Lelo I Bāni Basapula Myanda Miyampe?

“ . . . īkasapwila panopantanda ponso.”—MATEO 24:14.

MYANDA miyampe isapulwanga pano pa ntanda ponso na Batumoni ba Yehova. Beisapulanga mu miswelo palapala. Muswelo umo i kupityila ku . . .

Binenwa. Pamo bwa Yesu ne bandi bana ba bwanga, Batumoni ba Yehova bafikilanga bantu na myanda miyampe. (Luka 8:1; 10:1) Kebelaijangapo bantu beile kobadi. I Batumoni bonso—kintu kya midiyo isamba-ibidi ne musubu—bepēne mu mwingilo wa kusapwila bantu bukamoni bwa Bulopwe bwa Leza. Basapulanga ku njibo ne njibo, mu bipito, ku telefone, ne mu miswelo mikwabo. Mwaka wapityile’u, Batumoni bapityije mansaa kupita pa mudiyala umo ne kipindi mu uno mwingilo.

Bafundijanga bantu myanda itala Bulopwe bwa Leza ne ‘byonso byālaile Yesu mwine.’ (Mateo 28:20) Bendejanga kitatyi ne kitatyi bifundwa bya Bible midiyo mwanda ne musubu kwampikwa kufutwa.

Batumoni basapulanga konsokonso—mu matanda 236. Basapwilanga bantu ba būmi bwa miswelo ne miswelo. Basapulanga mu bibundi bikatampe ne bityetye, mu mató a Amazoni ne taiga (ditó dya kungala kwa umbuo) ya Siberi, mu ntanda mutuputupu ya Afrika ne mu Ngulu ya Himalaya. Kebafutwangapo pa uno mwingilo; bengilanga’o na lupeto lwa abo bene na kyabo kitatyi, koku bakunkwa na buswe bobaswele Leza ne bantu. Kadi bayukanyanga myanda miyampe kupityila ku . . .

Mabuku Obatampa. Mutwe wa mwanda mutuntulu wa dino dipepala i Kiteba kya Mulami Kisapula Bulopwe bwa Yehova, pano dilupulwanga mu ndimi 185, kadi buvule boditampwa ku nimelo ne nimelo i bupite pa midiyo 42. Dipepala dyendela pamo na dino i Réveillez-vous ! nadyo disapulanga Bulopwe, ne dilupulwanga mu ndimi 83, ne buvule boditampwa ku nimelo ne nimelo busenselela ku midiyo 40.

Bitabo, maboloshile, matrakte, madishike CD, MP3 ne DVD ashintulula bufundiji bwa mu Bible adi’ko mu kintu kya ndimi 540. Mu myaka’tu dikumi yapityile, Batumoni balupwile ne kwabanya bino bintu midiyala 20 ne kupita, mwayene wa bintu 3 ku muntu ne muntu udi pano pa ntanda!

Batumoni ba Yehova ke batampe nansha kutampija malamuni palapala a Bible. Bwalamuni bwa New World Translation of the Holy Scriptures—bwalamwinwe, kutampwa, ne kwabanibwa na Batumoni—budi’ko butuntulu nansha kipindi mu ndimi 96. Mabible midiyo 166 ne musubu ke mapwe kwabanibwa. Kadi Batumoni basapwilanga bantu myanda miyampe ya Bulopwe kupityila ku . . .

 Kupwila kwa Bwine Kidishitu. Kupwila kobapwilanga yenga ne yenga ku Mobo a Bulopwe ke kwingilapo’tu mingilo ya kipwilo; ino i mwanda wa kufundijibwa. Kunenwanga mwisambo wa mutwe mwanda kampanda wimanine pa Bible, kadi befundanga’ko Bible kupityila ku Kiteba kya Mulami ne mabuku makwabo. Kadi ku kuno kupwila, Batumoni befundanga ne mwa kwikadila basapudi ba myanda miyampe bafike’po.

Batumoni befundanga myanda imo yonka mu bipwilo tununu 107 ne kupita kujokoloka ntanda yonso, ne kino kiletanga bumo. Muntu ense ukokeja kutanwa ku kuno kupwila. I kutupu mikongo ya lupeto. Shako, ino mingilo yonso yadi ya kwikala ya bitupu shi Batumoni kebadipo balonda byobafundija. O mwanda, baloñanga bukomo bwa kumwekeja myanda miyampe kupityila ku . . .

Būmi Bwabo. Beelelanga’ko kuleta kimfwa mu būmi bwabo bwa Bwine Kidishitu, baloñanga bukomo bwa kulongela bakwabo bintu monka mobasakila nabo bebalongele. (Mateo 7:12) Nansha byobadi bakubulwa kubwaninina, bakutupatupa, bekankilanga’ko kulongela bantu na buswe na kwibasapwila myanda miyampe ne na kwibakwasha ponso pobibwanika.

Batumoni ba Yehova kebasakangapo kushinta ntanda na busapudi bwabo. Ino, shi bavuije uno mwingilo musakila Yehova, penepa mfulo nayo keifika shayo, mwālaile Yesu. Shi ibaiya, le ntanda ikekala namani ne bantu badi’po?

[Kifwatulo pa paje 7]

Myanda miyampe isapulwanga pano pa ntanda ponso na Batumoni ba Yehova