Mushipiditu Sandu Lelo I Bika?

YESU wāipangwile difuku dimo bana bandi ba bwanga amba: “Shi kudi bānwe mwana alombe mukate kudi shandi, amupe dibwe’ni, a? Kadi shi mwita ino amupe nyoka’mba ke mwita’ni? Ebiya pakwabo, shi alombe dī, kadi amupe kaminye?” (Luka 11:11, 12) Bana ba mu Ngadilea bādi basenswe kudya mai ne mwita; o mwanda bādi bayukile ne kyobasaka kudya.

Yesu wānene amba tufwaninwe kutakamana na kulomba mushipiditu sandu, pamo’nka bwa mwana wivwene nzala, ulomba bidibwa. (Luka 11:9, 13) Kwivwanija mwikadile mushipiditu sandu kwitukwasha tuyuke mvubu yao mu būmi bwetu. Nanshi dibajinji, tutalei bifundija Bible pa mushipiditu sandu.

“Bukomo bwa Wamūlumwine”

Bisonekwa bilombola patōka amba mushipiditu sandu i bukomo bwingidija Leza pa kulonga byasaka. Mwikeulu Ngabudyele pa kusapwila Madia amba usa kubutula mwana nansha byadi mujike, wāmunene amba: “Mushipiditu Sandu ukakwilako ne bukomo bwa Wamūlumwine-bukakuputa, ino kadi kyakubutulwa kikola kikatelwa ke Mwana Leza.” (Luka 1:35) Kukwatañana na binene Ngabudyele, mushipiditu sandu ukwatañene na “bukomo bwa Wamūlumwine.”

Uno mulangwe umweka kadi ne pakwabo mu Bible. Mupolofeto Mika wānene’mba: “Ami binebine ne muyule bukomokomo pa mushipiditu wa Yehova.” (Mika 3:8) Yesu wālaile bana ba bwanga amba: “Bānwe mukapebwa bukomo bwa Mushipiditu Sandu ukemwīla ko mudi.” (Bilongwa 1:8) Kadi mutumibwa Polo wēsambile pa “bukomo bwa Mushipiditu Sandu.”—Loma 15:13, 19.

Le tukanena bika pa bino byotwamona? Kudi kukwatañana pa bukata bwa mushipiditu sandu ne bukomo bwa Leza. Mushipiditu sandu i muswelo wingidija’mo Yehova bukomo bwandi. Mu kīpi, mushipiditu sandu i bukomo bwingidija Leza, nansha bukomo bwingila. Buno shabo e bo bukomo! Ketukokejapo kufwatakanya bukomo bulomba pa kupanga diulu ne ntanda. Yehova witulomba kupityila kudi mupolofeto Isaya, tulangulukile pa uno mwanda amba: “Tululai meso enu kūlu, mumone yewa wapangile bine bino’bi, yewa ulupula kibumbo kyabo pa mbadilo; wibeta bonso pa dijina pa dijina; pa bukatampe bwa bukomokomo bwandi, kabidi ne mwanda wa mu bukomokomo bwandi, nansha umo ubulwapo.”—Isaya 40:26.

Nanshi Bible ulombola amba diulu ne ntanda ne ndudi ne kukwatañana kwa byonso bidi’mo kudi’ko mwanda wa “bukatampe bwa bukomokomo,” bwa Leza Mwine bukomo bonso. I kimweke patōka amba, bukomo bwa Leza bwingila i bukatampe, kadi tudi’ko pa mwanda wa buno bukomo.—Tala  kapango kanena amba “Mushipiditu Sandu Wingila.”

Yehova ukokeja kwingidija mushipiditu sandu wandi mu ludingo lukatampe, bwa pa kupanga diulu ne ntanda. Ino kadi ubwanya ne kwibwingidija ku bantu. Bible utela divule dine bengidi ba Leza ba pano panshi bāpelwe bukomo kupityila ku bukomo bwingila bwa Leza.

“Mushipiditu wa Yehova Wangikadilako”

Mwingilo wa Yesu ulombola muswelo wa kutendelwa uleta mushipiditu sandu wa Leza bukomo ku bengidi bandi. Yesu wāsapwidile bantu ba mu Nazala amba: “Mushipiditu wa Yehova wangikadilako.” (Luka 4:18) Lelo Yesu wālongele bika “mu bukomo bwa Mushipiditu”? (Luka 4:14) Wābelwile  miswelo yonso ya misongo, wātalaja matanki a dijiba dikalabale, wādisha tununu ne tununu twa bantu na mikate ne twita twa lui tutyetye, kadi wāsangula ne bafwe. Mutumibwa Petelo wātelele Yesu bu “muntu mwitabijibwe na Leza . . . mu bikatampe bya bukomo ne mu bingelengele, ne mu biyūkeno byālongele Leza kudi aye.”—Bilongwa 2:22.

Mushipiditu sandu keukiloñangapo bingelengele bya uno muswelo. Inoko, ukokeja kwitulongela bintu bikatampe. Yehova upanga batōtyi bandi mushipiditu sandu na mutyima tō, monka mwākulupijije’kyo Yesu bana bandi ba bwanga. (Luka 11:13) O mwanda mutumibwa Polo wānene amba: “Ne mukomo wa kulonga bintu byonso mudi aye wakunkomeja.” (Fidipai 4:13) Le mushipiditu sandu ukokeja kukukwasha namino mu būmi bobe? Kishinte kilonda’ko kisa kulondolola kino kipangujo.

[Kapango/Kifwatulo pa paje 5]

Kinenenwa amba mushipiditu sandu ke muntupo

Bible udingakenye mushipiditu sandu na mema. Leza pa kulaila bantu bandi madyese a kumeso, wānene amba: “Nkapungulwila mema padi yewa udi ne kyumwa, ne tunonga pa nshi myumu; nkapungulula wami mushipiditu pa lukunwa lobe, ne dyese dyami pa boba batamba mobe.”—Isaya 44:3.

Pādi Leza upungulwila bengidi bandi mushipiditu wandi, bādi ‘bayulwa mushipiditu sandu’ ne ‘kuyula mushipiditu sandu.’ Yesu, Yoano Mubatyiji, Petelo, Polo, Banabasa, ne bana ba bwanga bābungakene mu difuku dya Pentekosa mu 33 K.K. bonso bano bāyudilwe ne kuyulwa na mushipiditu.—Luka 1:15; 4:1; Bilongwa 4:8; 9:17; 11:22, 24; 13:9.

Langa’po bidi: Le muntu ukokeja ‘kupungulwilwa’ mu bantu palapala? Le ubwanya kunena amba yao muntu i ‘muyule’ kisumpi kyonso kya bantu? Bine, kino kekidipo na buluji. Bible unenanga amba kudi bantu bāyudilwe tunangu, kwivwanija, ne buyuki bwa binebine, ino kashā kanenene amba kudi muntu muyulwe na muntu mukwabo.—Divilu 28:3; 1 Balopwe 7:14; Luka 2:40; Kolose 1:9.

Kishima kya Kingidiki kyalamwinwe bu “Mushipiditu” i pneuʹma, kidi na mulangwe wa bukomo bwakubulwa kumweka. Kukwatañana na Expository Dictionary of New Testament Words, dibuku dya Vine, kishima pneuʹma “kilombola dibajinji luvula . . . ne umpuya; ebiya, nakampata kilombola mushipiditu, keumwekangapo, keutengwapo, inoko wa bukomo monka mwikadile luvula.”

Kibamweka patōka amba mushipiditu sandu ke muntupo. *

[Kunshi kwa dyani]

[Kutambile Kifwatulo]

Photodisc/​SuperStock