Kintu 5

Pwija Bulanda Bobe bwa pa Mutyima

I BIKA BIFUNDIJA BIBLE? “Dyese dyo dyabo bakulandapala pa mutyima.”—Mateo 5:3.

I BIKA BIKOLEJA? Kudi bipwilo palapala tununu, kadi bivule bifundija bintu bipatanya pa muswelo wa kupwa bulanda bwa ku mushipiditu. I muswelo’ka le okayuka kipwilo kifundija bubinebine ne kisangaja Leza? Balembi bamo batumbe banena’mba kebidipo na buluji kwitabija ne kwipāna kudi Leza. Julunale umo (Maclean’s) unena mu kīpi milangwe ya muntu umo utunanga kwikala’ko kwa Leza, amba: “Mulangwe wa Bwine Kidishitu wa’mba kudi kintu kampanda kitabukile bino byotufunda ne byotumona . . . utūkijanga bulēme bwa būmi bumo kete botudi nabo ne kukankamika bikandangobo.”

I BIKA BYOKALONGA’PO? Bandaula bukamoni bulombola’mba Leza udi’ko. (Loma 1:20; Bahebelu 3:4) Kokaleka muntu nansha umo akukankaje kukimba malondololo a bipangujo bya mvubu, pamo na bino bilonda’ko: I kika kine kyotwikadile’ko? Le kudi būmi pa kupwa kufwa? Mwanda waka kudi masusu mavule nenki? Le i kika kisaka Leza kondi? Kutana malondololo otondwa ku bino bipangujo kudi na mvubu pa kutana kuloelelwa kwa endaenda.

Inoko, koketabija kitabijeitabije byobya bikulombola bakwabo. Kinenwa kya Leza kikukankamika wingidije “mutyima” obe mwa kujingulwila kya kuloelelwa Leza. (Loma 12:1, 2) Ukapalwa mpalo pa bukomo bolonga. Shi witūdile’ko kitatyi kya kwifunda Bible ne kwingidija madingi andi, ukepuka makambakano, kuzumbijazumbija mutyima ne kubweja nsangaji mu būmi bobe. Kino ke kya bubelapo. Midiyo ne midiyo ya bantu ba miswelo yonso bemwenanga byabuyabuya bitamba ku kwifunda bubinebine butala padi Leza ne mpango yandi. Kimfwa, tanga nsekununi ya bine idi pa paje 18 kutūla ku paje 21 wa dino dipepala.

Kitatyi kyomwena mu kwingidija madingi a tunangu adi mu Bible, lulamato lobe kudi Leza lukatyita. Wabulwa’po kwitabija lwito lwa kwifunda Bible na Batumoni ba Yehova? Shi ulonge namino, padi uketabija byānene mutumibwa Polo wāsonekele amba: “Kwakoko, shako, eyo! umbwine-Leza utūkije ne mutyima monka, kyo kimoni kīne kikata.”—1 Temote 6:6.

[Kifwatulo pa paje 8]

Jingulula kya kuloelelwa Leza