Mfulo Ya Bibi Idi’ko Bine!

LEZA i mwitupe Kinenwa kyandi kya ku bukomo bwa mushipiditu, mwaetulombola bine bilongelanga bantu bibi. Kadi i mwitupe bwanapabo bwa kwitongela ne bukomo bwa kwīfula, bwine bwitukwasha tuleke kulonga bibi. (Kupituluka 30:15, 16, 19) Byotupelwe bino byonso, tukokeja kujingulula mifwatakanyo yonso mibi itufikila ne kutabula matabula a mwa kwiitalwila. Pa kino, kwikoka ku bilongwa bibi kuleta nsangaji kotudi ne ku boba betujokolokele.​—Mitōto 1:1.

Inoko, nansha shi muntu ne muntu ulonga bukomo’ka bwa kukomena bibi, ntanda nayo yendelelanga kwitubeleñenya bilongwa bibi byotumona ku bantu bakwabo. Bible udyumuna amba: “Ebiya kadi, yūka kino nakyo’mba, myaka ya malwa īkāyangako mu oa mafuku a kumfulo’a.” Pa kwitulombola kine kikadije  ano mafuku bu “myaka ya malwa,” unena kadi amba: “Bantu bakēsanswa abo bene, ne bupeta kumo, ne ba bikandangobo, ne bakapuni ka kwitatula, ne babutukani, ne bampikwa kukōkela bakwibabutula, ne kufwija kwine mpika, ne bampikwa bu-ujila, ne bampikwa lusa lwa bu-butule, ne bakubulwa kanye kulekela bakwabo myanda, ne babepabepa bubela, ne bakubulwa kwifula, ne ba bukalabale bwa malwa, ne bampikwa kusanswa būmuntu. Ne banzazangi, ne ba lupata lubilubi, ne bakwitatula; bakusanswa byamazua pakatampe kudi Leza mpika; kwidingakanya bu-bwine Leza e ko kwabo, ino bukomo bwa bu-bwine Leza bafutulwile’bo; vundamina bene bano’ba badi namino.”​—2 Temote 3:1-5.

Padi ubamone biyampe binenwa ‘mafuku a kumfulo,’ mu binenwa bya bupolofeto bitelelwe kūlu’ku. Le bidi na buluji’ka kodi? Monka motwikivwaninanga pavule, kunena amba, ‘mafuku a ku mfulo’ kulombola amba kudi kintu kampanda kisa kufula. Lelo kikokeja kwikala kika? Tala bilaile Leza mu Kinenwa kyandi.

Babi bakafundulwa’ko lonso.

“Ke-kuntu kukidi bidi kitatyi kityetye, ne mubi ukēkala kutupu’ye; eyo i binebine, ukafwatakanya biyampe pantu pandi, ukēkalanga kutupu’ye. Nanshi bakikōkeji bakapyananga ntanda; kadi bakēsangaja mu bungi bwa ndoe.”​—MITŌTO 37:10, 11.

“Yehova ulelele boba bonso bamuswele; Ino babi bonso abo ukebonakanyanga.” ​—MITŌTO 145:20.

Kasusu kakekala kutupu’ko.

“Mwanda aye ukanyongolola mupando pa kwita; ne balanda ba kubulwa wakwibakwasha. Ukakūla muya wabo ku bongojani ne bikungulu bya bulobo; kadi mashi abo akēkalanga maleme mu meso andi.”​—MITŌTO 72:12, 14.

“Bipangwa abyo bīne bikakūlwanga ku bupika bwa kubola, nabyo ke byana bya bene bya ntumbo bwa bāna ba Leza.”​—LOMA 8:21.

Bantu bakekala na bisakibwa bya ku ngitu.

“Bakashikata, ense munshi mwa muñanza wandi, ense munshi mwa muñanza wandi, kadi ne ense munshi mwa mukuyu wandi, ense munshi mwa mukuyu wandi; nansha umo ukebalengejapo moyo.”​—MIKA 4:4.

“Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe; mwanda mwendele mafuku a mityi a monka mukekadila mafuku a mityi a monka mukekadila mafuku a bantu bami, ne batongwe bami bakalēpejeja biyampe mingilo ya makasa abo.”​—ISAYA 65:21, 22.

Boloke bukatāla.

“Ino Leza aye i namani, abulwe kukaketela nsambu ya bandi batonge, boba bamwitaita nyeke, dyuba ne bufuku . . . ? Nemunena’mba: Ukebaketelanga nsambu bukidi bukidi bonka.”​—LUKA 18:7, 8.

“Yehova uswele kutyiba-mambo ne kulekelela bapandulwemo bandi mpika; balelelwe nyeke.”​—MITŌTO 37:28.

Kwisakila kukapingakanibwa na boloke.

“Bekadi ba panopantanda balombolwa boloke.”​—ISAYA 26:9.

“Nanshi bātwe, monka mwendele mwanda-wamulao wandi, tutengele madiulu mapya, ne ntanda īngi mipya mo mwikalanga boloke.”​—2 PETELO 3:13.

 Bantu Bakishinta​—ne Pano Pene

Na bubine, batwe bonso tusangelanga ino milao. Ino i kika kitukulupija amba ikafikidilanga? Bine bukamoni bulombola amba milao ya Leza ikafikidila tudi nabo. Le abo bwine i bukamoni’ka? I bukamoni bwa amba midiyo ya bantu kujokoloka ntanda yonso dyalelo i benyongolole mu bilongwa bya kwisakila, busekese, bukalabale ne i befunde kwikala bambulwa budimbidimbi, ba ndoe, kadi bayampe. Dyalelo, kintu kya Batumoni ba Yehova midiyo isamba-ibidi, badi mu bu bana na bana bwa ntanda yonso i bakomene kwiketa kwa tubila, kwa misaka, kwa mizo, kwa politike, kwa myanda ya lupeto, bine bilengeje mu mānga ya muntu mushikwa, bukalabale ne kumwanga mashi. * Kushinta kwa uno muswelo kudi’ko dyalelo kwitupa bubinga bwa kukulupidila amba milao ya Leza ikafikidilanga ntanda yonso.

Ino i bika bilengeje kuno kushinta? Malondololo atanwa mu milao mikwabo isonekelwe na mupolofeto Isaya. Wāsonekele amba:

“Mpumpi ukekalanga ne kana-kamukōko pamo, ngé nandi ukalāla ne kana-kambuji pamo; kadi mwana-ñombe ne ntambo-mwana ne nyema munune bikekalanga pamo; ino kāna katyetye kakebyendejanga. . . . Kadi ntambo ukadyanga biyombo’nka bwa ñombe-mulume. Ebiyampe mwana wamwa ukazua pa kīna kya nyonka; penepo mwana-muleke ukatūla dikasa dyandi palāla mpela. Ino pano namino kebakasanshijapo, nansha kōna kwine, monsomonso mu lūlu lwami lwa bu-ujila; mwanda panopanshi pakayula ne kuyukidija kwa Leza’nka bwa mema ayuja kalunga-kamema.”​—Isaya 11:6-9.

Lelo buno bupolofeto bulaile’tu enka kitatyi kikekala banyema biyampe na bantu? Mhm, kudi bitabuke ne pano. Yuka amba kipindi kya mfulo kya kino kisonekwa  kilombola bine bilengeje kuno kushinta amba: ‘Panopanshi pakayula ne kuyukidija kwa Yehova.’ Lelo kuyukija kwa Leza kushintanga ngikadila ya banyema? Nansha dimo. Ino kukokeja ne kushintanga bantu! Buno bupolofeto bulaile amba boba badi na ngikadilo ya bunyema bakaleka’yo ne kutamija ngikadilo ya Kidishitu mwanda wa kwifunda kobefunda ne kulonda byobya bifundija Bible.

Tala kimfwa kya Pedro. * Wadi ulanga amba wadi ulwila boloke kitatyi kyaakatwelele mu kitango kya butumbula. Pa kupwa kufundijibwa, bamupa lupusa lwa kusala bitūlo bya bampulushi. Pādi ukiteakanya mwa kusadila’byo, bamukwata. Pedro walongele mu kifungo myeji 18, mwine mwaadi wendelela na bilongwa bya kyonakanya. Enka mu kitatyi’kya, mukaja Pedro washilula kwifunda Bible na Batumoni ba Yehova. Pedro pa kukutululwa, nandi washilula kwifunda Bible, ne byadi wifunda padi Yehova byamutonona ashinte bininge ngikadila ne muswelo wamona būmi. Pedro unena amba: “Nafwija’ko Yehova pa kwipaya ko nkyaipailepo muntu mu myaka yonadi mu butumbula. Pano ñingidijanga lupete lwa mushipiditu wa Leza, ke Bible kadi, mwanda wa kupa bantu musapu wa ndoe ya binebine kadi wa boloke​—yo myanda miyampe ya Bulopwe bwa Leza.” Pedro  waendele kukasapula musapu wa ndoe ne utala ntanda yambulwa bukalabale enka ne mu kitūlo kyadi ukanina kusala.

Bukomo bukatampe budi na Kinenwa kya Leza pa bantu bwitupa bubinga bwa kwikadila na lwitabijo mu mulao wa Leza wa amba mfulo ya bibi idi’ko bine. Bine bantu kebakendelelapo nyeke na kulonga bibi, ino bakalumbuluka. Panopano ponka Yehova usa kufundula Satana Dyabola, kalenga-byanzwe wa bibi, udi pamo bwa muntu ufyeme munyuma mwa kikailo wendeja myanda ya ntanda. Bible unena amba: “Panopantanda ponsololo pēne palēle mudi yewa umbi.” (1 Yoano 5:19) Ino panopano ponka usa konakanibwa. Boba bapela pelē kuleka mashinda abo mabi nabo basa konakanibwa. Bine kikekala kya nsangaji’po kashā kutanwa mu kino kitatyi kya madyese!

Lelo i bika bifwaninwe kulonga muntu pa kutanwa mu kino kitatyi kīya kumeso? Vuluka amba i ‘kuyukidija kwa Yehova’ kulengeja bantu bashinte dyalelo ne kusa kulengeja ntanda yonso ishinte panopano ponka. Shi wikale na buyuki wabinebine bwa Bible ne kwibwingidija ​—na mwalongele Pedro—​nobe ubwanya kutengela kwikala mu ntanda “mwikalanga boloke.” (2 Petelo 3:13) Nanshi tubakulombe ukwate makasa abidi mukenga ukupelwe wa kwifunda kuyuka Leza ne Yesu Kidishitu amba nobe umone būmi bwa nyeke ne nyeke.​—Yoano 17:3.

[Kunshi kwa dyani]

[Bushintuludi pa paje 9]

Nobe ubwanya kutengela kwikala mu ntanda “mwikalanga boloke.”​—2 PETELO 3:13