3. Bipupo bya Mbá

“Bantu . . . bakaponenwa na bipupo bya mbá ya malwa.”—LUKA 21:11, Contemporary English Version.

● Bonzali, mwingidi wa Leta utala bundapi mu ntanda imo ya Afrika mudi mavita, walonga bukomo bwandi bonso bwa kundapa bengidi ba mu mingotyi ba mu kyabo kibundi bakuba na misongo ya Marburg. * Walombele bukwashi ku bengidi nandi badi mu kibundi kikatampe, ino kebailepo. Myeji iná pa kupita’po, ebiya bukwashi bwaiya, ino bwatana Bonzali ke mufwe. Wasambukilwe na luba lwa Marburg paadi undapa bengidi ba mu mingotyi mwanda wa kwibapandija.

I BIKA BINE BILONGEKA? Misongo ya mayumba (kimfwa kikofolo), kupitwa munda, SIDA ne bishi byayo, kikofolo kya mushinga, ne musamvu ibadilwa mu misongo mibi isusula bantu. Mu ino myaka, ino miswelo itano ya misongo i mipaye bantu kupita pa midiyo 10 ne kipindi. Mu muneneno mukwabo, mu masekonde onso asatu mufwanga muntu umo ku ino misongo umbula bwa mwaka.

BAVULE BANENA’PO NAMANI? Bantu bendanga bavudila’ko pano pa ntanda, o mwanda bipupo nabyo byendanga bivudila’ko. Bantu i bangi babwanya kusambukilwa.

LE BINO BYOBANENA I BYA BINE? Bantu pano pa ntanda abavula bya malwa. Kadi buyuki nabo bwa kukwata misongo, kwiimika, ne kwiyundapa bubelundila’ko. Mungya buluji, mwene misongo yadi ifwaninwe kutyepa mu bisaka? Ino yō, po pene ibavula.

LE ULANGA’PO NAMANI? Le bantu basusulwanga na bipupo bya mbá ya malwa pamo na mwālaile Bible?

Kutenkana kwa nshi, bipupo bya nzala ne bya mbá i bintu bilongeka abyo bine ne kukolomona mfu ya midiyo ya bantu. Kudi bantu midiyo ne midiyo basusulwa na bakwabo—bavule basusulwa’nka ne na bene badi bafwaninwe kwibalama. Tala binena bupolofeto bwa mu Bible amba byo bikalongeka.

[Kunshi kwa dyani]

[Bushintuludi pa paje 6]

“Kudibwa na ntambo nansha na kintu kikwabo kya panja kulenga nzuba, inoko kudibwa munda na musongo kabidye wa malwa ne kwiumona wenda usambakana koku ne koku ko kwine.”

—MICHAEL OSTERHOLM, MWIFUNDI WA BIPUPO.

[Kutambile Kifwatulo pa paje 6]

© William Daniels/Panos Pictures