Yehova I Mulopwe Mukatakata Mwine!

“Ke-muntu Yehova, Mwinemukatakatamwine . . . I Mulopwe mukatakata panopantanda ponsololo.”—MIT. 47:2.

1. Le mobimwekela Polo wādi na milangwe’ka kitatyi kyaānene binenwa bisonekelwe mu 1 Kodinda 7:31?

 “MWIKADILO wa panopantanda upityidilanga.” I mutumibwa Polo wānene namino. (1 Kod. 7:31) Bimweka’mba wādingakenye ntanda na kikailo, pakaila bakayi ba drame, bamo bakaya bu bantu bayampe bakwabo nabo bu babi kufika ne bishinta makayo.

2, 3. (a) Le kukambakanibwa kwa bubikadi bwa Yehova kubwanya kudingakanibwa na bika? (b) I bipangujo’ka byotusa kubandaula?

² Dyalelo, kudi mwanda wa mvubu mikatampe ulongeka—kadi ukutala ne abewa! Utalanga nakampata kubingijibwa kwa bubikadi bwa Yehova Leza. Tukokeja kwelekeja uno mwanda na ngikadilo ibwanya kulongeka mu ntanda kampanda. Bukila bumo, bwendejibwa na buludiki bwa ntanda’ya buleta ndudi. Bukila bukwabo, bwendejibwa na buludiki bubi bwa manyengenyenge, bupolapola ne butapani. Bwendeji bwampikwa kwitabijibwa na Leta bukambakanyanga buludiki bwa ntanda’ya ne kutūla pa ditompo dikōkeji dya bekadi bonso kudi Leta.

³ Kudi mwanda wiifwene na uno mūlu ne pano panshi. Kudi buludiki bufwaninwe bwa “Mfumwami Leza” Yehova. (Mit. 71:5) Ino pano, bantu batuyulwanga na bwendeji bubi bwa “yewa umbi.” (1 Yoa. 5:19) Bukambakanyanga buludiki bufwaninwe bwa Leza, ne kutūla pa ditompo dikōkeji dya bantu bonso ku buludiki bwandi. Le uno mwanda wāshilwile namani? Mwanda waka Leza wālekele bilongeke? I kika kyotukokeja kulonga’po umo ne umo?

Bintu Bidi mu Uno Mwanda

4. Le mwanda uyukene mūlu ne pano panshi udi na bintu’ka bibidi bikwatañene?

⁴ Uno mwanda uyukene mūlu ne pano panshi udi na bintu bibidi bikwatañene: Bubikadi bwa Yehova ne bululame bwa bantu. Mu Bisonekwa, Yehova utelwa’mo bu “Mwinemukatakatamwine.” Kimfwa mulembi wa mitōto wāimbile na kikulupiji kyonso amba: “Yehova, Mwinemukatakatamwine . . . i Mulopwe mukatakata panopantanda ponsololo.” (Mit. 47:2) “Mwinemukatakatamwine” i yewa udi na lupusa nansha ubikele peulu pa bonso. Nanshi tudi na bubinga buvule bwa kumona Yehova Leza bu Mwine Mukatakata Mwine.—Dan. 7:22.

5. Mwanda waka tufwaninwe kukunkwa mutyima tukwatakanye bubikadi bwa Yehova?

⁵ Yehova Leza, byadi Umpangi, i Mubikadi wa diulu ne ntanda yonso. (Tanga Kusokwelwa 4:11.) Kadi Yehova i Mutyibi, Mujidiki wa bijila, ne Mulopwe wetu, mwanda aye mwine ye utyiba mambo, ujidika bijila, ne kupwija myanda itala umbikalo wa diulu ne ntanda. (Is. 33:22) Būmi bwetu byobutambile kudi Leza kadi twendejibwanga nandi, tufwaninwe kumumona bu Mfumwetu Mwine Mukatakata Mwine. Mutyima uketukunka tukwatakanye kitenta kyandi kya peulu shi tulame nyeke mu ñeni amba “Yehova wakankamika lupona lwandi mu madiulu; kadi bulopwe bwandi i bubikale konso.”—Mit. 103:19; Bil. 4:24.

6. Le bululame i bika?

⁶ Pa kukwatakanya bubikadi bwa Yehova, tufwaninwe kulama bululame bwetu  kwadi. “Bululame” bushintulula mwikadilo mubwane nansha butuntulu. Muntu mululame i wakubulwa kutopekwa kadi moloke. Mukulutuba Yoba wādi muntu wa uno muswelo.—Yoba 1:1.

Mwashilwidile Uno Mwanda

7, 8. Le Satana wāpatenye namani boloke bwa bubikadi bwa Yehova?

⁷ Ke papite myaka 6000 ne musubu, kipangwa kya ku mushipiditu kyāpatenye boloke bwa bubikadi bwa Yehova. Kilokoloko kya kusaka kutōtwa kyo kyālengeje uno ntomboki anene ne kulonga nabya. Wāongwele ba mulume ne mukaji babajinji, ba Adama ne Eva baleke kukōkela ku bubikadi bwa Leza kadi wāsubija ne dijina dya Yehova na kumutela bu mbepai. (Tanga Ngalwilo 3:1-5.) Uno ntomboki waikala ke Walwana mukatampe, Satana (Kinkwa), Dyabola (Vubavuba), nyoka (Ñongojani), ne mukishi (wa budyani).—Kus. 12:9.

⁸ Satana wētudile aye mwine bu mulopwe kinkwa. Le Mulopwe Mukatakata Mwine Yehova wādi wakulonga’po namani? Le wādi wa kwipaya ponka na ponka bantomboki basatu—Satana, Adama, ne Eva? Shandi, wādi na bukomo bwibepaya, kadi kulonga namino kwādi kwa kupwa lupata lwa kuyuka i ani udi na lupusa kutabuka. Kadi kyādi kya kulombola amba Yehova wānene bya bine pa mfuto ya kujilula kijila kyandi. Mwanda waka Leza kālongelepo namino?

9. Lelo Satana wāpatenye bika?

⁹ Satana pa kubepela ne kubombola ba Adama ne Eva kudi Leza, wāpatenye lupusa lwa Yehova lwa kunena bantu bamukōkele. Kadi, pa kongola ba mulume ne mukaji babajinji baleke kukōkela Leza, Satana wātatene kikōkeji kya bipangwa byonso bya ñeni. Monka mokilombwelwe mu mwanda utala Yoba, muntu wādi na dikōkeji ku bubikadi bwa Yehova, Satana wānene amba ukokeja kubombola bantu bonso balamuke kudi Leza.—Yoba 2:1-5.

10. Lelo Leza pa kuleka’ko kyaba penepa kabingija bubikadi bwandi, wāletele mukenga wa bika?

¹⁰ Yehova pa kuleka’ko kyaba penepa kabingija bubikadi bwandi, wāletele Satana mukenga wa kulombola shi byaānene i bya bine. Kadi Leza wāpele bantu mukenga wa kulombola dikōkeji ku bubikadi bwandi. I bika bilongekele mu myaka tutwa na tutwa yapita’po? Satana wāshimikile bwendeji bukomo abo’ko bubi. Yehova usa konakanya’bo ne Dyabola mwine, mwanda wa kulombola patōka’mba bubikadi bwa Leza i boloke. Yehova Leza wādi bine uyukile mobikafudila senene paālaile’kyo kitatyi kyāshilwile butomboki mu Edena.—Ngal. 3:15.

11. Lelo i bika bilongele bantu bavule bitala bubikadi bwa Yehova?

¹¹ Bantu bavule balombolanga lwitabijo ne kulama bululame bwabo ku bubikadi bwa Yehova ne kutōkeja dijina dyandi. Mu bano bantu, mubadilwa Abele, Enoke, Noa, Abalahama, Sala, Mosesa, Luta, Davida, Yesu, bana ba bwanga babajinji ba Kidishitu, ne midiyo ya bantu balamine bululame dyalelo. Bano bantu bakwatakenye bubikadi bwa Leza balombolanga’mba Satana i mbepai kadi batōkejanga dijina dya Yehova dyāsubijibwe na Dyabola pa kwitatula’mba ukabombola bantu bonso kudi Leza.—Nk. 27:11.

Tuyukile Mobikafudila

12. I kika kitukulupija’mba Leza kakalekapo bubi nyeke?

¹² Tubwanya kukulupila’mba Yehova usa kubingija bubikadi bwandi. Kakalekapo bubi bwikale’ko nyeke, kadi tuyukile’mba tudi mu mafuku a ku mfulo. Yehova wāonakenye babi ku Dilobe. Wāonakanya Sodoma ne Ngomola, Felo ne bandi. Shisela ne kibumbo kyandi, Senakediba ne bibumbo byandi bya Bene Ashidia kebākomenepo Mwine Mukatakata Mwine. (Ngal. 7:1, 23; 19:24, 25; Div. 14:30, 31; Bat. 4:15, 16; 2 Bal. 19:35, 36) Nanshi tukulupilei amba Yehova Leza kakalekapo dijina dyandi ditukwa ne Batumoni bandi basusulwa nyeke. Kadi, pano twimwenine bukamoni bwa kuyukila’po kwikala’po kwa  Yesu ne mfulo ya ino ngikadilo ya bintu.—Mat. 24:3.

13. I muswelo’ka otukatyina konakanibwa pamo na balwana na Yehova?

¹³ Kutyina twakonakanibwa pamo na balwana na Leza, tufwaninwe kulombola dikōkeji ku bubikadi bwa Yehova. Le tukalombola’dyo namani? Na kusansana nyeke na bulongolodi bubi bwa Satana ne kupela kutuyulwa na bandi bantu. (Is. 52:11; Yoa. 17:16; Bil. 5:29) Poso tulonge namino, nabya tubabingija bubikadi bwa Tata wetu wa mūlu ne kwikala na lukulupilo lwa kukapandijibwa na Yehova kitatyi kyakatōkeja dijina dyandi ku mutonko, pakalombola’mba aye ye Mulopwe Mukatakata Mwine wa diulu ne ntanda.

14. Le i bika bisokwelwe mu bipindi palapala bya mu Bible?

¹⁴ Myanda mivule itala muzo wa muntu ne bubikadi bwa Yehova i mishintululwe mu Bible. Mashapita asatu mabajinji etulombola bitala bupangi ne kuponena kwa muntu mu bubi, ino mashapita asatu a mfulo esambila pa kunyongololwa kwa bantu. Mapaje a pa bukata ashintulula matabula palapala akwete Mulopwe Mukatakata Mwine Yehova pa kufikidija mpango yandi itala muzo wa muntu, ntanda ne diulu. Mukanda wa Ngalwilo ulombola mwātwelele Satana ne bubi pano pa ntanda, kipindi kya mfulo kya mukanda wa Kusokwelwa nakyo kilombola mukafundwilwa bubi, Dyabola ukonakanibwa, ne kiswa-mutyima kya Leza nakyo kikalongwa pano panshi enka mokilongelwa kala momwa mūlu. Na bubine, Bible witusokwela kine kiletele bubi ne lufu kadi ulombola muswelo obikatalulwa pano pa ntanda, bikapingakanibwe na nsangaji ya ntanda ne miseke pamo ne būmi bwa nyeke ku boba balamine bululame.

15. Le pakafula mwanda utala bubikadi, umo ne umo ufwaninwe kulonga bika pa kukamwena’mo?

¹⁵ Panopano ponka mwikadilo wa pano pa ntanda usa kupita lonso. Pano ñoma ke isa kusabika, mwanda udi pamo bwa drame utala bubikadi walonga tutwa na tutwa twa myaka ke usa kufula. Satana usa kutalulwa pa kikailo, ne konakanibwa lonso, ino kiswa mutyima wa Leza kikalongeka konsokonso. Pa kumwena’mo ne kusangela madyese mavule alailwe mu Kinenwa kya Leza, tufwaninwe kukwatakanya bubikadi bwa Yehova tamba pano. Ketwakikalai bwa kibembe. Pa kusaka’mba tufikile pa kunena’mba “Yehova udi padi ami,” tufwaninwe kwikala nyeke kwadi.—Mit. 118:6, 7.

Tubwanya Kulama Bululame!

16. Mwanda waka tukulupile amba bantu bakokeja kulama bululame bwabo kudi Leza?

¹⁶ Tubwanya kukwatakanya bubikadi bwa Yehova ne kulama bululame bwetu, mwanda mutumibwa Polo wāsonekele amba: “Kekwadipo kyakutompa kyemutompele, nansha kimo, poso byonka bifikile pa bukomo bwa pa muntu, nanshi Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwakutūkijija mutyima monka.” (1 Kod. 10:13) Le i matompo’ka mene ātelele Polo, ne i muswelo’ka witusawila Leza dishinda?

17-19. (a) I ditompo’ka dyāponene’mo Bene Isalela mu ntanda mutuputupu? (b) Mwanda waka tubwanya kulama bululame kudi Yehova?

¹⁷ Enka na mwikilombwela myanda yātene Bene Isalela mu ntanda mutuputupu, “kyakutompa” kiyanga kupityila ku ngikadila itulengeja tujilule kijila kya Leza. (Tanga 1 Kodinda 10:6-10.) Bene Isalela bādi ba kukomena matompo, ino bāikala na kilokoloko kya “bintu bibibibi” kitatyi kyēbapele Yehova mu kingelengele bisesekwadi bya kudya mu kweji mutuntulu. Nansha byo kebādipo na mwita wa ntanda kyaba kampanda, Leza wēbapele mana mangi a kudya. Ino, bantu bāponena mu ditompo dya kulonda makomwameso kitatyi kya kuboya bisesekwadi.—Umb. 11:19, 20, 31-35.

¹⁸ Dibajinji, Mosesa paāendele kukatambula  Mukanda wa Bijila ku Lūlu lwa Shinai, Bene Isalela bashilula kutōta nkishi, kebatōta kyana kya ñombe ne kwisangaja. Mwendeji wabo umweka na meso byaādi patupu, ditompo dyebakomena. (Div. 32:1, 6) Ke kubwipi’tu na kutwela mu Ntanda ya Mulao, Bene Isalela tununu ne tununu bāongwelwe na bana-bakaji Bene Moabu, bālonga nabo busekese. Penepa, Bene Isalela tununu bafwa mwanda wa bubi bwabo. (Umb. 25:1, 9) Kyaba kimo, bantu ba Isalela bādi baponena mu ditompo dya kutompola bya butomboki, difuku dimo bādi kebatompwela Mosesa ne Leza mwine! (Umb. 21:5) Bantu ba Isalela bēuningileuningile pāonakanibwe muntu mubi Kola, Datani, Abilama, ne boba belungile kobadi, bādi balanga bifwe amba konakanibwa kwa bano bantomboki kekwadipo kwendele’mo. Ku mfulo, Bene Isalela 14700 bafwa ku kinzengele kyātumine Leza.—Umb. 16:41, 49.

¹⁹ Pa ano matompo onso atelwa pano, i patupu ditompo nansha dimo dya muswelo utunya Bene Isalela kukomena. Bantu bāponene mu ditompo mwanda bājimije lwitabijo kadi bāvulaminwe Yehova, buledi bwandi bwa buswe ne boloke bwa mashinda andi. Enka na mobyāfikile ku Bene Isalela, matompo otulwanga nao i onka afikile pa bukomo bwa bantu. Shi tulonge bukomo bwa kwiakomena ne kukulupila amba Leza uketukwashanga, tukalama bululame bwetu. Tukulupile uno muswelo ke-muntu “Leza i wabinebine” kadi ketulekangapo amba: “batompibwe na bitabuke bukomo bwabo.” Yehova ketwēlangapo nansha dimo amba tutanwe na myanda mipite bukomo bwa bumuntu bwa kulonga kiswa-mutyima kyandi.—Mit. 94:14.

20, 21. Le kitatyi kyotutompibwa, Yehova “ukasaula dishinda” namani?

²⁰ Yehova “ukasaula dishinda” na kwitukomeja tukomene matompo. Kimfwa, bantu betupangapanga babwanya kwitususula ku ngitu amba tutune lwitabijo lwetu. Kwitulonga namino kubwanya kwitutompa tutune lwitabijo na kutyina kukupilwa monka, kususulwa, nansha kwipaibwa. Ino, mungya kikulupiji kyālembele Polo ku bukomo bwa mushipiditu mu 1 Kodinda 10:13, tuyukile’mba ngikadilo ileta matompo i ya lupito. Yehova kakeilekapo yendelele kufika ne byotukomenwa kulama kikōkeji kwadi. Leza ukaningisha lwitabijo lwetu ne kwitupa bukomo bwa ku mushipiditu botusakilwa pa kulama bululame.

²¹ Yehova witukwashanga kupityila ku mushipiditu sandu wandi. Uno mushipiditu wituvulujanga milangwe ya mu Bisonekwa yotusakilwa pa kukomena matompo. (Yoa. 14:26) Nanshi, ketwakyongolwai kulonga bibi. Kimfwa, tubaivwanija myanda itala bubikadi bwa Yehova ne bululame bwa bantu. Pa kuyuka ino myanda, bavule bakwashibwe na Leza balame kikōkeji kufika ne ku lufu. Ino ke lufupo lwebasawidile dishinda; i bukwashi bwa Yehova bwebakweshe bōminine ne ku mfulo kwampikwa kupona mu matompo. Uketukwasha ne batwe bene. Kadi witukwashanga ne kupityila ku bamwikeulu bandi ba kikōkeji pamo bwa bengidi “batalwilwe kukwasha boba bakapyana lupandilo.” (Bah. 1:14) Enka mwikilombwela kishinte kilonda’ko, enka boba balamine bululame bo bakokeja kutengela dyese dya nsangaji dya kukwatakanya bubikadi bwa Leza nyeke. Netu tukokeja kubadilwa’mo shi tulamate kudi Yehova bu Mulopwe Mwine Mukatakata Mwine.

Usa Kulondolola Namani?

• Mwanda waka tufwaninwe kumona amba Yehova ye Mulopwe wetu Mwine Mukatakata Mwine?

• Le kulama bululame bwetu kudi Leza kushintulula bika?

• Le tuyukile namani amba Yehova usa kubingija bubikadi bwandi panopano ponka?

• Kukwatañana na 1 Kodinda 10:13, mwanda waka tubwanya kulama bululame?

[Bipangujo bya Kifundwa]