Muswelo Okokeja Kwivwana Bible

1. Lomba Bukwashi Kudi Mwine Ulembeje’ye

Ninfa, wikalanga mu Itadi, usekununa’mba: “Kitatyi kimo, nadi nsenswe kutanga Bible kumeso kwa kulala. Nadi noñanga namino mwanda nadi ndyukile amba i Kinenwa kya Leza, nansha byo nkyadipo nsangelanga kutanga, nadi nsakanga kuyuka byobya bine bilembeje Leza mu Bible. Naboile mulangwe wa kutanga yense mutuntulu. Ku ngalwilo namwene amba byadi bipēla, ino kupwa natana bipindi bikomo, ne kuleka naleka’byo.”

LELO nobe wiivwananga pamo bwa Ninfa? Ye mwiivwaninanga bantu bavule. Ino, enka na motwekimwenanga mu kishinte kibadikile, Yehova Leza Mwine wālembeje Bible, usakanga wimvwanije Kinenwa kyandi. Penepa, i muswelo’ka okokeja kwivwanija’kyo? Ditabula dibajinji i kulomba bukwashi kudi Mwine wālembeje’kyo.

Bantu bādi bamona batumibwa bu bantu “bakubulwa kufundijibwa” mwanda kebafundilepo masomo a balabi a myanda ya Leza. (Bilongwa 4:13) Nansha nabya, Yesu wēbakulupije amba badi na dyese dya kwivwana Kinenwa kya Leza. Namani? Yesu wāshintulwile amba: “Nsenga-mukwashi, Mushipiditu Sandu, ukatuma Tata mu dijina dyami, aye ukemulombolanga byonsololo.” (Yoano 14:26) Leza wāingidije uno mushipiditu sandu, ke bukomo bwingila kadi, pa kupanga ntanda ne byonso byūmi bidi’po. (Ngalwilo 1:2) Kadi wēwingidije pa kusoñanya balembi 40 basoneke milangwe yandi mu Bible. (2 Petelo 1:20, 21) Uno mushipiditu umo onka udi’ko mwanda wa kukwasha bonso basaka kwivwanija Bible.

Le ukalonga bika pa kutambula mushipiditu sandu wa Leza? Ufwaninwe kulomba’o na lwitabijo. I amo, padi bikusakila kulomba ne kuzenza. Yesu wānene’mba: “Mwikale kulomba nankyo kikemupebwapo. . . . Lelo ino bānweko . . . muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?” (Luka 11:9, 13) Yehova ukapāna na mutyima tō mushipiditu sandu ku boba beulomba na mutyima wampikwa budimbidimbi. Buno bukomo bwingila bukokeja kukukwasha wivwanije buluji bwa binenwa bya mu Bible bilembelwe ku bukomo bwa mushipiditu pano ke padi myaka tununu na tununu. Kadi mushipiditu wa Leza ukokeja kukupa tunangu tukakukwasha ulonde musapu wa bukomo wa Bible mu bobe būmi.—Bahebelu 4:12; Yakoba 1:5, 6.

Kitatyi kyonso kyoshikata kutanga Bible, dibajinji, lombela Leza, mulombe mushipiditu sandu ukukwashe wivwane Kinenwa kyandi.