Lelo Divita dya Amakedona Dikafika Kitatyi’ka?

“Namwene kibumbo kikatampe kīne kekibadibwapo na muntu, mhm; batambile mu mizo yonso, ne mu bisaka byonso ne mu bantu, ne mu ndimi, . . . balupukilemo mu oa malwa makatakata.”​—KUSOKWELWA 7:9, 14.

PANO kifuko kekisebe kya divita dya Amakedona. Namani?

Kudi kala bantu bekute mu bumo kujokoloka ntanda yonso bengidila Yehova ne kwiendeja mungya misoñanya ya peulu ya mu mwikadilo idi mu Bible. Na bukwashi bwa Leza, bantu midiyo ne midiyo ba mu mizo yonso, bisaka, ne ndimi i babungakanibwe pamo mwanda wa kubunda bubana na bana bwa buswe ne bumo. Buno bu bana na bana budi mu bukata mwa Batumoni ba Yehova.—Yoano 13:35.

Panopano ponka Satana usa kukongakanya bibumbo byandi ne kutamba bano bantu ba ndoe bulwi bukatampe, kadi bamweka bu bantu kebadipo ne wa kwibalwila. (Ezekyele 38:8-12; Kusokwelwa 16:13, 14, 16) Le ubwanya kwitabija uno mwanda namani? Bible ulombola binkumenkume bipotoloke bitukwasha tuyuke kitatyi kikafika divita dya Amakedona. Binkumenkume bivule bilombwelwe ke bifikidile kala.

Binkumenkume Byomona Bifikidila

Bana ba bwanga ba Yesu bāmwipangwile muswelo ukayuka bantu “pamfulo ya panopantanda” yadi pabwipi. (Mateo 24:3) Yesu wālondolwele na kwisambila pa kitatyi kya kumeso, paānene amba, “muzo ukataluka kukatamba muzo mukwabo, ne bulopwe nabo monka. Kadi kukēkalanga bipengele bya nzala, ne bintenshi bya kutenkanya ntanda, kyadi koku, ke kidi koku, kyadi koku, ke kidi koku.” Kadi wabweja’ko amba: “Nanshi bino byonso i bya pangalwilo pa misongo.” (Mateo 24:7, 8) Mutumibwa Polo wātelele kino kitatyi kimo kyonka bu “mafuku a kumfulo,” na kunena amba ano mafuku adi a kwikala “myaka ya malwa.” (2 Temote 3:1) Lelo umona amba buno bupolofeto bulombolanga binkumenkume bilongeka dyalelo?

 I kika kinenenwa amba kino kitatyi kikekala kikomo? Mutumibwa Yoano uleta bubinga. Wālaile amba kukekala “kakitatyi katyutyu” kene kakatādilwa na mingilo ya Satana ne bademona bandi pano pa ntanda. Satana ulombwelwe bu udi na “bukalabale bukatampe” mu kano kakitatyi. (Kusokwelwa 12:7-12) Lelo kumwenepo amba kudi mushipiditu wa bukalabale ne butapani mu bantu dyalelo, ke enkapo mu kifuko kimo ino kujokoloka ntanda yonso?

Kadi Yesu wānene amba mu kino kitatyi kya makambakano makatampe, mukengilwa mwingilo wa kutendelwa. Wānene amba “īno myanda-miyampe ya buno bulopwe[bwa Leza] īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” (Mateo 24:14) Dyalelo, mu matanda 235 ne kupita, Batumoni ba Yehova basapulanga myanda miyampe ya Bulopwe bwa Leza mu ndimi 500 ne kupita. Mapepala abidi emanine pa Bible obalupulanga, Kiteba kya Mulami ne Réveillez-vous !, i mapepala abanibwa bininge kujokoloka ntanda yonso. Batumoni i balamune Bible mu kintu kya ndimi 100. Mwingilo wabo wingilwanga na bantu ba kwituma ne kukwatakanibwa na byabuntu bya kwisakila. Le kano kampanye kakatampe ka busapudi kafikidijanga bupolofeto bwa Yesu?

Kadi Bible ulombola binkumenkume bikwabo bikatwala ku divita dikalwa Yehova Leza na boba balwa nandi. Tala buno bupolofeto busatu bosa kumona bufikidila.

Binkumenkume Byosa Kumona Panopano Bifikidila

Bupolofeto 1. Bible unena amba mizo ikēla lubila lukatampe lwa amba “ke talala, nyā, yonka ndoe.” Ino mizo ikokeja kulanga amba panopano ponka isa kupwa myanda mikatampe ya bantu. Inoko, binkumenkume bikalonda kupwa kwa bino binenwa kebikaletapo ndoe nansha dimo.—1 Tesalonika 5:1-3.

Bupolofeto 2. Kadi, maludiki mavule akakwata butyibi bwa kutalukila malongolodi a bipwilo bya ntanda yonso. Mu Bible, ano maludiki i melekejibwe na nyema wa ntanda; ne mitōtelo ya bubela ya ntanda nayo na mwana-mukaji utentamine pa kinyema. (Kusokwelwa 17:3, 15-18) Nyema wa kyelekejo ukalonga pampikwa kuyuka bisaka Leza na konakanya mitōtelo itēla bya bubela bu imanine Leza.

Kimfwa, mutumibwa Yoano ushintulula uno mwanda namino amba: “Oa masengo dikumi o wamwene’a, ne kinyema’kya, bano bo bakamushikwa wabwitwa ne kumusala ne kumuvula, kadi bakamudya mwita wandi, ne kumusokelela fututu mu mudilo. Ke-muntu aye Leza webatunwine kumityima kwabo kulongela monka muswidile mutyima wandi.”—Kusokwelwa 17:16, 17.

Bupolofeto 3. Kupwa kwa kunekenya ino mitōtelo ya bubela, Satana ukakongakanya mizo mwanda wa kulwa boba batōta Yehova Leza.—Kusokwelwa 7:14; Mateo 24:21.

Le Ukalonga Namani?

Shi kwamwene mukenga wa kwifunda Bible na katentekeji, ubwanya kukomenwa kukulupila amba bino binkumenkume bitelelwe kulu’ku bikafikidila. Ino kudi bubinga bwinebwine bwa kukulupidila amba bintu byonso bikafikidila ne amba bino binkumenkume bisa kufikidila panopano ponka. Bupolofeto buvule busonekelwe mu Bible ke bufikidile bwitupanga kikulupiji. *

Ubulwe’po kwitūdila’ko kitatyi kimo kya kuyuka mwanda waka Batumoni ba Yehova bakulupile amba “divita dya difuku dikatakata dya Leza, Mwinebukomobonso” dibafwena pabwipi ne mwanda waka kufwaninwepo kwidityina? Wibanene bakulombole byobya binena Bible byofwaninwe kulonga pa kubadilwa mu boba balaminwe na Yehova Leza. (Kusokwelwa 16:14) Byobya byowifunda bikokeja kushinta mumweno omona bintu bya kumeso.

[Kunshi kwa dyani]

[Bushintuludi pa paje 8]

Lelo mwingilo wa Batumoni ba Yehova o-ao ufikidija bupolofeto bwa mu Bible?