne kutwela lubilo lonka mu busongi bwampikwa nsangaji. Bangi nabo baloñanga bubi bukatampe kitatyi kyobenangila ne kwisonga mu muswelo kampanda, ino bakokeja kushilula busongi bwabo pampikwa kwilēmeka bininge umo ku mukwabo.
4 Bene Kidishitu bamo kebasoñangapo “monka mudi Mfumwetu,” kadi basusukanga divule na bipa bilula bilupuka ku kwikala mu kisaka kidi mu mitōtelo mishile. (1 Kod. 7:39) Shi nobe ubadilwa’mo, lomba Leza akufwile lusa ne kukukwasha. Kafundulangapo byobya bilupukile ku bilubo bya muntu bya pa kala, ino ukwashanga boba besāsa balwe na matompo. (Mit. 130:1-4) Ikala na mutyima wa kumusangaja pano ne nyeke, ne ‘tusepo twa Yehova nato tukekala bukomo bobe.’—Neh. 8:10.
SHI KIJIMBA KYA BUSONGI KIDI MU KYAKA
5. Pa mwanda utala busongi bwa kubulwa nsangaji, le i milangwe ya muswelo’ka yotufwaninwe kwepuka?
5 Boba badi na njia mu kipwano kya busongi bakokeja kwiipangula’mba: ‘Le bine mbwanya kukūla busongi bwami bwampikwa nsangaji? Shi kunyuma kwadi kujokelwanga longa nashilula kukimba mwinē pami ungi!’ Bakokeja kufwatakanya kutyiba kijimba kya busongi na kulanga amba—‘Ii mbwanya kwikala monka na bwanapabo! Kyoketwilubwila i kika? Nansha shi nkidipo na bubinga bwa mu Bisonekwa bwa kwilubwila, mwene tubwanya kusansana ne kuloelelwa monka mu būmi?’ Pa kyaba kya kulanga uno muswelo nansha kufwatakanya mobyadi bibwanya kwikadila, Bene Kidishitu bafwaninwe kulonga bukomo bwabo bonso mu ngikadilo yobadi’mo na kukimba buludiki bwa Leza ne kwibulonda.
6. Shintulula byobya byānene Yesu, bisonekelwe mu Mateo 19:9.
6 Shi Mwine kidishitu ukimba kwilubula, ubwanya kwikala nansha kubulwa kwikala na bwana-pabo bwa mu Bisonekwa bwa kwisonga na muntu mukwabo. Yesu wānene amba: “Yewa wakapanga mukajandi kwa kubulwa mwanda wa busekese, kakasonge mukwabo, nabya wapi mambo a makoji; kadi yewa wakasonga mupingwe aye wapi mambo a makoji.” (Mat. 19:9) Pano, “busekese” bufunkila pa makoji ne bubi bukwabo bukatampe bwa bulādi. I biyampe kulomba na kusuminwa pa mulangwe o-onso wa kwilubula shi kashā mwinē petu kalongele busekese.
7. Le i bika bikokeja kulanga boba babandila shi busongi bwa Mwine Kidishitu i buyayate?
7 Bantu badi mu busongi buyayate bakokeja kwialakana pa ngikadilo kampanda ya ku mushipiditu. Mutumibwa Polo wāipangwile kino kipangujo kya mvubu amba: “Ino, wivwane muntu kayūkilepo nansha mwa kulelela kipango kyandi, nankyo le ayūkeko namani mwakulelela kipwilo kya Leza?” (1 Tem. 3:5) Bine, shi ba mulume ne mukaji betela bu Bene Kidishitu ino busongi bwabo buyayate, bantu babandila babwanya kulanga amba bano besongele kebengidijangapo na bubine byobya byobasapula.—Loma 2:21-24.
8. Le i kibi’ka kibwanya kwikala’po shi Bene Kidishitu besongele abatyibe butyibi bwa kusansana nansha kwilubula?
8 Shi ba mulume ne mukaji babatyijibwe bakimba kusansana nansha kwilubula kwampikwa bubinga bwa mu bisonekwa, na bubine kudi kintu kibi mu būmi bwabo bwa ku mushipiditu. Mobimwekela, padi umo nansha abo bonso kebengidijangapo misoñanya ya mu Bisonekwa. Shi badi bine ‘bakulupile mudi Yehova ne mutyima wabo onsololo,’ badi ba kwikala na bubinga bwa kukulupidila amba babwanya kukūla busongi bwabo buyayate.—Tanga Nkindi 3:5, 6.
9. Le Bene Kidishitu bamo bapadilwe mpalo namani pangala pa bukomo bobalongele na kitūkijetyima mu busongi?
9 Masongi mavule adi amweka bu abwanya kupomoka, akokeja kwalamuka kyaba kimo ke a nsangaji ya binebine. Divule dine Bene Kidishitu bakomenanga bikoleja bya mu busongi bapalwanga mpalo. Tala bintu bibwanya kulongeka mu kisaka kidi mu mitōtelo mishile. Mutumibwa Petelo wāsonekele amba: “Bānwe bakaji nenu mo monka, kōkelai balume benu; amba, shi kudi bamobamo bakubulwa kukōkela mwanda, nankyo banekenībwe kwampikwa kwisambilwa mwanda, ponka pa mwikadilo wa bakaji babo; pa kumona mwikadilo wenu byo udi utōka, tō, ne kwakamwa ponka.” (1 Pet. 3:1, 2) Bine, muntu wakubulwa kwitabija ubwanya kwitabija bubinebine pa mwanda wa mwiendelejo muyampe wa mwinē pandi! Kukūla busongi kwa uno muswelo kupejanga Leza bulēme kadi kubwanya kwikala bu dyese dikatampe kudi mulume, mukaji, ne kudi bana bonso bobakabutula.
10, 11. Le i myanda’ka yakubulwa kulangila ibwanya kumweka mu busongi, ino Mwine Kidishitu ukokeja kukulupila bika?
10 Na mutyima wabo wa kusaka kusangaja Yehova, bakunga bavule Bene Kidishitu batoñanga benē pabo mu bukata mwa banababo betabije. Ino nansha nabya, ngikadilo ibwanya kushinta mu muswelo oketulangilapo. Kimfwa mu byaba bimo, mulume nansha mukaji ubwanya kutamija myanda mikomo mu ñeni. Nansha kyaba kikwabo kupwa kwa kwitundaila, mulume nansha mukaji ubwanya kwikala musapudi kakingilanga. Tulete kimfwa: Linda, * Mwine Kidishitu mupyasakane kadi inabana mwipāne, wadi utala kadi kya kulonga, kitatyi kyashilwile wandi mulume mubatyijibwe kutabula ditabula dya kubulwa kukwatañana na Bisonekwa pambulwa kwisāsa ne kupangwa’ye mu kipwilo. Le i bika bifwaninwe kulonga Mwine Kidishitu shi wamone amba kijimba kyabo kya busongi kibashilula kuzela pangala pa buno bubinga?
11 Ukokeja padi kwiipangula amba ‘Le mfwaninwe kwendelela kulonga bukomo bwa kukūla busongi bwami pampikwa kubanga bintu bilongeka?’ Kekudipo muntu nansha umo ubwanya nansha ufwaninwe kukukwatyila buno butyibi. Inoko, tudi na bubinga bwinebwine boketufwaninwepo kulekela kijimba kya busongi kizele. Mwana-mulume nansha mwana-mukaji wa bwine Leza uminina matompo a bikoleja bya mu busongi pa mwanda wa mutyima wandi wa mundamunda, i mulēme kudi Leza. (Tanga 1 Petelo 2:19, 20.) Yehova ukakwasha Mwine Kidishitu ulonga bukomo bukatampe bwa kukomeja busongi bujinajina kupityila ku Kinenwa ne mushipiditu wandi.
I BETEAKANYE KUKUKWASHA
12. Le bakulumpe baketumona namani shi tukimba bukwashi bwabo?
12 Shi ubatanwa na bikoleja mu busongi, kokikaka kukimba bukwashi bwa ku mushipiditu bwa Bene Kidishitu batame ku mushipiditu. Bakulumpe bengilanga bu bakumbi ba luombe kadi bakasangela kukupa madingi a ku mushipiditu atanwa mu Bisonekwa. (Bil. 20:28; Yak. 5:14, 15) Kokafula ku kunena amba abe ne mwinē pobe mubabulwe bulēme shi mukimbe bukwashi bwa ku mushipiditu bwa bakulumpe ne kwisambila nabo pa myanda mikatampe ya mu busongi. Pobamona’mba usakanga na kininga kusangaja Leza, buswe bobakusenswe bukavudila’ko.
13. Le i madingi’ka atanwa mu 1 Kodinda 7:10-16?
13 Shi Bene Kidishitu badi mu bisaka bidi mu mitōtelo mishile abalombe bakulumpe bukwashi, bakulumpe bakanyemena ku ano madingi a mutumibwa Polo a amba: “Ino kudi bakusonga nabo nebakome, kadi keamipo i Mfumwetu’mba: Mukaji kakafundukapo ku mulumyandi, mhm, (wivwane afundukeko, nankyo ēkale bitupu wampikwa kusongwa, shi usaka nabya apwane’nka na mulumyandi). Kadi mulume nandi kakashiapo mukajyandi, mhm. . . . Ke-wi-muntu abe mukaji, lelo uyūke namani’mba: Mpandijanga mulume? Nansha abe mulume nobe lelo uyūke namani amba: Mpandijanga mukaji?” (1 Kod. 7:10-16) Bine i dyese’po kashā shi mwinē petu wakubulwa kwitabija wanekenibwa na mutōtelo wa bine!
14, 15. Lelo Mwine Kidishitu ubwanya kufunduka mwinē pandi kitatyi’ka, ne mwanda waka i biyampe kulombela ne kubandaula milangwe yandi pambulwa budimbidimbi?
14 Le i mu ngikadilo’ka mukokeja mukaji Mwine Kidishitu ‘kufunduka’? Bamo batoñanga kusansana mwanda wa benē pabo bapela kwibakwatakanya ku kusaka. Bakwabo baloñanga namino mwanda wa kumweshibwa malwa makomokomo, nansha kukimba patōkelela kumwipaya ku mushipiditu.
15 Kusansana nansha kuleka kusansana i butyibi bwa muntu mwine. Inoko, mulume nansha mukaji mubatyijibwe ufwaninwe kutūla uno mwanda mu milombelo ne kubandaula milangwe yandi pampikwa budimbidimbi. Kimfwa, lelo i wa kubulwa kwitabija ukimba kumwipaya ku mushipiditu’ni, nansha i Mwine Kidishitu mwine wasūla kifundwa kya Bible, waleka kutanwa ku kupwila kitatyi ne kitatyi ne kutambila kyaba kyonso mu mwingilo?
16. Le i bika bifwaninwe kukankaja Bene Kidishitu baleke kukwata butyibi na kansontomokela mu mwanda utala dilubu?
16 Kusanswa kotusenswe kipwano kyetu na Leza ne kufwija’ko kotufwija’ko pangala pa kyabuntu kya busongi, kufwaninwe kwitukankaja tuleke kukwata na kansontomokela butyibi bwa kwilubula. Byotudi bengidi ba Yehova, tutalwanga na mwanda wa kuyukanya buujila bwa dijina dyandi dijila. Na bubine, nanshi ketukakutepo nansha dimo nkuku ya kutyiba busongi koku tukanina mu mutyima kwisonga na muntu mukwabo.—Yel. 17:9; Mal. 2:13-16.
17. Le i mu ngikadilo’ka motubwanya kunena’mba Leza wityilanga Bene Kidishitu besongele mu ndoe?
17 Mwine Kidishitu wisongele na wakubulwa kwitabija ufwaninwe kulonga bukomo bwa kulama biyampe kijimba kya busongi. Inoko, Mwine Kidishitu kafwaninwepo kwitopeka shi mwinē pandi wakubulwa kwitabija wapele kushikata nandi nyeke, nansha byalonga bukomo bwa binebine bwa kulama busongi bwandi. Mutumibwa Polo wāsonekele amba: Shi “wampikwa kwitabija afunduke i aye mwine, muleke afunduke. Ke-muntu mwanetu, shi mwana-mulume, shi mwana-mukaji, aye kadipo mu bupika bwa bidi namino, ehe. Nanshi Leza witwityilanga mu ndoe.”—1 Kod. 7:15. *
KULUPILA MUDI YEHOVA
18. Nansha shi kebibwanikapo kukūla busongi, i bipa’ka biyampe bibwanya kulupuka ku kukimba kwibukūla?
18 Kitatyi kyowikonda na mwanda o-onso mu busongi, lomba Yehova akukankamike ne kumukulupila nyeke. (Tanga Mitōto 27:14.) Langulukila pa kimfwa kya Linda, utelelwe kūlu’ku. Busongi bwandi bwafudile ku dilubu, nansha byaālongele bukomo mu myaka mivule bwa kutompa kwibukūla. Le wamwene’mba wajimije kitatyi kyandi? Unena’mba, “Nansha dimo.” “Bukomo bonalongele bwapele bantu badi babandila bukamoni buyampe. Ngidi na mutyima wa mundamunda utōka. Kutabukidila, ino myaka yakweshe wetu mwana mwana-mukaji emanije nshinkidingi mu bubinebine. Watamine na bupyasakane ne kwikala Kamoni wa Yehova mwipāne.”
19. Le bikokeja kwikala namani shi tulonga bukomo bwa kukūla busongi?
19 Mwana-mukaji umo Mwine Kidishitu witwa bu Marilyn usangedile kukulupila kwakulupile mudi Leza ne kulonga kwalonga bukomo bukatampe bwa kukūla busongi bwandi. Unena amba, “nadi pa ditompo dya kusansana na wami mulume mwanda kadipo unkwatakanya na lupeto ne pa mwanda wa kutyina kungipaya ku mushipiditu. Inoko, wadi wingila bu mukulumpe kumeso kwa kutwela mu kwiivwana kwa mu bya busunga kwa kubulwa ñeni. Washilwile kubulwa kupwila, twabulwa enka ne kwisamba. Bulwi bwa batumbula bwatwelele mu kyetu kibundi mbwakwatyije moyo bininge nakomenwa enka ne kujinina pantu kwine. Ebiya najingulula amba nadi nami na kilubo. Twashilula kwisamba monka, twashilula monka kifundwa kyetu kya kisaka, ne kutanwa ku kupwila kitatyi ne kitatyi. Bakulumpe badi na kanye kadi betukweshe. Busongi bwetu bwalumbuluka monka dipya. Mwenda mafuku, wami mulume wabwanya monka bisakibwa bya kupebwa madyese pa kipwilo. Adi masusu makatampe, ino kwalupuka bipa biyampe.”
20, 21. Pa kusaka kulēmeka busongi, le i bika byotufwaninwe kusuminwa kulonga?
20 Twikale bankunga nansha basonge, tulongei nyeke bintu na bukankamane ne kukulupila mudi Yehova. Shi tubatanwa na bikoleja mu busongi, tufwaninwe kukimba na kininga muswelo wa kupwija’byo, koku tuvulukile amba boba besongele ‘kebadipo ne bubidi bwine ke mubidi’tu umo.’ (Mat. 19:6) Ne kadi tuvulukei amba, shi tuminine mu kisaka kikalañane nansha byomudi masusu, tubwanya kwimwena nsangaji ya kunekenya mwinē petu atwele mu mutōtelo wa bine.
21 Tusuminwei kunanga na budyumuku mwanda wa kuleta bukamoni buyampe ku bantu ba panja pa kipwilo betubandila nansha shi tudi mu ngikadilo’ka. Shi busongi bwetu bujinajina, tulombelei kyaba kyonso, kubandaula kukanina kwetu kwa mutyima pampikwa budimbidimbi, kubandaula na katentekeji Bisonekwa, ne kukimba bukwashi bwa ku mushipiditu bwa bakulumpe. Kutentekela pa bino byonso, tusumininwei kusangaja Yehova Leza mu bintu byonso ne kulombola kufwija’ko kwa binebine pangala pa kyabuntu kyandi kya kutendelwa kya busongi.
[Kunshi kwa dyani]
^ Majina i mashintwe.
^ Tala dibuku “Mwilamei mu Buswe bwa Leza,” paje 219-221; Kiteba kya Mulami kya Falanse kya 1 Kweji 11, 1988, paje 26-27; ne kya 1 Kweji 1, 1976, paje 31.
[Bipangujo bya Kifundwa]
[Bushintuludi pa paje 16]
Divule dine Bene Kidishitu bomininanga mu busongi bujinajina bapalwanga mpalo
[Bushintuludi pa paje 18]
Kulupila nyeke mudi Yehova ne kumulomba akukankamike
[Kifwatulo pa paje 15]
Yehova weselanga Bene Kidishitu besongele balonga bukomo bwa kukomeja busongi bujinajina
[Kifwatulo pa paje 17]
Kipwilo kya bwine Kidishitu kibwanya kwikala nsulo ya busengi ne bukwashi bwa ku mushipiditu