Lelo Abalahama Wādi Ani?

IBANTU batyetye kete bādi batumbe bininge mu bipwilo bya ntanda. Abalahama * wādi ulēmekelwe na Bayuda, Bamizilma ne Bene Kidishitu, bāmutelele bu “muntu wa bulēme mpata” ne bu “kimfwa kikatampe kya lwitabijo.” Bible umutela bu “mukulutuba wa bonso bakwitabija.”—Loma 4:11.

Mwanda waka Abalahama wādi ulēmekelwe bininge? Kintu kimo bidi, Abalahama i muntu umo kete utelelwe na Bible bu mulunda na Leza—kadi misunsa isatu mituntulu!—2 Bilongwa 20:7; Isaya 41:8; Yakoba 2:23.

Inoko kumutamba mukwabo, Abalahama wādi muntu’nka bwa batwe. Wātenwe na bikoleja bivule’nka na bitutana—kadi wēbinekenye. Le usaka kuyuka mwaālongele? Tubandaulei binena Bible pa uno muntu utulumukwa.

Mwaātamine

Abalahama wābutwilwe mu 2018 K.K.K., wātamina mu ntanda ya Ulu. (Ngalwilo 11:27-31) Ulu kyādi kibundi kikatampe kadi kya bupeta. Mwādi muyudile butōtyi bwa bankishi. Padi Tela shandya Abalahama wādi ubadilwa mu boba bādi batōta bankishi beshileshile. (Yoshua 24:2) Ino Abalahama wātongele kutōta Yehova * kasuku kandi pa kyaba kya kutōta baleza bakwabo ba bankishi bakubulwa būmi.

Lelo i bika byātonwene Abalahama akwate buno butyibi? Bine Abalahama wāikele’ko kitatyi kampanda na Shema mwana Noa mu bula bwa myaka 150. Lelo shi bādi bapwene na uno mukulumpe, kino kyādi kibwanya kwikala na lupusa’ka padi? Abalahama wādi ukokeja kuboila ñeni kudi Shema ya mwādi mwa kupandila ku Dilobe. Kadi wādi ukokeja kuboila ñeni ku kamweno kadi mu kutōta Yehova, Leza wālamine Shema ne kisaka kyandi ku dino Dilobe.

Ekale shi i kupityila kudi Shema nansha mu muswelo mukwabo, Abalahama wāitabije byobya byaādi wifunda padi Leza wa bine. Yehova “utompanga mityima,” kitatyi kyaābandawile Abalahama wāmwene kintu kiyampe mwadi, ebiya wāmukwasha ekale muntu muyampe.—Nkindi 17:3; 2 Bilongwa 16:9.

Būmi Bwandi

Abalahama wādi na būmi buyampe kadi buyule nsangaji, nansha byobwādi divule na makambakano, ino abo’ko bwa mvubu. Tubandaulei’ko’tu bidi bintu bityetye byaēmwenine.

▪ Abalahama paādi wikele mu Ulu, Leza wāmunene ashiye ino ntanda yaābutwidilwe’mo ende ku ntanda yaādi wa kumulombola. Nansha ba Abalahama ne Sala byokebādipo bayukile myanda yonso—kobādi bakwenda nansha kine kyebānenene Leza bataluke—bākōkele. Mwenda mafuku ba Abalahama ne Sala bākashikete mu mapema mu ntanda ya Kenani, bāshikete bu beni mu būmi bwabo bonso.—Bilongwa 7:2, 3; Bahebelu 11:8, 9, 13.

▪ Pādi kepābutwile ba Abalahama ne Sala Yehova wālaile kuvudija muzo kupityila kudi Abalahama. Yehova wābwejeje’ko amba bisaka byonso bya pano panshi byādi bya kweselwa dyese kupityila kudi Abalahama. (Ngalwilo 11:30; 12:1-3) Yehova wāfikidije uno mulao mwenda mafuku. Wāsapwidile Abalahama amba lutundu lwandi lwādi lwa kwikala tununu na tununu pamo bwa ñenyenye ya mūlu.—Ngalwilo 15:5, 6.

 ▪ Kitatyi kyābwenye Abalahama myaka 99, Sala nandi kubwipi kwa myaka 90, Yehova wēbalaile’mba bakabutula mwana mwana-mulume. Kino kyādi kimweka bu kekibwanikapo kumeso a bantu, ino kepāijijepo ba Abalahama ne Sala bājingulwile amba i kutupu kintu nansha kimo “kikomene Yehova.” (Ngalwilo 18:14) Mwaka pa kupita’po, Abalahama papo na myaka 100, wabutula mwana mwana-mulume wāinikilwe bu Isake. (Ngalwilo 17:21; 21:1-5) Leza wālaile patōka amba i kupityila kudi Isake, kwaādi wakwesela muzo wa muntu.

▪ Myaka mivule pa kupita’po, Yehova walomba Abalahama kintu kikomo: Wamunena ele Isake wandi mwana wasenswe bu kitapwa, nansha byādi uno nkasampe kasongele ne kubutula bana. Nansha mulangwe wa kujimija mwana byowādi wa kumusansa bininge, ino Abalahama wākōkele ne kwela waela Isake bu kitapwa. Abalahama wādi ukulupile bya binebine amba Leza udi na bukomo bwa kusangula Isake, shi uswele mwanda wa kufikidija milao Yandi. (Bahebelu 11:19) Kitatyi pokyābwene kya Abalahama kulambula wandi mwana, Leza wamukankaja, wapandija būmi bwa Isake. Wāfwijije’ko Abalahama pa kikōkeji kyandi. Penepa Yehova wāpituluka mu milao yandi mibajinji yaālaile Abalahama.—Ngalwilo 22:1-18.

▪ Abalahama pa kubwanya myaka 175 wafwa. Bible unena amba “wafwa mu bununu byamwiko, myaka mifikile’tu she, mununu mununupidile myaka.” (Ngalwilo 25:7, 8) Mu uno muswelo Abalahama wēmwenine kufikidila kwa mulao wālaile Leza—wa amba wādi wa kulāla myaka mivule kumeso kwa kufwa mu ndoe.—Ngalwilo 15:15.

Kipyanwa Kyandi

Abalahama i mutabuke kulampe bantu bādi bāyukene mu bipwilo ne mu mānga tamba kala. Dyalelo, nsekununi yandi ikidi na mvubu, itulombola kimfwa kiyampe kyotufwaninwe kwiula. (Bahebelu 11:8-10, 17-19) Tubandaulei pano ngikadilo miyampe iná yālombwele Abalahama. Tusa kushilula padi na ngikadilo yandi iyukene biyampe—lwitabijo.

[Kunshi kwa dyani]

[Kapango pa paje 4]

Muntu Umo wa Mvubu mu Mānga ya mu Bible

Mu mashapita dikumi mabajinji a mukanda wa mu Bible wa Ngalwilo, musekunwinwe mānga ya bana-balume palapala ba lwitabijo, ba Abele, Enoke, ne Noa. Nansha nankyo, mashapita 15 alonda’ko esambila bininge pa būmi bwa muntu umo—ke Abalahama kadi.

Pakwabo kadi, Bible wisambile dibajinji pa myanda imo-imo ya mvubu mpata itala padi Abalahama. Kimfwa, mu mānga ya būmi bwa Abalahama tutana . . .

▪ musunsa mubajinji utelelwe Leza bu Ngabo, nansha mulami wa bengidi bandi.—Ngalwilo 15:1; tala Kupituluka 33:29; Mitōto 115:9; Nkindi 30:5.

▪ musunsa mubajinji usonekelwe kwitabija mudi Leza.—Ngalwilo 15:6.

▪ musunsa mubajinji utelelwe kishima mupolofeto.—Ngalwilo 20:7.

▪ musunsa mubajinji utelelwe buswe bwa mbutwile.—Ngalwilo 22:2.